Markhus 1

Khidmit Yahya al-Mukhattis

1Di hi bichaarat Isa al-Masiih Ibn Allah. Wa l-bichaara badat 2misil kalaam Allah al-maktuub fi kitaab al-nabi Ichaʼya. Hu gaal :

<Daahu nirassil rasuuli giddaamak

wa hu yiʼaddil leek al-derib.>#1:2 Al-kalaam da talgooh fi Malaakhi 3:1.

3<Wa fi hiss gaaʼid yiʼiit fi l-khala

wa yuguul :

«Jahhuzu derib al-Rabb

wa addulu leyah al-turug !»>#1:3 Al-kalaam da talgooh fi Ichaʼya 40:3, hasab al-tarjama al-yuunaaniiye.

4Wa khalaas Yahya al-Mukhattis, hu bas al-naadum al-gamma fi l-khala wa bada yinaadi al-naas achaan yutuubu. Wa yikhattishum fi l-almi wa Allah yakhfir leehum zunuubhum. 5Wa naas katiiriin min daar al-Yahuudiiya wa Madiinat al-Khudus marago wa macho le Yahya fi l-khala. Wa aʼtarafo be zunuubhum wa Yahya khattasaahum fi bahar al-Urdun.

6Wa Yahya laabis khalag min suuf albil wa raabit sulbah be seer wa gaaʼid yaakul jaraad wa asal al-nahal. 7Wa hu yibachchir al-naas wa yuguul : «Naadum waahid jaayi waraayi wa hu gaadir minni bilheen wa ana ma tammeet leyah khaddaam kula. 8Wa ana khattastuku fi l-almi wa laakin hu yikhattisku be l-Ruuh al-Khudduus».

Al-Masiih khattasooh wa Ibliis jarrabah

9Wa fi l-wakit da, Isa gamma min hillit al-Naasira al-fi daar al-Jaliil wa macha le Yahya. Wa Yahya khattasah fi bahar al-Urdun. 10Wa tawwaali wakit Isa gamma min al-almi, hu chaaf al-samaawaat anfataho wa l-Ruuh al-Khudduus jaayi min al-sama wa nazal foogah misil hamaama. 11Wa hiss min al-sama ansamaʼ wa gaal : «Inta bas Ibni wa ana nihibbak wa ana farhaan beek bilheen.»

12Wa tawwaali al-Ruuh al-Khudduus gaadah le Isa wa waddaah fi lubb al-khala. 13Wa hu gaʼad fi l-khala wa Ibliis jarrabah 40 yoom. Wa fi l-wakit da, Isa gaaʼid maʼa haywaanaat al-kadaade wa l-malaaʼika gaaʼidiin yisaaʼuduuh.

Awwal talaamiiz al-Masiih

14Wa Yahya karabooh fi l-sijin. Wa baʼad da, Isa macha fi daar al-Jaliil wa ballakh le l-naas bichaarat Allah. 15Wa gamma yuguul : «Al-wakit tamma wa mamlakat Allah garrabat. Tuubu min zunuubku wa aamunu be l-bichaara.»

16Wa wakit Isa raayikh fi khachum bahar al-Jaliil, hu chaaf naadum usmah Simʼaan maʼa akhuuh usmah Andareeyas. Wa humman hawwaatiin wa gaaʼidiin yazgulu charakhum fi l-bahar achaan yakurbu huut. 17Wa Isa gaal leehum : «Taʼaalu taabuʼuuni. Awwal intu gaaʼidiin takurbu huut wa laakin min al-yoom ana nisawwiiku takurbu al-naas le tiwassufuuhum derib Allah.» 18Wa tawwaali khallo charakhum wa gammo taabaʼooh.

19Wa Isa macha giddaam chiyya wa chaaf Yaakhuub maʼa akhuuh Yuuhanna awlaad Zabadi. Wa humman gaaʼidiin yiʼaddulu charakhum fi markabathum. 20Wa tawwaali Isa naadaahum. Wa humman gammo khallo abuuhum Zabadi fi l-markaba maʼa khaddaamiinah wa taabaʼo Isa.

Al-Masiih tarad cheetaan min naadum

21Wa Isa wa talaamiizah macho fi hillit Kafar Naahuum. Wa fi yoom al-sabt hu dakhal fi beet al-sala wa gamma yiʼallim al-naas. 22Wa l-naas alʼajjabo bilheen min taʼliimah achaan allamaahum be gudra al-Allah antaaha leyah wa ma misil kalaam al-ulama.

23Wa tawwaali, naadum waahid muchootin gamma fi beet al-sala. Wa indah cheetaan fasil. Wa hu aat 24wa gaal : «Ya Isa min al-Naasira ! Tidoor minnina chunu ? Jiit hini achaan tahlikna walla ? Ana naʼarfak. Inta bas al-khudduus al-Allah rassalah !» 25Wa laakin Isa kachcha leyah wa gaal : «Askut wa amrug minnah !» 26Wa l-cheetaan rama al-naadum wa hu gamma yifatfit wa aat be hiss haarr wa khalaas al-cheetaan marag minnah.

27Wa kulla l-naas alʼajjabo bilheen wa assaaʼalo ambeenaathum wa gaalo : «Haay ! Da chunu ? Indah taʼliim jadiid wa sulta lahaddi yaamur al-chawaatiin wa yasmaʼo kalaamah !» 28Wa tawwaali khabarah chatta fi kulla daar al-Jaliil.

Al-Masiih daawa naas katiiriin

29Wa tawwaali, Isa wa talaamiizah marago min beet al-sala wa andasso fi beet Simʼaan wa Andareeyas. Wa Yaakhuub wa Yuuhanna kula maʼaahum. 30Wa nasiibtah le Simʼaan raagde indaha wirde. Wa tawwaali ooro Isa beeha. 31Wa Isa macha leeha wa karab iidha wa gawwamaaha. Wa tawwaali al-wirde khallatha wa hi dayyafathum.

32Wa l-harraay wagaʼat khalaas wa l-makhrib ja. Wa jaabo le Isa ayyi naadum al-mardaan walla muchootin. 33Wa naas al-hille kulluhum lammo fi khachum al-beet. 34Wa hu daawa naas katiiriin al-maradhum chig chig wa tarad chawaatiin katiiriin. Wa hu amaraahum le l-chawaatiin ma yihajju achaan humman irfooh.

Al-Masiih raakh fi daar al-Jaliil

35Wa be fajur badri gubbaal al-harraay ma tatlaʼ, Isa gamma marag wa macha fi bakaan ma indah naas. Wa hu salla hinaak. 36Wa Simʼaan wa l-naas al-maʼaayah fattachooh. 37Wa ligooh wa hajjo leyah wa gaalo : «Kulla l-naas gaaʼidiin yifattuchuuk.» 38Wa hu radda leehum wa gaal : «Taʼaalu namchu fi l-hillaal al-aakhariin le niballikh leehum kalaam Allah. Achaan da bas ana jiit». 39Wa gamma raakh fi kulla daar al-Jaliil wa gaaʼid yibachchir al-naas fi buyuut al-sala wa yatrud al-chawaatiin.

Al-Masiih daawa al-mujaddim

40Wa raajil waahid indah jidaam ja le Isa wa barak giddaamah. Wa chahadah wa gaal : «Kan tidoor tachfiini, akiid inta tagdar wa ana nabga taahir.» 41Wa Isa hanna foogah wa madda iidah wa limis al-raajil al-indah jidaam wa gaal : «Nidoor nachfiik. Abga taahir !» 42Wa tawwaali, jildah biri min al-jidaam wa hu bigi taahir. 43Wa Isa rassalah wa amarah be kalaam gawi 44wa gaal leyah : «Asmaʼ. Ma tiʼoori naadum be l-cheyy al-bigi leek. Amchi wassif nafsak le raajil al-diin gabul. Wa gaddim dahiiye le Allah misil al-nabi Muusa amaraana beeha wa misil da, al-naas yaʼarfu kadar inta ligiit al-aafe wa bigiit taahir.»

45Laakin al-naadum da macha wa bada yihajji beyah le kulla l-naas wa chattat al-khabar. Wa achaan da, Isa ma gidir yadkhul fi ayyi hille kan al-naas yaʼarfu hu jaayi. Wa laakin hu gaʼad fi l-kadaade wa naas katiiriin macho leyah min kulli bakaan.

Currently Selected:

Markhus 1: ADT19

Highlight

Copy