Zia-ƃelai Kɛ́-mɛni-ŋai 6
6
Dí ǹúu lɔ́ɔlu mɛi feerɛi lɛ̀
1Ŋ̀ele-ŋai tí su Zîsɛ ŋɔpôlu-ƃelai kɛ̀ tâmai, Yɛ̂lɛni-ŋai dí kɛ̀ díŋuŋ su-woo saâi gɛ pîlaŋ Ibulu-ŋai dîa. Kpɛ́ni fêi, Ibulu-ŋai dí díŋɛi nàɣîŋ dípɔɔ-nɛyaai mɛi ŋ̀ele kûu tɔnɔ́-tɔnɔ́ mii-sɛŋ ŋá kɔlɛ mɛni ma. 2Nya ƃe bôlu-ƃela puu kao feerɛi dí ǹaa-la-ƃelai kpéli-ŋai kélee tòli gîe ma dîɛ dîai, “M̀aa fé nɛ̃ɛ ní kú Ɣâla ŋɔwóoi lɛ́ɛ kú mii-sɛŋ ŋá kɔlɛ teƃele ma. 3M̀ɛni ma, ŋánûa, ka núu sã́a lɛ́lɛɛ lɔ́ɔlu mɛi feerɛ kɔ́ri kásama nyíi-ŋai dílaa fɛɛ a M̀ɔlêŋ da tarei, a gɛ́ɛ ku dítɔɔ mɛnii ŋí láa tuɛ. 4Kɛ́lɛ, kwa pâi kúŋuŋ pûi Ɣâla fɛliɛ su a tãi kélee da ŋɔwóoi ƃoɔ.” 5Mɛnii ŋí è gbɔŋ kélee líi làa. Nya ƃe dí Tiƃiŋ lɛ̀, nyíi kɛ̀ a ǹáa fɛɛ a laa-la da M̀ɔlêŋ Maa Waai, da Fele, Purisela, Naikenɔ, Taimɔ, Paaminɛ, é pɛ́lɛ Nekolɛ ma, nyíi nâa pène a Zûu-nuu é kúla Ɛŋtiɔ taai sui. 6Dí ǹûai ŋí kùla zia-ƃelai ŋɛi. Tãi dí kɛ̀ Ɣâla fɛlîi lai, dí díyee pɛ̀lɛ dîa.
7Ɣâla ŋɔwóoi e ƃɔ̀lɔ; Zîsɛ ŋɔpôlu-ƃelai dí tama kpɔ́ a zu kɛ́tɛ Zerusâlɛŋ, Zâla láa soŋ-ƃelai dámaa dí díyee sèe naa-lai mu.
Dí Tiƃiŋ sòŋ
8Tiƃiŋ, nyíi ǹáa è kɛ̀ a vɛɛ a Ɣâla ŋɔƃɛlɛ-sêei da ŋɔwála-walai, e mɛni kpaya-kpaya-ŋa da ŋɛi-kɛ-maa-ŋa kɛ̀ ǹûai sama. 9Kɛ́lɛ, nûa-ŋa dí kùla Ŋ̀âla-fɛli kêre-ŋai mu da dítòli a Leƃetiŋ Ɣâla-fɛli-kerei, Sailini Ɣâla-fɛli-kerei, da Alezaŋdura Ɣâla-fɛli-kerei, da diai kùla Sɛlisia da Eesia, dí kɛ̀ yeli tɔɔ Tiƃiŋ lá. 10Kɛ́lɛ, dífe pɔ̂ri ni tɔɔ̂i ŋɔtárei ŋ́ɛi-tuɛ da M̀ɔlêŋ, nyíi è lòno lai. 11Nya ƃe dí mò nûa dîa loo-pere su a gɛ́ɛ dí mo a ǹáa, dîyɛɛi, “Ku ŋ̀óo mɛ̀ni gɛ tɛ-ŋɛi-woo-ŋa ƃo gɛ pîlaŋ Mose ma da Ɣâla.” 12Dí ǹûai líi mu siɣe, da ǹúu pɔlɔ-ŋai, e pɛlɛ gɔlɔ-pɔ̃yɛ-ƃelai dîa, dí pa dí zoŋ dí pa la goyâŋ su-ƃelai ŋɛi tuɛ. 13Dí woya-sere-faa kɛ-ƃela lɛ̀, nyíi-ŋai mò, dîyɛɛi, “Ǹalôŋ ŋí fa wɔ́lɔ kpèra lônoi a nyɔ́mɔɔ é pîlaŋ gwaa maa waai ŋí ma da dɔ̂ŋ; 14kpɛ́ni fêi, ku mɛ̀ni ǹá, a gɛ́ɛ Nâzarɛ Zisɛi ŋí a pâi gwaai ŋí ma karâi, é kútûa-perei maa fáleŋ nyíi Mose e dɛ̀ɛ kúpɔi.” 15Diai kélee kɛ̀ seêni goyâŋ sui, dí gàa, dí ŋ̀ɛi káa yɛ̂ɛ Ɣâla-taa-kela ŋɛ́i.
Currently Selected:
Zia-ƃelai Kɛ́-mɛni-ŋai 6: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
