Takwiin 40
40
1Wa baʼad da, yoom waahid masʼuuliin itneen hana Firʼoon malik Masir sawwo zanib. Al-waahid masʼuul al-naas al-yantu charaab le l-malik. Wa l-aakhar masʼuul al-naas al-yisawwu khubza le l-malik. 2-3Wa l-malik ziʼil minhum wa sajanaahum. Wa l-sijin da gaaʼid fi beet kabiir al-hurraas hana l-malik. Wa fi l-sijin da Yuusuf kula makruub foogah. 4Wa kabiir al-hurraas hana l-malik wakkal Yuusuf achaan yakhdim leehum. Wa sawwo ayyaam fi l-sijin.
Yuusuf yifassir hilim al-masʼuuliin
5Yoom waahid, al-masʼuuliin al-itneen hana l-malik hilmo fi l-sijin be l-leel. Wa hilim hana ayyi waahid indah maʼana. 6Be fajur wakit Yuusuf ja leehum, chaafaahum gaaʼidiin mubarjaliin. 7Wa hu saʼalaahum : «Maalku al-yoom intu mubarjaliin ?» 8Wa humman raddo leyah wa gaalo : «Aniina hilimna wa ma fi naadum hini al-yifassir leena hilimna da.» Wa Yuusuf radda leehum wa gaal : «Al-Rabb bas yagdar yifassirah leeku. Hajjuuni be hilimku.»
9Wa masʼuul al-naas al-yantu charaab le l-malik hajja le Yuusuf be hilmah wa gaal : «Fi hilmi ana chift chadarat inab waahide. 10Wa l-chadara di indaha talaata furuuʼ wa tidoor tinawwir wa baʼadeen nawwarat wa sawwat anguud hana inab najiid. 11Wa indi fi iideeni kaas hana l-malik. Ana gataʼt min al-inab wa assart almiih fi l-kaas da wa maddeetah le l-malik.»
12Wa Yuusuf gaal leyah : «Daahu tafsiir hilmak. Al-talaata furuuʼ humman yiwassufu talaata yoom. 13Baʼad talaata yoom, al-malik yamurgak min al-sijin wa yigabbilak fi khidimtak al-awwal wa battaan timidd leyah al-kaas. 14Wa wakit gabbalt fi khidimtak, ma tansaani sawwi leyi al-kheer wa hajji beyi le l-malik achaan yamrugni min al-sijin. 15Achaan ana jaabooni be gu min balad al-Ibraaniyiin. Wa hini ana ma sawweet cheyy al-waajib yasjunuuni be sababah.»
16Wa wakit masʼuul al-naas al-yisawwu khubza le l-malik simiʼ Yuusuf anta tafsiir adiil, gaal leyah : «Ana kula hilimt. Fi hilmi ana chaayil fi raasi talaata gufaf hana khubza. 17Wa l-guffa al-foogaaniiye malaane be ayyi nafar hana khubza al-malik yiriidha wa l-tuyuur jo akalo al-khubza al-fi raasi.»
18Wa Yuusuf radda leyah wa gaal : «Daahu tafsiir hilmak. Al-talaata gufaf yiwassufu talaata yoom. 19Baʼad talaata yoom, al-malik yamurgak min al-sijin wa yachunguuk fi chadara. Wa l-tuyuur yaju yaakulu jildak.»
20Wa khalaas baʼad talaata yoom, al-malik ayyad hool hana waaluudtah wa sawwa hafla le kulla masaaʼiilah wa marag al-masʼuuliin al-itneen min al-sijin, giddaam masaaʼiilah. 21Wa gabbal masʼuul al-naas al-yantu charaab le l-malik fi khidimtah le yimidd leyah battaan al-kaas. 22Wa le masʼuul al-naas al-yisawwu khubza le l-malik, chanagooh. Wa khalaas be misil da, tafsiir hana Yuusuf ja fi derbah. 23Wa laakin masʼuul al-naas al-yantu charaab le l-malik ma fakkarah le Yuusuf, hu nisiih.
Currently Selected:
Takwiin 40: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
