Zɛnɛse 28

1Nya ƃe Aise è Zeeka tòli é lûwa lá ma é mó ma ǹyɛɛi, “Ífe Keena nɛyâai da kùla a nɛnî. 2Ímu siɣe í lí Mɛsopotamia ílee ǹâŋ Bɛtuɛ pɔ́ naa í nɛnî kula naa ílee zâaƃɔlɔ Laƃaŋ ǹônii-nɛyãai sáma. 3Ŋ̀wála-wâla kélee Ɣalai é lûwa láa yâ é gɛ́ í ƃûu ƃó ísuui é kɛ́ a núu-kpulu su kɛ́tɛ. 4Ɣâla é Eberaɣɛ̃ɛ ŋɔlûwai tɛ́ɛ ípɔ ka ísuui a gɛɛ ǹɔii Ɣâla è dɛ̀ɛ Eberaɣɛ̃ɛ pɔ́ ƃɛ́i íkaa naa a ŋɔ̃yai, é kɛ́ a ípɔɔ.” 5Nya ƃe Aise è Zeeka tɛ̀ɛ é lí Araŋ-nuui Bɛtuɛ ǹóŋ Laƃaŋ pɔ́ naa. Laƃaŋ è kɛ̀ a Zeeka da Isɔɔ dílee Lubɛka zâaƃɔlɔ.

Isɔɔ è nɛnî da kpɛ́ni kùla

6Isɔɔ è gàa a gɛɛ Aise a lûwa láa Zeeka ma a dɛ́ɛ Mɛsopotamia a gɛɛ é nɛnî kula naa. È gàa ŋɔ́nɔ a gɛɛ tãi è lûwa làa la mai, è mò ma ǹyɛɛi, “Ífe Keena nɛyaai da kùla a nɛnî.” 7Ǹyaŋ Zeeka è ǹâŋ wóo mɛ̀ni da ǹee é lí Mɛsopotamia. 8Tãi Isɔɔ è gàa la a gɛɛ Keena nɛyâai dífe ǹâŋ Aise líi láa níi, 9Isɔɔ è lì Isimai pɔ́ naa é Nebayo zâaƃɔlɔ Maala kula a nɛnî, nyii kɛ̀ a Eberaɣɛ̃ɛ ǹóŋ Isimai ǹóŋ-nɛnii. Maala è nâa kɛ̀ a Isɔɔ ŋɔnɛnîi zaaƃa-ɣelei.

Zeeka è see ƃô Bɛtɛ

10Zeeka è kùla Bɛɛsiba é lí Araŋ pere. 11Nya ƃe è pà kwaa da ma é nyii naa, kpɛ́ni fêi, vóloi è nâa lì. È naa kɔnii dɔnɔ sìɣe é nɔ́ ŋ̀uŋ mu é ŋ̀uŋ láa mɛi gɛ́ nyîi. 12Nya ƃe è see ƃô é déle káa bîlaŋɔɔ ǹɔii ma, ŋ̀uŋ tɛ́ɛ ŋ̀ele-kɔlɔŋ su. Ɣâla ŋɔkéla-ŋai dí kɛ̀ tɛ̂i díkɛ yèŋ. 13Yâwɛɛ è tɔ̀ɔ délei ŋuŋ túɛ ǹyɛɛi, “Ńyãa ƃa Yâwɛɛ, nyii gáa a ínâŋ Eberaɣɛ̃ɛ da Aise díɣâlai. Ǹɔii íkaa lâa-ni mai, ŋa pâi dɛ̂ɛi ípɔ ká ísuui. 14Ǹyaŋ ísuui a pâi tâmai yɛ̂ɛ ǹɔii mâ ŋãyai. Ǹyaŋ ísuui a pâi serîi vóloi liî-pere da vóloi kulâi-pere, ǹɔii ŋûa-pere da ǹɔii kwára-pere. Ka ísuui kásârai, lûwa a pâi kɛ̂i ǹɔii su-ƃelai kélee dîa. 15Ŋ́gaa íkɔlɛ. Ŋa pâi ímɛi kâai ƃɛ́i kélee ƃa liî naai, ŋá pá a yá pôlu ŋɔ́nɔ ǹɔii ŋí su, kpɛ́ni fêi, fé pâi teêi yâ é lɛ́ɛ la zu m̀ɛnii ŋá mò yâi ŋá gɛ́.”

16Nya ƃe Zeeka è ŋ̀ɛ́i lá ƃò ŋɔnyii su ǹyɛɛi, “Tɔ̃yâ ma, Yâwɛɛ káa ƃɛ́, ǹyaŋ fé kɛ́ ní a gɔ̂lɔŋɔɔ!” 17È kɛ̀ yaôi. Nya ƃe è mò ǹyɛɛi, “Ƃɛ́ maa pɔlɔ-pɔlɔɔi léŋ ŋí? Nyíŋi fa pɔ̂ri kɛ̂i a sɛŋ da kpɛ́ni é kúla Ɣâla ŋɔpɛ́rɛi pôlu. Ǹyaŋ nyíŋi káa a Ɣâla-taa siɣãŋ lá.”

18Nya ƃe Zeeka è mu sìɣe a ŋ̀ele-wala pɛpɛi, é gɔnii síɣe nyii è nàa ŋ̀uŋ mu é ŋ̀uŋ láa mɛi, é dɔɔ a Ɣâla-teƃele é wúlɔ pú mà. 19Zeeka è naa láa sèe a Bɛtɛ (zu-kulai ƃa Ɣâla ŋɔpɛ́rɛi, kɛ́lɛ daai láa ƃe kɛ̀ a Luzi a maa-ŋuŋ). 20Nya ƃe Zeeka è góno tèe ǹyɛɛi, “À kɛ̀ Ɣâla a pâi kɛ̂i ŋ́gɔlɛ é mɛi káa ŋásiai su é mii-sɛŋ tɛ̀ɛ ḿbɔ ŋá mii é seɣe tɛ́ɛ ḿbɔ ŋá doo ḿâ, 21a gɛɛ ŋá pá ŋɔ́nɔ ńâŋ ŋɔpɛ́rɛi mu lii-see su, gɛ̀ ní Yâwɛɛ a pâi kɛ̂i a Ŋáɣâla. 22Gɛ̀ ní gɔnii ŋí ŋá dɔ̀ɔ a Ɣâla teƃelei, a pâi kɛ̂i a Ɣâla ŋɔpɛ́rɛ. Zɛŋ kélee Ɣâla a dɛ̀ɛ ḿbɔi, ŋa pâi buu-ɣelei tɛɛ̂i bɔ́.”

Currently Selected:

Zɛnɛse 28: KWB

Highlight

Copy