Táre-woo-ŋa 8
8
Táre ŋɔlaa maa tɛ̂i
1Kákelee ka káwoli tɔ́ɔ. Táre a tóli ƃôi.
Mɛni ŋá-kaa káa tɔɔ̂-ni gɛ́ kú tòli a ɣelêi-pere.
2Gáa tɔɔ̂-ni pono ŋá ǹyée-ŋai tôŋ su,
bere-ŋai kɔlɛ, bere tãɣaŋ-ŋai lá.
3Gáa tɔɔ̂-ni daa-leei ŋɔsiɣãŋ lá ƃɛ́i ǹûai da tɛ̂ɛ naa díkɛ tɛ̀ daai sui.
Naa ƃé gáa naa gɛ́ tóli ƃò a ɣelêi pere ǹyɛɛi,
4“Káa ƃé ŋa kátôlii, óo nûa,
ŋ́oo káa ǹúui kélee mɛni ma.
5Káai káfa mɛni ŋá kàa a ǹɛ́lɛɛi, ka mɛni-ŋa-kaa maa kɔ́ri.
Káai táre fé káŋuŋ sui, ka dáre wooi mɛ́ni.
6Ká káwoli tɔ́ɔ, ŋa pâi mɛni kpânaŋ ƃôi kâa.
M̀ɛnii kélee ŋa pâi môi káai, zãâi.
7Tɔ̃yâ ƃé ŋa mò.
Fé lɛ́ɛ-mɛni wɛ́li ní.
8M̀ɛnii kélee ŋa mòi, zãâi.
Wôya-mɛni fé zu kpaa máŋ núu pɛlɛ mɛ̂ni.
9Diai da mɛni ŋá kaai, ŋ́oo kélee su ponoɔ̂i díŋɛi.
Diai dítâreɛi, ǹɛ̂lɛɛi dímɛni ma.
10Ŋásɛŋ-lɛɛi síɣe káne pɔɔ ŋá,
táre síɣe gôo lɛ́lɛɛ pɔɔ ŋá.
11“Táre lɛ̂lɛɛi é tɛ́ɛ kɔni sɔ̃ɔ kpanaŋɔɔ-ŋa dîa.
Sɛŋ lɛ́lɛɛ kélee da fé naa ya pɔ̂ri gɔɔ̂ni ma.
12Ńyãa ƃa Táre. Ŋa pere sã́a kɔ́lɔŋ.
Ŋá ƃɛ́i kɔ́lɔŋ mɛni kɔ́lɔŋɔɔ káa naa da mɛni ŋá-kaa a ǹɛ́lɛɛi.
13Ǹúui a yâo Ɣâla Yâwɛɛ mai, a mɛni nyɔ́mɔɔ kpɔ̀ara.
Ŋa yoŋka kpɔ̀ara, ŋɛi-tɛ, ŋwana-lɔ̂ɔ, bɛ́lɛɛ lɛ́ɛ ma.
14Lia-woo káa ńa da mɛni ŋá-teɛɛ a zã́a,
mɛni ŋá-kaa bɛlɛ́ɛ wála-wala-laa ma.
15Ńzârai ƃé gâloŋ-ŋai da tíi kɛ̀ la.
Ńzârai ƃé ǹúu láa túɛ-ƃelai da mɛni ŋá tèe la a zã́a.
16Ńyãa ƃa wála-wala-laa tɛ̀ɛ gâloŋ-ŋai pɔ́,
da diai kélee díkaa a gɔmɛnɛi ŋuŋ-tuɛ-ƃelai.
17Diai ŋ́wɛlinii, ŋá díwɛli-ni,
diai da ŋ́gɔ̂rii, da ŋ́gâa.
18Tɔɔ-sãa da ƃaa-kɛ-maa káa ńyêei a gɛɛ ŋá dɛɛ núu pɔ́,
tɔ̃yâ-tua kɛ́ɛ, é pɛ́lɛ wɔ́lɔ-wɔlɔ da wɔlɔ-wɔlɔ tɔɔ-sãa ma.
19Zɛŋ ƃa zɔlɔ ƃò ńyêei ǹɛ̂lɛɛi é tɛ́ɛ gôo lɛ́lɛɛ ma,
ǹɛ́lɛɛ ŋɔ́nɔ é tɛ́ɛ káne lɛ́lɛɛ ma.
20Ŋa sîa tɔ̃yâ-laa ŋɔperei ma,
ŋ́gɛ lɛ̀ɛ mɛni sãa kɛ́ɛ ŋɔperei ma.
21Ŋa tɔɔ-laa tɛ̀ɛ diai pɔ́ dí ŋ́wɛlini, ŋa dípɛrɛi láa fɛ́ɛ a tɔɔ-sãa.
22“Ɣâla Yâwɛɛ è ŋ́gbɛ̀tɛ a maa-ŋuŋ,
tãi è ŋɔtíi kɔ́ɔ pìlaŋ lai.
23È ŋ́gbɛ̀tɛ a maa-ŋuŋ
é lɛ́ɛ pâi ŋ̀éniɛi kpɛtɛ̂i. È ŋ́gbɛ̀tɛ é lɛ́ɛ pâi ǹɔii kpɛtɛ̂i.
24È ŋ́gbɛ̀tɛ yúo-ŋa dí lɛ́ɛ pâi kɛ̂i naa,
da ǹya-toŋ-ŋai ƃɛ́i yá a kûla naai.
25È ŋ́gbɛ̀tɛ é lɛ́ɛ pâi ǹyée kpaya-kpayai
da ǹyée pɛlɛ-pɛlɛi kpɛtɛ̂i. 26Ɣâla è íkpɛ̀tɛ a maa-ŋuŋ é lɛ́ɛ pâi ǹɔii da ƃɛ́i ǹûai da tíi kɛ naa kpɛtɛ̂i,
kpaa máŋ é lɛ́ɛ pâi ǹɔii kpɛtɛ pɔ̂rɔi maa-ŋuŋ kpɛtɛ̂i.
27Tãi Ɣâla Yâwɛɛ è ŋ̀elei kpɛ̀tɛ la yúo mɛi,
ŋá kɛ̀ naa.
28Tãi Ɣâla Yâwɛɛ è ŋ̀ele-kɔlɔŋ kolei kɛ̀ la ŋ̀elei sui, tãi è yúo ŋɔya-toŋ-ŋai ma lá ƃò lai, 29tãi è yúo ŋɔkôya lɛ̀ la a gɛɛ vé tɛ̀ɛ naai, tãi è ǹɔii ŋɔsonôŋ-su-kɔni-ŋai pìlaŋ lai, ŋá kɛ̀ naa.
30Ŋá kɛ̀ gɔlɛ ma a ŋɔkpɔŋ maa-nuu ḿaa mɛ̂ni kɛ́ ńii làa a ɣele kélee.
Ŋá kɛ̀ naa ŋ́gɛ lii nɛ̃ɛ kùla.
31Ŋá lii-nɛ̃ɛ kùla ŋ̀éniɛi mɛni ma,
ńii láa núu-kpune mɛni ma.
32“M̀ɛni ma, ńônii, ka ŋ́oo mɛni.
Lûwa káa diai dîa da sîa ŋáperei mai.
33Ka ŋásɛŋ-lɛɛi síɣe, ká táre zu,
káfe tèe bôlu.
34Lûwa káa diai dîa da ŋ́oo mɛni,
dí kɛ́ ƃò tɔɔ̂ni ŋákpôŋ lá a ɣele kélee, dí kɛ́ ḿaa kpɛ̂ŋ ŋápɛrɛi lai.
35Diai da ŋ́gɔ̂ri dí ŋ́gaai, da fúlu-laa sɔlɔ ƃô,
Ɣâla Yâwɛɛ líi láa dímɛni ma.
36Kɛ́lɛ diai dífe pâi ŋ́gâai,
da díkpîŋ ŋwàna, diai kélee ŋ́gbɔarâi, díkɛ saa wɛ̂li.”
Currently Selected:
Táre-woo-ŋa 8: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
