Táre-woo-ŋa 10
10
Saloma ŋɔtáre-woo-ŋai
1Saloma ŋɔtáre-woo-ŋai ká ŋí. Táre lôloŋ a ǹâŋ líi nɛ̃ɛ, kɛ́lɛ lôloŋ nyii táre fé ŋuŋ sui, a ǹee líi sòli.
2Tɔɔ-laa sɔlɔ ƃóɔɔ wôya-pere su fa kpɔŋ-maa tɛ̀ɛ ípɔ, kɛ́lɛ tɔ̃yâ tua-kɛɛ a íkùla saa yêei.
3Ɣâla Yâwɛɛ fa nɛ̀ɛ naa puru é tɔ̃yâ-nuu kɛ́, kɛ́lɛ va wôya-sɛŋ wɛli-nuu líi làa.
4Nyɛ̃ŋ-nyɛŋ a pâ a kôlo-laa, kɛ́lɛ tíi-kpanaŋ kɛ́ɛ a pâ a tɔɔ-laa.
5Táre nuu a ŋɔsí-sãai mbá ŋá tɛ̀ ma a sí-sãa ƃá kula tãi, kɛ́lɛ núui nyii a nyîi a sí-sãa ƃá kula tãi a pâ a ŋumɛ gbîŋ pɔ́.
6Lûwa a pà tɔ̃yâ-nuu pɔ́, kɛ́lɛ ŋɔsɔnyɔ̂ŋ-nuu a ŋɔkili-ŋa sîa nyɔ́mɔɔi mɛi pɛ̂lɛ a ǹóno-woo.
7Tɔ̃yâ-nuu kɛ́-mɛni a lɛ̂ɛ núu kíli ŋá yɛ̂ɛ lûwa, kɛ́lɛ da nîa wôya-nuu láa ma.
8Táre-nuu a dɔ̂ŋ wóo sìɣe, kɛ́lɛ ǹúui nyii a ƃoo lôno kɛ̂i, a gbîŋ kàra.
9Ǹúui a sîa a tɔ̃yâ-perei ŋuŋ ma ƃôɔi, kɛ́lɛ ŋ̀ôya-nuui pôlu a pâi kulâi.
10Ǹúui a m̀arâŋ-nuu ŋɔsɔnyɔ̂ŋ mɛi pɛ̂lɛi, a pâ a mɛni kpɔ̂lu, kɛ́lɛ ǹúui a m̀arâŋ-nuu ŋɔsɔnyɔ̂ŋ ƃò mai, a pâ a lii-see.#10:10 Gɔlɔ pɔ̂lɔi dɔnɔ è mò ǹyɛɛ, “Kɛ́lɛ ǹúui nyii a ƃoo lôno kɛ̂i, a gbîŋ kàra.”
11Tɔ̃yâ-nuu lóno-woo a pâ a fúlu-laa, kɛ́lɛ ŋwana-lɔ̂ɔ-nuu lóno-woo a ŋɔsɔnyɔ̂ŋ mɛi pɛ̂lɛ.
12Kpɔara a pâ a laa-saa, kɛ́lɛ wɛli-kɛ-maa a pâ a su-mɛni lɛ̂ɛ.
13Ƃa táre-nuu kɔ̀lɔŋ ǹóno-woo ma, kɛ́lɛ tɔŋ kpɛ́-maa káa ƃoo-nuu mɛni ma. 14Táre-nuu a ŋɔtárei da pù ma, kɛ́lɛ ƃoo-lono kɛ́-nuu wóo a pâ a su-kara a maa félaa.
15Tɔɔ-nuu ŋɔtɔɔ-sãa káa yɛ̂ɛ taa-lee nyii siɣãŋ tínaŋɔɔ mai, kɛ́lɛ kôlo-laa a pâ a su-kara kôlo-nuu pɔ́.
16Mɛni lɛ́lɛɛ kɛ́ɛ a pâ a fúlu-laa, kɛ́lɛ sɔnyɔ̂ŋ tua kɛ́ɛ a sɔnyɔ̂ŋ su kɛ̂tɛ.
17Ǹúui a ŋ̀óli tɔ̀ɔ m̀arâŋ-nuui ŋɔlia-woo mai, a sîa fúlu-laa pere su, kɛ́lɛ ǹúui vá ǹyée sèe ŋɔpɔara mɛni-maai mui, a pɔ̂ara berei ma.
18Ǹúui a kpɔara mɛi pɛ̂lɛi, gáa a lɛ́ɛ-nuu, ǹyaŋ ǹúui nyii a m̀arâai láa kàrai, gáa a ƃoo-nuu.
19Lóno támaa a pâ a sɔnyɔ̂ŋ, kɛ́lɛ táre-nuu fa lóno támaa kɛ̀.
20Tɔ̃yâ-nuu lóno-woo káa yɛ̂ɛ káne, kɛ́lɛ ŋwana-lɔ̂ɔ-nuu ŋɔkili-ŋa sîai káa nɔ́ kpɛ́ni-kpɛni.
21Tɔ̃yâ-nuu lóno-woo a kpɔŋ-maa tɛ̀ɛ núu támaa pɔ́, kɛ́lɛ ƃoo-nuu lóno-woo a gbîŋ pàa.
22Ɣâla Yâwɛɛ ŋɔlûwai ƃa pâ a tɔɔ-laa, kɛ́lɛ tíi kpanaŋ kɛ́ɛ fêi da mɔ̃lɛ-laa.
23Ƃoo-nuu a lii-nɛ̃ɛ kùla a ŋɔƃoo tûai, kɛ́lɛ táre-nuu a lii-nɛ̃ɛ kùla a tɔ̃yâ kɛ́ɛ.
24Zɛŋ tɔ̃yâ-nuu a ŋ̀wɛ̂lii, a zɔlɔ ƃò, kɛ́lɛ zɛŋ ŋwana-lɔ̂ɔ-nuu a yâo mai, ǹyaa nɔ́ ƃé a zɔlɔ ƃô.
25Fãa kɛ́tɛ à tɛ̀ɛ, a ŋ̀wana-lɔ̂ɔ-nuui tôo, kɛ́lɛ tɔ̃yâ-nuu a tɔɔ nɔ́ dɔɔ̂i.
26Yɛ̂ɛ berei ŋwã̂ai kpona a ínyiŋ ŋá kpòna la kpaa máŋ luru a íŋɛi-ya pù lai, bere nɔ́ ƃé nyɛ̃ŋ-nyɛŋ-nuu a pâi gɛ̂i la a yá à kɛ̀ ƃà m̀arê kɛ̀ a gɛɛ é mɛni da kɛ́ yɛ̂.
27Ƃa yào Ɣâla ma, ífulu-laai su a kôya, kɛ́lɛ ŋwana-lɔ̂ɔ-nuu a pâi saâi ŋɔtãi túɛ.
28Tɔ̃yâ-nuu ŋɔkili-kɛ-zui a pâ a lii-nɛ̃ɛ, kɛ́lɛ ŋwana-lɔ̂ɔ-nuu ŋɔkíli-kɛ-zui káa nɔ́ kpɛ́ni-kpɛni.
29Yâwɛɛ a tɔ̃yâ-nuu maa kɔ̃ɔ, kɛ́lɛ a ŋwana-lɔ̂ɔ-nuu su kàra.
30Tɔ̃yâ-nuu a pâi lɛɛ̂i nɔ́ dɔɔ̂i, kɛ́lɛ da pâi ŋwana-lɔ̂ɔ-nuui kulâi ǹɔii ma.
31Tɔ̃yâ-nuu lóno-woo a pâ a táre, kɛ́lɛ da pâi ŋwana-lɔɔ-nuu nɛ́ŋ têei.
32Tɔ̃yâ-nuu è ǹóno-pere kɔ́lɔŋ, kɛ́lɛ ŋwana-lɔ̂ɔ-nuu wóo káa nɔ́ a lɛ́ɛ.
Currently Selected:
Táre-woo-ŋa 10: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
