Zɛlemaya 48
48
Môa lɔii su-kara mɛni
1M̀ɛnii ŋí ƃé Ŋ̀wála-wâla kélee Yâwɛɛ è mò é pîlaŋ Môa ma ǹyɛɛi,
“Kpalo ƃêlai Nebo-ƃelai dîa,
dítaai a wólo!
Da Kariatamiŋ soŋ,
da ŋɔtaa-lêe tɔɔi kpanaŋɔɔi wólo,
da ŋɔnûai ŋumɛ.
2Ƃâa fé ŋɔ́nɔ Môa ma.
Ɛsibɔŋ ŋɔkpɔara-ƃelai da naa siɣe
da mɛni kpɛtɛɛ kɛ́ a gɛɛ dí Môa lɔii su-kara.
Káai a ƃoo-ƃelai, ká-taai su a pâi kɛ̂i tɔ̀ŋ.
Kɔkuluƃa-ŋai da pâi tɛ̂i naa.
3Ɔlonaiŋ-ƃelai dí láɣi dîɛi,
‘Laa-saa! Mɛni-su-karaa kɛ́tɛ!’
4“Da Môa lɔii su-kara.
Ka ǹîa-pɛlɛɛi wɔ́lɔ-woo mɛni.
5Ka díwɔlɔ-woo mɛni
berei ma dí kɛ́ yèŋ Luɣii.
Maloŋ too-maa wɔlɔ-woo
kɛ́ tɛ̀ berei mâ a lî Ɔlonaiŋ.
6‘Ka kirɛ siɣe a maa félaa káfulu-laai mɛni ma.
Ka kirɛ siɣe yɛ̂ɛ wɛlɛ-sôo nyíi a tɛɛ̂ fɛ̃ɛ-kpâlaŋ sui!’
7“Môa, í íkili tɔ̀ɔ íwala-wala laai da ítɔɔ-sãai dîa.
Kɛ́lɛ, da pâi íyee mɛi-ɣâlei.
Ǹyaŋ íɣâlai Kemosi a pâi liî kɔ-sôŋ-laai,
ŋɔtíi kɛ́-ƃelai, da ŋɔsâla láa-soŋ-ƃelai.
8Taa da fé pâi lɛɛ̂i nyíi dífe pâi zu karâi.
Da pâi ǹyée lɔii su taa-ŋai da diŋ-tiŋ su-taa-ŋai su karâi ǹaa é lɛ́ɛ a pûŋ.
Ńyãa Yâwɛɛ ƃé mò tí.
9Lia-woo kpanaŋ ká ŋí Môa mɛni ma,
kpɛ́ni fêi, naa a pá wôloi a maa félaa.
Ŋɔtaa-ŋai da pá lɛɛ̂i a dípûŋ,
núu da fa ŋɔ́nɔ zeêi kàa naa.”
10Kpalo ƃêlai ǹúui ma nyíi pâi Yâwɛɛ ŋɔtíi kɛ̂i a fii kpɛ̂ɛ-perei. Kpalo ƃêlai ǹúui ma nyíi vé pâi núu paâi a ŋɔƃóa-sɔkpɔi.
Da Môa taa-lee-ŋai su-kara
11Yâwɛɛ è mò ǹyɛɛ, “Môa káa nɔ́ wɔ́lɔ lii-see su a tãi su kôyaa. Dífe tá lì ní kɔ-sôŋ perei. Gáa nɔ́ yɛ̂ɛ ŋwãai nyíi núu da fé niî lɛ̀ɣɛ ní ma é gúla zeêi kɛ́ gonoŋ su é bú da kpɛ́ni sui. Vé niî kpòna ní a dɔnɔ kpîŋ. Nɛ̃ɛ̂i kpɔ́ nɔ́ yɛ̂ɛ berei dí gbɛ̀tɛ lai.
12“Kɛ́lɛ, ɣele da a pâi, tãi ŋa pâi nûa tɛɛ̂i la a gɛɛ dí í pú yɛ̂ɛ berei da ŋwãai pù la sɛŋ-fôlo da kpɛ́ni sui. Tãi ya pâi kpɛɛ̂i la gònoŋ sui, da pâi gònoŋ wôloi kpɔ́ pɛ̀yɛ-pɛyɛ. 13À kɛ̀ tí, Môa-ƃelai díɣâlai Kemosi maa mɛni a pâi ŋumɛ lâai díŋɛi yɛ̂ɛ berei ŋ̀âlai nyíi Eezuɛ-ŋai dí kɛ̀ vɛlîi Bɛtɛ, dílaa lài, m̀aa mɛni è ŋumɛ lâa la díŋɛi.
14Môa sinaa, lé mɛni ƃé ka m̀ôi la a gɛɛ kákaa a kɔkuluƃa wála-walaâ-ŋa,
kɔkuluƃa-ŋa nyíi-ŋai da dísu kɔ̀ɔŋ a kɔ́i?
15Da Môa ŋɔtaa-lêe-ŋai su-kara.
Da ŋɔnyáŋ-kpa lɛ́lɛɛ-ŋai kélee páa.
Ńyãa ƃa gâloŋ, Ŋ̀wála-wâla kélee Yâwɛɛ,
Ńyãa ƃé mò tí.
16Môa ŋɔmɛni sôlii káa tãi a lɛɣɛ̂i.
Zu-kara ɣelêi a pâi a maa félaa.
17“Káai kélee kákaa ǹɔii-ŋuŋ tí kɔlɛi,
da káai kélee gɛ́-pere kɔ́lɔŋ a bɔlɔŋ,
ka malôŋ see ƃó m̀ɛni ma.
Ka mó kâa, ‘Ŋɔwála-walaai mɛi a tée.
Ŋɔfólo-laai su fé ŋɔ́nɔ kpànaŋ ní, ŋɔwala-walaai su a saa.’
18Káai kákaa Dibɔŋ,
ka kula káƃaa kɛ́-maa kwaa-ŋai dîa ká pîlaŋ,
ká sée ǹɔii ma muluŋ su.
Môa su-kara-ƃelai díkaa ƃɛ́.
Da ŋɔkili-tɔɔ-ma kwaai ma lɛɛ a gbolôŋ.
19Káai ká seɛ́ɛ káa Aloɛi,
ka pá ká tɔ́ɔ berei kɔlɛ ká maa kpɛ̂ŋ kɛ́,
ǹûai tí pûi, ka dímarê kɛ́.
Ka dímarê kɛ̀, lé ƃé kɛ̂i.
20Da pâi kɛ̂i kâa dîyɛɛi, ‘Môa a wólo.’
Gáa a ŋumɛ mɛni, ‘Ka wɔ́lɔ m̀ɛni ma.
Ka maa tuŋ too Ano Ya-leei kɔlɛ
a gɛɛ da Môa lɛ̀ɛ a lɔii pûŋ!’
21“Mɛni ŋá-teɛɛ a pá ǹɛ̃ɣɛ lɔii su taa-lee-ŋai ŋí mɛni ma: Oloŋ, Zuda, Mefa, 22Dibɔŋ, Nebo, Bɛɛ-diƃilita, 23Kiriataiŋ, Bɛgamɔ, Bɛmiɔŋ, 24Kɛriɔ da Bɔzira. Mɛni ŋá-teɛɛ a pá Môa lɔii su taa-lee-ŋai ŋí mɛni ma, nyíi-ŋai díkaa kwaa ma kpua-ŋa mai, da kwaa ma kôyaa-ŋa dîai. 25Da Môa ŋɔwála-walaai da ŋɔkponoi kpânaŋ-laai su-kara. Ńyãa Yâwɛɛ ƃé mò tí.”
Ɣâla a pâi Môa maa yenîi
26Yâwɛɛ è mò ǹyɛɛ, “Ka gɛ́ Môa é ŋwãai kpele é gɛ́, kpɛ́ni fêi, a tɔɔ ḿâ. Môa a pâi gɔŋ pilîi é tóo zu gɛ́ kɔ̀ kɔ̀. À kɛ̀ tí, nûa da pâi ɣɛ̂lɛi m̀a. 27Môa, gíli é lɛ́ɛ íŋa berei í ɣɛ́lɛ-maa kùla la Eezuɛ kponôi. Ítûa a dia yɛ̂ɛ sɛŋ ƃé ya dísoŋ ŋúma-ƃela sáma.
28“Káai kélee kpɔ́ káseɛɛ káa Môa taa-lee-ŋai sui, ka kula naa ká lí ká kɛ́ ǹyée wolo-ŋai su. Ka kɛ́ yɛ̂ɛ tòloŋ ƃé a daa tɔ́ɔ kɔni wôlo su. 29Kwa Môa ŋɔyoŋkai maa mɛ̂ni mɛni. Ŋ̀ɛ́i tɛɛ̂i, ǹíi kɛ̂tɛ, gɛ́tɛɛ gbîŋ ŋɛ́i. A ŋ̀ɛ́i ǹaɣiŋ ǹûai mɛi. 30Ńyãa Yâwɛɛ, ŋá díŋɛi tɛ̂i maa mɛni kɔ́lɔŋ. Mɛni lɛ́lɛɛ da fa kûla díkɛ mɛni da su. M̀ɛni ma, m̀ɛni-ŋai da gɛ̂i, zu a pâi karâi. 31M̀ɛni ma, ŋa pâi wɔ̂lɔi Môa da Kɛɛrɛ-ƃelai kélee mɛni ma. 32Ŋa pâi wɔ̂lɔi diai kùla Simai dímɛni ma, ŋá wɔ́lɔ a ŋ̀ánaa Zazɛ-ƃelai mɛ̂ni ma. Sima taa-leei, íkaa yɛ̂ɛ kpɔmɔ nyíi ŋ̀owo a lí Ǹyuo Saai pôlu pere a seri kpɔ́ Zazɛ. Kɛ́lɛ, ífolo lá ƃóɔɔ ƃai da íkpɔmɔ ƃai kélee kpɔ́ su a kara. 33Lii-nɛ̃ɛ da koi-nɛ̃ɛ dífe ŋɔ́nɔ mii-sãa kpɛtɛ lɔii Môa su. Ŋa gɛ́ ŋwãai fé ŋɔ́nɔ kulâi ŋwãai kpɛtɛ kwaai ma. Núu da fé naa gɛ́ ŋwãai kpɛ̀tɛ a lii-nɛ̃ɛ pere.
34“Ɛsibɔŋ da Ilealɛ-ƃelai da wɔ̂lɔi kpɔ́ a ŋ̀ánaa. Díwɔlɔ-wooi a seri kpɔ́ Zâa. Zoa-ƃelai da dílaɣi-wooi mɛnîi. Ǹûai díkaa Ɔlonaiŋ da Ɛgila-silisiyai dí dílaɣi-wooi mɛ̂ni. M̀ɛnii ŋí kɛ́ɛi, Niŋri ya-ɣɛli-ŋai da kpála. 35Ŋa pâi Môa-ƃelai kɛ̂i dí kpéra kéreŋ sala kulâi díɣâla-fɛli kwaa-ŋai ma, dí kpéra sâla kulâi díɣâlai-ŋai dîa. Ńyãa Yâwɛɛ ƃé mò tí.
36“Ńii toɔɔ̂i pôlu Môa da Kɛɛrɛ mɛni ma yɛ̂ɛ núu da a kɛ̀ saa wûle toôi ƃɔɔ su, kpɛ́ni fêi, díkɔ̃lîŋ kélee kpɔ́ su a kara. 37Díkelee da díŋuŋ kpɛ́ɛ gayôŋ ma da díla-leɣa pú. Da díŋwana díyee ma a tɛɛ-ŋa, díkelee da malôŋ seɣe-ŋa too dîa. 38Maloŋ-too maa wɔlɔ-woo nɔ́ ƃé ya m̀ɛni Môa pɛrɛ-ŋai mɛi ƃɛ́i nûa da gôyɛŋ naai, da ƃɛ́i da díŋaa tɛ̀ naa mai. Ŋá Môa wòlo yɛ̂ɛ gònoŋ nyíi núu da fé wɛ̂lii lai. 39Môa a wólo kpɔ́ pɛ̀yɛ-pɛyɛ! Dí lâɣi la! Da ƃâa kula Môa ma. Ǹaa a lɛɛ a gbolôŋ. Ǹɔii-ŋuŋ-ŋai da ɣɛ́lɛ maa kulâi gbonôi. Ńyãa Yâwɛɛ ƃé mò tí.”
Môa nuu da fé pâi pûi
40Yâwɛɛ a góno tée a gɛɛ lɔii-ŋuŋ da a pâi yenîi Môa ma yɛ̂ɛ kuɛ é goôŋ pɛlɛ m̀ɛi. 41À kɛ̀ tí, a pâi ǹaa taa-lee-ŋai kélee siɣêi. M̀aa ɣêlei tí, Môa kɔ-kuluƃa-ŋai da pâi kɛ̂i kpɔ́ nɔ́ yɛ̂ɛ nɛnî a kɛ̀ koi-têe su. 42Da pâi Môa su-karâi kpɔ́ va nâa kɛ̀ a lɔii-ŋuŋ, kpɛ́ni fêi, è tɔ̀ɔ ḿâ. 43Mɛni kpɔ̂lu, lóa kpóŋ kôyaa da ƃáre díkaa Môa-ƃelai maa kpɛ́nîi. Yâwɛɛ ƃé mò tí. 44Diai kélee pâi kulâi m̀ɛni kpɔ̂lui sui, da pâi toôi ǹóa kpóŋ kôyaai su. Diai kélee pâi kulâi ǹóa kpóŋ kôyaai sui, da pâi toôi m̀aréi ŋá, kpɛ́ni fêi, Yâwɛɛ a ŋ̀elei lɛ́ a pâi Môa su karâi lai. 45Gɔ-pû-ƃelai nyíi-ŋai pɔri mâa fé kɛ́ ní dîɛi, dí lì dí tɔ́ɔ Ɛsibɔŋ koo mu. Ɛsibɔŋ ŋí ƃé kɛ̀ a daa-lêei Siɔŋ è wɔ́lɔ kɛ̀ naa mɛi. Dífe pɔri ní kɛ̀ tɛ̂i daai su, kpɛ́ni fêi, ŋɔŋ è kɛ̀ daai ma. Ŋɔŋ è ǹɔii ŋɔkɔyɛŋ-perei kêreŋ da ǹyée tôŋ su nyíi Môa-ŋai kɛ̀ a kɔ́ mɛni wɛ́liɛɛi dí kɛ̀ a díseɛɛ naai. 46Kpalo ƃêlai Môa ma. Diai da Kesimɔ Ɣalai fêlii díkelee kpɔ́ dísu a kara. Da dílônii sinaai da ǹɛyâai sóŋ a kɔ-sôŋ-ŋa da lí a dia.
47Kɛ́lɛ, ŋ̀elei káa pâi nyíi Yâwɛɛ a pâi gɛ̂i Môa é ŋɔ́nɔ ƃûu ƃó lai. M̀ɛni-ŋai ŋí ƃé Yâwɛɛ è wɔ́lɔ mò a gɛɛ a pâi kɛ̂i a Môa.
Currently Selected:
Zɛlemaya 48: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
