Khuruuj 33

Allah amar al-chaʼab yarhalo

1Wa baʼad da, battaan Allah gaal le Muusa : «Amchi min hini inta wa l-chaʼab al-inta maragtuhum min balad Masir. Wa gummu amchu le l-balad al-ana halaft le Ibraahiim wa Ishaakh wa Yaakhuub wa gult nantiiha le zurriiyithum. 2Wa ana nirassil giddaamak malak wa natrud al-Kanʼaaniyiin wa l-Amuuriyiin wa l-Hittiyiin wa l-Firizziyiin wa l-Hiwwiyiin wa l-Yabuusiyiin. 3Wa baʼad da, intu tamchu le l-balad al-malaane be l-laban wa l-asal. Wa laakin ana ma namchi maʼaaku achaan ma naktulku fi l-derib be sabab intu chaʼab raasku gawi.»

4Wa wakit al-chaʼab simʼo al-kalaam da, bigi leehum gaasi wa gammo yabku wa naadum minhum libis ziintah kula ma fiih. 5Wa da achaan Allah gaal le Muusa : «Guul le Bani Israaʼiil : ‹Intu chaʼab raasku gawi. Kan ana macheet maʼaaku le wakit chiyya kula, naktulku. Hassaʼ da, sillu minku ziinitku. Wa ana nichiif kikkeef nisawwi leeku.›»

6Wa khalaas min al-yoom da fi jabal Huuriib, Bani Israaʼiil sallo ziinithum wa ma libsooha battaan.

Kheemat al-ijtimaaʼ

7Wa ayyi wakit kan al-chaʼab nazalo fi bakaan, Muusa yichiil al-kheema wa yabniiha barra baʼiid min al-fariig. Wa Muusa sammaaha kheemat al-ijtimaaʼ. Wa ayyi naadum kan dawwar yasʼal Allah, yamchi leeha barra min al-fariig. 8Wa fi ayyi wakit kan Muusa marag maachi le l-kheema di, kulla l-chaʼab yagiifu ayyi waahid fi khachum baab kheemtah wa yichiif Muusa lahaddi yadkhul fi kheemat al-ijtimaaʼ. 9Wa wakit Muusa yadkhul fi l-kheema di, amuud al-sahaab yanzil wa yagiif fi khachum baab al-kheema. Wa fi l-bakaan da, Allah yikallim maʼa Muusa. 10Wa wakit kulla l-chaʼab yichiifu amuud al-sahaab waagif fi baab al-kheema, kulluhum yasjudu ayyi waahid fi khachum baab kheemtah. 11Wa fi l-bakaan da, Allah yikallim maʼa Muusa khachum be khachum misil naadum yikallim maʼa rafiigah. Wa kan Muusa gabbal le l-fariig kula, musaaʼidah al-sabi al-usmah Yachuuʼ wileed Nuun yagood daayman fi l-kheema.

Allah waaʼad Muusa

12Wa Muusa gaal le Allah : «Inta dawwart minni ana nuguud al-chaʼab da. Wa laakin ma arraftini yaatu al-tirassilah maʼaayi. Wa battaan inta gult leyi : ‹Ana bas azaltak wa ridiit leek.› 13Wa kan sahiih ke inta ridiit leyi, arrifni derbak achaan naʼarfak wa inta tarda leyi daayman. Wa fakkir fi l-umma di achaan hi chaʼabak.» 14Wa Allah gaal : «Ana zaati namchi giddaamak wa be da, inta ma tihimm.» 15Wa Muusa gaal : «Kan inta be nafsak ma tamchi maʼaana, ma tamrugna min hini. 16Wa kan inta ma tamchi maʼaana, kikkeef naadum yagdar yaʼarif kadar inta ridiit leyi wa le chaʼabak ? Wa kikkeef yagdaro yifannuduuna ana wa chaʼabak min kulla chuʼuub al-ard al-aakhariin ?» 17Wa Allah gaal le Muusa : «Al-cheyy al-inta talabtah da, ana nisawwiih achaan ana ridiit leek wa ana bas azaltak.»

18Wa Muusa gaal : «Khalliini nichiif azamatak.» 19Wa Allah gaal : «Niwassifak kulla kheeri wa niʼaalin leek usmi hu Allah. Wa ana nihinn ayyi naadum al-nidoor nihinnah wa narham ayyi naadum al-nidoor narhamah. 20Wa laakin ma tagdar tichiif wijhi achaan kan insaan chaaf wijhi, battaan ma yiʼiich.»

21Wa Allah gaal battaan : «Daahu fi bakaan gariib leyi fi l-hajar. Agiif foogah. 22Wa wakit azamati tufuut giddaamak, nukhuttak fi faragat al-hajar wa nikhattiik be iidi. Wa baʼad azamati tufuut khalaas, 23ana narfaʼ iidi wa tichiif azamati be wara. Achaan wijhi, naadum ma yagdar yichiifah.»

Currently Selected:

Khuruuj 33: ADT19

Highlight

Copy