Kɔlɔnikɔ Veerɛi 5
5
1Saloma kpɛɛ́ a bɛ́rɛi tɔɔ̂i Yâwɛɛ mɛni mai, è pà a zãâi ǹâŋ Deeƃé è ǹâai kɛ̀i. È pà a gánei, gôoi da zãai da kpɛ́ni-ŋai Ŋ̀âla-pɛrɛ Kɛ́tɛi ŋɔsãa lâai kɛ́ kwaai ma Ɣâla ŋɔpɛ́rɛi mu.
Dí pà a Gbanaŋ-woo kɛ́ɛ maa Gãlai Ŋ̀âla-pɛrɛ Kɛ́tɛi mu
(Kâloŋ-ŋa Maa-ŋuŋ 8:1-9)
2Saloma è ǹúu pɔlɔ-ŋai, ǹúu-laa túɛ-ƃelai da Eezuɛ kaloŋ-ŋai kélee ma tòli Zerusâlɛŋ a gɛ́ɛ dí lí dí pá a Yâwɛɛ ŋɔkpanaŋ-woo kɛ́ɛ maa Gãlai. Gãlai ŋí è kɛ̀ Zãiyɔŋ Deeƃé ŋɔtaa-lêei su. 3Ǹûai kélee dí díŋaa tɛ̀ ma gâloŋ pɔ́-naa a gúui kɛ́ ŋ̀ele ŋ̀áloŋ ǹɔ́ɔlu mɛi feerɛi su. 4Díkelee díŋaa tɛ́ɛ gîe mai, Liiva-ŋai dí Gãlai sìɣe. 5Dí Gãlai sîɣe, zua-kɔlɔ pɛrɛi tɔɔ seɣei, zãa maa waai-ŋai kélee da bɛ́rɛi mu sãai kélee. Zâla-laa soŋ-ƃelai nyii-ŋai kɛ̀ a Liiva-ŋai ƃé zãai ŋí sìɣe. 6Gâloŋ Saloma da ǹûai kɛ̀ naai díkelee dí díŋaa tɛ̀ gîe ma Gãlai ŋɛ́i-tuɛ díkɛ sâla kùla. Dí zâla ŋí kùla a ƃála da niŋa-sirɛ támaa. Dífe pɔ̂ri ní kɛ̀ daa-tulɛ-ŋai ŋí lônoi kpaa máŋ gíli é lɛ́ɛ díŋa. 7Nya ƃe zâla-láa soŋ-ƃelai dí lì a Yâwɛɛ Ŋɔkpanaŋ-woo kɛ́ɛ maa Gãlai Ŋ̀âla-pɛrɛ Kɛ́tɛi mu dí zèe Gwaa ma-waai ŋɔkwaa-ma-waai ma ŋ̀âla-taa kooŋ-sãai koôŋ mu. 8Goôŋ sãai ŋí koôŋ è kɛ̀ a bɛ́lɛɛ Gãlai mɛi da Gãlai siɣe-wurui kélee. 9Gãlai siɣe wuru-ŋai díkɛ̀ a díkôyaa é tɛɛ Gãlai ma. Núu a kâa lɛ̀ɛ tɔ̂ɔni Gwaa ma-waai ŋɔkwaa-ma waai téniŋ ma gɛ́ gàa. Kɛ́lɛ, núu fa kâa gàa kwaa da kpɛ́ni ma pere. Díkaa naa sâa ƃa sâa. 10É tée gɔni ƃela feerɛi Mose è wɔ́lɔ Dɔŋ puui pɔ̃yɛɛ m̀a é doo Gbanaŋ-woo-kɛ́ɛ Gãlai su Sana Yeei mai, sɛŋ da kpɛ́ni fé kɛ́ ni zu. Ŋ̀elei ŋí ƃé Yâwɛɛ è wɔ́lɔ gbanaŋ-wooi kɛ́ la Eezuɛ-ŋai yêei díkɛɛ wɔ́lɔ kulâi Ize lɔɔi sui.
Yâwɛɛ ŋɔfólo-laai
11-14Nya ƃe zâla láa-soŋ-ƃelai kélee dí kùla Gwaa ma-waai ma dí díkpîŋ kpɛtɛ. Dífe kɛ́ ni a díkpaaŋɔɔ ǹuu-kpului nyíi díkɛ̀ zui mɛni ma. Liiva-ŋai kɛ̀ a ŋ̀ule-too ƃelai--Asafi, Emaŋ, Zedutuŋ da dínuu-suui su-ƃelai díkɛ̀ a dímaa ɣiriɛɛ a seɣe kole nɛnɛ-fɛfɛ. Liiva-ŋai díkɛ tɔɔ̂i ŋ̀âla-teƃelei ŋɔfóloi kulâi-pere ƃelai ma pere nyɛ̃-yɛŋ da kɔniŋ kɛ́ ƃô díyêei. Sâla-laa soŋ-ƃela ŋ̀uŋ tɔnɔ pôlu buu feerɛ (120) díkɛ̀ tɔɔ̂i díkɔlɛ díkɛ túru fɛ̀ɛ. Ŋ̀ule-wooi da dúru-wooi, nyɛ̃-yɛŋ ɣale tiŋ da ŋàle sãai gberi-ŋai kélee díkɛ̀ díkîe pôlu a ǹɛ́lɛɛ. Dí kɛ̀ Yâwɛɛ láa ma tɛ̀ a wule-ŋa toôi dîyɛɛi,
“Kwaa Yâwɛɛ láa maa tɛ́, kpɛ́ni fêi, zɔŋ lɛ̂lɛɛi.
Ŋɔwɛli kɛ́-maai káa nɔ́ naa wɔ́lɔ.”
Tãi zâla-laa soŋ-ƃelai díkɛ kulâi la Ŋ̀âla-pɛrɛ Kɛ́tɛi mui, ŋ̀ele-kɔlɔŋ kolei è pà é ǹaa láa fɛ́ɛ a maa félaa gɛ́ kɛ̀ yɛrɛŋ-yɛrɛŋ Yâwɛɛ ŋɛ́i-tuɛ. M̀ɛni ma, dífe pɔ̂ri ní Ŋ̀âla-fɛliɛɛi kpéli kpɛɛ̂i.
Currently Selected:
Kɔlɔnikɔ Veerɛi 5: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
