Khalaatiya 6
6
Al-masʼuuliiye al-akhawiiye
1Ya akhwaani, kan waahid minku wagaʼ fi khata, waajib intu al-gawiyiin be gudrat al-Ruuh al-Khudduus tikhattumu leyah be nafas baarid wa tigabbuluuh fi l-derib al-adiil. Wa fakkuru le nufuusku achaan al-zanib al-yaji be l-tajriba ma yinnasir foogku intu kula. 2Wa fi wakit al-taʼab, assaaʼado ambeenaatku. Wa misil da, titabbugu wasaaya al-Masiih. 3Wa kan naadum sawwa nafsah aali min akhwaanah lahaddi ma yisaaʼidhum, be l-sahiih hu ma yisaawi cheyy wa khachcha nafsah.
4Khalli ayyi waahid yijarrib al-khidme al-hu zaatah yisawwiiha le l-Rabb. Wa misil da, hu yafrah be khidimtah wa ma yichiif khidme hana naadum aakhar. 5Achaan ayyi waahid masʼuul min nafsah.
6Kan naadum gaaʼid yiʼallimku kalaam Allah, waajib tantuuh min al-maal al-induku. 7Ma tukhuchchu nufuusku. Allah ma yinkhachcha. Al-cheyy al-naadum yiteeribah, da bas al-yalgaah. 8Kan naadum yitaabiʼ chahwaatah al-fasliin, hu yalga min chahwaatah al-halaak. Wa kan naadum yitaabiʼ al-Ruuh al-Khudduus, khalaas hu yalga min al-Ruuh al-Khudduus al-haya al-abadiiye. 9Achaan da, khalli nisawwu al-kheer daayman wa abadan ma naksalo minnah. Baʼadeen kan ma kisilna, nalgo minnah faayde. 10Wa achaan da, fi ayyi wakit indina fursa, khalli nisawwu al-kheer le kulla l-naas wa khaassatan le ahal al-iimaan.
Nihaayat al-jawaab
11Chiifu al-huruuf al-kubaar dool. Ana chilt al-galam wa ana zaati gaaʼid naktib al-kalaam da. 12Al-naas al-yidooru yisawwu al-tahuura chart leeku, humman yidooru rida min al-naas bas. Yidooru al-Yahuud ma yitaʼʼubuuhum battaan be sabab bichaarat moot al-Masiih fi l-saliib. 13Wa l-naas al-mutahhariin dool zaathum ma yitabbugu kulla churuut al-Tawraat. Laakin yidooru yitahhuruuku achaan yifaachuru le l-naas be jilidku al-mutahhar.
14Wa kan leyi ana, abadan ma nidoor nifaachir le l-naas be ayyi cheyy, illa be saliib hana Rabbina Isa al-Masiih. Wa l-saliib da, katal leyi chahwaati hana l-dunya wa beyah ana kula bigiit misil naadum mayyit le l-dunya. 15Achaan kan naadum mutahhar walla ma mutahhar kula, da ma muhimm. Al-cheyy al-muhimm da, ayyi naadum waajib yadkhul fi l-khaliige al-jadiide.
16Al-salaam wa l-rahma le kulla l-naas al-yitaabuʼu al-wasiiye di. Humman bas ummat Allah. 17Khalaas, khalli naadum waahid minku ma yibachtinni battaan achaan indi alam fi jildi min zaʼal al-naas wa di l-alaama al-tiwassif ana abd Isa be l-sahiih.
18Ya akhwaani, aleekum rahmat Rabbina Isa al-Masiih. Aamiin.
Currently Selected:
Khalaatiya 6: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
