Azaya 30
30
Ka Ize-ni káfe mɛni kpɛtɛ́ɛ kɛ̀
1Yâwɛɛ è m̀o ǹyɛɛi, “Kpalo-ƃêlai Zuda lɔii láa túɛ-ƃelai dîa, kpɛ́ni fêi, dí tɔɔ̂i ḿâ. Da mɛni kpɛtɛ́ɛ-ŋa kɛ̀ dífa díŋuŋ ma pìlaŋ a ńyãa. Da lɔii-ŋuŋ da kpɛ́ni-ŋa da mɛni kpɛ̂tɛ díkîɛ-ni loai dífa mò ḿâ. Díkaa nɔ́ niî dísɔnyɔ̂ŋ pûi gîe mɛi. 2Da lî Ize dímaa kɔ̃ɔ mɛ̂ni ma nyíi ŋ́gɔlɔŋ fé zui. Dífa ḿarê kɛ̀ dília-wôo ƃó mɛ̂ni ma. Dílâai a Ize kaloŋ a gɛ́ɛ a pɔ̂ri díŋuŋ ma ƃôi. 3Kɛ́lɛ dífe pâi kpɔŋ mâa da sɔlɔ ƃôi ǹyêei. Ŋa pâi gɛ̂i ƃâa é kúla dîa díŋumɛ, kpɛ́ni fêi, da díkili tɔɔ̂i Ize ma. 4Berei máŋ Zuda kaloŋ ŋɔtíi kɛ́-ƃelai da-ŋa díkaa la Zoaŋ taa-leei su Ize, da-ŋa dí ƃò Anei taa-leei su Ize lɔii su a ŋ̀ɛ́i-gao-ŋai, 5Ize fa pɔ̂ri dímaa kɔ̃ɔ̂i. Dà díkili tɔ̀ɔ m̀a, da gɛ̂i nɔ́ tí kpɛ́ni-kpɛni. Va pɔ̂ri kpɔŋ mâa tɛɛ̂i dípɔ a dɔnɔ kpîŋ.”
6Ŋ̀orɛ̂-wooi ká ŋí Ɣâla è dɛ̀ɛ é pîlaŋ Zuda lɔii kwára-pere fɛ̃ɛ-kpalaŋ su sua-ŋai dîai: “Diai díkaa a ǹɔii ŋɛ́i-gao-ŋai da tɛ̀ɛ lɔii-ŋuŋ nyɔ́mɔɔ-ŋa su. Ǹɔii ŋuŋ-ŋai ŋí lá-fɛ̂ɛi a yala-sûlu-ŋa, kali nyɔ́mɔɔ-ŋa da ŋ́gɔ-ŋgɔ kali-ŋa. Zuda láa túɛ-ƃela kpaya-kpayai dí díkɔ̃̂liŋ sɔ̃ɔ kpanaŋɔɔ-ŋa pù wɛlɛ-sôo-ŋa da soo-fáleŋ-ŋa pôlu dí lí a dia lɔii ŋuŋ da su-ƃela pɔ́ a sama-sã̂a nyíi-ŋai dífa pɔ̂ri kpɔŋ mâa da sɔlɔ ƃôi díyêei. 7Mɛni lɛ́lɛɛ da kélee fa kûla Ize lɔii ŋɔkpɔŋ mâai su. M̀ɛni ƃé ŋá yɛpɛ-làa sèe la m̀a. Maa lâai ŋí ƃa ‘Ŋ́gɔ-ŋgɔ Kali nyii ǹíi lɛ̂lɛi goi.’ ”
Ɣâla wóo pili-ƃela
8Ɣâla è m̀o ḿâ a gɛ́ɛ m̀ɛni nyɔ́mɔɔ-ŋai ǹûai da gɛ̂i, ŋá m̀aa mɛni-ŋai pɔ̃yɛ kɔlɔ ma. Gɔlɔi ŋí a pâi kɛ̂i a sêre da dîa-ni díloai wɔ́lɔ-wɔlɔ da wɔ́lɔ-wɔlɔ. 9Ǹûai ŋí díkaa nɔ́ tɔɔ̂i Ɣâla ma. Díkaa a lɛ́ɛ-ƃela. Dífa díwoli tɔ̀ɔ Yâwɛɛ ŋɔsɛŋ lɛ́ɛ-ŋai dîa. 10Da m̀o Ɣâla ŋɔlóno kɛ́-ƃelai dîa dîyɛɛi, “Káfe ŋɔ́nɔ zĩ̂a su mɛni ƃò kûa nyii gáa a tɔ̃yâi. M̀ɛnii ƃó kûa nyii kwa ŋ̀wɛ̂lii kú mɛnii. M̀ɛnii ƃó kûa nyii pâi kúpɛlɛ̂i. 11Ka káŋɛi síɣe kúŋɛi. Kúfe ŋɔ́nɔ ŋ̀wɛ̂lii kú mɛni da mɛni é pîlaŋ Eezuɛ Ŋɔɣâla Maa Waai ma.”
12Eezuɛ Ŋɔɣâla Maa Waai è m̀o ǹyɛɛi, “Kaâ kámaa kôya ḿâ ka kánaŋ wôya mɛni-ŋa dîa. Káfe ŋ̀wɛ̂lii ka káyee kúla ŋ̀ôya mɛni-ŋai da mɛni nyɔ́mɔɔ da kpɛ́ni-ŋai su. 13Kákaa a mɛni nyɔ́mɔɔ kɛ́-ƃela. Kákaa yɛ̂ɛ pɛ́rɛ kâŋ nyii wôloi zu perei. Ŋa pâi kásu-karâi a maa félaa. 14Ŋa pâi káwolo wôloi yɛ̂ɛ núu a pɔ̂rɔ leɣi tòo é wólo-wôlo nyíi kɛ̂i fa kɛ̂ galâŋ da mai. Núu da fa pɔ̂ri kpîŋ ŋɔŋ siɣêi galâŋ da su kpaa máŋ é ya-kpôloŋ tuâŋ la.”
15Ǹuu-namui Yâwɛɛ, Eezuɛ Ŋɔɣâla Maa Waai è m̀o ǹyɛɛi, “Kà láa a ńyãa. Kà gɛ̀ tí, káŋuŋ ma a pâi kɛ̂i a m̀óɔɔ kákponôi kpanaŋɔɔ.” Kɛ́lɛ káfe gɛ̂i tí. 16Ka mò kâa ka pâi tɛ̂i soo-ŋa mɛi kú pú kú kúla kúkpɔara-ƃelai perêi. Ka púɔɔ fé nyɔ́ŋ ní. Gáa kákili ŋá a gɛ́ɛ kásoo-ŋai kɔ́ɔ ma fêlaai é tɛ́ɛ kákpɔara-ƃelai díwɔ̂ɔ-ŋai dîa. Kɛ́lɛ vé tí! 17Káwala tɔnɔ fa pɔ̂ri tɔɔ̂i kákpɔara-ƃelai díkɔ kuluƃai dɔnɔ perêi. Díkɔ-kuluƃai ǹɔ́ɔlu da pɔ̂ri gɛ̂i kákelee ká pú. Da gɛ̀ ka kákɔ-kuluƃa-ŋai kélee ká pú. Zɛŋ nɔ́ pâi lɛɛ̂i kápôlui ǹyaa ƃa káƃenâi ká dɔ̀ɔ ǹyéei tôŋ sui. 18Maloŋ-kâa káa Yâwɛɛ yêei kámɛni ma. A ŋ̀wɛ̂lii é kámalôŋ káa, kpɛ́ni fêi, pɔara-mâa fé gɛ́-mɛni da kélee su. Lûwa káa diai dîa díkili tɔɔ-maai kélee káa Yâwɛɛ mai.
Ɣâla a pâi lûwa lâai ŋɔnûai dîa
19Káai a Zerusâlɛŋ-ƃelai, káfe pâi wɔ́lɔ ŋɔ́nɔ wɔ̂lɔi. Yâwɛɛ káa a maloŋ-kâa Ɣâla. Kà wɔ̀lɔ m̀a, a pâi káŋa nɛnɛ̂i. 20Yâwɛɛ a pâi gɛ̂i ka tɛ́ɛ mɛni kpɔ̂lu támaa su. Vé pâi wɔ́lɔ gbîŋ loôi kâa. 21Kà kɛ̀ sia-siâi, ka kɛ́ tɛ̀ ká kɛ́ yèŋ, ka pâi kɛ̂i ŋ̀óo mɛnîi kápôlu-pere, gɛ́ káteniŋ tɔ̀ɔ ǹyɛɛ kâai, “Berei ká ŋí, ka tɛɛ la.” 22À kɛ̀ tí, káɣâla pɔɔkɔɔŋ-ŋai nyíi-ŋai ká díkpɛ̀tɛ a wúru ká káne sía dîai, da nyii-ŋai ká díkpɛ̂tɛ ká gôo sia dîai, ka pâi dípilîi ká m̀ó dîa kâai, “Ka kúla kúŋɛi.” 23A pâi gɛ̂i tuna é pú kási-sãai dîa, dí kpɛtɛ, dí ƃá a zu-kɛ́tɛ. A pâi gɛ̂i kátaa-tûlɛ-ŋai kɔ́nɔ̃ŋ kɛ́ ƃò ma dí ƃûu ƃó díkɛ̂i lɛ́lɛɛ kɛ́ ƃò ma a tɛɛ-ŋa. 24Mii-sã̂a lɛ́lɛɛ-ŋa da pâi kɛ̂i naa ǹiŋa-ŋai da ŋ̀wɛrɛ-soo-ŋai da kási-sãai sí kwaa-ŋai ma lɔii wɔ̂rɔi, dímɛni ma. 25Ŋ̀elei Ɣâla a pâi kákpɔara-ƃelai paâi la é díkili tɔɔ-maa kwaa-ŋai ma su karâi, yá-ŋa da pâi kulâi ǹyée kpaya-kpayai da bɛlɛ-pɛlɛɛi su dí ǹɔii lá fɛ́ɛ. 26É kúla nyíŋi pôlu, ŋ̀áloŋ a pâi kɛ̂i fôloi yɛ̂ɛ vóloi, vóloi kɛ́ fòlo kpɔ́ a ŋ̀ánaa yɛ̂ɛ fólo lɔ́ɔlu mɛi-feerɛ folo a tòo a fólo tɔnɔ. Nyíŋi a pâi kɛ̂i a ŋ̀elei Yâwɛɛ a pâi kɛ̂i ŋɔnûai ŋuŋ ma ƃôi la gɛ́ díkùla dímɔ̃lɛ-laai sui.
Ɣâla a pâi Asiria kula-maa kɛ̂i
27Yâwɛɛ ŋɔwála-walai da ŋɔkɛ́tɛ-laai maa tûŋ káa ŋ̀éniei gwaa kélee ma. A ǹíi ŋwàna, ŋɔŋ a têe, maa lurii é ǹɔii mɛi pɛ́lɛ. Ŋ̀óo a núu kèreŋ yɛ̂ɛ ŋɔŋ. 28Dúɛ-pere fãai káa yɛ̂ɛ ya-ɣîliŋ su-kpanaŋɔɔ nyíi a dɛɛ̂i kɔ̀ɔ yɛ̂ɛ da kwaa ma kɔ̀ɔ a tɛ̃́lɛŋ. A ǹyoŋka lɔii-ŋuŋ-ŋai su kàra da dímɛni kpɛtɛ́ɛ nyɔ́mɔɔ-ŋai kélee. 29Kɛ́lɛ káai a Ɣâla ŋɔnûai, lii-nɛ̃ɛ su-kɛ́tɛ a pâi kɛ̂i kâa a ŋ̀elei ka pâi káɣele-kûu maa waai maa kûui kɛ̂i lai. Kálii a pâi kɛ̂i nɛ̃ɛ̂i yɛ̂ɛ nûa ƃé mãlâi ƃɔɔ fɛ́ɛ-woo ma díkɛ lì Yâwɛɛ nyii gáa a Eezuɛ ŋɔkɔnii, Ŋɔpɛ́rɛ maa waai lá.
30Yâwɛɛ a pâi gɛ̂i núu kélee dí ŋɔwála-wala wooi da ŋɔlii-ŋwânai kili kɔ́lɔŋ. Ŋɔŋ a pâi têei a zu-kɛ́tɛ, tuna támaa kɛ́ pù, fãa kɛ́tɛ kɛ́ tɛ̀ɛ, sãɔɔ kɛ́ pù. 31Asiria-ŋai da Yâwɛɛ wóo mɛ̀ni dí ŋɔmɛni kula-maai kíli kɔ́lɔŋ, yao támaa a pâi pâi díkɔlɔ̂i. 32À kɛ̀ díkula-maa kɛ̂i, ŋɔnûai da pâi kɛ̂i gbùŋ-gbuŋ tuâi, díkɛ kɔnîŋ ɣàle, díkɛ lii-nɛ̃ɛ kùla. A pâi kɔ̂i dímɛni ma. 33Asiria lɔii láa túɛ-nuui kéreŋ kwaa ma kpɛtɛ̂ɛi kóraŋ támaa tɛɛ pôlu ma. Gáa a lóa su-kɛ́tɛ kpóŋ kôyaa, kɔi kɛ́ ƃò a ǹaa lá fɛ́ɛ. Yâwɛɛ a pâi ǹaa fɛ̂ɛi a ǹɛwo, ŋɔŋ su-kɛ́tɛ é tée naa yɛ̂ɛ súluŋ su ŋɔŋ.
Currently Selected:
Azaya 30: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
