Zɛnɛse 19

Sodɔŋ-ƃelai dísɔnyɔ̂ŋ

1Ŋ̀âla-taa-kela feerɛi dí pà Sodɔŋ a ŋ̀ele-wulii. La è kɛ̀ seeni Sodɔŋ ziɣãŋ lá. Tãi è díkàa lai, è mu sìɣe é lí díla koyânii. È pɛ̀lɛ díkɔɔ mu 2ǹyɛɛi, “Núu-namela, ŋa kákpera fêi ká pá káyee mu-nuui ŋɔpɛ́rɛi mu ká kákɔɔ maa wáa, ká nyii naa. Ka pâi tínaa liî a ɣele-wala pɛpɛ.”

Dí mò ma dîyɛɛi, “Kpao! Kwa pâi nyii berei mâ.”

3Kɛ́lɛ è lòno dípɔ a gbanaŋɔɔ. Nya ƃe dí lì ŋɔpɛ́rɛi mu. È kúu kɛ̀ dîa, é tɛ́-sɛŋ féu kpolo kpɛtɛ dí mìi.

4Kɛ́lɛ dí lɛ́ɛ pâi lâai Sodɔŋ taai su-sinaai, ǹyáŋkpa-ŋai da ǹúu-pɔlɔ-ŋai díkelee dí tînaŋ bɛ́rɛi mâ. 5Dí La tòli dîyɛɛ mai, “Ǹûai pà ípɔ a gbínii, dia kɔɔ? Pá a dîa kúpɔ a gɛɛ kú lɔ-pɔ̂rɔŋ kɛ́ a dia.”

6Nya ƃe La è kùla ŋ̀énii ŋá é bɛ́rɛi lá tɛ́ é lí ǹûai pɔ́ naa, 7ǹyɛɛ diai, “Ka kpera kâa ŋánûa, káfe ŋwana-lɔ̂ɔ tuai ŋí kɛ̀. 8Ka gáa, ńônii-nɛyaa feerɛ káa naa, nyii-ŋai dífe niî seɣe ɣíri níi. Tɔɔ ŋá pá a dîa kápɔ, mɛnii ka ŋ̀wɛ̂lii ká gɛ́ a dîa. Kɛ́lɛ káfe mɛni da kélee kɛ̀ a ǹûai ŋí, kpɛ́ni fêi, díkaa a ŋáŋɔ̃ya-ŋa.”

9Kɛ́lɛ dí mò dîyɛɛi, “Síɣe ƃɛ́.” Díyɛɛi, “Nalôŋ ŋí káa a ŋɔ̃ya, ǹyaŋ a ŋ̀wɛ̂lii é kúmɛni ŋá tée. Kwa pâi tûa nyɔ́mɔɔ kɛ̂i a yá é tɛ́ɛ dîa.” Nya ƃe dí nâa kpɔ̀ŋ La ma duãŋ, dí lí a gɛɛ dí gbôŋ wólo. 10Kɛ́lɛ ǹûai kɛ̀ bɛ́rɛi mui, dí díyee kùla dí La soŋ dí bíli bɛ́rɛi mu dí bɛ́rɛi lá tɛ́. 11Nya ƃe La ŋɔŋɔ̃ya-ŋai kɛ̀ bɛ́rɛi mui, dí ǹûai kɛ̀ ŋ̀énii ŋái ŋɛ́i pù, bɛlɛ-pɛlɛɛ da gbaya-kpayaa, a gɛɛ dífe gbôŋ lá kàa.

La è kùla Sodɔŋ

12Nya ƃe ŋɔ̃ya-ŋai dí mò La ma dîyɛɛi, “Ínuu da kpɛ́ni káa ƃɛ́? Íƃɔ̂lɔ, ílônii-sinaa, ílônii-nɛyaa, kpaa máŋ ínuu da kpɛ́ni nyii gáa daai ŋí sui, kula ƃɛ́ a díkelee. 13Kwa pâi ƃɛ́ su karâi, kpɛ́ni fêi, ŋ̀ɔ́lɔ-wooi gáa ƃɛ́-ƃela dísɔnyɔ̂ŋ mɛni mai, zu a nâa kɛ́tɛ Yâwɛɛ ŋɛ́i. Ǹyaŋ Yâwɛɛ a kútɛɛ a gɛɛ kú ƃɛ́ su kara.”

14Nya ƃe La è lì é mó zinâai dîa, nyii-ŋai kɛ̀ pâi ǹônii-nɛyãai kulâi a dínɛyâai, ǹyɛɛi, “Ka kámu síɣe ká kúla ƃɛ́, kpɛ́ni fêi, Yâwɛɛ a kɛ́ pâi daai ŋí su karâi.” Kɛ́lɛ è kɛ̀ nɔ́ díŋɛi a pêle.

15Ɣele ƃɔ́i kɛ́ɛ a serii, ŋ̀âla-taa kela-ŋai dí mò La ma dîyɛɛi, “Ímu síɣe í ínɛnîi da ílônii-nɛyãai kúla ƃɛ́, à wàla kɛ́ tí daai ŋɔtɔŋ-kpɛ-maai a pâi kásu karâi.” 16Kɛ́lɛ vé gɛ́ ní a maa félaa. Nya ƃe ŋɔ̃ya-ŋai dí zòŋ a ǹyée da ŋɔnɛnîi é pɛ́lɛ ǹônii-nɛyaa feerɛi dîa, dí díkula daai su. Kpɛ́ni fêi, Yâwɛɛ è dímalôŋ kàa. 17Tãi dí díkùla la daai mai, dí mò dîa dîyɛɛi, “Ka pú ká káfulu-laai maa kɔ̃ɔ. Káfe kápôlu kàa, kpaa máŋ ká kpéra kwaa da kélee ma ǹyéei koo mu. Ka pú ká tɛ́ ǹyéei su, káfa lâa saa la.”

18Nya ƃe La è mò dîa ǹyɛɛi, “Óo kpao, núu-namela. 19Ka gáa, kálii a láa ḿɛni ma, ńyãai a káyee-mu-nuui, ka wɛli-kɛ-maa kɛ́tɛ lɛ́ ḿâ a ŋáfulu-laai maa kɔ̃ɔ. Kɛ́lɛ fa pɔ̂ri pûi ŋá tɛ́ ǹyéei su. Naa kôyai. Ŋá lɛ́ɛ pâi serîi naa, m̀ɛni-kpɔ̂lui ŋí a pâi serîi ḿâ, ǹyaŋ gɛ̀ ní ŋa pâi saâi. 20Taa tɔnɔ káa ƃɛ́ kɔlɛ, nyii ŋa pɔ̂ri pûi ŋá lí zui. Guro têi, tɔɔ ŋá pú ŋá lí zu. Gáa a taa lôŋ, nyii ŋa pɔ̂ri ŋáfulu-laai maa kɔ̃ɔ̂i zui.”

21È mò ma ǹyɛɛi, “Gáa, ŋa íwoo mɛ́ni, fé pâi daai su karâi nyii ƃa lônoi é pîlaŋ mai. 22Ímu síɣe a maa félaa í lí naa, ǹyaŋ fé pâi mɛni da kélee kɛ̂i fɛ̂ɛ í seri naa.”

Mɛni ƃé dí daai láa sèe la a Zoa.

Sodɔŋ da Gomora su kara mɛni

23Tãi La è sèri la Zoai, vóloi è kɛ̀ a fólo-nɛnɛŋ. 24Nya ƃe Yâwɛɛ è Sodɔŋ da Gomora su kâra a kɔni-fãa da ŋɔŋ nyii-ŋai kùla ŋ̀élei sui. 25È daa-ŋai tí su kàra da naa kpiniŋ su kélee é pɛ́lɛ zu-ƃelai kélee dîa da gala-ŋai kélee lɛ̀lɛ ǹɔii mai. 26Kɛ́lɛ La ŋɔnɛnîi è kɛ̀ bôlu díkɛ lì. Nya ƃe nɛnîi è bôlu kàa é pene a kpolo-liyeŋ kɔni kɛ́tɛ.

27Nya ƃe Eberaɣɛ̃ɛ è lì a ɣele-wala pɛpɛ ƃɛ́i è tɔ̀ɔ naa Yâwɛɛ ŋɛ́i-tuɛ a maa-ŋuŋ. 28È Sodɔŋ-pere kàa da Gomora da naa kɔlɛ ma kpiniŋ é ǹúrii káa ǹɔii mɛi yɛ̂ɛ suluŋ lá luru. 29Tãi Ɣâla è daa-ŋai su kâra la gbîniŋ tí sui, Eberaɣɛ̃ɛ maa mɛni è tôo gíli ŋá, é La kula mɛni-kpɔ̂lui su tãi è daa-ŋai su kâra la ƃɛ́i La è kɛ̀ naai.

Môa-ŋai da Amɔŋ-ŋai dísuu pîlaŋ-pere

30Nya ƃe La è kùla Zoa é sée ǹyéei ma da ǹônii-nɛyaa feerɛi, kpɛ́ni fêi, è kɛ̀ yaôi a gɛɛ é sée Zoa. Mɛni ma è kɛ̀ kɔni-wolo su da ǹônii-nɛyaa feerɛi. 31Nya ƃe ǹóŋ maa-ŋuŋ è mò ǹêɣe ma ǹyɛɛi, “Kúnâŋ káa a núu pɔlɔ, ǹyaŋ surɔ̂ŋ da kélee fa pɔ̂ri kulâi ǹɔii su é pá kúpɔ é kúkula a nɛnî yɛ̂ɛ nɛnî kula-pere. 32Pá kú ŋwãai tɛ́ɛ kúnâŋ pɔ́ é gbele a gɛɛ kwa dîa-ni kú lɔ-pɔ̂rɔŋ kɛ́ a gɛɛ kúsuu é lɛ́ɛ ɣele ma zârai.” 33Nya ƃe dí ŋwãai tɛ̀ɛ dínâŋ pɔ́ é gbele a gbínii tí. Ǹóŋ maa-ŋuŋ é lí da nyaa dílɔ-pɔ̂rɔŋ kɛ́. Kɛ́lɛ, ǹâŋ fé kɛ́ ní a gɔ́lɔŋɔɔ tãi da ǹyaa díǹɔ-pɔ̂rɔŋ kɛ̀ lai, kpaa máŋ tãi è mu sìɣe lai.

34Bôlu ma ɣelei, La ǹóŋ maa-ŋuŋ è mò ǹêɣe ma ǹyɛɛi, “Gáa, kwa ńâŋ kú sâa lɔ-pɔ̂rɔŋ kɛ̀ a gbínii tí tɛ̀ɛi. Kú ŋwãai tɛ̀ɛ bɔ́ é gbele ŋɔ́nɔ sâa a gbínii, ka ǹyaa ká lɔ-pɔ̂rɔŋ kɛ́ a gɛɛ kúsuu é lɛ́ɛ ɣele ma zârai.” 35Nya ƃe dí ŋwã̂ai tɛ̀ɛ dínâŋ pɔ́ é gbele ŋɔ́nɔ a gbínii tí. Ǹóŋ guro-te-ɣelei è lì da ǹyaa dí lɔ-pɔ̂rɔŋ kɛ́. La fé kɛ́ ní a gɔ́lɔŋɔɔ tãi da ǹóŋ guro-tei díǹɔ-pɔ̂rɔŋ kɛ̀ lai, da tãi è mu sìɣe lai. 36Nya ƃe è ǹônii-nɛyãai veerɛŋɔɔ koo kɛ̀ dîa. 37Ǹóŋ-nɛnii maa-ŋuŋ è lóŋ surɔ̂ŋ maa sɔlɔ ƃô é ǹáa sée a Môa. Môa ƃé gáa a Môa-ŋai dínâŋ é seri sâa ma. 38Nèɣe-ɣelei è lóŋ surɔ̂ŋ maa sɔlɔ ƃô máŋ é ǹáa sée a Bɛnami. Ǹyaa ƃé kɛ̀ a Amɔŋ-ŋai dínâŋ é seri sâa ma.

Currently Selected:

Zɛnɛse 19: KWB

Highlight

Copy