Markhus 13

Beet Allah yikharrubuuh

1Wa wakit Isa maarig min beet Allah, naadum waahid min talaamiizah hajja leyah wa gaal : «Sayyidna, beet Allah ajiib ! Chiif al-hujaar dool ! Chiif buyuutah dool !» 2Wa Isa gaal : «Inta chift kulla l-buyuut al-kubaar dool walla ? Ma yikhallu hajar yagood foog hajar. Yarmuuhum kulluhum.»

3Wakit Isa gaaʼid wiheedah fi jabal al-Zaytuun mugaabil beet Allah, Butrus wa Yaakhuub wa Yuuhanna wa Andareeyas macho leyah. Wa saʼalooh 4wa gaalo : «Ooriina da yabga mata ? Wa chunu al-alaama al-tiwassif kadar kulla l-kalaam da yitimm ?» 5Wa Isa gamma yihajji leehum wa gaal : «Awʼu baalku. Ma tikhallu naadum yukhuchchuku. 6Naas katiiriin yaju be usmi wa yuguulu : ‹Ana bas al-Masiih.› Wa yukhuchchu naas katiiriin.

7«Wa wakit intu tasmaʼo khabar hana huruub gariib wa huruub baʼiid, ma tibarjulu. Achaan da waajib yukuun. Wa laakin da lissaaʼ ma kumaalit al-dunya. 8Naas hana balad waahide yahjumu naas hana balad aakhara wa mamlaka tahjim mamlaka. Wa fi diyaar katiiriin yukuun zilzaal. Juuʼ katiir yanzil fi l-ard. Wa laakin al-taʼab da, di al-bidaaya bas. Hu misil al-talaga al-awwalaaniiye hana l-mara al-tidoor talda.

9«Wa intu, awʼu baalku. Akiid yakurbuuku wa yiwadduuku le l-chariiʼa wa yafurchuuku fi buyuut al-sala. Wa fi chaani ana, tahdaro giddaam al-hukkaam wa l-muluuk. Wa fi l-bakaan da, tachhado leyi. 10Wa awwal cheyy, laabudda al-bichaara yiballukhuuha le kulla l-umam. 11Wa wakit yakurbuuku wa yiwadduuku le l-chariiʼa, ma tihimmu le l-kalaam al-tuguuluuh. Fi l-bakaan da, guulu al-kalaam al-yaji leeku achaan al-kalaam al-tuguuluuh yaji min al-Ruuh al-Khudduus wa ma min nufuusku. 12Wa fi l-wakit al-jaayi da, naadum yisallim akhuuh le l-moot wa abu iyaal yisallim wileedah le l-moot wa l-iyaal yabgo aasiyiin le waaldeenhum wa yisabbubu leehum al-moot. 13Wa fi chaan usmi, kulla l-naas yakrahooku. Wa laakin al-naadum al-gaaʼid saabit lahaddi l-kumaale, yanja.

14«Wa wakit tichiifu al-haraam al-yijiib al-kharaab waagif fi l-bakaan al-abadan ma waajib leyah#13:14 al-haraam al-yijiib al-kharaab Al-kalaam da talgooh fi Danyaal 9:27. (khalli al-naadum al-yagri al-kalaam da yafhamah), fi l-wakit daak, khalli al-naas al-gaaʼidiin fi daar al-Yahuudiiya yiʼarrudu fi l-hujaar. 15Wa ayyi naadum al-gaaʼid yinjamma fi raas beetah, khalli ma yidalli le yadkhul fi beetah yichiil khumaamah. 16Wa ayyi naadum al-gaaʼid fi l-zereʼ, khalli yajri wa ma yigabbil yichiil khalagah. 17Wa fi l-wakit da, yabga gaasi marra waahid le l-awiin al-khalbaanaat wa l-yiraddiʼan. 18Asʼalo Allah achaan da ma yabga fi l-chite. 19Achaan fi l-wakit daak, al-taʼab yabga chadiid bilheen. Wa ma fi taʼab mislah min Allah khalag al-dunya lahaddi l-yoom. Wa taʼab chadiid misil da abadan ma yukuun battaan. 20Wa kan Allah ma nagas adad ayyaam al-taʼab da, naadum waahid ma yanja. Wa laakin Allah fakkar fi naasah al-azalaahum wa fi chaanhum hu nagas adad ayyaam al-taʼab da.

Jayyit al-Masiih al-taaniye

21«Wa fi l-wakit daak, akuun naadum yuguul leeku : ‹Daahu ! Al-Masiih hini !› Aw yuguul : ‹Chiifu ! Al-Masiih hinaak !› Ma tisaddugu kalaamah. 22Achaan naas katiiriin yaju wa yuguulu humman al-Masiih walla yuguulu be kidib humman anbiya. Wa yisawwu alaamaat wa ajaayib le yukhuchchu, kan mumkin, hatta al-naas al-Allah azalaahum. 23Aywa, awʼu baalku. Ana ooreetku be kulla l-kalaam da gubbaal ma yukuun. 24Wa fi l-wakit al-yaji baʼad al-taʼab al-chadiid da, al-harraay tabga dalma wa l-gamar ma yidawwi 25wa l-nujuum yagaʼo min al-sama wa khuwwaat al-samaawaat yinhazzo. 26Wa fi l-wakit da, yichiifu Ibn al-Insaan jaayi fi sahaab al-sama#13:26 Ibn al-Insaan jaayi fi sahaab al-sama Al-kalaam da talgooh fi Danyaal 7:13-14. be gudra aziime wa majiide. 27Wa yirassil malaaʼikatah fi ayyi jiihe achaan yilimmu al-naas al-azalaahum min ayyi bakaan fi l-ard.

Alaamit chadarat al-tiin

28«Wa fakkuru fi masal chadarat al-tiin. Kan furuuʼha yidooru yikhadduru wa warchaalha al-awwal yamrug, be da taʼarfu al-wakit al-hi talda foogah garrab. 29Wa sawa sawa misil da, wakit tichiifu kulla cheyy al-ooreetku beyah gaaʼid yabga, khalaas taʼarfu jayyit al-Masiih gariib. Hu garrab le biibaanku. 30Wa nuguul leeku al-hagg, naas hana l-wakit da ma yikammulu gubbaal kulla l-kalaam da ma yitimm. 31Al-sama wa l-ard yabgo ma fiihum wa laakin kalaami yagood daayman.

Al-yoom al-ma maʼruuf

32«Wa l-cheyy al-yabga baʼadeen da, naadum waahid ma yaʼarif yoomah wa la saaʼtah. Al-malaaʼika fi l-samaawaat kula ma yaʼarfuuh wa Ibn Allah ma yaʼarfah, illa abuuh wiheedah bas yaʼarfah.

33«Awʼu baalku. Agoodu waaʼiyiin achaan intu ma taʼarfu mata waktah yitimm. 34Aywa, da yabga misil naadum waahid al-yidoor yisaafir. Wa gubbaal ma yugumm min beetah hu yikallif abiidah be maalah wa ayyi waahid minhum indah masʼuuliiye. Wa siid al-beet yaamurah le haaris al-baab achaan yagood waaʼi fi l-baab. 35Wa achaan da, intu kula, agoodu waaʼiyiin achaan ma taʼarfu al-wakit al-siid al-beet yaji foogah. Akuun yaji makhrib walla fi ust al-leel walla waradde walla fajur. 36Akuun yaji fajʼatan wa yalgaaku naaymiin. 37Wa l-kalaam al-nuguulah leeku da, nuguulah le kulla l-naas. Nuguul agoodu waaʼiyiin.»

Currently Selected:

Markhus 13: ADT19

Highlight

Copy