Kɔlɔnikɔ Veerɛi 6
6
Saloma è lòno ǹûai pɔ́
(Kâloŋ-ŋa Maa-ŋuŋ 8:12-21)
1M̀ɛnii ŋí kɛ́ɛ a kɛ̂i, Saloma è mò Yâwɛɛ ma ǹyɛɛi, “Í mò a gɛ́ɛ ya pâi kɛ̂i ŋ̀ele-kɔlɔŋ kolei su da gbínii. 2Kɛ́lɛ ŋa Ŋ̀âla-pɛrɛ Kɛ́tɛi maa pɔlɔ-pɔlɔɔ tɔɔ ímɛni ma a gɛ́ɛ íkɛ mu wɔ́lɔ-wɔlɔ da wɔ́lɔ-wɔlɔ.”
3Eezuɛ-ƃelai kélee díkɛ̀ tɔɔ̂-ni naa. Nya ƃe gâloŋ è tìnaŋ dípɔ naa pere é lûwa too dîa Ɣâla láai su. 4È mò dîa ǹyɛɛi, “Laa-ma-tɛ é tɛ́ɛ Yâwɛɛ pɔ́ nyíi gáa a Eezuɛ Ɣâlai. A ŋɔkono-têei ŋ̀aa see kɛ́ nyíi è wɔ́lɔ gɛ̀ ńâŋ Deeƃé yêei. Kpɛ́ni fêi, è mò ǹâŋ ma ǹyɛɛ, 5‘É síɣe kpɔ́ tãi ma ŋá ŋánûai kùla la Izei, ḿve niî tá taa-leê da lɛ́ ní Eezuɛ-ŋai dísuui da sáma a gɛ́ɛ dí Ɣâla-pɛrɛ kɛ́tɛ tɔ́ɔ ńaai mɛni ma, kpaa máŋ ḿve niî núu da siɣe ní a gɛ́ɛ é kɛ́ ŋánûai Eezuɛ-ŋai mɛi. 6Kɛ́lɛ ŋâa nâa Zerusâlɛŋ siɣe zu a gɛ́ɛ ŋá ŋápɛrɛi tɔ́ɔ naa. Ŋaâ ŋɔ́nɔ Deeƃé síɣe a gɛ́ɛ é kɛ́ ŋánûai Eezuɛ-ŋai mɛi.’ ”
7“Ńâŋ Deeƃé è wɔ́lɔ gbɛ̀tɛ gíli ŋá a gɛ́ɛ é pɛ́rɛ tɔ́ɔ Yâwɛɛ, Eezuɛ Ɣalai mɛni ma. 8Kɛ́lɛ Yâwɛɛ è mo ǹâŋ Deeƃé ma ǹyɛɛi, ‘Í gɛ̀ a ǹɛ́lɛɛ a gɛ́ɛ í gbɛ̀tɛ íkili ŋá a gɛ́ɛ í pɛ́rɛ tɔ́ɔ mî. 9É máŋ kɛ́ tí, yá kpîŋ fé pâi bɛ́rɛi ŋí tɔɔ̂i mɛ̂ni ma. Kɛ́lɛ íkpɔɔi loŋ-surɔŋ ƃé pâi bɛ́rɛi ŋí tɔɔ̂i ḿɛni ma.’
10“Ǹyaŋ Yâwɛɛ aâ ŋɔkono-teei ŋaa-see kɛ́. A ńɛɛ ńâŋ Deeƃé pɔ́ɔ ŋá. Ŋ́gaa nâa seê-ni gâloŋ see-sɛŋ ŋá yɛ̂ɛ berei Yâwɛɛ è góno tèe lai. Ŋa Ŋ̀âla-pɛrɛ Kɛ́tɛi tɔ́ɔ Yâwɛɛ mɛni ma nyíi gáa a Eezuɛ Ŋɔɣâlai. 11Ŋaâ gbanaŋ woo kɛ́ɛ Gãlai seêi mu. Gãlai ŋí ƃé gbanaŋ wooi nyíi Yâwɛɛ é wɔ́lɔ gɛ̀ Eezuɛ-ŋai dîɛi káa zu.”
Saloma è Ɣâla fɛ̀li
(Kâloŋ-ŋa Maa-ŋuŋ 8:22-53)
12Naa kɛ́ɛ tíi, Saloma è tɔ̀ɔ ŋ̀âla-teƃelei ŋ́ɛi tuɛ ǹûai kélee ŋɛ́i é ǹyée sã́a. 13Tãi ŋí yée mu, Saloma è ƃara gbɛ-gbɛ tɛ̀ Ŋ̀âla-pɛrɛ Kɛ́tɛi ŋɛ́i-tuɛ. Gbɛ-gbɛi ŋí ŋɔkôya da ŋɔŋa kɛ̂tɛ díkɛ a kɔ́ɔ ƃɔ̂rɔnii lɔ́ɔlu mɛi saaƃa, ŋɔmusîɣe kɛ́ ƃò a kɔ́ɔ ƃɔ̂rɔnii lɔ́ɔlu. Nya ƃe Saloma è tɛ̀ ŋá é pîlaŋ gbêleŋ-ŋa ǹûai kélee díkɛ gàa. Gɛ́ɛ tí, è ǹyée tɛ̀ ŋ̀elei su Ɣâla-taa pere. 14È nâa pɛ̀lɛ Ɣâla fɛlîi ǹyɛɛ, “Yâwɛɛ, Eezuɛ Ŋɔɣâlai, Ɣâla da kpɛ́ni fé ŋ̀ele su, kpaa máŋ ǹɔii ma nyíi móloŋɔɔ yâ. Íkaa a Ɣâla. Ya í kpanaŋ-wooi ŋàa see kɛ́. Ya íwɛli-kɛ-maai lɛ́ íyee mu-ƃelai nyii-ŋai da tíi kɛ̀ yɛ̂ɛi a dílii kélee dîa. 15Yâ íyee sée gono-teei mu nyíi íwɔlɔ gɛ̀ ńâŋ Deeƃé yêei a íwooi. Ǹyaŋ, yâa ŋa-see kɛ́ a íkpɔɔi yèe yɛ̂ɛ berei kúkaa sâa gâai lai. 16M̀ɛni ma, Yâwɛɛ, Eezuɛ Ŋɔɣâlai, ye gono-teei ŋa-see kɛ́ nyíi íwɔlɔ gɛ̀ ńâŋ Deeƃé yêei. Íwɔlɔ mò yɛ̂ɛi, ‘Deeƃé ŋɔsuui su-ƃelai dífe pâi kulai galoŋ-see sɛŋ ŋá. A kɛ̀ nɔ́ ílônii sinaai da tùa a ǹɛ́lɛɛ dí ŋátɔ̂ŋ-ŋai mɛi káa yɛ̂ɛ berei gáa lai.’ 17Gɛ̀ ní Yâwɛɛ, yái íkaa a Eezuɛ Ŋɔɣâlai, ǹɛɛ naa gono-teei íwɔlɔ gɛ̀ ńâŋ Deeƃé mì ŋaa-see é kɛ́ yɛ̂ɛ berei íwooi káa lai.
18“Kɛ́lɛ tɔ̃yâ kpîŋ ma, Ɣâla a pɔ̂ri kɛ̂i ǹɔii ŋí ma? Ífa pɔ̂ri ŋ̀ele-kɔlɔŋ da m̀ɛi pere ɣele-kɔlɔŋ su. M̀ɛni ma Ŋ̀âla-pɛrɛ Kɛ́tɛi ŋá dɔ̀ɔ yɛ̂ɛi guro-tei ímaa mɛni ma! 19É máŋ kɛ́ tí, ye íwoli tɔ́ɔ íyee mu-nuui ŋɔfɛli-wooi da ŋɔpɛlɛ-a-gɔɔi ma íŋɛi-maloŋ-kaai mɛni ma óo Yâwɛɛ ŋáɣâlai. Ye íwoli tɔ́ɔ íyee mu-nuui ŋɔfɛli wooi ma nyíi a gɛ̂i íŋɛi tuɛi. 20Tɔɔ íŋɛi é kɛ́ bɛ́rɛi ŋí ma a kpíni da fólo. Í íkono tèe a gɛ́ɛ kú ífɛli gwaai ŋí ma. Ye íwoli tɔ́ɔ íyee mu-nuui ŋɔfɛli-wooi ma gwaai ŋí ma. 21Ye ínûai dípɛlɛ-a-gɔɔ wooi mɛni a tãi kélee da ífɛli la gwaai ŋí mai. Ya kɛ̀ ípɔ-taai Ɣâla-taa, ye íwoli tɔ́ɔ í mɛnii mɛ́ni da pâi ífɛlîi mai í dísɔnyɔ̂ŋ su mɛni lɛɛ.
22“À kɛ̀ núu da a mɛni nyɔ́mɔɔ kɛ̀ a m̀arâŋ-nuu é pá a gɛ́ɛ é vóo ŋ̀âla-teƃelei ma ípɛrɛi ŋí mu, 23ye lɛɛ Ɣâla-taa í ŋóo mɛni í zu too. Íyee mu-ƃelai dímɛni-saai ƃó í díkula-maa kɛ́ yɛ̂ɛ berei dítûa-pere nyɔ̂ŋ káa lai. Ǹúui nyíi ŋɔmɛnii lɛ̂lɛɛi, zu too yɛ̂ɛ berei ŋɔmɛni lɛ́lɛɛi káa lai.
24“À kɛ̀ ínûai Eezuɛ-ŋai díkpɔara-ƃelai da díyee mɛi ɣâle kɔ́ su kpɛ́ni fêi Eezuɛ-ŋai dísɔnyɔ̂ŋ kɛ̀ a yá, tãi da tînaŋ la dí pá dí dísɔnyɔ̂ŋ ƃó dí pɛ́lɛ a íkɔɔ Ŋ̀âla-pɛrɛ Kɛ́tɛi ŋí mu, 25gɛ̀ ní ye lɛɛ Ɣâla-taa í díwoo mɛ́ni í dísɔnyɔ̂ŋ su mɛni lɛɛ í pá a dia pôlu ǹɔii su nyíi ídɛ̀ɛ dípɔi da dínâŋ ni.
26“À kɛ̀ ŋ̀ele-kɔlɔŋ láa a tɛ̀ tuna fa ŋɔ̂nɔ pù kpɛ́ni fêi ínûai da sɔnyɔ̂ŋ kɛ́ a yá, gɛ̀ ní tãi da pâ la ƃɛ́ dí dísɔnyɔ̂ŋ ƃó dí dípôlu tɔɔ dísɔnyɔ̂ŋ-ŋai dîa, kpɛ́ni fêi ya mɛni kpɔ̂lu láa dîa, 27gɛ̀ ní ye lɛɛ Ɣâla-taa í díwoo mɛni í dísɔnyɔ̂ŋ-ŋai su mɛni lɛɛ, diai díkaa a Eezuɛ-ŋai. Ye dɔ̃ya-perei lɛ́ dîa í gɛ́ tuna é pú dí lɔi su nyíi ya wɔ́lɔ dɛɛ dípɔ a díkɔ̃liŋ.
28“À kɛ̀ puru kɛ́tɛ kpaa máŋ laa-kpala-maa kɔlɔ-fela a tòo ǹɔii su, é máŋ kɛ́ yɛ̂ɛ kɔlɔ-fela nyíi a dísi-sãai kpâlai, kpaa máŋ gotó, kpaa máŋ kotêŋ, kpaa máŋ à kɛ̀ díkpɔara-ƃelai da dítaa-lêe-ŋai da sòŋ, kpaa máŋ laa-kpala-maa mɛni kpɔlu da kɔlɔ-fela a dísòŋ, 29À kɛ̀ núu da a pà a ífɛ̀li nyíi gáa a ínûai Eezuɛ-ŋai da, kpɛ́ni fêi, yâ mɛni da sɛŋ soli maa láa dîa, à kɛ̀ da díyee tɛ̀ ɣelêi Ŋ̀âla-pɛrɛ Kɛ́tɛi ŋí ma pere, 30gɛ̀ ní ye lɛɛ ípɔ-taai Ɣâla-taa í díwoo mɛni. Dísɔnyɔ̂ŋ-ŋai su mɛ̂ni lɛɛ í dímɛnii ŋá tée yɛ̂ɛ berei dítûa-perei káa lai. Kpɛ́ni fêi í díkelee dílii su mɛnii kɔ́lɔŋ. 31Ye nyíŋi kɛ́ a sɛŋ díyao yâ, dísia yɛ̂ɛ berei ítûa-perei káa lai tãi díkaa la ǹɔii su nyíi ídɛ̀ɛ kúnâŋ-ni pɔi.
32“À kɛ̀ a ŋɔ̃ya nyíi vé a ínûai da kɛ́lɛ è kùla lɔii da kpɛ́ni su é pá ƃɛ́ kpɛ́ni fêi è ílaa maa tûŋ mɛ̀ni da berei íyee láa ƃôɔɔi lai, a Ɣâla fɛ̀li Ŋ̀âla-pɛrɛ Kɛ́tɛi ŋí mu, 33ye lɛɛ Ɣâla-taa ƃɛ́i íkaa naai í ŋ̀óo mɛ́ni, í m̀ɛnii kɛ́ mì nyíi a ŋ̀wɛ̂lii í gɛ́ mìi. Ye nyíŋi kɛ́ a gɛ́ɛ ǹûai kélee díkaa ɣele mai díyao yâ yɛ̂ɛ berei ínûai Eezuɛ-ŋai da yâo la yâi, a gɛ́ɛ dígɔlɔŋ a gɛ́ɛ ŋá bɛ́rɛi ŋí tɔ̀ɔ ímaa mɛni ma.
34“A kɛ̀ ínûai da lî kɔ́ mâ yɛ̂ɛ berei ímo la diai, da díkpɔara-ƃela, da díŋɛi tìnaŋ daa-lêei ŋi ma pere nyíi yâ ziɣe zu ƃɛ́i ípɛrɛi káa naai, nyíi ŋa dɔ̀ɔ ímɛni mai, dí ífɛli, 35ye lɛɛ Ɣâla-taa ƃɛ́i íkaa naai í díwoo mɛ́ni í íyee sée díɣâla fɛli-wooi mu.
36“Tãi da sɔnyɔ̂ŋ kɛ̀ la a yá, kpɛ́ni fêi núu da fé naa nyíi va sɔnyɔ̂ŋ kɛ̀i, à kɛ̀ ya ílii ŋwana dîa dí tɛ́ɛ díkpɔara-ƃelai pɔ́, dí lí a dia luɛ-laa su, lɔii su kôyaa, kpaa máŋ kwaa kpûa ma, 37Ǹyaŋ à kɛ̀ da dílii maa fâleŋ ǹɔii su ƃɛ́i díkaa naa ǹuɛ-laai sui, dí dípôlu tɔɔ dísɔnyɔ̂ŋ ma dí íkperai fé dí luɛ-laai su, dí mó yâ, ‘kwa sɔnyɔ̂ŋ kɛ́ a yá, kwa tûa nyɔ́mɔɔ da ŋwana lɔ̂ɔ kɛ́’ 38ǹyaŋ à kɛ̀ da tìnaŋ ípɔ naa pere a dílii da dímɔ̂leŋ kélee díluɛ-laai su dí díŋɛi tínaŋ ǹɔii su-pere nyíi í dɛ̀ɛ dínâŋ-ni pɔi, dí díŋɛi tínaŋ daa-lêei su pere nyíi ya zìɣei, da ípɛrɛi nyíi ŋá dɔ̀ɔ ímɛni mai, 39ye lɛɛ Ɣâla-taa ƃɛ́i íkaa naa í díwoo mɛ́ni. Da díkpera fé í íyee sée dímu a ínûai da sɔnyɔ̂ŋ kɛ́ a yái dísɔnyɔ̂ŋ su mɛni lɛɛ.
40“Óo Ŋáɣâlai, ye íŋɛi laa ƃó í íwoli tɔ́ɔ ŋ̀âla fɛli-woo-ŋai dîa nyii-ŋai da pâi gɛ̂i gwaai ŋí mai. 41À kɛ̀ tí, óo Yâwɛɛ Ŋáɣâlai, í mu siɣe í pá ífii tɔɔ kwaai ma, ƃɛɛi íwala-wala-laai maa kpanaŋ-woo-kɛɛ Gãlai káa naai. Óo Yâwɛɛ Ɣâla, tɔɔ ísala-laa soŋ-ƃelai díkɛ a dímaa ɣiriɛɛ a ƃalo-laa. Tɔɔ íma-waa-ƃelai dí lii-nɛ̃ɛ kula ímɛni-lɛlɛɛi su. 42Óo Yâwɛɛ Ɣâla, ífe íyee kùla gâloŋ mu nyíi ya ziɣe zui. Ŋ̀wɛli-kɛ-maai í íkono tèe la íyee mu-nuui Deeƃé yêei gíli é lɛ́ɛ í ŋa.”
Currently Selected:
Kɔlɔnikɔ Veerɛi 6: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
