1 مُلوك 7
7
سُلَيْمَان بنى قصْره
1وَ سُلَيْمَانْ بَنَى قَصْرَهْ وَ كَمَّلَهْ فِي مُدَّةْ 13 سَنَةْ. 2وَ هُو بَنَى بَيْت السَّمَّوْه غَابَةْ لُبْنَانْ وَ طُولَهْ 100 دُرَاعْ وَ عُرْضَهْ 50 دُرَاعْ وَ طُولَهْ فَوْق كَمَانْ 30 دُرَاعْ. وَ فِي لُبَّهْ، هُو سَوَّى أَرْبَعَةْ رَوْق هَنَا عَمَدْ مِنْ حَطَبْ الْأَرْز وَ فِي رَاسْهُمْ، خَطَّ مَرَادِيسْ كُلَ مِنْ حَطَبْ الْأَرْز. 3وَ الْمَرَادِيسْ دَوْل عَدَدْهُمْ 45 وَ قَاعِدِينْ فِي تَلَاتَةْ رَوْق وَ أَيِّ رَوْق عِنْدَهْ 15 مَرَادِيسْ الْقَاعِدِينْ فِي رَاسْ الْعَمَدْ. وَ هُو سَدَّ الْمَرَادِيسْ دَوْل بِخَشَبْ الْأَرْز. 4وَ فِي أَيِّ جِيهَةْ هَنَا الْبَيْت، سَوَّوْا تَلَاتَةْ رَوْق هَنَا شَبَابِيكْ بِحَطَبْهُمْ. وَ رَكَّبَوْا الشَّبَابِيكْ دَوْل مُلْقَابِلِينْ الْوَاحِدْ لِلْآخَرْ. 5وَ كُلَّ الْبِيبَانْ وَ الشَّبَابِيكْ وَ حَطَبْهُمْ الْيِرَكُّبُوهُمْ فَوْقَهْ، شَكِلْهُمْ مُرَبَّعْ. وَ الشَّبَابِيكْ دَوْل مُلْقَابِلِينْ أَمْبَيْنَاتْهُمْ عَلَيْ تَلَاتَةْ رَوْق.
6وَ سُلَيْمَانْ سَوَّى بَرَنْدَةْ الطُّولْهَا 50 دُرَاعْ وَ عُرْضَهَا 30 دُرَاعْ وَ بَنَاهَا بِعَمَدْ. وَ بَنَى غُرْفَةْ الْمَدَخَلْ وَ ثَبَّتْهَا بِعَمَدْ وَ سَوَّى بَابْهَا بِقِدَّامْ. 7وَ بَتَّانْ بَنَى بَرَنْدَةْ آخَرَةْ الْيُخُطُّوا فَوْقهَا كُرْسِي الْمُلُكْ وَ دَا الْبَكَانْ الْيِسَوِّي فَوْقَهْ الشَّرِيعَةْ. وَ الْبَكَانْ دَا، هُو سَدَّاهْ بِخَشَبْ الْأَرْز مِنْ تِحِتْ لَحَدِّي فَوْق. 8وَ الْبَيْت الْيَسْكُنْ فَوْقَهْ، بَنَوْه فِي فَضَايْ آخَرَةْ وَ هُو بِشَابِهْ بَيْت غَابَةْ لُبْنَانْ. وَ لِمَرْتَهْ بِنَيَّةْ فِرْعَوْن مَلِكْ مَصِرْ، سُلَيْمَانْ بَنَى بَيْت الْهُو كُلَ بِشَابِهْ بَيْت غَابَةْ لُبْنَانْ.
9وَ كُلَّ الْبُيُوتْ دَوْل وَ الدَّرَادِرْ وَ الْفَضَايْ الْكَبِيرَةْ مِنْ الْأَسَاسْ لَحَدِّي الْمَرَادِيسْ، بَنَوْهُمْ بِحُجَارْ سَمْحِينْ وَ مَقْطُوعِينْ. وَ هُمَّنْ قَطَعَوْهُمْ بِمُنْشَارْ بِقِدَّامْ وَ بِوَرَاءْ. 10وَ لِلْأَسَاسْ، أَسْتَعْمَلَوْا حُجَارْ كُبَارْ وَ سَمْحِينْ الطُّولْهُمْ مَا سَوَا. وَاحِدِينْ 10 دُرَاعْ وَ وَاحِدِينْ 8 دُرَاعْ. 11وَ فِي رَاسْ الْأَسَاسْ دَا، خَطَّوْا حُجَارْ سَمْحِينْ مَقْطُوعِينْ حَسَبْ الْمَقَاسْ الْوَاجِبْ وَ حَطَبْ الْأَرْز. 12وَ الْفَضَايْ الْكَبِيرَةْ، حَوَّقَوْهَا بِدُرْدُرْ الْعِنْدَهْ تَلَاتَةْ رَوْق هَنَا حُجَارْ مَقْطُوعِينْ وَ فِي رَاسْهُمْ، عِنْدَهْ رَوْق وَاحِدْ هَنَا حَطَبْ الْأَرْز. وَ دَا مِثِلْ الْفَضَايْ الدَّخْلَانِيَّةْ وَ غُرْفَةْ الْمَدَخَلْ هَنَا بَيْت اللّٰهْ.
حُورَام صنع خُمام بيت اللّه
13وَ الْمَلِكْ سُلَيْمَانْ رَسَّلْ جَابَهْ لِحُورَامْ مِنْ بَلَدْ صُورْ. 14وَ حُورَامْ دَا، هُو وِلَيْد هَنَا مَرَةْ أَرْمَلَةْ وَ هِي مِنْ قَبِيلَةْ نَفْتَالِي وَ أَبُوهْ مِنْ بَلَدْ صُورْ. وَ هُو عِنْدَهْ خِبْرَةْ وَ فِهِمْ وَ مَعْرَفَةْ فِي خِدْمَةْ النَّحَاسْ. هُو جَاءْ بَكَانْ الْمَلِكْ سُلَيْمَانْ وَ سَوَّى لَيَّهْ كُلَّ خِدِمْتَهْ.
حُورَام صنع عمد تِنَيْن
15وَ حُورَامْ صَنَعْ عَمَدْ إِتْنَيْن هَنَا نَحَاسْ وَ طُولْ هَنَا أَيِّ وَاحِدْ 18 دُرَاعْ وَ الدَّايِرَةْ هَنَا أَيِّ وَاحِدْ عِنْدَهَا 12 دُرَاعْ. 16وَ صَنَعْ رُوسَيْ هَنَا نَحَاسْ الْيُخُطُّوهُمْ فَوْق فِي الْعَمَدْ دَوْل وَ أَيِّ وَاحِدْ مِنْ الرُّوسَيْ دَوْل طُولَهْ 5 دُرَاعْ. 17وَ جَمَّلْ الْعَمَدْ دَوْل بِسَلَاسِلْ هَنَا نَحَاسْ مَضْفُورِينْ وَ خَطَّاهُمْ فَوْق فِي رَاسْ الْعَمَدْ دَوْل. وَ أَيِّ عَمُودْ عِنْدَهْ سَبْعَةْ سَلَاسِلْ. 18وَ بَتَّانْ صَنَعْ بِنَحَاسْ رَوْقَيْن هَنَا رُمَّانْ وَ عَلَّقْهُمْ فِي السَّلَاسِلْ وَ سَدَّ بَيْهُمْ رَاسْ الْعَمُودْ الْوَاحِدْ. وَ سَوَّى نَفْس الشَّيّءْ بِالْعَمُودْ التَّانِي. 19وَ لِلْعَمَدْ هَنَا الْمَدَخَلْ دَوْل، صَنَعْ لَيْهُمْ رُوسَيْ آخَرِينْ وَ أَيِّ رَاسْ طُولَهْ 4 دُرَاعْ. وَ الرُّوسَيْ دَوْل بِشَابُهُوا نُوَّارْ السِّتَّيْب. 20وَ فَوْق مِنْ رُوسَيْ الْعَمَدْ، فِيَّهْ بَكَانْ تَخِينْ زِيَادَةْ. وَ الْبَكَانْ دَا فَايِتْ السَّلَاسِلْ الْمُعَلَّقِينْ فَوْقهُمْ 200 رُمَّانْ الْمُحَوِّقِينْ رُوسَيْ الْعَمَدْ.
21وَ حُورَامْ خَطَّ الْعَمَدْ دَوْل قِدَّامْ غُرْفَةْ الْمَدَخَلْ هَنَا بَيْت اللّٰهْ. الْعَمُودْ الْوَاحِدْ، خَطَّاهْ بِالزَّيْنَةْ وَ سَمَّاهْ يَاكِينْ (مَعَنَاتَهْ اللّٰهْ يِثَبِّتْ). وَ الْعَمُودْ التَّانِي، خَطَّاهْ بِالْإِسْرَةْ وَ سَمَّاهْ بُعَازْ (مَعَنَاتَهْ الْقُدْرَةْ مِنْ اللّٰهْ). 22وَ الرُّوسَيْ هَنَا الْعَمَدْ دَوْل بِشَابُهُوا نُوَّارْ السِّتَّيْب. وَ بِمِثِلْ دَا، حُورَامْ كَمَّلْ خِدْمَةْ الْعَمَدْ.
حُورَام صنع حَوْط كبير
23وَ حُورَامْ صَنَعْ حَوْط كَبِيرْ مُدَوَّرْ هَنَا نَحَاسْ. وَ خَشْمَهْ يِسَاوِي 10 دُرَاعْ مِنْ طَرَفَهْ لِطَرَفَهْ. وَ طُولَهْ فَوْق يِسَاوِي 5 دُرَاعْ وَ دَايِرَهْ كَمَانْ 30 دُرَاعْ. 24وَ جَمَّلْ الْحَوْط بِبُخَسْ الصَّنَعَاهُمْ بِنَحَاسْ. فِي أَيِّ دُرَاعْ، سَوَّى 10 بُخَسْ وَ دَا، فِي كُلَّ دَايِرَةْ الْحَوْط. وَ الْبُخَسْ دَوْل صَنَعَاهُمْ عَلَيْ رَوْقَيْن. وَ هُمَّنْ وَ الْحَوْط كُلُّهُمْ كَيْ صُنْعَةْ وَاحِدَةْ بَسْ. 25وَ الْحَوْط دَا خَطَّوْه فِي 12 تِيرَانْ هَنَا نَحَاسْ. وَ التِّيرَانْ دَوْل مُوَجِّهِينْ عَلَيْ الْأَرْبَعَةْ جِيهَاتْ. تَلَاتَةْ مُوَجِّهِينْ عَلَيْ جِيهَةْ الْمُنْشَاقْ وَ تَلَاتَةْ عَلَيْ جِيهَةْ الْغَرِبْ وَ تَلَاتَةْ عَلَيْ جِيهَةْ الْوَطِي وَ تَلَاتَةْ عَلَيْ جِيهَةْ الصَّبَاحْ. وَ ضُهُورْهُمْ دَاخَلْ تِحِتْ الْحَوْط. 26وَ خَشُمْ الْحَوْط دَا تُخْنَهْ يِسَاوِي أَرْبَعَةْ أُصْبَعْ وَ خَشْمَهْ مِثِلْ نُوَّارْ السِّتَّيْب. وَ الْحَوْط دَا يِشِيلْ 200 بِرْمِيلْ هَنَا أَلْمِي.
حُورَام صنع عشرة حيطان
27وَ حُورَامْ صَنَعْ عَشَرَةْ حِيطَانْ مُتَحَرِّكِينْ مِنْ نَحَاسْ وَ أَيِّ وَاحِدْ طُولَهْ 4 دُرَاعْ وَ عُرْضَهْ 4 دُرَاعْ وَ طُولَهْ فَوْق كَمَانْ 3 دُرَاعْ. 28وَ دَاهُو كِكَّيْف صَنَعْ الْحِيطَانْ الْمُتَحَرِّكِينْ دَوْل. صَنَعَاهُمْ بِصَفَايِحْ هَنَا نَحَاسْ الْبِقِي مِثِلْ أَسَاسْ وَ خَطَّ لَيْهُمْ حَوَادِرْ. 29وَ صَنَعْ فِي الصَّفَايِحْ أَمْبَيْن الْحَوَادِرْ دَوْل صُوَرْ هَنَا دِيدَانْ وَ تِيرَانْ وَ مَخْلُوقِينْ سَمَاوِيِّينْ. وَ بِفَوْق وَ بِتِحِتْ لِلدِّيدَانْ وَ التِّيرَانْ، جَمَّلَاهُمْ بِزُهُورْ مُدَّوْدَلِينْ. 30وَ أَيِّ أَسَاسْ عِنْدَهْ أَرْبَعَةْ عَجَلَاتْ هَنَا نَحَاسْ مُرَكَّبِينْ فِي أَرْبَعَةْ حَوَادِرْ هَنَا نَحَاسْ الْمُثَبَّتِينْ فِي الْأَرْبَعَةْ أَرْكَانْ هَنَا الْأَسَاسْ. وَ الْحَوَادِرْ مَعَ الْأَسَاسْ، كُلُّهُمْ كَيْ صُنْعَةْ وَاحِدَةْ بَسْ وَ الْعَجَلَاتْ مَا لِحْقَوْا الْبَكَانْ الْمُجَمَّلْ بِزُهُورْ. 31وَ فِي رَاسْ أَيِّ أَسَاسْ، فِيَّهْ فَتْحَةْ مُدَوَّرَةْ طُولْهَا فَوْق دُرَاعْ وَ عُرْضَهَا دُرَاعْ وَ نُصّ وَ دَا الْبَكَانْ الْيُخُطُّوا فَوْقَهْ الْحَوْط. وَ خَشُمْ الْفَتْحَةْ الْمُدَوَّرَةْ دَا، نَقَشَوْا فَوْقَهْ صُوَرْ. وَ لَاكِنْ صَفَايِحْ الْأَسَاسْ دَا مُرَبَّعِينْ مَا مُدَوَّرِينْ. 32وَ الْأَرْبَعَةْ عَجَلَاتْ دَوْل قَاعِدِينْ بِتِحِتْ مَرْبُوطِينْ فِي صَفَايِحْ الْأَسَاسْ وَ الْحَوَادِرْ الْمُرَبَّطِينْ فَوْقهُمْ الْعَجَلَاتْ مَارْقِينْ جَايْ وَ جَايْ لِلْأَسَاسْ وَ طُولْ الْعَجَلَاتْ فَوْق دُرَاعْ وَ نُصّ. 33وَ الْعَجَلَاتْ دَوْل مِثِلْ عَجَلَاتْ هَنَا عَرَبَاتْ الْحَرِبْ. الْحَوَادِرْ وَ كُلَّ شَيّءْ الْفَوْقهُمْ، صَنَعَاهُمْ مِنْ نَحَاسْ. 34وَ فِي أَرْبَعَةْ عَمَدْ مَصْنُوعِينْ فِي الْأَرْبَعَةْ أَرْكَانْ وَ كُلُّهُمْ كَيْ صُنْعَةْ وَاحِدَةْ مَعَ الْأَسَاسْ. 35وَ الْبَكَانْ الْفَوْق هَنَا أَيِّ أَسَاسْ مُجَمَّلْ بِتَاجْ مُدَوَّرْ طُولَهْ نُصّ دُرَاعْ. وَ الْبَكَانْ دَا، عِنْدَهْ مَسَّاكَةْ وَ صَفَايِحْ هَنَا نَحَاسْ وَ هُمَّنْ كُلُّهُمْ كَيْ صُنْعَةْ وَاحِدَةْ مَعَ الْأَسَاسْ. 36وَ أَيِّ بَكَانْ فَاضِي فِي الْمَسَّاكَةْ وَ الصَّفَايِحْ، هُو جَمَّلَاهُمْ بِصُوَرْ هَنَا مَخْلُوقِينْ سَمَاوِيِّينْ وَ دِيدَانْ وَ شَدَرْ نَخَلْ وَ زُهُورْ فِي كُلَّ دَايِرْ الْأَسَاسْ. 37وَ بِمِثِلْ دَا، هُو سَوَّى الْأَسَاسْ دَوْل بِنَحَاسْ وَ كُلُّهُمْ عِنْدُهُمْ نَفْس الصُّنْعَةْ وَ نَفْس الطُّولْ وَ نَفْس الْحَجِمْ. 38وَ سَوَّى عَشَرَةْ حِيطَانْ هَنَا نَحَاسْ. وَ أَيِّ حَوْط طُولَهْ فَوْق يِسَاوِي 4 دُرَاعْ وَ يِشِيلْ 4 بِرْمِيلْ أَلْمِي. وَ أَيِّ حَوْط يُخُطُّوهْ فِي رَاسْ أَسَاسْ وَاحِدْ. 39وَ الْحِيطَانْ الْمُتَحَرِّكِينْ الْخَمْسَةْ خَطَّاهُمْ بِنُصّ الزَّيْنَةْ هَنَا الْبَيْت الْمُقَدَّسْ وَ الْحِيطَانْ الْخَمْسَةْ الْآخَرِينْ كَمَانْ خَطَّاهُمْ بِنُصّ الْإِسْرَةْ. وَ لَاكِنْ الْحَوْط الْكَبِيرْ كَمَانْ خَطَّاهْ بِنُصّ الزَّيْنَةْ هَنَا الْبَيْت فِي رُكْنَهْ مُقَابِلْ وَطِي صَبَاحْ.
حُورَام صنع مُعِدّات من نحاس
40وَ حُورَامْ صَنَعْ حِيطَانْ وَ فَيْلَاتْ وَ كِيسَانْ. وَ هُو كَمَّلْ كُلَّ الْخِدْمَةْ هَنَا بَيْت اللّٰهْ الْكَلَّفَهْ بَيْهَا الْمَلِكْ سُلَيْمَانْ. 41وَ هُو صَنَعْ
الْعَمَدْ الْإِتْنَيْن
وَ رُوسَيْهُمْ الْخَطَّاهُمْ فِي رَاسْ الْعَمَدْ
وَ السِّلْسِلَتَيْن هَنَا نَحَاسْ الْمَضْفُورِينْ الْخَطَّاهُمْ فِي رُوسَيْ الْعَمَدْ دَوْل
42وَ الْأُرْبُعْمِيَةْ رُمَّانْ الْمُعَلَّقِينْ رَوْقَيْن فِي السِّلْسِلَتَيْن هَنَا نَحَاسْ الْمَضْفُورِينْ الْخَطَّاهُمْ فِي رُوسَيْ الْعَمَدْ دَوْل
43وَ الْعَشَرَةْ أَسَاسْ
وَ الْعَشَرَةْ حِيطَانْ الْخَطَّاهُمْ فَوْقهُمْ
44وَ الْحَوْط الْكَبِيرْ الْوَحِيدْ
وَ الْأَتْنَا عَشَرْ تِيرَانْ التِّحْتَهْ
45وَ الْحِيطَانْ وَ الْفَيْلَاتْ وَ الْكِيسَانْ.
كُلَّ الْمُعِدَّاتْ دَوْل، حُورَامْ صَنَعَاهُمْ مِنْ نَحَاسْ نَقِي لِبَيْت اللّٰهْ بِأَمُرْ الْمَلِكْ سُلَيْمَانْ. 46وَ الْمَلِكْ أَمَرْ يَصْنَعَوْا كُلَّ الْمُعِدَّاتْ دَوْل فِي قَوَالِبْ هَنَا طِينَةْ فِي تُرَابْ بَحَرْ الْأُرْدُنْ أَمْبَيْن سُكُّوتْ وَ صَرْتَانْ. 47وَ سُلَيْمَانْ سَوَّى مُعِدَّاتْ كَتِيرِينْ مَرَّةْ وَاحِدْ لَحَدِّي نَادُمْ مَا يَقْدَرْ يَعَرِفْ وَزِنْ النَّحَاسْ السَّوَّوْهُمْ بَيَّهْ.
المُعِدّات هنا دهب
48وَ بَتَّانْ كُلَ سُلَيْمَانْ سَوَّى مُعِدَّاتْ آخَرِينْ لِبَيْت اللّٰهْ. وَ هُمَّنْ
مُخْبَرْ الْبَخُورْ هَنَا الدَّهَبْ
وَ الطَّرَبَيْزَةْ هَنَا الدَّهَبْ الْيِقَدُّمُوا فَوْقهَا الْخُبْزَةْ لِلّٰهْ
49وَ الْعَشَرَةْ فَانُوسْ مِنْ دَهَبْ صَافِي الْخَطَّاهُمْ قِدَّامْ الْبَكَانْ الْمُقَدَّسْ مَرَّةْ وَاحِدْ، الْخَمْسَةْ بِنُصّ الزَّيْنَةْ وَ الْخَمْسَةْ الْآخَرِينْ بِنُصّ الْإِسْرَةْ
وَ الزُّهُورْ وَ الطِّيَيْسَاتْ لِلنَّارْ وَ الْكَلَالِيبْ كُلُّهُمْ كَيْ مِنْ دَهَبْ
50وَ الْمَوَاعِينْ وَ السَّكَاكِينْ وَ الْكِيسَانْ وَ الصُّفَرْ وَ خَمَّامَاتْ النَّارْ كُلُّهُمْ كَيْ مِنْ دَهَبْ صَافِي
وَ الْحَدِيدْ الْمُثَبِّتْ الْبِيبَانْ هَنَا الْبَكَانْ الْمُقَدَّسْ مَرَّةْ وَاحِدْ وَ الْحَدِيدْ الْمُثَبِّتْ الْبِيبَانْ هَنَا بَيْت اللّٰهْ كُلُّهُمْ كَيْ مِنْ دَهَبْ.
51وَ وَكِتْ كُلَّ الْخِدْمَةْ هَنَا بَيْت اللّٰهْ كَمَّلَتْ خَلَاصْ، الْمَلِكْ سُلَيْمَانْ جَابْ كُلَّ شَيّءْ الْأَبُوهْ دَاوُدْ خَصَّصَهْ مِثِلْ الْفُضَّةْ وَ الدَّهَبْ وَ الْمَوَاعِينْ وَ خَطَّاهُمْ فِي الْمَخَازِنْ هَنَا بَيْت اللّٰهْ.
Currently Selected:
1 مُلوك 7: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
