Zia-ƃelai Kɛ́-mɛni-ŋai 7

Tiƃiŋ è gbîŋ maa kɔ̃̂ɔ

1Zâla láa soŋ-nuu kɛ́tɛi è mò, ǹyɛɛ, “M̀ɛni-ŋai ŋí káa a tɔ̃yâ?”

2Tiƃiŋ è zu-tòo ǹyɛɛ, “Ŋánûa da ńâŋ-ni, ka ŋ́oo mɛni. Vólo-laa Ɣalai è kùla kúnâŋ Eberaɣɛ̃ɛ ŋɛ́i é lɛ́ɛ liî Araŋ a gɛ́ɛ é sée naa Ɣâla è kùla ŋ̀ɛ́i Mɛsopotemiai. 3È mò ma, ǹyɛɛi, ‘Kula ílɔii su ínûai sáma í pá ǹɔii su ŋa pâi ǹɛ̂i yâi.’ 4Nya ƃe è kùla ŋɔnûai sáma é lí é sée Araŋ. Ǹâŋ saai, Ɣâla è gùla naa é lí la ǹɔii ŋí su kwa seêni mai. 5Ɣâla fé ǹɔii ŋí gbua da kpîŋ tɛ̀ɛ ní bɔ́ a gɛ́ɛ é sée naa, kɛ́lɛ, è góno tèe ǹyêei a gɛ́ɛ a pâi dɛɛ̂i bɔ́ a gɔ̃liŋ da ŋɔsuui. Eberaɣɛ̃ɛ fé niî kɛ̀ loŋ da maa sɔlɔ ní. 6Ɣâla ǹyɛɛ mài, ‘Ŋɔsuui a pâi kɛ̂i a ŋɔ̃yâ ƃarâa dílɔii su. Da pâi dísônii yɛ̂ɛ luɛ dí díkɛ dí mɛni-soli káa kóraŋ ŋuŋ náaŋ yée mu.’ 7Ɣâla è mò, ǹyɛɛ, ‘Ǹɔii-ŋuŋ da pâi ǹuɛ-laai kɛ̂i zui, ŋa pâi ŋɔmɛni ŋá têei. Nàa pôlu ma da pâi kulâi maa lɔii-ŋuŋ su, dí pá ƃé dí tíi kɛ́ mî.’ 8Nya ƃe Ɣâla è nuu-kpɛtɛ mɛni maa kpanaŋ-woo kɛ̀ Eberaɣɛ̃ɛ yêei. Gɛ́ɛ tí, Eberaɣɛ̃ɛ è Aise maa sɔlɔ ƃô é zee kpono ma gɛ́ɛ a fólo lɔ́ɔlu mɛi saaƃai. Aise è Zeeka maa sɔlɔ ƃo, Zeeka é nîa-pɛlɛɛ puu kao feerɛ maa sɔlɔ ƃó. Ǹûai ŋí ƃa sâa kánâŋ pɔlɔ-ŋai.

9“Kánâŋ pɔlɔ-ŋai ŋí dí kɛ̀ tólo kulâi Zosɛ ma. Dí gɔ̀lɛ Ize lɔii su. Kɛ́lɛ, Ɣâla è kɛ̀ gɔlɛ. 10È gùla ŋɔmɛni kpɔ̂lui kélee su é lûwa láa ma é táre tɛ́ɛ bɔ́ Ize kaloŋ Feelo ŋɛ́i tuɛ, nyíi gɛ̀ a Ize lɔii da ŋɔpɛ́rɛi mɛi-nuui. 11Nya ƃe puru su kɛ́tɛ è tòo Ize da Keena lɔii gwaa kélee da mɛni kpɔ̂lu támaa. Kúnâŋ-ni dífe kɛ́ ni mii-sɛŋ da sɔlɔ ƃôi. 12Kɛ́lɛ, Zeeka è mɛ̀ni a gɛ́ɛ gbai è kɛ̀ Ize. Nya ƃe e kúnâŋ ni tɛ̀ɛ naa a m̀aa-ŋuŋ. 13Ziai veerɛ ɣelei, Zosɛ è gbîŋ lɛ̀ ǹía-ni dîa é ŋɔnûai lɛ́ Ize kaloŋ ma. 14Nya ƃe Zosɛ è ǹâŋ Zeeka worɛ̂ tɛ̀ɛ da ŋɔnûai kélee a gɛ́ɛ dí pá Ize. Dí kɛ̀ a núu buu lɔ́ɔlu mɛi feerɛ kao lɔ́ɔlu. 15Nya ƃe Zeeka è lì Ize, é sáa naa da kúnâŋ-ni. 16Dí lì pôlu a dia Sɛkɛŋ dí díloo m̀olôŋ su ǹɔii ma Eberaɣɛ̃ɛ è wɔ́lɔ naa yà a sɛŋ-kao Amɔŋ ǹônii yêei Sɛkɛŋ.

17“Kɛ́lɛ, gono-teei ŋɔtãi lɛɣɛi, nyíi Ɣâla è gɛ̀ Eberaɣɛ̃ɛ yêei, ǹûai dí ƃûu ƃò Ize dí támaa 18é lɛ́ɛ zu kâloŋ da kpɛ́ni é mu siɣe Ize nyíi vé kɛ́ ní a Zosɛ kɔ́lɔŋɔɔ̂i. 19Gâloŋ ŋí è ŋ̀wana-lɔ̂ɔ tua tee-tèe kɛ̀ a kúsuui su-ƃelai. È tùa a kúnâŋ-ni a nyɔ́mɔɔ, é díkɛ a gɛ́ɛ dí dílônii kɔatara-ŋai kɛ́ díŋuŋ lá é píli a gɛ́ɛ dífe kɛ̀ ɣele ma. 20M̀aa tãi ŋí su ƃé dí Mose maa sɔlɔ ƃò la. È kɛ̀ a gwatara è kɛ̀ a ǹɛ́lɛɛ. Ŋɔnûai dí m̀ɛi kàa a ɣáloŋ saaƃa ǹâŋ ŋɔpɛ́rɛi mu. 21Tãi dí bìli lai, gâloŋ ǹóŋ-nɛnîi è zìɣe a ǹóŋ é ŋá-kɔŋ. 22Mose è Ize-ƃelai dítarei kélee maa kɔ̀ri é gɔ́lɔŋ. È kɛ̀ a núu kɛ́tɛ ŋ̀óo su da dûa-pere.

23“Gɛ́ɛ a kóraŋ buu náaŋ, è gbɛ̀tɛ ǹíi su a gɛ́ɛ é lí ŋɔnûai Eezuɛ-ƃelai naa kâai. 24Gɛ́ɛ a dɔnɔ káa da Ize naloŋ dɔnɔ dí kɛ́ kɔ̂i, è ǹúui maa kɔ̃ɔ m̀arâŋ tûai la a ǹyɔ́mɔɔi. È Ize naloŋ lòkwa é bàa. 25È kɛ̀ gâai a gɛ́ɛ ŋɔŋûai dí táre zu berei Ɣâla a pâi díŋuŋ ma ƃôi la ǹyaa Mose sârai. Kɛ́lɛ, dífe táre ni kɛ̀ zu. 26Bôlu ma ɣelei è kùla ŋɔnûai veerɛ ma díkɛ namu kɔ̀. È kɔ̀ a gɛ́ɛ é díŋaa kɔlɛ, ǹyɛɛi, ‘Ŋánûa, kákaa a nuu tɔnɔ. Lé ƃé ka kákîe-ni ŋwânai mɛni mai?’ 27Kɛ́lɛ, ǹúui m̀arâŋ kɔ̀rii, è Mose tùaŋ, ǹyɛɛ mài, ‘Gbɛ̂ɛ ƃé íkɛ̀ a mɛni ŋá-tee-nuu kúloai? 28Ya ŋ̀wɛ̂lii í ḿbaa yɛ̂ɛ berei í wɛ́ɛ Ize naloŋ pàa lai?’ 29M̀ɛnii ŋí ƃóɔɔ nalôŋ mìi, Mose è pù é lí Midiaŋ. È lɛ̀ɛ naa é lónii-sinaa feerɛ maa sɔlɔ ƃó.

30“Kóraŋ buu náaŋ tɛɛ pôlu ma, Ɣâla-taa kela è pà bɔ́ Sana Yeei maa Fɛ̃yɛ-kpalaŋ su. Ŋ̀âla-taa kelai ŋí è kɛ̀ ŋɔŋ-leŋ su ɣalêŋ kpɔlɔ su. 31M̀ɛnii ŋí naa káa Mose mii, ǹá è kpàla ma. Ǹɛɣɛɛ naa a gɛ́ɛ é naa káai, è Kúnuu-namui wóo mɛ̀ni, ǹyɛɛ mài, 32‘Ńyãa ƃa ínâŋ pɔlɔ-ŋai Díɣâlai, Eberaɣɛ̃ɛ Ŋɔɣâlai, Aise Ŋɔɣâlai, da Zeeka Ŋɔɣâlai.’ Mose è kpɛ̃liŋ vé pɔ̂ri ní naa kâai. 33Kúnuu-namui è mò ma, ǹyɛɛi, ‘Íkɔlɔ̂i kúla íkɔɔ ŋá. Ƃɛ́i íkaa tɔ̂ɔni naai, naa káa a lɔii maa waa. 34Ŋa ŋánûai dímɛni-solii káa, nyíi-ŋai díkaa Izei. Ŋa díŋuŋ su-saa wooi mɛni, ǹya ƃé ŋa pá a gɛ́ɛ ŋá díŋuŋ ma ƃo. Pá ŋa pâi ítɛɛ̂i Ize.’

35“Mosei ŋí dí díyee kula mu, díkɛ m̀o, dîyɛɛi, ‘Gbɛ̂ɛ ƃé íkɛ̀ a núu kɛ́tɛ da mɛni ŋá-tee-nuui?’ Ǹyaa nɔ́ ƃé Ɣâla è dɛ̀ɛ, a gɛ́ɛ é kɛ́ a núu-mɛi-nuu da núu-ŋuŋ ma ƃó-nuu Ŋ̀âla-taa kelai sârai nyíi pà bɔ́ ŋ̀álêŋ kpɔlɔi sui. 36Gɛ́ɛ a mɛni kpaya-kpaya-ŋa da ŋɛi-kɛ-maa-ŋa kɛ́ Ize, da Ǹyúo Kpɔ̂lui su da vɛ̃ɛ-kpâlaŋ su a kóraŋ buu náaŋ, è díkùla yeei kɛ̀. 37Mose ká nyíi mò Eezuɛ-ƃelai dîa, ǹyɛɛ, ‘Ɣâla a pâi lóno kɛ́-nuu tɛɛ̂i kámɛni ma. A pâi kulâi kásuui su yɛ̂ɛ ńyãa.’ 38Ǹyaa ƃé kɛ̀ Ŋ̀âla-ƃelai sáma vɛ̃ɛ-kpâlaŋ su da Ŋ̀âla-taa kelai nyíi lòno bɔ́ Sana Yeei ma, ǹyaŋ gɛ́ lòno kúnâŋ-ni pɔ́i. Mosei ŋí è mɛni fûlu-ŋa sɔlɔ ƃô a gɛ́ɛ é mó kûa.

39“Kúnâŋ-ni dífe ŋ̀óo mɛni ní. Dí dùaŋ kwaa tɔnɔ ma-pere, dí tinaŋ Ize pere dílii su. 40Dí mò Eelɔŋ ma, dîyɛɛi, ‘Ɣâla-ŋa kpɛtɛ kûɛ dí tɔɔ kútuɛ, kpɛ́ni fêi, Mosei ŋí nyíi kúkùla Ize lɔii sui, kúfe mɛnii kɔ́lɔŋ a kɛ́ lai.’ 41Nya ƃe dí niŋa-lonii pɔɔkɔ̂ŋ kpɛ̀tɛ a ŋ̀ele-ŋai tí dí sâla kula ma. Dí kɛ̀ díkpɔɔ̂i kpɛtɛ sɛŋ maa lii-nɛ̃ɛ kulâi. 42Ɣâla è tìnaŋ é bôlu fé dîɛ é dílɛɛ naa a gɛ́ɛ dí ŋ̀áloŋ fɛli, bɛmɛlɛŋ-kao-ŋai, da vóloi nyíi-ŋai díkaa ŋ̀elei sui, yɛ̂ɛ berei bɔ̃yɛɛ̂i la Ɣâla ŋɔlóno kɛ́-ƃelai díkɔlɔi su, ǹyɛɛi,

‘Eezuɛ-ƃelai kélee, káfe taa-tulɛ kula ḿâ

a sâla da sâla da kpɛni-ŋa

góraŋ buu náaŋ yée mu vɛ̃ɛ-kpâlaŋ su?

43Ka ŋ̀âlai Molɛ ŋɔpɛ́rɛi siɣe da ŋâlai da dòli a

Lefaŋ ŋɔpɛmɛlɛ̂ŋ-kaoi,

nyíi gáa a ɣâla-pɔɔkɔŋ-ŋa ka zàa a gɛ́ɛ ka vɛlii.

Ŋa pâi liî a káa Babelɔŋ pôlu-pere.’

44“Sêre-faa pɛrɛ è kɛ̀ kúnâŋ-ni yêei vɛ̃ɛ-kpâlaŋ su, gbɛ́tɛɛ yɛ̂ɛ berei Ɣâla è mò Mose ma a gɛ́ɛ é gbɛtɛ la yɛ̂ɛ berei ǹyaa Mose è gbɛtɛ pere kàa lai. 45Bɛ́rɛi ŋí kúnâŋ-ni dí zɔlɔ ƃô díwɔ̂ nua pɔlɔ-ŋai yêei. Dí pà la ƃɛ́ tãi dí kɛ̀ la Zasua mui. Dí Zɛ̃tai-ŋai yée mɛi ɣàle, nyíi-ŋai Ɣâla è díkpɛ̀ dí siɣe kúnâŋ-ni ŋɛ́i. Bɛ́rɛi e lɛ̀ɛ díyêei é lɛ́ɛ la zu Deeƃé ŋɔtãi é seri. 46Ɣâla líi è kɛ̀ a ǹáa Deeƃé yêei. Deeƃé è gberâi fè a gɛ́ɛ é ǹɛɛ naa é pɛ́rɛ kɔ́ri Zeeka Ŋɔɣâlai mɛni ma. 47Kɛ́lɛ, Saloma ƃé pɛ́rɛ tɔ̀ɔ mì.

48“É máŋ kɛ́ ti, Ǹúui Gɛ́tɛi va kɛ̂ pɛ́rɛ mu, dí dɔ̀ɔ a núu-kpune yeei, yɛ̂ɛ berei Ɣâla ŋɔlóno kɛ́-nuui a mò la, ǹyɛɛi,

49‘Ŋ̀elei su ƃa ŋátɔɔ-kpeliŋ,

ǹɔii ma kɛ́ ƃo a ŋ́gɔɔ-tɔɔi.

Lé pɛrɛ ƃé ka pɔ̂ri tɔɔ̂i ḿɛni ma?

Kpaa máŋ, mí ƃé gáa a ḿvii-tɔɔi?

50Fé zãâi ŋí kélee kpɛtɛ ní a ńyee?’

51“Wolii-kpɔlɔ-ƃela, káai Ɣâla fé kálii su, kpaa máŋ káfa ŋ̀óo mɛnii, ka tɔɔ M̀ɔlêŋ Maa Waai ŋɔtíi tuɛ a tãi kélee. Berei kánâŋ-ni dí tùa lai, bere nɔ́ ƃé kákaa tuâi la. 52Ɣâla ŋɔlóno kɛ́-ƃelai nênɛ ƃé vé mɛni-soli káa ní kánâŋ-ni yêei? Kánâŋ-ni dí Ɣâla worɛ̂-woo ƃó-ƃelai kélee pà a nyíi-ŋai kɛ̀ Dɔ̃yâ Nuui pá mɛni ƃôi nàa túɛi. Káa kpîŋ ka káyee kúla Dɔ̃yâ Nuui ŋí mu ka bàa. 53Káa ƃé ka dɔ̂ŋ maa sɔlɔ ƃò Ɣâla-taa kela-ŋa yêei. Kɛ́lɛ káfe mɛi káa ní.”

Dí Tiƃiŋ sɔ̀ɔ a kɔni

54M̀ɛni-ŋai ŋí mɛniɛɛ dîɛi, dílii è tèe díkoi díkɛ dísîa-mii la. 55Kɛ́lɛ, gbono è kɛ̀ a ǹáa fɛ́ɛ a M̀ɔlêŋ Maa Waai. E ŋ̀elei su kàa kpɔ́ é Ɣâla ŋɔfóloi káa é Zîsɛ káa tɔ̂ɔni Ɣâla láa mii yée mɛi, 56é m̀ó, ǹyɛɛi, “Ŋa ŋ̀elei su kâai ǹá ƃóɔɔ, núu-kpune Ǹóŋ kɛ́ ƃò tɔ̂ɔni Ɣâla láa mii yée mɛi.” 57Dí làɣi a zu-kɛ́tɛ, dí díyee lɔ́ díwolii, díkelee dí zoŋ a gîe a maa félaa. 58Dí gùla daai su dí pɛ́lɛ zɔɔ̂i a kɔni. Diai kɛ̀ zɔɔ̂i a gɔnii, dí díseɣe-ŋai pù ńyaŋkpa tɔnɔ kɔ́ɔ mu. Ǹyaŋkpâi ŋí láa ƃé kɛ̀ a Sɔ̂ɔ. 59Díkɛɛ Tiƃiŋ sɔɔ̂i, è Ɣâla fɛ̀li, ǹyɛɛi, “Kúnuu-namu Zîsɛ, íyee sée ŋámɔ̂leŋ mu.” 60È pù ŋume ŋá é wɔ́lɔ a ŋ̀óo su-kɛ́tɛ, ǹyɛɛi, “Kúnuu-namui, ífe díkula maa kɛ̀ dísɔnyɔ̂ŋ ŋí mɛni ma.” Nyíŋi ƃóɔɔ mìi, è sàa.

Currently Selected:

Zia-ƃelai Kɛ́-mɛni-ŋai 7: KWB

Highlight

Copy