1 Butrus 5

Wasaaya le l-kubaaraat

1Wa nidoor niwassi kubaaraat jamaaʼat al-muʼminiin al-maʼaaku. Ana kula kabiir misilhum. Wa ana chaahid le taʼab al-Masiih wa battaan muchaarik fi gudrat al-Masiih al-majiide al-tibiin gariib. 2Asraho be l-muʼminiin al-misil khanam achaan Allah kallafaaku beehum misil ruʼyaan. Wa chiilu al-masʼuuliiye fooghum ma misil jabarooku laakin be niiyitku giddaam Allah wa ma achaan tidooru minhum riba al-ma waajib laakin chiilu al-masʼuuliiye di be farah. 3Wa ma tamulku be chidde fi l-naas al-Allah kallafaaku beehum misil ruʼyaan laakin abgo leehum masal lahaddi yitaabuʼu deribku. 4Wa wakit al-Masiih kabiir al-ruʼyaan yibiin, hu yantiiku al-taaj al-majiid al-jamaalah abadan ma yikammil.

Al-maskana wa l-iimaan al-saabit

5Wa leeku intu al-chabaab kula, asmaʼo adiil kalaam kubaaraatku. Wa nuguul leeku kulluku, maskunu nufuusku ambeenaatku al-waahidiin le l-aakhariin. Achaan Allah yugumm didd al-naas al-yistakbaro laakin hu yanti niʼma le l-naas al-yimaskunu nufuushum.#5:5 Al-kalaam da talgooh fi Amsaal 3:34, hasab al-tarjama al-yuunaaniiye. 6Khalaas, maskunu nufuusku giddaam gudrat Allah wa fi l-wakit al-muwaafig, hu bas yarfaʼku. 7Kulla cheyy al-tihimmu beyah, khalluuh le Allah achaan hu yichiil masʼuuliiyitku.

8Khuttu baalku wa agoodu waaʼiyiin achaan aduuku Ibliis gaaʼid yihawwig foogku misil duud al-gaaʼid yikirr wa yifattich naadum le yaakulah. 9Agoodu saabtiin fi iimaanku wa agiifu didd Ibliis. Aʼarfu kadar akhwaanku fi ayyi bakaan fi l-dunya gaaʼidiin yahmalo nafs al-taʼab misilku.

10Taʼabku yagood battaan wakit chiyya. Wa laakin Allah indah rahma kabiire wa hu naadaaku achaan tichaaruku fi majdah al-abadi be alaakhitku maʼa Isa al-Masiih. Wa Allah hu zaatah yisabbitku wa yigawwiiku wa yantiiku gudra wa ma tagaʼo battaan. 11Wa l-muluk waajib leyah hu bas ila l-abad. Aamiin.

Nihaayat al-jawaab

12Wa ana katabt leeku al-jawaab al-gisayyir da maʼa akhuuna Siila wa nachhad leyah, hu akhu saadikh. Wa katabtah leeku achaan nichajjiʼku wa nachhad leeku kadar induku niʼmat Allah al-sahiihe wa intu gaaʼidiin saabtiin foogha. 13Wa l-muʼminiin hini fi Baabil#5:13 Baabil Zamaan madiinat Baabil hi aasima hana l-naas al-ma yaʼarfu Allah. Wa hini al-usum da yiwassif madiinat Rooma. al-Allah azalaahum misil hu azalaaku, humman yisallumuuku. Wa wileedi Markhus yisallimku kula. 14Assaalamo ambeenaatku be salaam al-mahabba.

Al-salaam aleekum kulluku intu al-induku alaakha maʼa l-Masiih.

Currently Selected:

1 Butrus 5: ADT19

Highlight

Copy