Táre-woo-ŋa 28
28
1Ŋwana-lɔ̂ɔ-nuu a pû à nɛ̃ɛ mà núu fé kɛ̀ gbɛ̂i, kɛ́lɛ tɔ̃yâ-nuu lii-kpeleɛ̂i yɛ̂ɛ yala-sulu.
2Ǹɔii-ƃelai da sɔnyɔ̂ŋ kɛ̀, kâloŋ támaa a kɛ̂ dímɛi, kɛ́lɛ à kɛ̀ tɔ̃yâ kâloŋ sã́a lɛ́lɛɛ à kɛ̀ lɔii mɛi, maa lɔii a kɛ̂ a ŋ̀wála-walaa gɛ́ ƃûu ƃò.
3Ŋwana-lɔɔ kâloŋ nyii a gôlo-ƃelai lûaŋ, gáa yɛ̂ɛ tuna nyii a sí-sãa su kàrai.
4Diai dífa dɔ̂ŋ mɛi kâai, gáa yɛ̂ɛ da kɛ̀ ŋwana-lɔɔ-ƃelai láa maa tɛ̂i, kɛ́lɛ dɔ̂ŋ-mɛi-kaa-ƃelai da tɔ̂ɔ ŋ̀wana-lɔ̂ɔ-ƃelai dîa.
5Ŋwana-lɔ̂ɔ-nuu fé tɔ̃yâ kɔ́lɔŋ, kɛ́lɛ diai da Ɣâla Yâwɛɛ kɔ̀rii, dí dɔ̃yâi kélee kɔ́lɔŋ.
6Kôlo-nuu sã́a lɛ̂lɛɛi é tɛ́ɛ tɔɔ-nuu ma nyii dûa-pere fé sã́a nii.
7Lôloŋ nyii a dɔ̂ŋ mɛi kâai, gáa a táre-loloŋ, kɛ́lɛ ǹúui gáa m̀ii-sɛŋ-wɛlii-ƃelai pôlui, a ǹâŋ ŋùmɛ.
8Ǹúui a ŋɔtɔɔ-sãai da pù ma a gêeni láa ŋɔkpa-sɛŋ-kaoi mai, a ŋɔtɔɔ-sãai ŋá tɛ̀ ma ǹúui mɛni ma a kôlo-ƃela malôŋ kaai.
9Ǹúui va ŋ̀óli tɔ̀ɔ dɔ̂ŋ mai, ŋɔɣâla fɛli-wooi ƃɛlɛ kpɛɛ̂i Ɣâla koi.
10Ǹúui a tɔ̃yâ-nuu kɛ̀ é sɔnyɔ̂ŋ kɛ́i, a pîli gbɔ́ɔi ƃare ŋá. Tɔ̃yâ-nuu a fela-fei lɛ́lɛɛ sɔlɔ ƃô.
11Tɔɔ-nuu târeɛi gbîŋ ŋɛ́i, kɛ́lɛ kôlo-nuu nyii a mɛni ŋá kâai, é gɔ́lɔŋ a gɛɛ dɔɔ-nuui kpîŋ fé fáre-ni.
12Tɔ̃yâ-nuu à kâloŋ-laa sɔlɔ ƃô, núu kélee líi a nɛ̃ɛ. Kɛ́lɛ wôya-nuu a wála-wala sɔlɔ ƃô, ǹûai da kɛ̂ dí loôi.
13Ǹúui a ŋɔsɔnyɔ̂ŋ mɛi pɛ̂lɛi, va mɛni lɛ́lɛɛ sɔlɔ ƃô, kɛ́lɛ ǹúui a ŋɔsɔŋyɔ̂ŋ ƃò, gɛ́ bôlu tɔ̀ɔ mài, Ɣâla a m̀alôŋ kàa.
14Lûwa káa ǹûui ma a yâo Ɣâla Yâwɛɛ ma a ɣele kéleei, kɛ́lɛ ǹúui ŋuŋ su kpanaŋɔɔ̂i, a pîli mɛni kpɔ̂lu su.
15Ŋwana-lɔɔ kaloŋ nyii gáa gôlo-ƃelai mɛi, gáa yɛ̂ɛ yala-sulu kpeɣeɛɛ kpaa máŋ ditala nyii puru káa mai.
16Kâloŋ nyii táre fé ŋuŋ sui, gáa a núu-mɔ̃lɛ-nuu, kɛ́lɛ ǹúui vé wôya-mɛni wɛlii nii, a tûa ɣele ma.
17Núui a núu pàai, tɔɔ é pú é lɛ́ɛ naa é sáa. Núu da fé kpɔ̀ŋ mà.
18Ǹúui a tûa a zã́ai a pâi ƃâloi, kɛ́lɛ ŋ̀wana-lɔ̂ɔ-nuui a pâi toôi lôai.
19Tíi-kpanaŋ kɛ́-nuu a mii-sɛŋ támaa sɔlɔ ƃô, kɛ́lɛ ǹúui a pîlaŋ mɛni kpɛ́ni-kpɛni pôlui, a pâi kôloi.
20Tɔ̃yâ-nuu a pâi lûwa támaa sɔlɔ ƃôi, kɛ́lɛ ǹúui tɔɔ-laa lii-sɛlɛŋ káa mai, a pâi tɔŋ-kpɛ-maa sɔlɔ ƃôi.
21M̀aa fé nɛ̃ɛ ní núu é ŋaa-kɔlɛ mɛni kɛ́. Kɛ́lɛ nûa da mɛni nyɔ́mɔɔ kɛ̀ a gɛɛ dí mii-sɛŋ kpua sɔlɔ ƃó.
22Ŋɛi-kpala-nuu a tɔɔ-laa kɔ̀ri a maa-felaa, vé gɔ́lɔŋ a gɛɛ kôlo-laa a pâi pâi bɔ́.
23Ƃa íƃarâŋ-nuu ŋɔpɔara-maai lɛ̀ mà, a pâi ísɛɣɛi fêi é tɛ́ɛ la laa-maa-tɛ kpɛ́ni-kpɛni ma.
24Ǹúui a ǹâŋ kpaa máŋ ǹee kɔ̂liŋ ŋùmai, é m̀ó ǹyɛɛ, “Mɛni nyɔ́mɔɔ fêi,” maa núui tí káa a ŋúma-nuu.
25Sɛŋ maa-lii tée-nuu a laa-saa tèe, kɛ́lɛ ǹúui a làa a Ɣâla Yâwɛɛi, a kpɔŋ-maa sɔlɔ ƃô.
26Ǹúui a làa nɔ́ a gbîŋ tarei, gáa a núui táre lɛ́lɛɛ fé ŋuŋ su, kɛ́lɛ ǹúui a sîa a táre-perei a pâi ƃâloi.
27Ǹúui a kpɔŋ-maa tɛ̀ɛ kôlo-nuu pɔ́i, sɛŋ da kôlo fé pâi toôi ma, kɛ́lɛ ǹúui a kôlo-nuu ŋɛ́i kpàlai, náɣaŋ a pâi kɛ̂i ma.
28Tãi ŋwana-lɔɔ-ƃela da kɛ̂ la lɔii mɛi, kôlo-ƃela da dílôo. Kɛ́lɛ tãi da díwala-wala-laai kùla la díyêei, tɔ̃yâ-ƃela da kɛ̀ a dítamaa.
Currently Selected:
Táre-woo-ŋa 28: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
