Zɛlemaya 49
49
Yâwɛɛ è Amɔŋ-ŋai dímɛnii ŋáa tèe
1M̀are kɛ̂ɛi Yâwɛɛ è gɛ̀ é pîlaŋ Amɔŋ lɔii mai ƃa, “Eezuɛ sinaai kɔɔ? Núu da fé naa é dílɔii maa kɔ̃ɔ? Lé mɛni ƃé dí ǹɛɛ la naa diai da Mɛɛkɔŋ ɣalai fɛ̂lii dí kɛ̀ Daŋ ŋɔlɔii sôŋ dí kɛ́ sèe naai? 2Kɛ́lɛ, ŋ̀elei káa pâi tãi ŋa pâi gɛ̂i la kɔ́ é tɛ́ ǹûai dítaa-lêei Laba sui. Ǹyaŋ ǹaa a pâi lɛɛ̂i a pilêŋ ŋá, ŋá díkpanâŋ-ŋai kéreŋ kpɔ́ kpúŋ. Gɛ̀ ní Eezuɛ a pâi ŋɔlɔii dí gula ǹyéei siɣêi pôlu. 3Ɛsibɔŋ-ƃela, ka wɔ́lɔ. Da Eea su kàra! Laba nɛyaa, ka malôŋ see ƃó. Ka maloŋ tôo-maa sêɣe too kâa a malôŋ pere. Ka kɛ́ wúlee kákɛ kîrɛ sìɣe. Da pâi liî a káɣâlai Maakɔŋ, ŋɔsâla láa soŋ-ƃelai da ŋɔtíi kɛ́-ƃela kpaya-kpayai kɔ-sôŋ-laa su. 4Lé mɛni ƃé ka kákili tɔɔ̂i la sãâ da kpɛ́ni-ŋai dîai? Káwala-wala-laai ŋá a yenîi. Lé mɛni ƃé ká kákili tɔ̀ɔ la káwala-wala-laai ma kákɛ mò a gɛɛ m̀aa-nuu fé ma é kɔ́ pɛ́lɛ kâai? 5Ŋa pâi mɛni kpɔ̂lu lâai kâa ƃéla kélee mɛi. Kákelee kpɔ́ ka pâi pûi. Núu da kélee fé pâi kɛ̂i naa é ká kɔ-kuluƃa-ŋai ŋáa tɛ́ gîe ma.
6“Kɛ́lɛ, ǹaa loŋ a kɛ́ tí, ŋa pâi gɛ̂i Amɔŋ é ƃûu ƃó ŋɔ́nɔ. Ńyãa Yâwɛɛ ƃé mò tí.”
Yâwɛɛ è Idɔŋ-ŋai dímɛnii ŋáa tèe
7M̀ɛnii ŋí ƃé Ŋ̀wála-wâla kélee Yâwɛɛ è mò é pîlaŋ Idɔŋ lɔii ma: “Idɔŋ-ƃela da díkili ŋá siâi léŋ? Dí lia-woo ƃó nuu fé ŋɔ́nɔ naa é dí lia-woo ƃó? Dítare-ŋai kélee da láŋ? 8Káai kákaa Dedaŋ, ka pú ká káloo. Ŋa pá Isɔɔ ŋɔsuui su-ƃelai su karâi, kpɛ́ni fêi, tãi a seri a gɛɛ ŋá díkula-maa kɛ́. 9Núu é máŋ lí kpɔmɔ ƃa kulâi, a da-loŋ lɛ̀ɛ naa. Ŋúma-ƃela da núu ŋɔpɛ́rɛ wòlo, zɛŋ da ŋ̀wɛ̂lii, ǹyaa nɔ́ ƃé a zìɣe. 10Kɛ́lɛ, ŋá Isɔɔ ŋɔsuui su-ƃelai maa kpôloŋ kpɔ́ sɛŋ da fé lɛ̀ɛ ní dîa. Ŋa pâi díloo kwaa-ŋai kélee ma lɛ̂i banaŋ ma, a gɛɛ dífa ŋɔ́nɔ dílòo naa, ŋa Ídɔŋ-ƃelai kélee kpɔ́ su kara. Ǹyaŋ, díta dɔnɔ kpîŋ fé lɛ̀ɛ. 11Ka kátee loŋ-ŋai lɛ́ɛ ńyêei, ŋa pâi dímɛi kâai. Ká pɔɔ-nɛyãai da pɔ̂ri díkili tɔɔ̂i ḿâ.
12“À kɛ̀ diai maa fɛ́ nɛ̃ɛ ní ŋá díkula maa kɛ́i, ŋa díkula maa kɛ̂, kálaai la a gɛɛ ḿve pâi kákula maa kɛ̂i? Kpao! Fɛ́ɛ nɔ́ ŋá kákula maa kɛ́. 13Ńyãa kpîŋ-kpiŋ ŋá ḿvòo a gɛɛ ŋa pâi Bozira taa-leei su karâi, nûa da ǹaa kàa, dílaa é kpála dîa. Ǹaa a pâi kɛ̂i a fɛ̃ɛ-kpâlaŋ. Nûa da pâi ɣɛ́lɛ-maa kulâi gbonôi. Ǹaa láa a pâi kɛ̂i a kpalo. Ǹaa kɔlɛ ma kpanaŋ-ŋai da pâi kɛ̂i a pilêŋ ŋá wɔ́lɔ-wɔlɔ da wɔlɔ-wɔlɔ. Ńyãa Yâwɛɛ ƃé mò tí.”
14Nya ƃe ńyɛ̃ɛi, “Idɔŋ, ŋá worɛ̂-woo mɛ̀ni é kúla Yâwɛɛ yêei. A m̀ó ǹɔii-ŋuŋ-ŋai dîa a gɛɛ dí kɔ-kuluƃa-ŋa ŋá tɛ́ gîe ma dí kɔ́ pɛ́lɛ yâ. 15Ńyãa Yâwɛɛ ŋa pâi gɛ̂i ífii é kpɛ́ɛ. Ǹyaŋ núu da fé pâi ƃâa kɛ̂i yâ. 16Ká yoŋkai a kápɛlɛ. Núu da fa yâo kâa yɛ̂ɛ berei ka kákili-ŋa siâi la é pîlaŋ dîai. Kákaa kpɔ́ seêni gɔni yee kɛ́tɛi tôŋ su gɔni wôloi su. Kɛ́lɛ, a nɛ̃ɛ ma kpîŋ kákɛ kpɔ́ ŋ̀elei su póŋ-poŋ yɛ̂ɛ kuɛ, Yâwɛɛ a pâi pâi a káa ǹɔii ma. Ńyãa Yâwɛɛ ƃé mò tí.”
17Yâwɛɛ è mò ǹyɛɛ, “Da pâi Idɔŋ su karâi kpɔ́ a ŋ̀ánaa. Nûa da tɛ̀ɛ ǹaa, dílaa a pâi kpâlai dîa, dí dísĩ̂a mii. Ǹaa a pâi kɛ̂i a maa yâo kwaa ma. 18M̀ɛni tɔnɔi tí kɛ̀ a Sodɔŋ da Gomorai, da ǹaa kɔlɛ ma taa-ŋai a tãi ŋá dísu kara lai, m̀ɛni tɔ̂nɔi tí ƃé pâi kɛ̂i a Idɔŋ. Núu da kélee fé ŋɔ́nɔ wɔ́lɔ pâi seêi naa. Ńyãa Yâwɛɛ ƃé mò tí. 19Ŋa pâi pâi dîa yɛ̂ɛ yala-sulu a kùla ǹɔɔi su Zɔdiŋ Ya-leei kɔlɛ a pɛ̀lɛ ƃála-ŋa dîa gala ŋûnui ŋá ƃɛ́i da dílaa-mii naai. Ŋa pâi pâi ŋá Idɔŋ-ƃelai kɛ́ dí pú a maa félaa dí kúla dílɔii su. Gɛ̀ ní, ŋa pâi dílaa túɛ-nuu lɛ̂i nyíi pâi dímɛi kâai. Gbɛ̂ɛ ƃé ka pɔ̂ri gɔɔ̂ni ḿâi? Gbɛ̂ɛ ƃa pɔ̂ri tɔɔ̂i ŋ́ɛi túɛi? 20M̀ɛni ma, ka káwoli tɔ́ɔ m̀ɛni kpɛtɛɛi ma ŋa gɛ́ é pîlaŋ Idɔŋ-ƃelai dîa da m̀ɛnii ŋa ŋ̀wɛ̂lii ŋá gɛ́ a Témaŋ taa-leei su-ƃelai. Ŋa pâi dínîa-pɛlɛi ɣâlai, ǹûai kélee kpɔ́ dí yao, dí láa é kpála dîa. 21Idɔŋ too tîŋ a pâi gɛ̂i ŋ̀éniɛi gwaa kélee ma é kpɛ̃lîŋ, ǹyaŋ da pâi wɔ̂lɔi, díwɔ́lɔ-woo é seri Ǹyúo Kpɔ̂lui ma. 22Bózira kpɔara-ƃelai da pâi pɛlɛ̂i m̀a yɛ̂ɛ kuɛ a goôŋ fùlomo a bɛ̀lɛ gɔ́nɔ̃ŋ mɛi. Maa ɣelêi tí, Idɔŋ kɔ-kûluƃa-ŋai da pâi kɛ̂i yɛ̂ɛ nɛnî a kɛ̀ koi-têe su.”
Yâwɛɛ è Dɛmɛika ŋɔmɛnii ŋá tèe
23M̀ɛnii ŋí ƃé Yâwɛɛ è mò é pîlaŋ Dɛmɛika ma: “Ǹûai díkaa Ama da Apa taa-leei sui, da yao da kɛ́ wúlee, kpɛ́ni fêi, da tùŋ nyɔ́mɔ mɛ́ni a pîlaŋ Dɛmɛika ma. Mĩli-mili a yeŋ a dîa yɛ̂ɛ yúo, dífa pɔ̂ri dífii tɔ̂ɔi. 24Dɛmɛika-ƃela da yao, kɔlɔ a kpɛɛ dîa dí kɛ́ pù. Díkaa sɛŋ-soli maa su. Malôŋ a too dîa yɛ̂ɛ nɛnî a kɛ̀ koi-têe su. 25Daa-lêei nyíi nûa dí kɛ̀ a gɔ́lɔŋɔɔ ŋɔlii-nɛ̃ɛ kula mɛ̂ni mai, ǹaa káa nâa a fɛ̃ɛ-kpâlaŋ su. 26Ŋ̀elei tí à sèri, da pâi ŋɔnyánkpa-ŋai paâi bere lêei-ŋai ma daa-lêei su, dí ŋɔkɔ-kuluƃa-ŋai páa. 27Ŋa pâi Dɛmɛika siɣãŋ kêrenîi da Gâloŋ Bɛŋ-a-da ŋɔkâloŋ-pɛrɛi. Ńyãa Yâwɛɛ ƃé mò tí.”
Yâwɛɛ a pâi Kida sii-ŋai da Azɔ taa-leei dímɛnii ŋá têei
28M̀ɛnii ŋí ƃé Yâwɛɛ è mò é pîlaŋ Kida sii-ŋai da Azɔ kpiniŋ ma, nyíi Babelɔŋ kaloŋ Nɛbukinaza è wɔ́lɔ ǹaa sòŋ ma. “Kɔ́ pɛ́lɛ Kida-ƃelai dîa í dísîi su-kara. Ǹûai ŋí seɛ́ɛ káa vóloi kulâi-pere. 29Ka dísua-kɔlɔ-pɛrɛi kúla díyêei, díƃala-ŋai dísua-kɔlɔ-pɛrɛi lá-ƃerei seɣei da zãâi díkaa mui. Ka dísoo-fáleŋ-ŋai kúla díyêei, ká mò ǹûai dîa kâai, ‘Mɛni kpɔ̂lu a pá kâa.’
30“Azɔ-ƃela, Ńyãa Yâwɛɛ ŋá kália-woo ƃò a gɛɛ ká pú ká lí kwaa kôyaa ma ká káloo. Babelɔŋ kaloŋ Nɛbukinaza a mɛni kpɛtɛ̂i é pîlaŋ kâa. È mò ǹyɛɛ, 31‘Ŋá kɔkuluƃa-ŋai, ka pá. Kwaa lí kú kɔ́ pɛ́lɛ ǹûai dîa nyíi-ŋai da díkili ŋá siâi a gɛɛ díŋuŋ ma ƃôɔi! Siɣãŋ da fé tínani dítaa-lêei ma zɔ́ɔŋ-too kɔ̂li kɛ́ ƃò ma. Dímɛi káa sɛŋ da fé ma.’
32“Ka dísoo-fáleŋ-ŋai da díniŋa-ŋai kélee kpɔ́ kúla díyêei. Ǹûai ŋí díŋuŋ ƃôɔi, ŋa pâi dítaa-tâai kpɔ́ kwaa kélee ma. Ǹyaŋ ŋa pâi mɛni kpɔ̂lu lâai kpɔ́ dîa ƃéla kélee ma. 33Azɔ a pâi kɛ̂i a pilêŋ ŋá, ƃɛ́i ǹɔɔ-ɣîla-ŋai da pâi kɛ̂i naai. Núu da kélee fé ŋɔ́nɔ pâi seêi naa. Ńyãa Yâwɛɛ ƃé mò tí.”
Yâwɛɛ a pâi Elaŋ ŋɔmɛnii ŋá têei
34Tãi Zɛdikaya è ŋɔkâloŋ-laai kɔ́ɔ pìlaŋ la Zudai, Ŋ̀wála-wâla kélee Yâwɛɛ è lòno ḿbɔ é pîlaŋ Elaŋ lɔii ma. 35È mò ḿâ ǹyɛɛi, “Ŋa pâi Elaŋ lɔii su keraŋ pili-ƃelai kélee kpɔ́ paâi. Dia ƃé da gɛ́ Elaŋ wála-wâlaa. 36Ŋa pâi gɛ̂i fãa é kúla kpɔ́ Elaŋ lɔii m̀éla gwaa kélee ma é gɛ́ ǹaa-ƃelai kélee kpɔ́ dítaa-tâa kwaa kélee ma. Lɔii da fé pâi kɛ̂i naa nyíi Elaŋ-nuu da fé pâi kɛ̂i zu a kɔ pû-nuui. 37Ŋa pâi gɛ̂i Elaŋ-ƃelai dí yao díkpɔara-ƃelai dîa nyii-ŋai ŋ̀wɛ̂lii dí dípaai. Ŋa pâi ńii ŋwânai kpɔ́ a ŋ̀ánaa ŋá Elaŋ-ƃelai páa. Ŋa pâi kɛ̂i kuluƃa-ŋa tɛɛ̂i naa é lɛ́ɛ la zu ǹaa-ƃelai kélee kpɔ́ díkpɛɛ kpúŋ. 38Ŋa pâi díkâloŋ-ŋai da dínuu láa-tuɛ-ƃelai kélee kpɔ́ paâi, ŋá ŋákâloŋ see-sɛŋ sée naa. 39Kɛ́lɛ, ǹaa-loŋ a gɛ̀ tí, ŋa pâi gɛ̂i Elaŋ é ƃûu ƃó ŋɔ́nɔ. Ńyàa Yâwɛɛ ƃé mò tí.”
Currently Selected:
Zɛlemaya 49: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia