1 مُلوك 8
8
صنْدوق المُعاهدة في بيت اللّه
1وَ بَعَدْ دَا، الْمَلِكْ سُلَيْمَانْ نَادَى كُلَّ شُيُوخْ بَنِي إِسْرَائِيلْ وَ كُلَّ كُبَارَاتْ الْقَبَايِلْ وَ كُبَارَاتْ الْعَايِلَاتْ هَنَا بَنِي إِسْرَائِيلْ يِلِمُّوا فِي أُورُشَلِيمْ. وَ دَا أَشَانْ يِشِيلُوا صَنْدُوقْ مُعَاهَدَةْ اللّٰهْ مِنْ مَدِينَةْ دَاوُدْ السَّمَّوْهَا صَهْيُون وَ يِوَدُّوهْ بَيْت اللّٰهْ. 2وَ كُلَّ رُجَالْ بَنِي إِسْرَائِيلْ لَمَّوْا وَرَاءْ الْمَلِكْ سُلَيْمَانْ فِي الشَّهَرْ السَّابِعْ الْأُسْمَهْ إِتَانِيمْ وَ دَا فِي وَكْت الْعِيدْ.
3وَكِتْ كُلَّ شُيُوخْ بَنِي إِسْرَائِيلْ جَوْا، رُجَالْ الدِّينْ شَالَوْا الصَّنْدُوقْ. 4وَ رُجَالْ الدِّينْ وَ اللَّاوِيِّينْ شَالَوْا صَنْدُوقْ اللّٰهْ وَ خَيْمَةْ الْإِجْتِمَاعْ وَ كُلَّ الْمُعِدَّاتْ الْمُخَصَّصِينْ الْفِي لُبّ الْخَيْمَةْ. 5وَ الْمَلِكْ سُلَيْمَانْ وَ كُلَّ جَمَاعَةْ بَنِي إِسْرَائِيلْ لَمَّوْا وَ وَقَفَوْا قِدَّامْ الصَّنْدُوقْ. وَ قَدَّمَوْا ضَحَايَا هَنَا غَنَمْ وَ بَقَرْ كَتِيرْ مَرَّةْ وَاحِدْ لَحَدِّي نَادُمْ مَا يَقْدَرْ يَحْسِبْهُمْ وَ لَا يَلْقَى عَدَدْهُمْ.
6وَ بَعَدْ دَا، رُجَالْ الدِّينْ جَابَوْا صَنْدُوقْ مُعَاهَدَةْ اللّٰهْ وَ دَخَّلَوْه فِي لُبّ بَيْت اللّٰهْ فِي الْبَكَانْ الْخَصَّصَوْه لَيَّهْ فِي الْبَكَانْ الْمُقَدَّسْ مَرَّةْ وَاحِدْ تِحِتْ جَنَاحَيْ هَنَا الْمَخْلُوقِينْ السَّمَاوِيِّينْ. 7وَ الْمَخْلُوقِينْ السَّمَاوِيِّينْ دَوْل مُمَطِّطِينْ جَنَاحَيْهُمْ بِفَوْق لِلْبَكَانْ الْقَاعِدْ فَوْقَهْ الصَّنْدُوقْ. وَ بِمِثِلْ دَا، يِغَطُّوا الصَّنْدُوقْ وَ الْعِيدَانْ الْيِشِيلُوهْ بَيْهُمْ. 8وَ الْعِيدَانْ الْيِشِيلُوهْ بَيْهُمْ طُوَالْ. وَ خَشُمْ الْعِيدَانْ دَوْل يِنْشَافْ لِلنَّادُمْ الْقَاعِدْ أَمْبَيْن الصَّنْدُوقْ وَ الْمَدَخَلْ هَنَا الْبَكَانْ الْمُقَدَّسْ مَرَّةْ وَاحِدْ وَ لَاكِنْ نَادُمْ مِنْ بَرَّا مَا يِشِيفَهْ. وَ كُلَّ الْأَشْيَاءْ دَوْل قَاعِدِينْ لَحَدِّي الْيَوْم. 9وَ الصَّنْدُوقْ دَا مَا عِنْدَهْ شَيّءْ دَاخَلْ إِلَّا اللِّيحَانْ الْإِتْنَيْن هَنَا الْحَجَرْ الْمُوسَى خَطَّاهُمْ فِي لُبَّهْ وَكِتْ هُو قَاعِدْ فِي جَبَلْ حُورِيبْ. وَ دَا، وَكِتْ اللّٰهْ سَوَّى مُعَاهَدَةْ مَعَ بَنِي إِسْرَائِيلْ بَعَدْ مَرِقِينْهُمْ مِنْ بَلَدْ مَصِرْ.
10وَ وَكِتْ رُجَالْ الدِّينْ مَرَقَوْا مِنْ الْبَكَانْ الْمُقَدَّسْ دَا، سَحَابَايْ جَاتْ سَدَّتْ بَيْت اللّٰهْ. 11وَ رُجَالْ الدِّينْ مَا قِدْرَوْا يِسَوُّوا خِدْمِتْهُمْ بِسَبَبْ السَّحَابَايْ دِي أَشَانْ مَجْد اللّٰهْ مَلَا بَيْت اللّٰهْ. 12وَ خَلَاصْ، سُلَيْمَانْ قَالْ: «يَا اللّٰهْ! إِنْتَ قُلْت تَسْكُنْ فِي الضَّلَامْ. 13وَ دَاهُو أَنَا بَنَيْت لَيْك بَيْت عَظِيمْ التَّسْكُنْ فَوْقَهْ. وَ دَا الْبَكَانْ الْإِنْتَ تَسْكُنْ فَوْقَهْ إِلَى الْأَبَدْ.»
سُلَيْمَان شكر اللّه
14وَ بَعَدْ دَا، الْمَلِكْ وَجَّهْ لِكُلَّ جَمَاعَةْ بَنِي إِسْرَائِيلْ الْوَاقْفِينْ فَوْق وَ بَارَكَاهُمْ. 15وَ قَالْ: «بَارَكْ اللّٰهْ إِلٰـهْ بَنِي إِسْرَائِيلْ الْحَجَّى لِأَبُويِ دَاوُدْ. أَيْوَى، بِإِيدَهْ هُو حَقَّقْ كُلَّ الْكَلَامْ الْقَالَهْ لَيَّهْ. هُو قَالْ: 16‹مِنْ يَوْم الْأَنَا مَرَقْت شَعَبِي بَنِي إِسْرَائِيلْ مِنْ بَلَدْ مَصِرْ، أَنَا مَا عَزَلْت حِلَّةْ وَاحِدَةْ مِنْ كُلَّ حِلَّالْ قَبَايِلْ بَنِي إِسْرَائِيلْ لِيَبْنُوا بَيْت النُّخُطّ فَوْقَهْ أُسْمِي. وَ لَاكِنْ أَنَا عَزَلْت دَاوُدْ لِيَحْكِمْ فِي شَعَبِي بَنِي إِسْرَائِيلْ.›»
17وَ سُلَيْمَانْ قَالْ بَتَّانْ: «دَاوُدْ أَبُويِ عِنْدَهْ نِيَّةْ لِيَبْنِي بَيْت لِلّٰهْ إِلٰـهْ بَنِي إِسْرَائِيلْ. 18وَ لَاكِنْ اللّٰهْ قَالْ لِأَبُويِ دَاوُدْ: ‹إِنْتَ شِلْت نِيَّةْ لِتَبْنِي بَيْت لِأُسْمِي وَ نِيّتَكْ دِي عَدِيلَةْ. 19وَ دَا مَا إِنْتَ التَّبْنِي لَيِّ الْبَيْت دَا لَاكِنْ وِلَيْدَكْ الْمَرَقْ مِنْ صُلْبَكْ، هُو بَسْ يَبْنِي الْبَيْت دَا لِأُسْمِي.›
20«وَ هَسَّعْ، اللّٰهْ حَقَّقْ كَلَامَهْ الْقَالَهْ. أَنَا بَدَّلْت أَبُويِ دَاوُدْ وَ قَعَدْت فِي كُرْسِي الْمُلُكْ فِي بَنِي إِسْرَائِيلْ مِثِلْ اللّٰهْ قَالَهْ. وَ دَاهُو أَنَا بَنَيْت بَيْت لِلّٰهْ إِلٰـهْ بَنِي إِسْرَائِيلْ. 21وَ عَدَّلْت بَكَانْ لِلصَّنْدُوقْ الْعِنْدَهْ اللِّيحَانْ الْفَوْقهُمْ الْمُعَاهَدَةْ السَّوَّاهَا اللّٰهْ مَعَ جُدُودْنَا وَكِتْ هُو مَرَقَاهُمْ مِنْ بَلَدْ مَصِرْ.»
سُلَيْمَان سأل اللّه للشعب
22وَ سُلَيْمَانْ وَقَفْ قِدَّامْ مَدْبَحْ اللّٰهْ وَ قَابَلْ كُلَّ جَمَاعَةْ بَنِي إِسْرَائِيلْ. وَ رَفَعْ إِيدَيْنَهْ عَلَيْ السَّمَاءْ 23وَ قَالْ: «يَا اللّٰهْ إِلٰـهْ بَنِي إِسْرَائِيلْ، مَا فِي إِلٰـهْ مِثْلَكْ إِنْتَ وَ لَا فَوْق فِي السَّمَاءْ وَ لَا تِحِتْ فِي الْأَرْض. إِنْتَ تَحْفَضْ مُعَاهَدَتَكْ وَ خَيْرَكْ لِخَدَّامِينَكْ الْيِتَابُعُوكْ بِكُلَّ قُلُوبْهُمْ. 24وَ الْيَوْم، إِنْتَ حَفَضْت لِعَبْدَكْ دَاوُدْ أَبُويِ مُعَاهَدَتَكْ وَ بِإِيدَكْ، إِنْتَ حَقَّقْت كُلَّ كَلَامَكْ الْقُلْتَهْ لَيَّهْ.
25«وَ هَسَّعْ، يَا اللّٰهْ إِلٰـهْ بَنِي إِسْرَائِيلْ، أَحْفَضْ مُعَاهَدَتَكْ السَّوَّيْتهَا مَعَ عَبْدَكْ دَاوُدْ أَبُويِ وَكِتْ قُلْت لَيَّهْ: ‹دَايْماً يُكُونْ نَادُمْ مِنْ ذُرِّيّتَكْ قِدَّامِي فِي كُرْسِي الْمُلُكْ هَنَا بَنِي إِسْرَائِيلْ. وَ دَا إِلَّا كَنْ ذُرِّيّتَكْ تُكُونُوا مَعَايِ وَ تِتَابِعْ دَرْبِي مِثِلْ إِنْتَ ذَاتَكْ تَابَعْتَهْ.› 26وَ هَسَّعْ، يَا اللّٰهْ إِلٰـهْ بَنِي إِسْرَائِيلْ، مِنْ فَضْلَكْ خَلِّي كَلَامَكْ دَا يِلْحَقَّقْ مِثِلْ إِنْتَ قُلْتَهْ لِعَبْدَكْ دَاوُدْ أَبُويِ.
27«وَ هَلْ صَحِيحْ كَيْ الرَّبّ يَسْكُنْ فِي الْأَرْض وَلَّا؟ السَّمَاءْ وَ كُلَّ السَّمَاوَاتْ الْوَسِيعِينْ دَوْل مَا يَقْدَرَوْا يِشِيلُوكْ، يَا اللّٰهْ. وَ كِكَّيْف الْبَيْت الصَّغَيَّرْ الْأَنَا بَنَيْتَهْ يِشِيلَكْ؟ 28يَا اللّٰهْ إِلٰـهِي، أَقْبَلْ صَلَاتِي وَ دُعَايِ أَنَا عَبْدَكْ. أَسْمَعْ الْمُنَادَاةْ وَ الصَّلَاةْ النِّوَجِّهُّمْ لَيْك أَنَا عَبْدَكْ الْيَوْم. 29وَ فَكِّرْ فِي الْبَيْت دَا لَيْل وَ نَهَارْ أَشَانْ دَا الْبَكَانْ الْإِنْتَ قُلْت: ‹دَا بَسْ الْبَكَانْ النُّخُطّ فَوْقَهْ أُسْمِي.› أَسْمَعْ صَلَاتِي أَنَا عَبْدَكْ النِّوَجِّهَّا عَلَيْ الْبَكَانْ دَا. 30يَا اللّٰهْ، أَسْمَعْ دُعَايِ أَنَا عَبْدَكْ وَ دُعَا شَعَبَكْ بَنِي إِسْرَائِيلْ وَكِتْ يِصَلُّوا عَلَيْ الْبَكَانْ دَا. وَ مِنْ السَّمَاءْ، الْبَكَانْ الْإِنْتَ سَاكِنْ فَوْقَهْ، أَسْمَعْنَا وَ أَغْفِرْ لَيْنَا ذُنُوبْنَا.
31«وَ كَنْ يُلُومُوا نَادُمْ وَ يُقُولُوا هُو سَوَّى خَطَا ضِدّ نَادُمْ آخَرْ وَ يَجْبُرُوهْ لِيَحْلِفْ بِحَلِيفَةْ التِّجِيبْ فَوْقَهْ اللَّعَنَةْ، خَلِّي النَّادُمْ دَا يَجِي يَحْلِفْ قِدَّامْ مَدْبَحَكْ الْقَاعِدْ فِي لُبّ الْبَيْت دَا. 32وَ خَلَاصْ مِنْ السَّمَاءْ، أَسْمَعْ وَ أَحْكِمْ أَمْبَيْن عَبِيدَكْ. عَاقِبْ الْفَسِلْ وَ قَبِّلْ لَيَّهْ فَسَالْتَهْ فِي رَاسَهْ. وَ بَرِّي الصَّالِحْ وَ أَحْكِمْ لَيَّهْ حَسَبْ عَدَالْتَهْ.
33«وَ أَكُونْ الْعَدُو يِنَّصِرْ فِي شَعَبَكْ بَنِي إِسْرَائِيلْ بِسَبَبْ هُمَّنْ أَذْنَبَوْا ضِدَّكْ. وَ كَنْ هُمَّنْ يِعْتَرُفُوا بِذُنُوبْهُمْ وَ يِمَجُّدُوا أُسْمَكْ وَ يِوَجُّهُوا لَيْك صَلَاوَاتْهُمْ وَ يَشْحَدَوْك فِي لُبّ الْبَيْت دَا، 34خَلَاصْ مِنْ السَّمَاءْ أَسْمَعْ وَ أَغْفِرْ لِشَعَبَكْ بَنِي إِسْرَائِيلْ ذُنُوبْهُمْ وَ قَبِّلْهُمْ فِي الْأَرْض الْإِنْتَ أَنْطَيْتهَا لِجُدُودْهُمْ.
35«وَ أَكُونْ السَّمَاءْ يِنْسَدَّ وَ الْمَطَرْ يَبْقَى مَا فِيهْ أَشَانْ شَعَبَكْ أَذْنَبَوْا ضِدَّكْ. وَ كَنْ هُمَّنْ يِوَجُّهُوا لَيْك عَلَيْ الْبَكَانْ دَا لِيِصَلُّوا وَ يِمَجُّدُوا أُسْمَكْ وَ يِعْتَرُفُوا بِذُنُوبْهُمْ أَشَانْ إِنْتَ تَعَّبْتُهُمْ، 36خَلَاصْ مِنْ السَّمَاءْ أَسْمَعْهُمْ وَ أَغْفِرْ لِعَبِيدَكْ وَ لِشَعَبَكْ بَنِي إِسْرَائِيلْ ذُنُوبْهُمْ. وَ وَصِّفْ لَيْهُمْ الدَّرِبْ الْعَدِيلْ الْوَاجِبْ يِشِيلُوهْ. وَ نَزِّلْ لَيْهُمْ مَطَرْ فِي الْأَرْض الْإِنْتَ أَنْطَيْتهَا وَرَثَةْ لِشَعَبَكْ.
37«وَ أَكُونْ جُوعْ وَلَّا وَبَاءْ يَجِي فِي الْبَلَدْ دِي وَ الزِّرَاعَةْ يَيْبَسَوْا وَ التَّيْرَابْ يِعَفِّنْ وَ سَارْ اللَّيْل وَ الْجَرَادْ يَجُوا بِكَتَرَةْ. وَ الْعَدُو يَجِي يِحَاصِرْ الْمُدُنْ الْقَوِيِّينْ هَنَا شَعَبَكْ حَتَّى كَانْ فَوْقهُمْ وَبَاءْ أَوْ أَمْرَاضْ كُلَ. 38وَ كَنْ كُلَّ شَعَبَكْ بَنِي إِسْرَائِيلْ عِرْفَوْا كَدَرْ الْوَبَاءْ دَا جَايِ مِنْهُمْ هُمَّنْ ذَاتْهُمْ، هُمَّنْ يَشْحَدَوْك وَ يِوَجُّهُوا عَلَيْ بَيْتَكْ وَ يَرْفَعَوْا إِيدَيْهُمْ عَلَيْك لِيَسْأَلَوْك، 39خَلَاصْ مِنْ السَّمَاءْ، الْبَكَانْ الْإِنْتَ سَاكِنْ فَوْقَهْ، أَسْمَعْ وَ أَغْفِرْ لَيْهُمْ ذُنُوبْهُمْ وَ أَحْكِمْ وَ سَوِّي فَوْق أَيِّ وَاحِدْ حَسَبْ عَمَلَهْ أَشَانْ إِنْتَ تَعَرِفْ قَلْبَهْ. وَ إِنْتَ بَسْ التَّعَرِفْ قَلِبْ هَنَا أَيِّ نَادُمْ. 40وَ بِمِثِلْ دَا، بَنِي إِسْرَائِيلْ يَخَافَوْا مِنَّكْ فِي كُلَّ مُدَّةْ حَيَاتْهُمْ الْيِعِيشُوهَا فِي الْأَرْض الْإِنْتَ أَنْطَيْتهَا لِجُدُودْنَا.
41«وَ أَكُونْ أَجْنَبِي الْمَا مِنْ شَعَبَكْ بَنِي إِسْرَائِيلْ يَجِي مِنْ بَلَدْ بَعِيدَةْ فِي شَانْ أُسْمَكْ 42أَشَانْ سِمِعْ يِحَجُّوا بِأُسْمَكْ الْمَجِيدْ وَ قُدُرْتَكْ الْعَظِيمَةْ وَ إِيدَكْ الْمَمْدُودَةْ. وَ كَنْ الْأَجْنَبِي دَا يَجِي يِقَدِّمْ صَلَاوَاتَهْ عَلَيْ الْبَيْت دَا، 43خَلَاصْ مِنْ السَّمَاءْ، الْبَكَانْ الْإِنْتَ سَاكِنْ فَوْقَهْ، أَسْمَعْ وَ أَقْبَلْ كُلَّ شَيّءْ الْيَطُلْبَهْ مِنَّكْ الْأَجْنَبِي. وَ بَيْدَا، كُلَّ شُعُوبْ الْأَرْض يِعْتَرُفُوا بِأُسْمَكْ وَ يَخَافَوْا مِنَّكْ مِثِلْ شَعَبَكْ بَنِي إِسْرَائِيلْ. وَ يَعَرْفُوا كَدَرْ أُسْمَكْ يِنَادُوهْ فِي الْبَيْت الْأَنَا بَنَيْتَهْ لَيْك دَا.
44«وَ أَكُونْ شَعَبَكْ يَمُرْقُوا يَمْشُوا يِحَارُبُوا عُدْوَانْهُمْ بِالدَّرِبْ الْإِنْتَ تِرَسِّلْهُمْ فَوْقَهْ. وَ كَنْ هُمَّنْ يِصَلُّوا لَيْك إِنْتَ اللّٰهْ وَ يِوَجُّهُوا عَلَيْ الْمَدِينَةْ الْإِنْتَ عَزَلْتَهَا وَ عَلَيْ الْبَيْت الْأَنَا بَنَيْتَهْ لِأُسْمَكْ، 45خَلَاصْ مِنْ السَّمَاءْ أَسْمَعْ صَلَاوَاتْهُمْ وَ دُعَاهُمْ الْيِوَجُّهُوهُمْ لَيْك وَ دَافِعْ لِحُقُوقْهُمْ.
46«وَ أَكُونْ بَنِي إِسْرَائِيلْ يَذْنُبُوا ضِدَّكْ، أَشَانْ مَا فِي نَادُمْ الْمَا يِسَوِّي ذَنِبْ، وَ إِنْتَ تَغْضَبْ لَيْهُمْ وَ تِسَلِّمْهُمْ لِعُدْوَانْهُمْ وَ هُمَّنْ يَكُرْبُوهُمْ مَسَاجِينْ حَرِبْ وَ يِوَدُّوهُمْ فِي بَلَدْ بَعِيدَةْ أَوْ قَرِيبَةْ. 47وَ أَكُونْ مِنْ بَلَدْ الْعَدُو، الْبَكَانْ الْهُمَّنْ قَاعِدِينْ فَوْقَهْ مَسَاجِينْ، يُتُوبُوا مِنْ ذُنُوبْهُمْ وَ يَشْحَدَوْك وَ يُقُولُوا: ‹أَنِحْنَ أَذْنَبْنَا وَ سَوَّيْنَا خَطَا وَ فَسَالَةْ.› 48وَ كَنْ يِعْتَرُفُوا بِذُنُوبْهُمْ بِكُلَّ قُلُوبْهُمْ وَ بِكُلَّ فِكِرْهُمْ مِنْ بَلَدْ عُدْوَانْهُمْ، الْبَلَدْ الْوَدَّوْهُمْ فَوْقهَا مَسَاجِينْ، وَ كَنْ هُمَّنْ يِصَلُّوا لَيْك وَ يِوَجُّهُوا عَلَيْ بَلَدْهُمْ الْإِنْتَ أَنْطَيْتهَا لِجُدُودْهُمْ وَ عَلَيْ الْمَدِينَةْ الْإِنْتَ عَزَلْتَهَا وَ عَلَيْ الْبَيْت الْأَنَا بَنَيْتَهْ لِأُسْمَكْ، 49خَلَاصْ مِنْ السَّمَاءْ، الْبَكَانْ الْإِنْتَ سَاكِنْ فَوْقَهْ، أَسْمَعْ صَلَاوَاتْهُمْ وَ دُعَاهُمْ وَ دَافِعْ لِحُقُوقْهُمْ. 50أَغْفِرْ لِشَعَبَكْ الْأَذْنَبَوْا ضِدَّكْ وَ عِصَوْك. وَ خَلِّي يَلْقَوْا رَحْمَةْ مِنْ النَّاسْ الْكَرَبَوْهُمْ وَ وَدَّوْهُمْ مَسَاجِينْ وَ يِحِنُّوا فَوْقهُمْ 51أَشَانْ بَنِي إِسْرَائِيلْ هُمَّنْ شَعَبَكْ الْمِثِلْ وَرَثَتَكْ مِنْ إِنْتَ مَرَقْتُهُمْ مِنْ بَلَدْ مَصِرْ الْمِثِلْ جَهَنَّمْ التَّقْطَعْ الْحَدِيدْ. 52وَ أَسْمَعْ دَايْماً دُعَا هَنَايِ أَنَا عَبْدَكْ وَ هَنَا شَعَبَكْ بَنِي إِسْرَائِيلْ. أَسْمَعْنَا فِي أَيِّ وَكِتْ النَّشْحَدَوْك. 53يَا اللّٰهْ رَبِّنَا، إِنْتَ بَسْ عَزَلْتِنَا مِنْ أُسُطْ كُلَّ شُعُوبْ الْأَرْض لِنَبْقَوْا وَرَثَتَكْ. وَ دَا مِثِلْ إِنْتَ قُلْتَهْ بِوَاسِطَةْ عَبْدَكْ مُوسَى وَكِتْ مَرَقْت جُدُودْنَا مِنْ بَلَدْ مَصِرْ.»
سُلَيْمَان طلب البركة للشعب
54وَ وَكِتْ سُلَيْمَانْ قَاعِدْ يِصَلِّي وَ يَشْحَدْ اللّٰهْ، كَمَّلْ كُلَّ صَلَاتَهْ وَ دُعَايَهْ دَا لِلّٰهْ، هُو بَرَكْ قِدَّامْ مَدْبَحْ اللّٰهْ وَ رَفَعْ إِيدَيْنَهْ عَلَيْ السَّمَاءْ. وَ وَكِتْ كَمَّلْ صَلَاتَهْ قَمَّ 55وَ وَقَفْ بِطُولَهْ وَ بَارَكْ كُلَّ جَمَاعَةْ بَنِي إِسْرَائِيلْ بِحِسّ عَالِي وَ قَالْ: 56«بَارَكْ اللّٰهْ الْأَنْطَى بَكَانْ هَنَا رَاحَةْ لِشَعَبَهْ بَنِي إِسْرَائِيلْ مِثِلْ هُو قَالَهْ. وَ مِنْ كُلَّ الْكَلَامْ الْعَدِيلْ الْهُو قَالَهْ بِوَاسِطَةْ عَبْدَهْ مُوسَى، كِلْمَةْ وَاحِدَةْ اللِّسَّاعْهَا مَا أَلْحَقَّقَتْ كَيْ مَا فِي. 57وَ خَلِّي اللّٰهْ إِلٰـهْنَا يُكُونْ مَعَانَا مِثِلْ كَانْ مَعَ جُدُودْنَا. وَ خَلِّي مَا يَابَانَا وَ لَا يِخَلِّينَا. 58وَ لَاكِنْ خَلِّي يِوَجِّهْ فِكِرْنَا عَلَيَّهْ أَشَانْ نِتَابُعُوا دَرْبَهْ وَ نَحْفَضَوْا وَصِيَّاتَهْ وَ قَوَانِينَهْ وَ شُرُوطَهْ الْأَنْطَاهُمْ لِجُدُودْنَا. 59يَا اللّٰهْ، لَيْل وَ نَهَارْ فَكِّرْ فِي دُعَايِ الْوَجَّهْتَهْ لَيْك أَشَانْ إِنْتَ اللّٰهْ إِلٰـهْنَا تِدَافِعْ دَايْماً حُقُوقِي أَنَا عَبْدَكْ وَ حُقُوقْ شَعَبَكْ بَنِي إِسْرَائِيلْ. 60وَ بِمِثِلْ دَا، كُلَّ شُعُوبْ الْأَرْض يَعَرْفُوا كَدَرْ اللّٰهْ هُو بَسْ الْإِلٰـهْ وَ مَا فِي إِلٰـهْ إِلَّا هُو. 61وَ خَلِّي قُلُوبْكُو يُكُونُوا مُخْلِصِينْ لِلّٰهْ إِلٰـهْنَا مِثِلْ هُو يِدَوْرَهْ وَ تَحْفَضَوْا شُرُوطَهْ وَ تِطَبُّقُوا قَوَانِينَهْ مِثِلْ الْيَوْم.»
62وَ بَعَدْ دَا، الْمَلِكْ سُلَيْمَانْ وَ كُلَّ بَنِي إِسْرَائِيلْ الْمَعَايَهْ قَدَّمَوْا ضَحَايَا لِلّٰهْ. 63وَ الْمَلِكْ سُلَيْمَانْ قَدَّمْ ضَحَايَا كَتِيرِينْ. ضَحَايَا السَّلَامَةْ الْقَدَّمَاهُمْ لِلّٰهْ هُمَّنْ 22 000 بَقَرْ وَ 120 000 غَنَمْ. وَ بِمِثِلْ دَا، الْمَلِكْ وَ كُلَّ بَنِي إِسْرَائِيلْ سَوَّوْا حَفْلَةْ وَ فَتَحَوْا بَيْت اللّٰهْ. 64وَ فِي نَفْس الْيَوْم دَا، الْمَلِكْ خَصَّصْ أُسْط الْفَضَايْ الْقَاعِدَةْ قِدَّامْ بَيْت اللّٰهْ أَشَانْ يِقَدِّمْ فَوْقَهْ الضَّحَايَا الْمُحَرَّقِينْ وَ هَدَايَا الدَّقِيقْ وَ يِحَرِّقْ فَوْقَهْ الشَّحَمْ هَنَا ضَحَايَا السَّلَامَةْ. وَ دَا أَشَانْ الْمَدْبَحْ هَنَا النَّحَاسْ الْقَاعِدْ فِي بَيْت اللّٰهْ صَغَيَّرْ مَا يِشِيلْ كُلَّ الضَّحَايَا الْمُحَرَّقِينْ وَ هَدَايَا الدَّقِيقْ وَ الشَّحَمْ هَنَا ضَحَايَا السَّلَامَةْ.
65وَ فِي الْوَكِتْ دَا، الْمَلِكْ سُلَيْمَانْ عَيَّدْ عِيدْ مَعَ كُلَّ بَنِي إِسْرَائِيلْ. وَ جَمَاعَةْ كَتِيرِينْ جَوْا مِنْ كُلَّ الْبَلَدْ، مِنْ حِلَّةْ لَبُو حَمَاتْ فِي الْمُنْشَاقْ لَحَدِّي وَادِي مَصِرْ فِي الْوَطِي. وَ هُمَّنْ عَيَّدَوْا قِدَّامْ اللّٰهْ الرَّبّ 7 يَوْم وَ بَتَّانْ 7 يَوْم وَ كُلَّ كَيْ يِسَاوِي 14 يَوْم. 66وَ فِي الْيَوْم التَّامِنْ هَنَا السُّبُوعْ التَّانِي، سُلَيْمَانْ قَالْ لِبَنِي إِسْرَائِيلْ خَلِّي أَيِّ وَاحِدْ يَمْشِي بَيْتَهْ. وَ هُمَّنْ جَوْا بَارَكَوْا لِلْمَلِكْ وَ مَشَوْا بُيُوتْهُمْ مَبْسُوطِينْ وَ فَرْحَانِينْ أَشَانْ اللّٰهْ سَوَّى الْخَيْر لِعَبْدَهْ دَاوُدْ وَ لِشَعَبَهْ بَنِي إِسْرَائِيلْ.
Currently Selected:
1 مُلوك 8: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
