Zɛnɛse 20

Eberaɣɛ̃ɛ da Abimelɛ

1Eberaɣɛ̃ɛ è kùla naa é lí Keena lɔii kwára pere é sée Kedɛ da Suu díloai. È kɛ̀ nɔ́ Gera lɔii su a ŋɔ̃ya. 2Tãi è kɛ̀ la naai, è mò a gɛɛ ŋɔnɛnîi Seera káa a zâaƃɔlɔ. Nya ƃe Gera kaloŋ, Abimelɛ, è núu tɛ̀ɛ Seera kanai. 3Kɛ́lɛ Ɣâla è pà Abimelɛ pɔ́ a gbínii seêi-pere, ǹyɛɛ ma, “Gáa íkaa pâi saâi, kpɛ́ni fêi, nɛnîi í zîɣei bɔ̂ŋ káa ma.”

4Ǹyaŋ Abimelɛ fé niî kɛ̀ lɛɣɛ ní nɛnîi ma. Nya ƃe è mò ǹyɛɛ, “Kúnuu-namui, ƃa pâi ḿbaâi, ǹyaŋ ŋ́zɔŋ fé mɛnii su? 5Ǹyaa kpîŋ vé mó ní ḿâ a gɛɛ zâaƃɔlɔ ƃa nɛnîi, nɛnîi ǹyaŋ é mó ḿâ a gɛɛ Eberaɣɛ̃ɛ káa a zâaƃɔlɔ? Fé gɛ́ ní a líi nyɔŋ. Ŋá gɛ̀ a líi lɛ̂lɛɛ.”

6Nya ƃe Ɣâla è mò ma ŋɔseei su ǹyɛɛi, “Óoei, ŋá gɔ́lɔŋ a gɛɛ í gɛ̀ a lii lɛ̂lɛ. Ńyãa ƃé gɛ̀ a gɛɛ ífe sɔnyɔ̂ŋ kɛ̀ a ńyãa. Mɛni ƃé fé ílɛɛ ní la naa a gɛɛ í lɛ́ɣɛ ma. 7Mɛni ma, nalôŋ ŋɔnɛnîi tɛ́ɛ pôlu bɔ́, kpɛ́ni fêi, gáa a ŋálono-kɛ-nuu. A pâi ḿvɛlìi ímɛni ma ífulu-laai su é kôya. Kɛ́lɛ ƃà wàla ŋɔnɛnîi tɛ́ɛ bɔ́ pôlu, gɛ̀ ní é kɛ́ íkili ŋá a gɛɛ ka ínûai ka pâi saa títi ƃôi.”

8Nya ƃe Abimelɛ è mu sìɣe a ŋ̀éle-walai é ŋɔtíi-kɛ-ƃelai kélee tóli é mɛni-ŋai ŋí ƃó dîa. Ǹûai dí yào a ŋánaa. 9Nya ƃe Abimelɛ è Eberaɣɛ̃ɛ tòli é mó ma ǹyɛɛi, “Lé ƃé í gɛ̀ ŋí a kûai? Lé mɛni nyɔ́mɔɔ ƃé ŋá gɛ̀ a yá, ǹyaa ƃa pá a zɔnyɔ̂ŋ sii ŋí kwa ŋánûai kûai? Ƃa mɛnii kɛ́ a ńyãa nyii vêi pɔ̂ri kɛ̂i.” 10Abimelɛ è ŋɔ́nɔ mò ma ǹyɛɛi, “Íkili-ŋa-siai è kɛ̀ léŋ íkɛ nyíŋi kɛ̀?”

11Eberaɣɛ̃ɛ ǹyɛɛ mai, “Ŋá gɛ̀ tí, kpɛ́ni fêi, ŋá kɛ̀ gâai yao-maa fé ƃɛ́ Ɣâla mɛni ma. Ǹyaŋ ŋá kɛ̀ yaôi a gɛɛ dífa lâa ḿbaa la ŋánɛnîi mɛni ma. 12Nyíŋi pôlu ma, gáa a ŋ́zâaƃɔlɔ a tɔ̃yâ. Gáa a ńâŋ ǹóŋ-nɛni, kɛ́lɛ vé a ńee ǹóŋ. Mɛni ma ŋá gùla a nɛnî. 13Tãi Ɣâla è ŋ́gûla la ḿbɔ taai a gɛɛ ŋá sía ǹɔii da kpɛ́ni-ŋai sui, ŋá mò Seera ma, ‘Mɛni lɛ́lɛɛi ƃa pɔ̂ri gɛ̂i ḿî ǹyaa ká ŋí. Kwa kùla kwaa kélee ma, mó yɛ̂ɛ ísâaƃɔlɔ ƃa ńyãa.’ ”

14Nya ƃe Abimelɛ è ƃála-sîrɛ da niŋa-sîrɛ sìɣe é pɛ́lɛ luɛ-ŋa dîa, é dɛ́ɛ Eberaɣɛ̃ɛ pɔ́, é ŋɔnɛnîi Seera tɛ́ɛ bɔ́ pôlu. 15Nya ƃe Abimelɛ è mò ma ǹyɛɛi, “Ŋálɔii ká ŋí. Ƃɛ́i ƃa ŋ̀wɛ̂lii, see naa.” 16È mò Seera ma ǹyɛɛi, “Ŋá sɛŋ-káne wála tɔnɔ (1,000) tɛ̀ɛ ísâaƃɔlɔ pɔ́. Nyíŋi ƃé pâi ǹɛ̂i ínûai kélee dîa a gɛɛ ísɔŋ fé mɛnii ŋí su. Ísãâi núu kélee ŋɛ́i.”

17Nya ƃe Eberaɣɛ̃ɛ è Ɣâla fɛ̀li. Ɣâla é Abimelɛ ƃálo é ŋɔnɛnîi ƃálo máŋ da ǹúɛ nɛyâai a gɛɛ dí nîa-pɛlɛɛ maa sɔlɔ ƃó. 18È nyíŋi kɛ̀, kpɛ́ni fêi, Yâwɛɛ è Abimelɛ ŋɔpɛ́rɛi mu-nɛyâai kélee koi pâa Eberaɣɛ̃ɛ ŋɔnɛnîi Seera mɛni ma.

Currently Selected:

Zɛnɛse 20: KWB

Highlight

Copy