Markhus 9

1Wa Isa gaal leehum : «Nuguul leeku al-hagg, fi naas waahidiin al-gaaʼidiin hini ma yumuutu gubbaal ma yichiifu mamlakat Allah wakit taji be gudra.»

Al-Masiih fi nuur al-majd

2Wa baʼad sitte yoom, Isa chaal maʼaayah Butrus wa Yaakhuub wa Yuuhanna wa waddaahum wiheedhum fi raas hajar tawiil. Wa Isa alkhayyar giddaamhum. 3Wa khalagah bada yiraari wa bigi abyad karr marra waahid. Wa abadan ma fi naadum fi l-dunya al-yagdar yisawwi khalag abyad misil da. 4Wa l-nabi Muusa wa l-nabi Iliyaas baano giddaamhum wa gaaʼidiin yihajju maʼa Isa.

5Wa Butrus hajja le Isa wa gaal : «Sayyidna, bigi leena sameh kadar aniina gaaʼidiin hini. Khalli nabnu lagaadiib talaata. Waahide leek inta wa waahide le Muusa wa waahide le Iliyaas.» 6Wa Butrus hajja misil da achaan hu alʼajjab wa ma irif yuguul chunu. Wa kulluhum khaafo marra waahid. 7Wa sahaabaay waahide jaat wa khattathum be dullaha wa hiss min lubb al-sahaabaay ansamaʼ wa gaal : «Da bas Ibni al-nihibbah. Asmaʼo kalaamah.»

8Wa tawwaali anlafato wa ma chaafo ayyi naadum, illa Isa wiheedah bas maʼaahum. 9Wa wakit gaaʼidiin yanzulu min raas al-hajar, Isa amaraahum achaan ma yiʼooru ayyi naadum be l-cheyy al-chaafooh gubbaal Ibn al-Insaan ma yabʼas min ust al-maytiin. 10Wa humman simʼo kalaamah. Wa assaaʼalo ambeenaathum chunu maʼana al-kalaam al-gaalah fi l-buʼaas min ust al-maytiin.

11Wa saʼalo Isa wa gaalo : «Maala al-ulama gaaʼidiin yuguulu akiid Iliyaas yaji gubbaalak ?» 12Wa hu radda leehum wa gaal : «Sahiih, Iliyaas yaji gubbaali achaan yiʼaddil kulla cheyy. Laakin ma misil fi fikirku, achaan maktuub fi l-Kitaab kadar Ibn al-Insaan yatʼab taʼab chadiid wa l-naas yahguruuh. 13Wa laakin nuguul leeku Iliyaas#9:13 Iliyaas Talgo tafsiir fi Iliyaas fi Matta 17:11-13. ja khalaas wa sawwo foogah misil dawwarooh. Wa da misil al-maktuub fi l-Kitaab.»

Al-wileed al-indah amfitfit

14Wa lihgo al-talaamiiz al-aakhariin wa chaafo naas katiiriin bilheen maʼaahum wa l-ulama gaaʼidiin yinaakhuchuuhum. 15Wa wakit al-naas chaafo Isa jaayi, humman ajjabo bilheen wa jaro leyah wa sallamooh. 16Wa Isa saʼal talaamiizah wa gaal : «Tinaakhuchu maʼaahum fi chunu ?»

17Wa naadum waahid min ust al-naas radda leyah wa gaal : «Al-sayyid, ana jibt leek wileedi achaan indah cheetaan al-yisawwiih ambuuku. 18Wa wakit al-cheetaan yakrub al-wileed, yarmiih fi l-turaab wa rikhwe tamrug min khachmah wa yiʼaddi sunuunah wa yaybas karr min al-amfitfit. Wa ana talabt min talaamiizak achaan yaturdu minnah al-cheetaan wa laakin humman ma gidro.»

19Wa Isa radda wa gaal : «Ya l-naas al-ma induku iimaan ! Lahaddi mata nagood maʼaaku ? Lahaddi mata nilhammalku ? Jiibu leyi al-wileed.»

20Wa jaabo leyah al-wileed. Wa l-cheetaan chaaf Isa wa tawwaali al-wileed fatfat wa wagaʼ fi turaab wa chaglab wa rikhwe maragat min khachmah. 21Wa Isa saʼal abu al-wileed wa gaal : «Min kam yoom hu taʼbaan misil da ?» Wa radda leyah wa gaal : «Min hu sakhayyar. 22Al-cheetaan yidoor yaktulah wa iddat marraat ramaah fi l-naar wa fi l-almi. Arhamna. Aawinna, kan ma gaasi leek.» 23Wa Isa gaal : «Inta gult kan ma gaasi leyi. Wa ana nuguul kan naadum indah iimaan, ma fi cheyy gaasi leyah.» 24Wa tawwaali, abu al-wileed radda leyah be hiss foog wa gaal : «Indi iimaan ! Najjiini min chukuuki !»

25Wa Isa chaaf kadar al-naas al-laammiin foogah gaaʼidiin yiziidu wa naas ziyaada jaariyiin aleyah wa khalaas kachcha le l-cheetaan wa gaal : «Ya cheetaan ambuuku. Asmaʼ kalaami ! Amrug minnah wa abadan ma tigabbil foogah !»

26Wa l-cheetaan aat wa l-wileed fatfat fatfitiin chadiid wa l-cheetaan marag minnah khalaas. Wa l-wileed raagid saakit misil naadum mayyit. Wa achaan da naas katiiriin gaalo : «Khalaas, al-wileed maat.» 27Wa laakin Isa karab iidah wa aawanah wa l-wileed gamma foog.

28Wa baʼadeen Isa dakhal fi l-beet wa talaamiizah jo leyah wiheedhum. Wa saʼalooh wa gaalo : «Maala ma gidirna taradna al-cheetaan da ?» 29Wa radda leehum wa gaal : «Al-cheetaan al-nafar da ma yintarid illa be l-sala.»

Al-Masiih hajja battaan be mootah

30Wa gammo min al-bakaan da wa chaggo daar al-Jaliil. Wa Isa dawwar al-naas ma yaʼarfu al-bakaan al-hu gaaʼid foogah 31achaan hu gaaʼid yiʼallim talaamiizah wiheedhum bas. Wa gaaʼid yuguul leehum : «Baʼad chiyya Ibn al-Insaan yisallumuuh le l-naas wa yaktuluuh. Wa talaata yoom baʼad mootah, hu yabʼas.» 32Laakin humman ma fihmo kalaamah wa ma saʼalooh min al-kalaam da achaan humman khaayfiin.

Al-kubaar wa l-sukhaar

33Wa jo fi hillit Kafar Naahuum wa dakhalo fi l-beet. Wa fi l-bakaan da, Isa saʼalaahum wa gaal : «Awwal, wakit aniina fi l-derib, intu gaaʼidiin tinaakhuchu fi chunu ?» 34Wa khijlo wa sakato achaan fi l-derib gaaʼidiin yilkhaalato ambeenaathum fi yaatu minhum al-kabiir. 35Wa hu gaʼad tihit wa naada al-talaamiiz al-atnaachar. Wa gaal leehum : «Kan naadum yidoor yabga al-awwal, hu waajib yisawwi nafsah al-akhiir wa yabga khaddaam hana kulla l-naas.»

36Wa Isa jaab leehum wileed sakhayyar wa waggafah fi usuthum wa hadanah. 37Wa gaal : «Ayyi naadum al-yakhbal wileed sakhayyar misil da be usmi, yakhbalni ana. Wa l-naadum al-khibilaani, ma khibilaani ana wiheedi. Hu khibil Allah al-rassalaani.»

38Wa Yuuhanna hajja le Isa wa gaal : «Sayyidna, chifna naadum waahid gaaʼid yatrud al-chawaatiin be usmak. Wa dawwarna nadharooh achaan hu ma gaaʼid yitaabiʼak maʼaana.» 39Wa Isa gaal : «Ma tadharooh achaan ma fi naadum al-yisawwi ajaayib be usmi wa ajala ke yuguul foogi kalaam fasil. 40Wa l-naadum al-ma yidaawisna hu gaaʼid yisaaʼidna. 41Wa nuguul leeku al-hagg, ayyi naadum al-yantiiku kaas hana almi achaan intu naas al-Masiih, ajrah ma yiwaddir abadan.

42«Wa laakin ayyi naadum al-yitallif iimaan hana waahid min al-muʼminiin al-dugaag dool, al-azaab al-yarjaah yabga chadiid lahaddi akheer leyah kan rabato fi ragabatah murhaaka kabiire wa zagalooh fi l-bahar.

43«Wa kan iidak tidoor tamurgak min al-derib al-adiil, agtaʼha ! Akheer leek tadkhul fi l-haya al-abadiiye be iid waahide bas min tadkhul fi Jahannam be iideenak al-itneen. Wa naar Jahannam abadan ma yumuut. 44Fi l-bakaan da, al-duud al-yaakulhum abadan ma yumuut wa ma fi cheyy yaktul al-naar. 45Wa kan rijlak tidoor tamurgak min al-derib al-adiil, agtaʼha. Akheer leek tadkhul fi l-haya al-abadiiye be rijil waahide bas min yazguluuk fi Jahannam be rijileenak al-itneen. 46Fi l-bakaan da, al-duud al-yaakulhum abadan ma yumuut wa ma fi cheyy yaktul al-naar. 47Wa kan eenak tidoor tamurgak min al-derib al-adiil, sillaha ! Akheer leek tadkhul fi mamlakat Allah be een waahide bas min yazguluuk fi Jahannam be uyuunak al-itneen. 48Fi l-bakaan da, al-duud al-yaakulhum abadan ma yumuut wa ma fi cheyy yaktul al-naar. 49Ayyi naadum yitahhuruuh be naar misil yitahhuru al-dahiiye be mileh.

50«Al-mileh adiil. Laakin kan taʼaamah bigi ma fiih, chunu yigabbilah ? Abgo taaʼimiin misil al-mileh wa khalli al-salaam yagood ambeenaatku.»

Currently Selected:

Markhus 9: ADT19

Highlight

Copy