Khalaatiya 5
5
Agoodu saabtiin fi l-hurriiye
1Al-Masiih sawwaana naas hurriin achaan niʼiichu fi l-hurriiye. Agoodu saabtiin fi l-hurriiye wa aabo ma tabgo battaan abiid. 2Fukku adaanku. Ana Buulus nuguul leeku kan tikhalluuhum yitahhuruuku, barakat al-Masiih ma tanfaʼ leeku abadan. 3Nachhad leeku battaan kadar ayyi naadum al-yikhalli nafsah yitahhuruuh be tahuurat al-Tawraat, waajib leyah yitabbig churuut al-Tawraat kulluhum ke. 4Intu al-tidooru tabgo saalihiin be tabbigiin churuut al-Tawraat dool, anfaragtu marra waahid min al-Masiih wa khalleetu minku niʼmat Allah.
5Laakin be gudrat al-Ruuh al-Khudduus, aniina nukhuttu achamna fi Allah al-yisawwiina saalihiin be sabab iimaanna al-gaaʼidiin nitmannooh be ziyaada. 6Achaan fi derib al-Masiih Isa, kan naadum mutahhar walla ma mutahhar kula, da ma muhimm. Al-cheyy al-muhimm da, hu al-iimaan be l-Masiih wa l-mahabba al-jaaye min al-iimaan da.
7Badeetu adiil fi derib al-Masiih. Kikkeef khalleetu naadum yamrugku min al-derib al-sahiih da ? 8Al-kalaam da ma jaayi min Allah al-gaaʼid yinaadiiku. 9Angarʼu ! Tawwaara chiyya bas takfi le tigawwim al-ajiine kullaha ke. 10Laakin al-Rabb antaani damaan leeku wa naʼarif kadar intu ma takhbalo fikir chig min fikirna. Wa l-naadum al-gaaʼid yibarjilku da, al-hukum yaji foogah kan yabga yaatu kula.
11Ya akhwaani, kan ana zaati gaaʼid niʼallim al-naas kadar al-tahuura waajbe, maala al-Yahuud gaaʼidiin yitaʼʼubuuni ? Kan awwal ana niʼallim be l-tahuura wa ma nibachchir be l-saliib, naadum ma yalga muchkila. 12Wa hassaʼ le l-naas al-gaaʼidiin yibarjuluuku be l-tahuura dool, khalli yikhassu nufuushum marra waahid !
Derib al-Ruuh al-Khudduus
13Ya akhwaani, Allah naadaaku achaan yidoor intu tiʼiichu fi l-hurriiye. Laakin ma tisawwu al-hurriiye di fursa le titaabuʼu chahwaatku al-fasliin. Akheer takhdumu le akhwaanku be mahabba. 14Achaan kulla churuut al-Tawraat, zibdithum tinlagi fi wasiiye waahide wa hi : <Hibb akhuuk misil tihibb nafsak.>#5:14 Al-kalaam da talgooh fi Laawiyiin 19:18. 15Laakin kan tilkhaalafo ambeenaatku wa tiddaawaso misil kulaab, khalaas fi l-akhiir tilʼaakalo marra waahid.
16Nuguul leeku taabuʼu Allah be derib al-Ruuh al-Khudduus wa misil da, ma titaabuʼu chahwaatku al-fasliin. 17Achaan al-cheyy al-yiriidah galib al-insaan chig min al-yiriidah al-Ruuh al-Khudduus. Wa l-cheyy al-yiriidah al-Ruuh al-Khudduus chig min al-yiriidah galib al-insaan. Al-itneen dool yiddaawaso ambeenaathum achaan yadharooku min al-cheyy al-tidooru tisawwuuh. 18Wa kan al-Ruuh al-Khudduus gaaʼid yuguudku, intu ma gaaʼidiin tihit churuut al-Tawraat.
19Wa khalaas, al-zunuub al-yaju min galib al-insaan maʼruufiin. Humman al-zina wa l-khabaasa wa l-fasaad 20wa ibaadat al-asnaam wa l-sihir wa l-huraaj wa l-duwaas wa l-husud wa l-khabiine wa l-khilaaf wa l-mukhaasamaat wa l-tafrikha 21wa l-tamaʼ wa l-sakar wa l-safaaha wa cheyy aakhar al-misilhum. Nuguul leeku misil awwal gultah leeku, al-naas al-yisawwu al-achya dool ma yawrusu cheyy fi mamlakat Allah.
22Laakin misil al-chadar yalda iyaal, daahu iyaal al-Ruuh al-Khudduus humman al-mahabba wa l-farah wa l-salaam wa l-sabur wa l-galib al-abyad wa l-kheer wa l-amaan 23wa l-nafas al-baarid wa sabbitiin al-nafs. Al-achya dool, ma fi chart waahid didduhum. 24Wa l-naas al-bigo naas hana l-Masiih Isa khatto chahwaathum al-fasliin fi l-saliib wa kataloohum. 25Wa kan niʼiichu be gudrat al-Ruuh al-Khudduus, waajib nuruukhu be gudrat al-Ruuh al-Khudduus. 26Khalli ma nistakbaro wa la nizzaaʼalo ambeenaatna wa la nilhaasado.
Currently Selected:
Khalaatiya 5: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.