Zɛnɛse 29

Zeeka è sèri Laƃaŋ pɔ́ naa

1Nya ƃe Zeeka è ŋɔsiai kûla é seri vóloi ƃelai-pere. 2Nya ƃe è ya-loa kàa nɔ̀ɔi su, ƃála-kpulu saaƃa kɛ́ ƃò puni gɔlɛ. Kpɛ́ni fêi, Ǹya-loai tí ƃé da kâa gùla díkɛ dɛ̀ɛ dípɔ. Gɔnii kɛ̀ ǹya-loai lái, è kɛ̀ a gɛ́tɛ. 3Tãi m̀ála-kpulu-ŋai da kâa díŋa tɛ̀ la ma naai, m̀ála mɛi-kaa-ƃelai da kâa kpɔ̀ŋ gɔnii mâ dí giliŋ dí gúla ǹya-loai lá dí yá kúla m̀ála-ŋai dîɛ. Naa pôlu ma da kâa gɔnii pɛ̂lɛ pôlu nya-loai lá.

4Nya ƃe Zeeka è mò m̀ála mɛi-kaa-ƃelai dîa ǹyɛɛi, “Ŋánûa, ká kùla mí?”

Dîyɛɛ mai, “Kú kùla Araŋ taa-leei su.”

5È mò dîa ǹyɛɛi, “Ká Naɔ ǹóŋ-surɔ̂ŋ Laƃaŋ kɔ́lɔŋ?”

Dîyɛɛ mai, “Kú gɔ́lɔŋ.”

6Ǹyɛɛ diai, “Gɔlɔ̂i ponoɔ̂ɔi?”

Dîyɛɛ mai, “Óoei, gɔlɔ̂i ponoɔ̂ɔi. Gáa, ǹóŋ-nɛnii Leesɛ káa pâi a ŋɔƃála-ŋai.”

7Ǹyɛɛi, “Gáa, tãi su kôyai niî. Tãi fé niî seri ní a gɛɛ m̀ála-ŋai dí díŋa tɛ́ ma. Ka yá tɛ́ɛ dípɔ ká lí a dia dí dílaa míi.”

8Kɛ́lɛ dí mò dîyɛɛi, “Kúfa pɔ̂ri gɛ̂i tí, fɛ̂ɛ kú m̀ála-ŋai kélee ŋá tɛ́ ma kú gɔnii kiliŋ kú gúla ǹya-loai lá kú yá tɛ́ɛ dípɔ.”

9Tãi è kɛ̀ niî lônoi la ǹûai pɔ́i, Leesɛ è pà a ǹâŋ ŋɔƃála-ŋai, kpɛ́ni fêi, ǹyaa ƃé kɛ̀ a dímɛi-kaa-nuu. 10Tãi Zeeka è ǹee zâaƃɔlɔ Laƃaŋ ǹóŋ-nɛnii Leesɛ kàa la da Laƃaŋ ŋɔƃála-ŋai, Zeeka è lì é gɔnii kilíŋ é gúla ǹya-loai lá é yá tɛ́ɛ Laƃaŋ ŋɔƃála-ŋai pɔ́. 11Nya ƃe Zeeka è ǹá-gbɔ sèe Leesɛ ma é wɔ́lɔ kpɔ́ a zu kɛ́tɛ. 12Zeeka è mò Leesɛ ma a gɛɛ gáa a Leesɛ ǹâŋ ŋɔkáayɔ, gɛ́ ƃò a Lubɛka ǹóŋ.

Nya ƃe Leesɛ è kîrɛ sìɣe é lí é mó ǹâŋ mà. 13Tãi Laƃaŋ è zâaƃɔlɔ ǹóŋ Zeeka tuŋ mɛ̀ni lai, è kîrɛ sìɣe é pá ǹá koyânii. È kpùlɔŋ mà, é ǹá-gbɔ see mâ, é pá la ŋɔpɛ́rɛi lá. Zeeka è mɛni-ŋai kélee su kùla Laƃaŋ ma. 14Nya ƃe Laƃaŋ è mò ma ǹyɛɛi, “Tɔ̃yâ ma, kúkaa a kpono tɔnɔ.” Da Zeeka dí ɣáloŋ tɔnɔ kɛ̀ naa.

Zeeka è tíi kɛ̀ Laƃaŋ mì Leesɛ da Liɛ dímɛni ma

15Nya ƃe Laƃaŋ è mò Zeeka ma ǹyɛɛi, “Berei máŋ íkaa la a ŋ́gaayɔi ƃa pɔ̂ri tíi kɛ̂i mî kpɛ́ni-kpɛni? Ífela-fei lɛ́ ḿâ.” 16Ǹyaŋ Laƃaŋ ǹônii-nɛyãai dí kɛ̀ feerɛ. Núu pɔlɔ-ɣelei láa ƃé kɛ̀ a Liɛ, ǹôloŋ-ɣelei láa kɛ́ ƃò a Leesɛ. 17Liɛ ŋɛ́i-laai fé kɛ́ ní a ǹɛ́lɛɛ a Zeeka nîa, kɛ́lɛ Leesɛ è kɛ̀ a ǹɛ́lɛɛ.

18Zeeka è kɛ̀ a Leesɛ wɛ́liɛɛ. Nya ƃe è mò ǹyɛɛi, “Ŋa pâi tíi kɛ̂i yɛ̂ a kóraŋ lɔ́ɔlu mɛi feerɛ íloŋ-nɛnii guro-tei Leesɛ mɛni ma.”

19Laƃaŋ è mò ma ǹyɛɛi, “Maa nɛ̃ɛ̂i ŋá dɛ́ɛ ípɔ é tɛ́ɛ la dɛ́ɛ mâ mî núu da kpɛ́ni pɔ́. Kú kɛ́ ƃɛ́.” 20Nya ƃe Zeeka è tíi kɛ̀ a kóraŋ lɔ́ɔlu mɛi feerɛ Leesɛ m̀ɛni ma. Kɛ́lɛ góraŋ kpɔŋ ŋí è kɛ̀ nɔ́ ŋ̀ɛ́i yɛ̂ɛ ɣele kûu kpɛ́-kpɛɛ, kpɛ́ni fêi, è kɛ̀ a Leesɛ wɛ́liɛɛ a ŋánaa.

21Zeeka è mò Laƃaŋ ma ǹyɛɛi, “Ŋánɛnîi tɛ́ɛ ḿbɔ kwa ǹyaa kú kɛ́ kúkîe ma, kpɛ́ni fêi, ŋátãi a kpɛɛ.” 22Nya ƃe Laƃaŋ è naa-ƃelai kélee ŋá tɛ̀ ma é kúu kɛ́. 23Kɛ́lɛ tãi ɣele-wulii è kɛ̀ lai, Laƃaŋ è ǹóŋ maa-ŋuŋ Liɛ sìɣe é pá la Zeeka pɔ́. 24Laƃaŋ è ǹyée mu-nɛnii Zipa tɛ̀ɛ ǹóŋ-nɛnii Liɛ pɔ́ a gɛɛ é kɛ́ a ǹyée-mu-nɛni. 25Ɣele ƃɔ́i, Zeeka è gàa a gɛɛ Liɛ ƃé ǹâŋ Laƃaŋ è pà la bɔ́. Nya ƃe Zeeka è mò Laƃaŋ ma ǹyɛɛi, “Lé ƃé ŋí í gɛ̀ a ńyãai? Leesɛ ƃé ŋá maa tîi kɛ̀ yɛ̂. Vé tí? Í ḿvìli lé mɛni ma?”

26Laƃaŋ ǹyɛɛ mai, “Vé tí kúlɔii su a gɛɛ lóŋ-nɛni guro-te é surɔ̂ŋ kula fúlɔi ǹîa-nɛnii túɛ. 27Tɔɔ ǹɛnî kula lɔɔ-kuui é kpɛ́ɛ. Gɛ̀ ní kwa pâi Leesɛ tɛɛ̂i máŋ ípɔ à kɛ̀ ƃâ maa tíi kɛ̀ a kóraŋ lɔ́ɔlu mɛi feerɛ.”

28Zeeka è gɛ̀ tí. È ŋɔlɔɔ-kuui kpɛ̂ɛ. Nya ƃe Laƃaŋ è ǹóŋ-nɛnii Leesɛ tɛ̀ɛ bɔ́ a ŋɔnɛnî. 29(Laƃaŋ è ǹyée mu-nɛnii Bila tɛ̀ɛ ǹóŋ-nɛnii Leesɛ pɔ́ a gɛɛ é kɛ́ a ǹyée mu-nɛni.) 30Nya ƃe Zeeka è lɔ̀ a Leesɛ pɔ̂rɔŋ máŋ. È Leesɛ wɛ̀li é tɛ́ɛ Liɛ ma. È tíi kɛ̀ ŋɔ́nɔ Laƃaŋ mì a kóraŋ lɔ́ɔlu mɛi feerɛ.

Zeeka è nîa-pɛlɛɛ maa sɔlɔ ƃô

31Tãi Yâwɛɛ è gàa la a gɛɛ Zeeka a Liɛ kpɔarai, è lóŋ tɛ̀ɛ bɔ́, kɛ́lɛ Leesɛ è kɛ̀ a kpóma nɛni. 32Nya ƃe Liɛ è koo sîɣe é lóŋ-surɔ̂ŋ maa sɔlɔ ƃó é ǹáa sée a Lubiŋ ǹyɛɛi, “Yâwɛɛ a ŋámɛni-solii káa, mɛni ma ŋásurɔ̂ŋ a pâi ŋ́wɛ̂lii.” 33È ŋɔ́nɔ koo sîɣe é lóŋ-surɔ̂ŋ maa sɔlɔ ƃó ǹyɛɛi, “Yâwɛɛ a lóŋ-surɔ̂ŋ tɛ́ɛ ḿbɔ ŋɔ́nɔ, kpɛ́ni fêi, a gáa a gɛɛ da ŋ́gbɔ̂ara.” Nya ƃe è ǹôloŋ láa sèe a Simiɔŋ. 34È ŋɔ́nɔ koo sîɣe é lóŋ-surɔ̂ŋ maa sɔlɔ ƃó, ǹyɛɛi, “Kwa ŋásurɔ̂ŋ kwa pâi kɛ̂i nâa zu tɔnɔɔ, kpɛ́ni fêi, ŋa lóŋ-sinaa saaƃa maa sɔlɔ ƃó mì.” Mɛni ma è ǹôloŋ láa sèe a Liva. 35Nya ƃe è ŋɔ́nɔ koo sîɣe é lóŋ-surɔ̂ŋ maa sɔlɔ ƃó ǹyɛɛi, “Ŋa pâi Yâwɛɛ láa maa tɛ̂i tãi ŋí su.” Mɛni ma è ǹôloŋ láa sèe a Zuda. È nâa kpèra lóŋ káa mà.

Currently Selected:

Zɛnɛse 29: KWB

Highlight

Copy