Azaya 10
10
1Kpalo-ƃêlaai kâa! Ka lɛ́ɛ tɔŋ-ŋa kpɛ̀tɛ a gɛɛ ká kɛ́ ŋánûai lùaŋ. 2Ka dee lônii, bɔɔ-nɛyãai, da gôlo-ƃelai dímɛni sâai ŋá tèe a wôya-pere. Ka gɛ̀ tí a gɛɛ ká díkɔ̃liŋ kula díyêei. 3Lé ƃé ka pâi gɛ̂i tãi Ɣâla a pâ la a gɛɛ é ká kula-maa kɛi? Lé ƃé ka pâi gɛ̂i à kɛ̀ Ɣâla a kɛ̀ pâi a mɛni kpɔ̂lu gɛ́ kùla lɔii kôyaa su kôyaa sui? Mí ƃé ka pâi liî naa kpɔŋ mâa mɛni mai? Ka kɛ̀ pûi, mí ƃé ka pâi kátɔɔ-sãai lɛɛ̂i naai? 4Da pâi kápaâi kɔ́ su, kpaa máŋ dí kásoŋ a kɔsôŋ-ŋa. É máŋ kɛ́ tí, Yâwɛɛ a pâi kɛ̂i nɔ́ a ǹíi ŋ̀wánaa é lɛ́ɛ la zu é Eezuɛ kula maa kɛ́.
Ɣâla a pâi Asiria kaloŋ kɛ̂i a sɔnyɔ̂ŋ-ƃela kula maa kɛ́-nuu
5Yâwɛɛ è mò ǹyɛɛi, “Asiria káa ńyêei a sɔnyɔ̂ŋ-ƃela kula maa kɛ́ lɔii. Ŋá dɛ̀ɛ ǹɔii ŋuŋ-ŋai su a gɛɛ é diai kula maa kɛ́ da ńii ŋwána mɛni kɛ̂i. 6Ŋá dɛ̀ɛ a gɛɛ é kɔ́ pɛ́lɛ diai dîa ɣâla mɛni fé díŋuŋ sui a gɛɛ é díkɔ̃liŋ kula díyêei é dítaŋ-tâŋ yɛɛ pere lêe ma muluŋ.”
7Kɛ́lɛ m̀ɛnii ǹíi sui ǹyaa fa nyíti. Ŋɔmɛni-kpɛtɛɛ gíli ŋái, gáa a dee. Mɛni su-kara mɛni ƃe gíli ŋá. A ŋ̀wɛ̂lii é lɔii támaa su-ƃela su-kara. Lɔii-ŋuŋ kpɛ́-kpɛɛ su-ƃela tɔnɔ nɔ́ fêi. 8Kɛ́lɛ a yoŋka têei gɛ́ mò ǹyɛɛi, “Ŋákuluƃa-ŋai láa túɛ-ƃelai kélee díkaa a kâloŋ-ŋa! 9Ŋaâ Kano taa-leei su kara yɛ̂ɛ berei ŋá gɛ̀ la a Kasimisi, Ama, Apâi, Sameria da Dɛmɛika. 10Ŋa ǹɔii ŋuŋ-ŋai kula maa kɛ̂ nyii zu-ƃela da ɣâla pɔkɔɔŋ-ŋa fɛlîi. Ɣâla pɔɔkɔŋ támaa káa ǹɔii ŋuŋ-ŋai ŋí su é tɛ́ɛ Zerusâlɛŋ da Sameria dîa. 11Ŋá Sameria su kàra da ǹaa ɣala pɔɔkɔŋ-ŋai kélee. Ǹyaŋ bere nɔ́ ƃé ŋa pâi Zerusâlɛŋ su karâi la da ǹaa ɣâla pɔɔkɔŋ-ŋai kélee.”
12Ǹuu-namui è m̀o ǹyɛɛi, “Ŋà kpɛ̀ɛ ǹûai kula-maa kɛ̂i Zãiyɔŋ Yeei ma da Zerusâlɛŋ, ŋa pâi Asiria kaloŋ kula maa kɛ̂i ŋɔyoŋka tuai da ŋɔsu-mɛni kɛ̂tɛi mɛ̂ni ma.”
13Kpɛ́ni fêi, a yoŋka têei ǹyɛɛi, “Ńyãa ƃe gɛ̀ a ŋáwala-walai. Ŋ́gbonôi kpanaŋɔɔ̂i, ńdareɛɛ, ŋ́gili ŋá ponoɔɔ. Ŋá gòyaŋ-pere-ŋai kûla ǹâai ǹɔii-ŋûŋ-ŋai su ŋa ǹaa-ƃela kɔ̃lîŋ kula díyêei. Diai seê-ni kâloŋ-see sãa ŋái ŋa ƃɔ̀rɔŋ dîa yɛ̂ɛ berei niŋa a sɛŋ tâŋ-taŋ lai. 14Ŋá ǹûai sòŋ nɔ́ mɔ̀lɛ̃ɛ, ŋá díkɔ̃liŋ kula díyêei yɛ̂ɛ berei núu a ǹyée lɔ̀ la ŋɔni taa su é ŋɔni-ɣaloŋ kúla naa nyíi ǹee a nɛ̀ɛ naa a púi. Núu da fé kɛ́ ní naa é tɔ́ɔ ḿberêi, kpaa máŋ é ḿaa yáo.”
15Kɛ́lɛ Yâwɛɛ è mò ḿâ ǹyɛɛi, “Yuɔ̂ tɛɛ̂i bili-nuu ma? Kpaa máŋ wúru tée-sɛŋ mɛni kpanaŋɔɔ̂i é tɛ́ɛ bili nuu ma? Bàri-kpua#10:15 Bàri-kpua káa a núu maa kɔ̃ɔ wuru gbùa gbɔara-ƃelai yêei. fa pɔ̂ri núu tɛ̂i ɣelêi, núu ƃa bari-kpua tɛ̀ ɣelêi.”
16M̀ɛni ma Ŋ̀wála-wâla kélee Yâwɛɛ a pâi kpono ma kɔlɔ-fela pilîi Asiria ŋɔkɔ-kuluƃa-ŋai dîa. A pâi kɛ́i díkerenîi díkponôi-pere yɛ̂ɛ ŋɔŋ. 17Ɣâla nyii gáa a Eezuɛ ŋɔkwaa ponoɔɔi, a pâi kɛ̂i a ŋɔŋ, Ŋɔɣâla Maa Waai kɛ́ ƃò a ŋɔŋ lêŋ. A pâi sɛŋ kélee kérenîi fólo tɔnɔ yée mu, tânaŋ da ɣalêŋ-kpɔlɔ kélee. 18A pâi Asiria wola-ŋai da díi kɛ́-lɔɔ-ŋai kélee su-karâi yɛ̂ɛ berei kɔlɔ-fela nyɔ́mɔɔ a núu pàa lai. 19Wolâ wuru tɛi-tɛi nɔ́ ƃé pâi lɛɛ̂i nyíi nîa-pɛlɛɛ kpîŋ da pɔ̂ri ǹônoi.
Núu kpɛ́-kpɛɛ da pâi pâi pôlu
20Tãi a pâi Eezuɛ-lonii nyii-ŋai lɛ̀ɛ ɣele mai, da fé pâi gíli tɔɔ̂i Asiria-ŋai nyii-ŋai kɛ̀ pâi dísu-karâi. Kɛ́lɛ díkili a pâi kɛ̂i nɔ́ Yâwɛɛ, Eezuɛ Ŋɔnúu Maa Waai ma a tɔ̃yâ-pere. 21Zeeka ŋɔnûai gbulu-lôŋ nɔ́ ƃé pâi tínanîi Ŋ̀wála-wâla kélee Ɣalai pɔ́ naa pere. 22Berei máŋ Eezuɛ-ŋai tâmaai la yɛ̂ɛ yúo su ŋãai, gbulu-lôŋ nɔ́ ƃé pâi tínanîi Yâwɛɛ pɔ́ naa pere. Ɣâla a gbâa gbɛtɛ a gɛɛ é ǹaa-ƃela su-kara yɛ̂ɛ berei dítûa-pere káa lai. 23Ǹuu-namui, Ŋ̀wála-wâla kélee Yâwɛɛ a pâi Eezuɛ lɔii gwaa kélee su karâi yɛ̂ɛ berei è gbɛ̀tɛ lai.
Yâwɛɛ a Asiria lɔii kula maa kɛ̂i
24Ŋ̀wála-wâla kélee Ɣalai Yâwɛɛ è mò ǹûai dîa Zãiyɔŋ Yeei ma, ǹyɛɛi, “Káfe yào Asiria-ŋai dîa berei máŋ da ká lúanîi la yɛ́ɛ berei Ize-ŋai da kâa gɛ̀ la a kánuu pɔ̂lɔ-ŋai. 25Ká kula maa kɛ́ɛi a nâa lɛɛ a tãi kpua. À kɛ̀ tí, ŋa pâi tínanîi dípɔ naa pere ŋá dísu-kara. 26Ńyãa, Ŋ̀wála-wâla kélee Yâwɛɛ ŋa pâi dílôkwai yɛ̂ɛ berei ŋá gɛ̀ la a Mediaŋ-ŋai Ore kɔnii mai. Ŋa pâi Asiria kula maa kɛ̂i yɛ̂ɛ berei ŋá Ize kula maa kɛ̂ lai. 27Tái tí a sèri, ŋa pâi káŋuŋ maa ƃôi Asiria yêei. Vé pâi ŋɔ́nɔ pɔrîi mɛni da kɛ̂i a káa. Ŋɔkáraŋ-ŋai kákɔŋ mai, ŋa pâi díkulâi naa ŋá dísu kara.”
Ǹyee-mɛi ɣâle-ƃelai
28Asiria kɔ kɔ́-ƃelai dí tɛ̀ Eea dí ǹaa siɣe. Dí tɛ̀ɛ Mekurɔŋ dí tɛ́ɛ Mimasi dí díkɔ kɔ́-sãai lɛ́ɛ naa. 29Dí tɛ̀ɛ a ǹyée su-perei dí tɛ́ Geeƃa. Ǹaa ƃé dí nyìi naa. Lama-ƃelai díkpɛ̃̀liŋ a yao, Gâloŋ Sɔ̂ɔ ŋɔnûai kɛ̀ Giƃiɛi, dí pú. 30Káai a Galimi-ƃelai, ka wɔ́lɔ a zu-kɛ́tɛ. Ka káwoli tɔ́ɔ, káai a Laki-ƃelai. Káai a Anatɔ̃ŋ-ƃela, ka Galimi-ƃelai wɔ́lɔ-woo su-too. 31Mamena da Gebiŋ-ƃelai da pûi a gɛɛ dí dífulu-laai maa kɔ̃ɔ. 32Sâa foloi ŋí mu, gɔ-kûluƃa-ŋai díkaa Nɔ̂ɔ taa-leei su. Da díkpîŋ kpɛtɛ̂i a gɛɛ dí kɔ́ pɛ́lɛ Zãiyɔŋ Yeei ma nyíi gáa a Zerusâlɛŋ Yeei.
33Ka gáa, Ǹuu-namui Ŋ̀wála-wâla kélee Yâwɛɛ a pâi Asiria kɔ-kuluƃa-ŋai su tée-têei yɛ̂ɛ da wúru woŋo tèe ma. Diai díwala-walai, a pâi dímaa yenîi. Diai dítɛ̂ɛi-ɣelei, a pâi díyenîi. 34Yâwɛɛ a pâi dípɔnîi é dísu tée-têe yɛ̂ɛ wolâ sâmai wuru ƃé da zu-tée-têe a yuɔ̂ yɛ̂ɛ berei nɔ́ da Lɛƃanɔŋ wuru lɛ́lɛɛ-ŋai têe lai.
Currently Selected:
Azaya 10: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
