Filibbi 2

Al-maskana hana l-muʼminiin

1Hal ligiitu chajaaʼa be alaakhitku maʼa l-Masiih walla ? Wa mahabbitah raggadat guluubku walla ? Wa chaaraktu sawa fi gudrat al-Ruuh al-Khudduus walla ? Wa ligiitu min al-Masiih mahanna katiire walla ? 2Khalaas, ziidu farhiti wa khalli fikirku yabga waahid. Arraayado ambeenaatku be mahabba waahide. Wa astafugu ambeenaatku marra waahid be hadaf waahid. 3Wa ma tisawwu cheyy min al-husud wa l-istikbaar. Khalli ayyi waahid yimaskin nafsah wa yichiif akhwaanah akheer min nafsah. 4Khalli ayyi waahid ma yifakkir fi l-cheyy al-yijiib faayde leyah hu wiheedah bas, laakin khalli yukhutt baalah fi l-cheyy al-yijiib faayde le l-aakhariin.

Al-maskana wa azamat al-Masiih

5Al-fikir al-intu waajib titaabuʼuuh, hu nafs al-fikir al-Isa al-Masiih taabaʼah.

6Min awwal hu indah tabiiʼat Allah

laakin ma dawwar yamsuk le nafsah

gudurtah al-rabbaaniiye.

7Be l-aks, hu khalla minnah kulla cheyy

wa sawwa nafsah misil abid

wa khassad yaldooh wa yabga insaan.

8Wa wakit bigi naadum,

hu maskan nafsah

wa bigi taayiʼ lahaddi l-moot

wa khassad yumuut moot cheen fi l-saliib.

9Achaan da, Allah rafaʼah foog marra waahid

wa antaah usum aali min kulla l-asaame

10lahaddi ayyi waahid yicharrif usum Isa

fi l-sama wa fi l-ard wa tihit al-ard

wa yarkaʼ giddaamah.

11Wa lahaddi ayyi waahid yachhad wa yuguul

kadar Isa al-Masiih hu al-Rabb

wa yimajjid Allah abuuh.

Abgo nuur fi ust al-naas

12Fi chaan kulla l-kalaam da, ya akhwaani al-nihibbuku, asmaʼo kalaami. Wakit ana maʼaaku, intu daayman titaabuʼu kalaam Allah. Wa hassaʼ wakit ana ma maʼaaku, waajib titaabuʼuuh be ziyaada. Jaahudu be khoof wa rajifiin le tisawwu kulla cheyy al-waajib le l-naas al-Allah najjaahum. 13Achaan Allah hu al-gaaʼid yisawwi amalah foogku wa hu yantiiku al-niiye wa l-gudra le tisawwu al-cheyy al-adiil al-yarda beyah.

14Fi kulla cheyy ma tachku wa la tihaaruju ambeenaatku. 15Achaan tabgo naas bala khata wa bariyiin wa tiʼiichu misil iyaal Allah bala eeb fi usut al-naas al-fasliin wa uwuj hana l-dunya di. Wa tabgo fi usuthum nuur misil al-nujuum fi l-aalam al-adlam 16achaan intu munkaribiin fi kalaam al-haya. Wa kan tabgo misil da, nagdar narfaʼ raasi foog fi yoom jayyit al-Masiih. Wa naʼarif taʼabi wa khidimti al-khadamtaha leyah ma fachalat. 17Wa hatta kan dammi waajib yidaffig misil hadiiyat charaab fi l-dahiiye al-tigaddumuuha le Allah fi chaan iimaanku wa khidmitku, khalaas ana nafrah wa ninbasit maʼaaku kulluku. 18Wa waajib intu kula tabgo farhaaniin wa tafraho maʼaayi.

Haal Timuutaawus

19Wa baʼad chiyya, nitmanna nirassil leeku Timuutaawus kan da al-yidoorah Rabbina Isa. Nidoor nirassilah achaan hu yichajjiʼni wakit yigabbil yijiib leyi khabarku. 20Ma fi naadum aakhar al-yihimm beeku misli ana, illa hu bas. Yihimm beeku be niiye mukhlisa. 21Kulla l-aakhariin yukhuttu baalhum fi l-cheyy al-yijiib faayde leehum humman wa ma fi l-cheyy al-yijiib faayde le Isa al-Masiih. 22Laakin akiid intu taʼarfu kikkeef Timuutaawus wassaf sabaatah. Min wakit tawiil, hu gaaʼid yakhdim maʼaayi fi ballikhiin bichaarat al-Masiih misil wileed al-yakhdim maʼa abuuh. 23Achaan da wakit naʼarif chunu yabga leyi hini, nitmanna nirassilah leeku tawwaali. 24Wa indi acham foog Rabbina kadar baʼad wakit chiyya bas, ana zaati namchi leeku.

Haal Abfariid

25Wa fi fikri ana, waajib leyi nirassil leeku akhuuyi Abfariid al-gaaʼid yakhdim maʼaayi wa nijaahudu sawa. Sahiih, intu bas rassaltuuh leyi achaan fi taʼabi hu yisaaʼidni. 26Laakin hu gaaʼid yagram leeku kulluku wa bigi leyah gaasi achaan intu simiʼtu khabar hana maradah. 27Wa be l-sahiih, awwal hu mardaan bilheen wa gariib yumuut. Laakin Allah hanna foogah wa ma foogah hu wiheedah bas, laakin foogi ana kula achaan ma yiziid le hizni hizin aakhar battaan.

28Wa chilt niiye nirassilah leeku ajala achaan be jaytah, intu tafraho battaan wa ana kamaan galbi yargud. 29Wa khalaas, akurbuuh be usum al-Rabb be farha kabiire. Wa nuguul leeku waajib tikarrumu be ziyaada ayyi naadum mislah hu. 30Awwal hu gariib yumuut fi chaan khidimtah le l-Masiih wa dassa nafsah fi khutuura chadiide achaan yijiib leyi musaaʼada al-intu ma tagdaro tijiibuuha leyi.

Currently Selected:

Filibbi 2: ADT19

Highlight

Copy