2 صَمُوِيل 21
21
الجوع القعد تلاتة سنة
1وَ فِي وَكِتْ حُكُمْ دَاوُدْ، بِقِي جُوعْ وَ الْجُوعْ دَا قَعَدْ تَلَاتَةْ سَنَةْ مُتَتَابِعِينْ. وَ دَاوُدْ سَأَلْ اللّٰهْ وَ اللّٰهْ رَدَّ لَيَّهْ وَ قَالْ: «الْجُوعْ دَا جَاءْ بِسَبَبْ الدِّمَمْ الشَّاوُولْ وَ عَايِلْتَهْ كَتَلَوْهُمْ. هُمَّنْ كَتَلَوْا مِنْ سُكَّانْ قِبْعُونْ.» 2وَ الْمَلِكْ نَادَاهُمْ لِسُكَّانْ قِبْعُونْ وَ حَجَّى لَيْهُمْ. وَ الْقِبْعُونِيِّينْ، هُمَّنْ مَا مِنْ بَنِي إِسْرَائِيلْ لَاكِنْ مِنْ الْأَمُورِيِّينْ الْفَضَّلَوْا فِي الْبَلَدْ. وَ زَمَانْ، بَنِي إِسْرَائِيلْ حَلَفَوْا لِلْقِبْعُونِيِّينْ وَ قَالَوْا مَا يَكْتُلُوهُمْ.#21:2 حَلَفَوْا لِلْقِبْعُونِيِّينْ وَ قَالَوْا مَا يَكْتُلُوهُمْ: التاريخ دا تلقوه في يَشُوع 9:3-15. وَ لَاكِنْ مِنْ شِدَّةْ حَمِيصْتَهْ لِبَنِي إِسْرَائِيلْ وَ بَنِي يَهُوذَا، شَاوُولْ دَوَّرْ يِدَمِّرْهُمْ.
3وَ دَاوُدْ قَالْ لِلْقِبْعُونِيِّينْ: «نِسَوِّي لَيْكُو شُنُو؟ وَ بِشُنُو نِرَضِّيكُو مِنْ الْفَسَالَةْ السَّوَّوْهَا لَيْكُو أَشَانْ تِبَارُكُوا شَعَبْ اللّٰهْ الْمِثِلْ وَرَثَتَهْ؟» 4وَ الْقِبْعُونِيِّينْ قَالَوْا لِلْمَلِكْ: «مُشْكِلِتْنَا مَعَ شَاوُولْ وَ عَايِلْتَهْ مَا تِنْحَلَّ وَ لَا بِقُرُسْ وَ لَا بِدَهَبْ وَ لَا بِكَتِلْ نَادُمْ فِي بَنِي إِسْرَائِيلْ.» وَ الْمَلِكْ قَالْ لَيْهُمْ: «أَيِّ شَيّءْ التِّدَوْرُوهْ، أَنَا نِسَوِّي لَيْكُو.» 5وَ هُمَّنْ قَالَوْا لِلْمَلِكْ: «شَاوُولْ دَوَّرْ يِدَمِّرْنَا وَ يِوَدِّرْنَا مَرَّةْ وَاحِدْ مِنْ بَلَدْ إِسْرَائِيلْ. 6وَ بَيْدَا، خَلِّي يِسَلُّمُوا لَيْنَا سَبْعَةْ رُجَالْ مِنْ عِيَالَهْ وَ أَنِحْنَ نَشُنْقُوهُمْ قِدَّامْ اللّٰهْ فِي قِبَيْعَةْ حِلَّةْ شَاوُولْ هُو الْاللّٰهْ عَزَلَهْ.» وَ الْمَلِكْ قَالْ لَيْهُمْ: «نِسَلِّمْهُمْ لَيْكُو.» 7وَ لَاكِنْ الْمَلِكْ حَنَّ فِي مَفِيبُشَتْ وِلَيْد يُونَتَانْ وِلَيْد شَاوُولْ أَشَانْ الْحَلِيفَةْ السَّوَّاهَا دَاوُدْ وَ يُونَتَانْ#21:7 أَشَانْ الْحَلِيفَةْ السَّوَّاهَا دَاوُدْ وَ يُونَتَانْ: التاريخ دا تلقوه في 1 صَمُوِيل 20:14-17. قِدَّامْ اللّٰهْ.
8وَ خَلَاصْ، الْمَلِكْ شَالْ أَرْمُونِي وَ مَفِيبُشَتْ عِيَالْ رِصْفَةْ الْوِلْدَتْهُمْ لِشَاوُولْ. وَ رِصْفَةْ دِي هِي بِنَيَّةْ أَيَّا. وَ شَالْ بَتَّانْ الْعِيَالْ الْخَمْسَةْ هَنَا مِيرَبْ#21:8 مِيرَبْ: في العِبْرَانِي بُقول العيال دَوْل هنا مِكَال و لاكن هي عاقْرة. شيفوا في فصُل 6 آية 23. و عُلماء واحِدين يفكُّروا عيال مِيرَب حسبوهم مِثِل عيال أخُتها مِكَال. بِنَيَّةْ شَاوُولْ الْوِلْدَتْهُمْ لِعَدْرِيِيلْ وِلَيْد بَرْزِلَّايْ الْمِنْ حِلَّةْ مَحُولَى. 9وَ الْمَلِكْ سَلَّمَاهُمْ لِلْقِبْعُونِيِّينْ. وَ خَلَاصْ، الْقِبْعُونِيِّينْ شَنَقَوْهُمْ فِي رَاسْ الْحَجَرْ قِدَّامْ اللّٰهْ. وَ هُمَّنْ السَّبْعَةْ دَوْل، كُلُّهُمْ مَاتَوْا سَوَا. وَ مَوْتهُمْ دَا بِقِي فِي بِدَايَةْ الْقَطِعْ هَنَا الْقَمَحْ الْأَبْيَضْ.
10وَ رِصْفَةْ بِنَيَّةْ أَيَّا شَالَتْ شُوَالْ وَ فَرَشَتَهْ فِي رَاسْ الْحَجَرْ وَ قَعَدَتْ هِنَاكْ مِنْ بِدَايَةْ قَطِعْ الْقَمَحْ الْأَبْيَضْ لَحَدِّي أَلْمِي الْخَرِيفْ صَبَّ فِي الْجَنَازَاتْ دَوْل. وَ بِنَهَارْ، هِي تَدْحَرْ الصُّقُورَةْ مَا يَنْزُلُوا فَوْقهُمْ وَ بِلَيْل، تَدْحَرْ مِنْهُمْ حَيْوَانَاتْ الْكَدَادَةْ. 11وَ خَبَّرَوْه لِدَاوُدْ بِالشَّيّءْ السَّوَّتَهْ رِصْفَةْ بِنَيَّةْ أَيَّا سِرِّيَةْ شَاوُولْ.
12وَ دَاوُدْ قَمَّ مَشَى شَالْ عُضَامْ شَاوُولْ وَ يُونَتَانْ وِلَيْدَهْ مِنْ سُكَّانْ حِلَّةْ يَابِيشْ فِي تُرَابْ قِلْعَادْ. أَشَانْ وَكِتْ الْفِلِسْطِيِّينْ هَجَمَوْا شَاوُولْ وَ عَسْكَرَهْ فِي جَبَلْ قِلْبُوعَةْ، هُمَّنْ كَتَلَوْهُمْ وَ عَلَّقَوْا جَنَازَاتْهُمْ فِي نَقَعَةْ حِلَّةْ بَيْت شَانْ. وَ سُكَّانْ يَابِيشْ شَالَوْهُمْ.#21:12 سُكَّانْ يَابِيشْ شَالَوْهُمْ: التاريخ دا تلقوه في 1 صَمُوِيل 31:8-13. 13وَ دَاوُدْ وَدَّى مَعَايَهْ عُضَامْ شَاوُولْ وَ يُونَتَانْ. وَ نَاسَهْ كُلَ خَمَّوْا عُضَامْ الرُّجَالْ السَّبْعَةْ الشَّنَقَوْهُمْ. 14وَ دَفَنَوْا عُضَامْ شَاوُولْ وَ يُونَتَانْ وَ الرُّجَالْ السَّبْعَةْ دَوْل فِي بَلَدْ بَنْيَامِينْ فِي حِلَّةْ صِيلَعْ فِي قَبُرْ قِيشْ أَبُو شَاوُولْ. وَ النَّاسْ سَوَّوْا كُلَّ شَيّءْ الْمَلِكْ أَمَرَاهُمْ بَيَّهْ. وَ بَعَدْ دَا، الرَّبّ رَحَمْ الْبَلَدْ دِي.
مَوْت هنا رجال من ذُرّية رَافَا
15وَ كَانْ حَرِبْ أَمْبَيْن الْفِلِسْطِيِّينْ وَ بَنِي إِسْرَائِيلْ. وَ دَاوُدْ وَ نَاسَهْ مَشَوْا حَارَبَوْهُمْ لِلْفِلِسْطِيِّينْ وَ دَاوُدْ بِقِي عَيَّانْ. 16وَ يِشْبِـي بِنُوبْ وَاحِدْ مِنْ ذُرِّيَّةْ رَافَا شَالْ نِيَّةْ أَشَانْ يَكْتُلْ الْمَلِكْ دَاوُدْ. وَ حَرِبْتَهْ هِنْت نَحَاسْ تَوْزِنْ تَلَاتَةْ كِيلَوْ وَ رَابِطْ فِي صُلْبَهْ سَيْف جَدِيدْ. 17وَ لَاكِنْ أَبِشَايْ وِلَيْدهَا لِصَرُويَةْ جَاءْ فَزَعْ لِدَاوُدْ وَ ضَرَبْ الْفِلِسْطِي وَ كَتَلَهْ. وَ فِي الْبَكَانْ دَا، عَسْكَرْ دَاوُدْ حَلَفَوْا وَ قَالَوْا لَيَّهْ: «بَتَّانْ إِنْتَ مَا تَمْرُقْ مَعَانَا فِي الْحَرِبْ. أَشَانْ إِنْتَ نُورْ بَنِي إِسْرَائِيلْ مَا تُمُوتْ.»
18وَ بَعَدْ دَا، قَمَّ بَتَّانْ حَرِبْ مَعَ الْفِلِسْطِيِّينْ فِي قُوبْ. وَ فِي الْبَكَانْ دَا، سِبَّكَايْ مِنْ حِلَّةْ حُوشَى كَتَلْ سَافْ مِنْ ذُرِّيَّةْ رَافَا.
19وَ بَتَّانْ الْحَرِبْ بَدَا مَعَ الْفِلِسْطِيِّينْ فِي قُوبْ. وَ أَلِحَنَانْ وِلَيْد يَعْرِي مِنْ بَيْت لَحَمْ كَتَلْ جَالُوتْ مِنْ حِلَّةْ قَاتْ. وَ جَالُوتْ دَا، عُودْ حَرِبْتَهْ تَخِينْ مِثِلْ مُرْدَاسْ اللِّقْدَابَةْ.
20وَ بَتَّانْ كُلَ الْحَرِبْ بَدَا فِي حِلَّةْ قَاتْ. وَ فِيَّهْ رَاجِلْ وَاحِدْ طَوِيلْ وَ أَصَابِعْ رِجِلَيْنَهْ وَ إِيدَيْنَهْ سِتَّةْ سِتَّةْ وَ كُلُّهُمْ كَيْ عَدَدْهُمْ 24. وَ هُو كُلَ مِنْ ذُرِّيَّةْ رَافَا. 21وَ الرَّاجِلْ دَا عَيَّرْ بَنِي إِسْرَائِيلْ. وَ خَلَاصْ، يُونَتَانْ وِلَيْد شِمْعَى أَخُو دَاوُدْ كَتَلَهْ.
22وَ كُلَّ الرُّجَالْ الْأَرْبَعَةْ دَوْل، هُمَّنْ مِنْ ذُرِّيَّةْ رَافَا مِنْ حِلَّةْ قَاتْ. وَ هُمَّنْ مَاتَوْا بِإِيدْ دَاوُدْ وَ نَاسَهْ.
Currently Selected:
2 صَمُوِيل 21: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
