Yaakhuub 4
4
Al-naas al-yihibbu al-dunya
1Al-duwaas wa l-huraaj ambeenaatku jaayiin min ween ? Humman jaayiin min chahwaatku al-gaaʼidiin yihaarubu fi guluubku. 2Tidooru chokhol waahid wa ma talgooh. Tukhuttu eenku fi cheyy waahid wa ma talgooh wa tugummu taktulu. Wa tugummu tidaawusu wa tihaarubu wa ma talgo al-cheyy al-tidooruuh, da achaan intu ma saʼaltu Allah. 3Wa kan tasʼalo kula, ma talgo cheyy achaan niiyitku ma adiile wa intu tasʼalo le chahwaatku bas. 4Intu chaʼab munaafikhiin ! Ma taʼarfu kadar al-naas al-yihibbu al-dunya udwaan Allah ? Wa l-naadum al-yihibb al-dunya sawwa nafsah adu Allah.
5Hal tuguulu kalaam al-Kitaab ma indah maʼana kan buguul : <Allah indah mahabba ziyaada le l-ruuh al-khattaah foogna.> 6Al-niʼma al-Allah yantiiha leena kabiire ziyaada. Wa achaan da, al-Kitaab buguul : <Allah yugumm didd al-naas al-yistakbaro laakin hu yanti niʼma le l-naas al-yimaskunu nufuushum.>#4:6 Al-kalaam da talgooh fi Amsaal 3:34, hasab al-tarjama al-yuunaaniiye.
7Fi chaan da, asmaʼo kalaam Allah wa agiifu didd Ibliis wa Ibliis yajri baʼiid minku. 8Taʼaalu garrubu le Allah wa Allah yigarrib leeku. Intu al-muznibiin, naddufu iideeku min al-zanib. Intu al-galibku itneen, tahhuru nufuusku. 9Abgo haznaaniin fi chaan zunuubku wa asrakho wa abku baki chadiid. Battaan ma tadhako, akheer tabku. Ma tafraho, akheer tahzano. 10Maskunu nufuusku giddaam Allah wa khalaas, hu yarfaʼku.
Kalaam fasil
11Ya akhwaani, ma tuguulu kalaam fasil ambeenaatku. Ayyi naadum al-yatham akhuuh walla yuguul kalaam fasil foogah, hu da gaaʼid yatham wasaaya Allah wa yuguul kalaam fasil fooghum. Wa kan inta tuguul kalaam fasil fi l-wasaaya dool, khalaas inta ma gaaʼid titabbighum laakin sawweet nafsak haakim. 12Allah anta al-wasaaya wa hu bas al-haakim. Hu wiheedah bas al-yinajji wa hu wiheedah bas al-yahlik. Wa inta al-tatham akhuuk, inta ke yaatu ?
Al-istikbaar
13Wa asmaʼo kalaami, intu al-tuguulu : «Al-yoom walla ambaakir, aniina namchu fi hille waahide wa nagoodu hinaak sana waahide. Wa nitaajuru wa nalgo gurus katiir.» 14Wa laakin intu ma taʼarfu chunu al-yukuun leeku ambaakir. Hayaatku misil al-dukhkhaan al-yugumm wa tawwaali bas yabga ma fiih. 15Akheer tuguulu : «Kan Rabbina gaal aamiin wa antaana al-haya, nisawwu cheyy misil da aw misil da.» 16Wa laakin intu mustakbiriin wa kalaamku kalaam hana fachaar bas. Kulla l-istikbaar al-misil da, ma adiil. 17Wa kan naadum yaʼarif al-kheer al-waajib yisawwiih wa ma yisawwiih, hu bigi muznib.
Currently Selected:
Yaakhuub 4: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.