Kâloŋ-ŋa Maa-ŋuŋ 21
21
Dí Nabo pàa ŋɔkpɔmɔ kpâlaŋ mɛni ma
1Nalôŋ tɔnɔ è kɛ̀ naa ǹáa ƃé kɛ̀ a Nabo. È kɛ̀ a Zariɛɛ ŋɔsuui su nuu. Kpɔmɔ kpâlaŋ è kɛ̀ ǹyêei Zariɛɛ, Sameria kaloŋ Eɣa ŋɔkâloŋ pɛrɛ kɛ́tɛi kɔlɛ. 2Ɣele tɔnɔ da Eɣa è mò Nabo ma ǹyɛɛi, “Íkpɔmɔ kpâlaŋ tɛ́ɛ ḿbɔ ŋá naa kɛ́ a ŋásûa, kpɛ́ni fêi, gáa ŋákâloŋ pɛrɛ kɛ́tɛi kɔlɛ ma. Ŋa pâi kpɔmɔ kpâlaŋ lɛ́lɛɛ tɛɛ̂i ípɔ a bɔɔ-ŋa tòo é tɛ́ɛ nyíŋi ma, kpaa máŋ ƃa kɛ̀ ŋ̀wɛ̂lii, ŋá zɔ̃ɔ tɛ́ɛ ípɔ a sɛŋ-kao ŋa pâi gɛ̂i tí.”
3Kɛ́lɛ Nabo è mò ma ǹyɛɛi, “Yâwɛɛ fé mɛni a gɛ́ɛ ŋá ńâŋ-ni dípɔɔ-sɛŋ tɛ́ɛ ípɔ.”
4Nya ƃe Eɣa è lì pôlu bɔ́-taai, lii-too pôlu da lii-ŋwâna su, kpɛ́ni fêi, Zariɛɛ-nuui Nabo è mò ma ǹyɛɛi, “Fé pâi ńâŋ pɔlɔ-ŋai díkɔ̃liŋ tɛɛ̂i ípɔ.” È làa ŋɔgbìŋ ŋá a lii-ŋwâna. Vé fáa ní ma a gɛ́ɛ é mii-sɛŋ da mii. 5Ŋɔnɛnîi Zɛsebɛɛ è pà bɔ́ é marê kɛ́ ǹyɛɛ mai, “Lé mɛni ƃé ŋ̀wanâi yâ ímɛi saai? Lé ƃé kɛ̀ ífe ŋ̀wɛ̂lii í mii-sɛŋ da kélee mii?”
6È ŋɔnɛnîi wóo su tòo ǹyɛɛ m̀ai, “Ŋá mò Zariɛɛ-nuui Nabo ma, ‘Íkpɔmɔ kpâlaŋ kɔ́lɛ ḿâ kpaa máŋ yà kɛ̀ ŋ̀wɛ̂lii, ŋa pâi kpɔmɔ kpâlaŋ da kpɛ́ni tɛɛ̂i ípɔ a bɔɔ-ŋa too.’ Kɛ́lɛ è mò ḿâ ǹyɛɛi, ‘Ḿve pâi ŋá kpɔmɔ kpâlaŋ tɛɛ̂i ípɔ.’ ”
7Ŋɔnɛnîi Zɛsebɛɛ ǹyɛɛ m̀ai, “Bere ƃé ya tûa la ƃíai a Eezuɛ kaloŋ? Ímu siɣe í ílaa míi! Lii-nɛ̃ɛ kula. Ŋa pâi Zariɛɛ-nuui Nabo ŋɔkpɔmɔ kpâlaŋ sɔlɔ ƃôi ímɛni ma.”
8Nya ƃe è kɔlɔ-ŋa pɔ̃yɛ Gâloŋ Eɣa láai su é Gâloŋ yée pɔɔ kɛ́ dîa, é dítɛɛ ǹúu-pɔlɔ-ŋai da dɔɔ-ƃela kpaya-kpayai nyii-ŋai kɛ̀ daa-lêei su ƃɛ́i Nabo è kɛ̀ naai dípɔ. 9È bɔ̃yɛ gɔlɔ-ŋai tí su ǹyɛɛi, “Ka sûŋ siɣe mɛni kpɛ̀tɛ. Ka Nabo see ƃaa kɛ́-maa see-sɛŋ lɛ́lɛɛ ŋá ǹûai sáma. 10Ka ŋaa-ƃâlaŋ maa-ƃela feerɛ sée gɔlɛ, dí sêre-faa kɛ́ é pîlaŋ ma a gɛ́ɛ è Ɣâla làraŋ da gâloŋ. À kɛ̀ tí, ka zìɣe ká kúla la ka zɔ̀ɔ a kɔni ká baa.”
11Nya ƃe ǹúu-pɔlɔ-ŋai da dɔɔ-ƃela kpaya-kpayai kɛ̀ daa-lêei su Nabo è kɛ̀ naai, dí gɛ̀ yɛ̂ɛ berei Zɛsebɛɛ è bɔ̃yɛ la gɔlɔ-ŋai su é dɛɛ dípɔi. 12Dí zûŋ siɣe maa ɣele kuui mɛni kpɛ̀tɛ dí Nabo sèe ƃaa kɛ́-maa see-sɛŋ lɛ́lɛɛ ŋá ǹûai sáma. 13Nya ƃe ŋaa-ƃâlaŋ maa-ƃela feerɛ dí pà dí sée gɔlɛ dí pɛ́lɛ mɛni lɛɛ̂i Nabo ma ǹûai ŋɛ́i, dîyɛɛi, “Nabo a Ɣâla larâŋ da gâloŋ.” Dí kùla la daa-lêei su dí lɛ́ɛ zɔɔ̂i a kɔni é lɛ́ɛ la zu é sáa. 14Gɛ́ɛ tí, dí díwoo tɛ̀ɛ Zɛsebɛɛ pɔ́-naa dîyɛɛ m̀ai: “Kú lɛ̀ɛ Nabo sɔɔ̂i a kɔni é lɛ́ɛ la zu é sáa.”
15Zɛsebɛɛ è m̀ɛnii ŋí mɛ̀ni nɔ́, è mò Eɣa ma ǹyɛɛi, “Ímu siɣe í lí í Zariɛɛ-nuui Nabo ŋɔkpɔmɔ kpâlaŋ síɣe a ípɔɔ nyíi vé fáa ní kɛ̀ é gɔlɛ yâi. Vé ŋɔ́nɔ a vúlu, aâ saa.” 16Eɣa ǹyaŋ è mɛ̀ni nɔ́, é mù sìɣe é yéŋ naa a gɛ́ɛ é gbɔmɔ kpâlaŋ síɣe mì.
17Gɛ́ɛ tí, Yâwɛɛ è worɛ̂ tɛ̀ɛ a Ɣâla ŋɔlóno kɛ́-nuui Ilaiza kùla Tisibi ǹyɛɛ m̀ai, 18“Lí ka Eezuɛ kaloŋ Eɣa ká koyaŋ. Zeɛ́ɛ káa Sameriai. Gáa naa Nabo ŋɔkpɔmɔ kpâlaŋ ŋá, ƃɛ́i è lì naa a gɛ́ɛ é ziɣe a bɔ́ɔi. 19M̀ó m̀a yɛ̂i, ‘M̀ɛnii ká ŋí Yâwɛɛ a m̀ôi: Í ǹalôŋ pàa í ŋɔ́nɔ gɔ̂liŋ siɣe? Gɛ̀ ní, m̀ó m̀a ŋɔ́nɔ yɛ̂i, m̀ɛnii ká ŋí Yâwɛɛ a môi: Gwaa tɔnɔi tí ma ɣîla-ŋa dí Nabo ŋãa kɔ̂mɔ naai, ɣîla-ŋa da pâi íŋãa kɔ̂mɔi naa máŋ. Óowei, a pâi kɛ́ tí-ti ƃôi.’ ”
20Eɣa è mò Ilaiza ma ǹyɛɛi, “Gɛ̀ ní, ƃaâ ŋ́gaa ŋákpɔara-nuui!”
Ilaiza ǹyɛɛ m̀ai, “Ŋaâ íkaa, kpɛ́ni fêi, ya fáa ma a gɛ́ɛ í mɛni nyɔ́mɔɔ kɛ́ a Yâwɛɛ. 21Yâwɛɛ a m̀ôi yâ ǹyɛɛi, ‘Ŋa pâi a mɛni kpɔ̂lu ípɔ. Ŋa pâi ísuui su karâi. Ŋa pâi Eɣa ǹóŋ-sinaai gbɛɛ ŋái kélee su karâi Eezuɛ, luɛ, kpaa máŋ núu ŋuŋ ma ƃóɔɔ. 22Ŋa pâi ípɛrɛi kɛ̂i yɛ̂ɛ Neƃa ǹóŋ Zɛroboaŋ ŋ̀ɔi da Aiza ǹóŋ Baasa ŋɔpɛ́rɛi, kpɛ́ni fêi, ya ńii ŋwána ƃa Eezuɛ kɛ́ a sɔnyɔ̂ŋ kɛ́.’ 23À kɛ̀ a Zɛsebɛɛ, Yâwɛɛ a mò a gɛ́ɛ ɣîla-ŋa da pâi baâi dí mii Zariɛɛ galai kɔlɛ ma. 24Eɣa ŋɔnûai pâi saâi daa-lêei sui ɣîla-ŋa da pâi dípoma miî. Diai pâi saâi víyeŋ-ŋai pâi saâi víyeŋ ŋái ŋ̀ɔni-ŋai da pâi díluu kpelêi.”
25(Kpakolo ta fé wɔ́lɔ kɛ́ ní naa zɔŋ nyɔ́mɔɔ yɛ̂ɛ Eɣa. Ŋɔnɛnîi Zɛsebɛɛ è gɛ̀ é sɔnyɔ̂ŋ kpɛ́ɛ pôlu ŋánaa kɛ́ a Yâwɛɛ. 26È ŋumɛ tûa nyɔ́mɔɔ-ŋa kɛ̀ a gɛ́ɛ liî ɣâla pɔkɔɔŋ-ŋa pôlu yɛ̂ɛ berei Amora-ŋai dí gɛ̀ la Yâwɛɛ kɛ́ díkpɛ̀ ǹɔii su Eezuɛ-ŋai ŋɛ́i tuɛi.)
27Eɣa è kɛ́ɛ a ŋ̀óo-ŋai ŋí mɛ́nii, è ŋɔseɣe-ŋai kùla ma é dífala-fâla, é maloŋ too-maa seɣe too ma, è sûŋ sìɣe. È kɛ̀ lâani ƃɔrɔ-sâa su. A kâa kɛ̀ tɛɛ-tɛɛ̂i a lii maa yêŋ pere maloŋ tòo maa su.
28Nya ƃe Yâwɛɛ è m̀o Tisibi-nuui Ilaiza ǹyɛɛi, 29“Ƃa berei káa Eɣa a gbîŋ maa yéŋ la ŋɛ́i-tuɛi? M̀ɛni ma, fé pâi pâi bɔ́ a mɛni kpɔ̂lu ŋɔɣele-ŋai ma. Kɛ́lɛ ŋa pâi pâi a maa mɛni kpɔlui ŋɔpɛ́rɛi ma a ǹóŋ ŋɔɣele-ŋai ma. Ŋa pâi ŋɔsuui kélee su karâi.”
Currently Selected:
Kâloŋ-ŋa Maa-ŋuŋ 21: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
