Yaakhuub 5
5
Siyaad al-maal
1Intu siyaad al-maal, asmaʼo sameh ! Abku wa arjufu min al-azaab al-gaaʼid yarjaaku. 2Maalku da yatlaf wa khulgaanku, al-arda taakulhum. 3Dahabku wa fudditku, al-turaab yaakulhum. Wa maalku yachhad foogku wa yaakul jilidku misil al-naar. Intu laayamtu maal katiir laakin al-dunya gariib tikammil. 4Wa laakin intu ma kaffeetu ujrat al-khaddaamiin al-khadamo fi ziraaʼitku. Daahu gaaʼidiin yachku minku ! Wa l-naas al-gataʼo ziraaʼitku gaaʼidiin yasrakho wa Allah al-Gaadir simiʼ siraakhhum. 5Fi l-dunya ichtu fi l-hala wa fi l-raaha. Intu simintu misil al-bagar al-yisammunuuhum le l-juzur. 6Intu bas haakamtu wa kataltu abd Allah al-saalih. Wa hu ma yugumm didduku walla ?
Al-sabur wa jayyit al-Rabb
7Ya akhwaani, asburu lahaddi Rabbina Isa yaji. Fakkuru fi l-harraatiin. Humman yarjo al-khariif le yiteerubu al-khalla al-muhimme le hayaathum. Min teerabooha, yarjo almi yusubb le l-khalla tugumm wa yasburu lahaddi tanjad. 8Intu kula asburu wa agoodu saabtiin achaan jayyit Rabbina garrabat.
9Ya akhwaani, ma tilhaarajo ambeenaatku achaan Allah ma yihaasibku. Asmaʼo kalaami ! Al-yihaasibna da jaahiz giddaam al-baab. 10Ya akhwaani, chiilu masal hana l-anbiya al-kallamo be usum Allah. Fakkuru fi taʼabhum wa saburhum. 11Humman sabaro fi l-taʼab wa aniina nuguulu humman naas mubaarakiin. Intu simiʼtu be sabur Ayyuub wa taʼarfu kadar Allah antaah baraka fi l-akhiir achaan Allah hu al-Rahmaan al-Rahiim.
12Ya akhwaani gubbaal kulla cheyy, abadan ma tahalfu wa la be l-sama wa la be l-ard wa la be ayyi cheyy aakhar. Laakin kan tidooru tuguulu : «Aywa», guulu : «Aywa». Wa kan tidooru tuguulu : «La», guulu : «La» achaan al-azaab ma yaji foogku.
Al-duʼa wa l-chifa
13Kan naadum waahid minku taʼbaan, khalli yasʼal Allah. Wa kan naadum farhaan, khalli yachkur Allah be khine. 14Wa kan naadum minku mardaan, khalli yinaadi kubaaraat jamaaʼat al-muʼminiin achaan yaju yamsaho raasah be dihin be usum al-Rabb wa yasʼalo leyah Allah. 15Wa l-sala al-gaddamooha be l-iimaan tinajji al-mardaan. Wa Rabbina yachfiih wa kan indah zunuub kula, hu yakhfir leyah.
16Fi chaan da, aʼtarufu be zunuubku ambeenaatku wa asʼalo Allah ambeenaatku achaan yachfiiku. Duʼa hana naadum saalih indah gudra chadiide. 17Fakkuru fi Iliyaas. Hu insaani misilna bas. Hu saʼal Allah be chidde achaan al-matara ma tusubb.#5:17 Iliyaas saʼal Allah achaan al-matara ma tusubb Al-taariikh da talgooh fi 1 Muluuk 17:1; 18:41-45. Wa almi ma sabba lahaddi talaata sana wa nuss. 18Wa baʼad da, hu saʼal Allah battaan achaan almi yusubb. Wa khalaas, min al-sama almi sabba wa min al-ard al-maʼaach gamma.
19Ya akhwaani, kan naadum minku marag min al-derib al-sahiih wa naadum aakhar gabbalah, 20aʼarfu kadar al-naadum al-gabbal akhuuh min al-derib al-hawaan da, hu najjaah min al-halaak. Wa fi chaan da, Allah yakhfir le l-muznib zunuubah al-katiiriin.
Currently Selected:
Yaakhuub 5: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.