Zɔ̂ŋ Maa-ŋuŋ 4

Ɣâla Ŋɔmɔ̂leŋ da Kôrai-tɔɔ maa-nuui ŋɔmɔ̂leŋ

1Ŋáwɛli-kɛ-maa-ƃelai, káfe làa a mɔ̂leŋ kélee, kɛ́lɛ, ka mɔ̂leŋ-ŋai kɔɔ̂ŋ, ká gáa à kɛ̀ díkaa a Ɣâla pɔ́ɔ. Kpɛ́ni fêi, Ɣâla-maa-wôya lono-kɛ-ƃela támaa da lí ǹɔii su. 2Bere-sii ŋí ƃe ka pɔ̂ri Ɣâla Ŋɔmɔ̂leŋ kɔ́lɔnîi la. M̀ɔlêŋ kélee a mò a gɛɛ Zîsɛ Kôrai è pà núu-kpune kponôii, m̀aa-nuui káa a Ɣâla pɔ́ɔ. 3M̀ɔlêŋ nyíi kélee va Zîsɛ maa-mɛni ƃòi, vé a Ɣâla pɔ́ɔ. Kôrai ŋɔtɔɔ-maa-nuui ŋɔmɔ̂leŋ ká tí nyíi ka m̀ɛni a gɛɛ gáa pâi. Gáa nâa ǹɔii su. 4Nîa-pɛlɛɛ, kákaa a Ɣâla pɔ́ɔ. Ka díyee mɛi ɣále. Kpɛ́ni fêi, ǹúui gáa kákponôi, gɛ́tɛ̂i é tɛɛ ǹúui mâ gáa ǹɔii sui. 5Díkaa a ǹɔii pɔ́ɔ, maa-mɛni ma, mɛnii da mòi gáa a ǹɔii pɔ́ɔ, ǹyaŋ ǹɔii a ŋ̀óli tɔ̀ɔ dîa. 6Kúkaa a Ɣâla pɔ́ɔ. Núui kélee Ɣâla kɔ́lɔŋ, a ŋ̀óli tɔ̀ɔ kûa, ǹyaŋ ǹúui vé a Ɣâla pɔ́ɔi, va ŋ̀óli tɔ̀ɔ kûa. Nyíŋi su ƃe kwa dɔ̃yâ-mɔleŋ da ǹɛ́ɛ-mɔleŋ kɔ̀lɔŋ naa.

Ɣâla káa a wɛli-kɛ-maa-Ɣala

7Ŋáwɛli-kɛ-maa-ƃelai, kwaa kúkîe-ni wɛ́li. Kpɛ́ni fêi, wɛli-kɛ-maa káa a Ɣâla pɔ́ɔ, ǹyaŋ ǹúui wɛli-kɛ-maa káa gbonôi, gáa a Ɣâla ǹóŋ, gɛ ƃô a Ɣâla kɔ́lɔŋɔɔ. 8Ǹúui wɛli-kɛ-maa fé gbonôi, vé Ɣâla kɔ́lɔŋ. Kpɛ́ni fêi, Ɣâla káa a wɛli-kɛ-maa. 9Berei-sii ŋí ƃe Ɣâla è ŋɔwɛli-kɛ-maai lɛ̀ naa kûa. È Ǹóŋ tɔnɔi tɛ̀ɛ ǹɔii su a gɛɛ fulu-laa é kɛ́ kúyêei zarâi. 10Dɔ̃yâ-wɛli-kɛ-maai kpîŋ fa a gɛɛ kú Ɣâla wɛ́li ni. Kɛ́lɛ, dɔ̃yâ-wɛli-kɛ-maai kpîŋ ƃa Ɣâla è kúwɛli ni. Ǹyaŋ è Ǹóŋ tɛ̀ɛ a gɛɛ é kɛ́ a kúsɔnyɔ̂ŋ maa-sala-sɛŋ. 11Ŋáwɛli-kɛ-maa-ƃelai, à kɛ̀ Ɣâla è kúwɛ̀li a bere-sii ti, fɛ̂ɛ kúa máŋ kú kúkîe-ni wɛ́li. 12Núu da kélee fé niî Ɣâla káa ni. A kɛ̀ kwa kúkîe-ni wɛ̀li, gɛ̀ ní Ɣâla káa kúkponôi, ŋɔwɛli-kɛ-maai láa fɛ̂ɛ kúkponôi.

13Bere-sii ŋí ƃe kwa gɔ̀lɔŋ la a gɛɛ kúkaa Ɣâla kponôi, ǹyaŋ gɛ ƃo kúkponôi, kpɛ́ni fêi, a Ŋɔmɔ̂leŋ kpîŋ tɛɛ kúpɔ. 14Ǹyaŋ kwa gáa, kwa maa-seri-faa kɛ́ a gɛɛ Nàŋ-nuui è Nòŋ-nuui tɛ̀ɛ a gɛɛ é kɛ́ a ǹɔii-Ƃalo-nuu. 15Ǹúui kélee a mò a gɛɛ Zîsɛ káa a Ɣâla Ǹóŋ, Ɣâla káa gbonôi, ǹyaŋ gɛ ƃo Ɣâla kponôi. 16Mɛni ma kú Ɣâla ŋɔwɛli-kɛ-maai kɔ́lɔŋ kúmɛni ma, kú láa la. Ɣâla káa a wɛli-kɛ-maa. Ǹúui a kɛ̂ wɛli-kɛ-maa sui, a kɛ̂ Ɣâla kponôi, Ɣâla ǹyaŋ kɛ́ ƃo gbonôi. 17Bere-sii ŋí su wɛli-kɛ-maa káa kúkponôi a maa waa, a gɛɛ lii-kpele é kɛ́ kúyêei a mɛni-ŋa-tee-ɣelei, kpɛ́ni fêi, berei gáa lai, bere nɔ́ ƃe kúkaa la ǹɔii ŋí su. 18Yao fé wɛli-kɛ-maa sú. Kɛ́lɛ, tɔ̃yâ-wɛli-kɛ-maa a yao kpɛ́. Kpɛ́ni fêi, yao a pâ a tɔŋ-kpɛ́-maa, ǹyaŋ ǹúui ǹyaoɔ̂i m̀aa fé waa ni wɛli-kɛ-maa su. 19Wɛli-kɛ-maa káa kúyêei, kpɛ́ni fêi, ǹyaa fulɔi è kúwɛ̀li. 20À kɛ̀ núu da à mò, ǹyɛɛ, “Ŋá Ɣâla wɛ́li ní,” kɛ́lɛ, é gɔlɛ-ma-nuui kpɔara, gáa a lɛ́ɛ-nuu, kpɛ́ni fêi, ǹúui vé gɔlɛ-ma-nuui wɛ́li ní, nyíi a gáai, va pɔ̂ri Ɣâla wɛ̂lii, nyíi vé niî gáa níi. 21Ǹyaŋ kú dɔ̂ŋ ŋí kùla ǹyêei, a gɛɛ ǹúui à Ɣâla wɛ̀li, fɛ̂ɛ nɔ́ é gɔlɛ-ma-nuui wɛli máŋ.

Currently Selected:

Zɔ̂ŋ Maa-ŋuŋ 4: KWB

Highlight

Copy