Azaya 26

Ɣâla a pâi ŋɔnûai kɛ̂i díyee é tɛ́ɛ dípɔara-ƃelai dîa

1Ɣele da a pâi pâi nûa da pâi kɛ̂i ŋ̀ulei ŋí toôi Zuda lɔii su:

Kútaa-lêei wála-wâlai!

Ɣâla ǹyaa kpîŋ ƃa ŋɔsiɣãŋ maa kɔ̃̂ɔ.

2Ka ziɣãŋ-ŋai díkpôŋ-ŋai lá-ƃo,

ǹɔii-ŋuŋ ŋí zu-ƃela teniŋ-ƃoɔɔ̂i dí lɔ́ naa.

3Yâwɛɛ, yâ lii-see tɛ̀ɛ

diai pɔ́ dí lâai a yá,

díkili tɔɔ yâi.

4Ka láa a Yâwɛɛ wɔ́lɔ-wɔlɔ da wɔ́lɔ-wɔlɔ.

Ǹyaa ƃa kúmaa kɔ̃ɔ-nuu wɔ́lɔ-wɔlɔ da wɔ́lɔ.

5Diai díyoŋkai a díŋa-yèŋ,

daa-lêei da zui é maa taa-leei su-kara,

ǹaa é lɛ́ɛ a muluŋ su.

6À kɛ̀ tí, diai kɛ̀ mɔ̃lɛ̂i daa-leei ŋí su-ƃela yée mui,

da pâi kɛ̂i sia-siai naa díkɛ naa taŋ-taŋ a díkɔɔ.

7Yâwɛɛ, ya lûwa làa ǹaa-laa-ƃelai kɛ́-mɛni kélee ma.

Ya díteniŋ tɔ̀ɔ dísia-pêre kélee su.

8Yá ƃe kúkaa ípôlu íteniŋ ƃô-laa mɛni ma.

Yá nɔ́ ƃé kwa ŋ̀wɛ̂lii kúkɛ ƃaa kɛ́-maa tɛ̀ɛ ípɔ.

9Kpíni a pɛ̀lɛ ímaa mɛni kíli káa nɔ́ ńii su.

Yà kɛ̀ núu-kpune kula maa kɛ̂i ǹɔii ma,

da pâi tɔ̃yâ-laa mɛni maa kɔ̂rii.

10Berei máŋ ísɔŋ lɛ̂lɛɛi káa la ŋ̀wana-lɔ̂ɔ-ƃelai kélee mɛni mai,

dífa wɔ́lɔ dítûa pere maa fâleŋ.

Díkaa kpɔ́ nɔ́ ŋwana-lɔ̂ɔ tua-ŋa kɛ̂i. Dífii fa kpɛ̀ɛ.

Dífe kpáaŋ ní máŋ íkɛtɛ-laai mɛni ma.

11Óo Yâwɛɛ, ŋ̀wana-lɔ̂ɔ-ƃelai dífe gɔ́lɔŋ a gɛɛ ya pâi díkula maa kɛ̂i.

Díkula maa kɛ́ dí mɔ̃lɛ.

M̀ɛnii í gbɛ̀tɛ díkula maa kɛ́ mɛni mai gɛ́.

Ǹɛ́ dîa berei í ínûai wɛ́li ní lai.

12Óo Yâwɛɛ, lûwa láa kúkɛ mɛni kélee dîa díƃûu ƃó.

M̀ɛni lɛ́lɛɛ-ŋai kélee kwa zɔlɔ ƃôi da kûla ísɔŋ lɛ̂lɛ tuai su.

13Óo Yâwɛɛ Kúɣâlai, wála-wala-laa da kpɛ́ni-ŋa da wɔ́lɔ kɛ́ kú mɛi.

Kɛ́lɛ yá nɔ́ ƃé kú íkɔlɔŋ a Yâwɛɛ.

14Maa wala-wala-laa-ŋai da saa, dífe pâi wɔ́lɔ dímu-siɣêi.

Da kɛ́ a mɔ̃leŋ-ŋa, dífe pâi wɔ́lɔ dímu-siɣêi,

kpɛ́ni fêi, í díkula maa kɛ̀.

Dímaa mɛni da kíli fé pâi wɔ́lɔ lɛɛ̂i núu da kíli ŋá.

15Óo Yâwɛɛ, ya ǹɔii-ŋuŋ su-kɛtɛ.

Ya gɛ́ zu a kɛ̂tɛ m̀éla kélee ma.

M̀ɛnii ŋí a gɛ́ ƃaa kɛ́-maa támaa a kɛ́ yâ.

16Yâwɛɛ, ya ínûai kula maa kɛ̀.

Da kɛ̀ kpîŋ maa mɛ̂ni kpɔ̂lui su, yá nɔ́ ƃé da kɛ̂ ífɛlîi.

17Yâwɛɛ, ya gɛ́ kwa wɔ́lɔ,

yɛ̂ɛ berei nɛnî a kɛ̀ koi-têe su a kɛ̂ wɔ̂lɔi lai.

18Kú kɛ̀ mɔ̃lɛ̂i a ŋ̀ánaa.

Kɛ́lɛ kúfe sɛŋ da sɔlɔ ƃó ní kúmɔ̃lɛ-laai su.

Kúŋuŋ ma fé niî ƃó ní kúkpɔɔi lɔii ma.

Kúlônii da fé pâi lɛɛ̂i ǹɔii ma é kúpɔɔ ŋá síɣe.

19Kúnûai nyii-ŋai da saai, da pâi dímu-siɣei saa yêei.

Da pâi ŋɔ́nɔ kɛ̂i pôlu yɛ̂ɛ berei díkɛ̀ la a bɔlɔɔi.

Da pâi dímu-siɣêi dí kúla m̀olôŋ su.

Da kùla m̀oloŋ su, da pâi kɛ̂i lii-nɛ̃ɛ wule-ŋa toôi.

Yâwɛɛ ŋɔkwaa ponoɔɔi a pâi dímaa ponôi

yɛ̂ɛ nɛ̀ŋ a pù kala ŋûnu ŋá a ɣele-wala pɛpɛ.

M̀ɛni ŋá-teɛɛi da sɛŋ kɛ́ɛ a gɛ́-pere pɔlɔi

20Ŋánûa, ka lɔ́ kápɛrɛ-ŋai mu ká ǹá-tɛ. Ka káloo a da-loŋ é lɛ́ɛ la zu Ɣâla líi ŋá é yéŋ. 21Yâwɛɛ a pâi a gɛɛ é ŋ̀wana-lɔ̂ɔ-ƃelai kula maa kɛ́ díŋwana-lɔ̂ɔ tua-ŋai mɛ̂ni ma. Diai kélee nûa pàa a ŋwana-lɔ̂ɔ pere loo-pêre-ŋa sui, díkelee dímaa mɛ̂ni a pâi toôi banaŋ ma. Ǹyaŋ diai kélee nûa dí dípàa bere sîi-ŋai ŋí sui, da maa mɛ̂ni fé pâi lɛɛ̂i loo-pêrei.

Currently Selected:

Azaya 26: KWB

Highlight

Copy