Zac 14
14
Watx' ok elok Jerusalén yet lajubal
1Toxa ok jayoc c'ual yet yowal c'ul Jehová, yet ok pojontok eb ajc'ul is tzetak yetal eb cajyom bay Jerusalén, axac'al bay tu' ok pojic'ok. 2A yet jun c'ual tu', ok wajbaj oc Jehová masanil nacionlak yak'on owal yin Jerusalén. Cax ok ayc'ay yuj eb. Ok uchlay eltek eb cajyom bay Jerusalén tu' yulak na, c'al yetnelay eb ix ix yuj eb ajc'ul, cax ok ilaytok nanok eb cajyom tu' preso. Jaywanxanej eb ok cancanok. 3Palta ayman ok eltek Jehová yak'on owal yetok juntzan nación tu', axcac'al max yun yak'on owal yet payxa. 4A wal yet jun c'ual tu', ok ay batxnaj yakan Cham bay tzalan Olivo bay satak Jerusalén, bay yetc'ulal bay chi ajol c'u. Ok pojchaj ay nan jun tzalan Olivo tu', cax ok jakchaj jun miman jobe, chi tit yetc'ulal bay chi ajol c'u, chi ec'tok bay yetc'ulal yayub c'u. A nanok jun tzalan tu', ok tokcan bay yetc'ulal norte; axa nanxa, ok tokcan bay yetc'ulal sur. 5Axa tu' ok ex elaj bay yul jun jobe nan xol cab tzalan tu', yujtol ok apnoktac'al oc bay Azal, cax ok ex elaj ayex ti', axca max yun yelaj eb e yichmam yuj jun quixcab max ec' yet ayoc Uzías yin reyal bay Judá, axa jayoc Jehová co Diosal yetok masanil eb yet-xa.
6A yet tu', man ok sakbok yuj yakan c'u cax man ok ay numumok. 7C'am junokxa c'ual axca jun c'ual tu', sakk'inalxac'al; c'am acaw c'ualil, tamwal acaw ak'balil, xan a yet ok ay c'u, ayc'al sakk'inal. A jun tu', asan Jehová yojtak tzet ok yunej. 8Axa yet tu xin, ok ajol jun nuk' aej bay Jerusalén, tol ac'ala' yel yakan yet nabil k'inal, c'al yet waresma, a nanok jun aej tu' ok tojcan bay a' Mar Muerto; axa nanxa xin, ok tojcan bay a' mar Mediterráneo. 9A yet jun c'ual tu', asannej Jehová ok yajawbok bay masanil yulyibank'inal ti', asannej Cham Dios. A Dios, asanxanej Jehová is bi ok ak'lay binajok. 10Pananxac'al ok yuncantok jun makan tx'otx' ok toktac'al bay Geba masantac'al bay Rimón, bay sur yet Jerusalén. Axa Jerusalén xin, can ok yuncan axca junok tzalan. A bay ok cajay eb anima bay conob Jerusalén, ok toktac'al bay puerta yet Benjamín, masantac'al bay puerta yet yesquinail bay ay jun babel puerta yet payxa. Ok toktac'al bay torreal yet Hananeel, masantac'al bay chi pitz'lay el yal an yuva cham rey. 11Ok cajay pax anima bay Jerusalén xin; c'amxac'al tzet ok na eb bay tu', yujtol manxa ok uchchajtok.
12Palta a pax juntzan nación ok yak' owal yetok Jerusalén xin, caw wal miman ok yun yalay oc is yailal eb yuj Jehová. A eb anima tu', yin wal yiquisal eb cax ok k'atok is chibejal eb, ok k'atok is bak' sat eb yul is bakil, c'al yak' eb yul is ti'. 13A yet jun c'ual tu', caw wal ok aj can xiwc'ulalil xol eb yuj Jehová. Junjunxac'al ok mitx'lej oc ba yetok mac ajun yetok, cax ok mak'len cam ba eb. 14Axa yet tu xin, ok tit eb aj Judá colwaj yetok eb aj Jerusalén. Cax ok tok'on ec' eb is beyomal masanil nacionlak ay bay is cawilal; xiwil oro, plata, c'al pichilej ok wajbaj eb. 15Ac'al oc jun yailal max ayc'ay yiban eb anima, ac'ala' ok jay c'apax yiban no chej, no mula, no camello, no burro, c'al yiban masanil is jobbejal no' eb ajc'ul ayic' bay is campamento eb.
16A yet ok lajwok juntzan tu xin, a eb anima okto cancan bay juntzan conob max yak' owal yin Jerusalén, junjunc'al abil ok jay eb chaon k'in yet Chinama, c'al yoc eb yin ayilal bay Cham Rey, a ton Jehová, Cham Yajaw yin Masanil. 17Ta ay junok nación bay yulyibank'inal ti', tol c'am chi jay bay Jerusalén ti', yuj yoc yin ayilal bay Cham Rey tu', majxa ayc'ay nab bay is tx'otx'al. 18Ta a eb aj Egipto c'am chi jayoc chaon k'inal Chinama, ok jayoc yailal yiban eb yuj Jehová, axcac'al yailal ok jay yiban juntzanxa nacionlak, tatol c'am chi jayi. 19A ton wal jun yailal tu' yowalil ok jayoc yiban Egipto, c'al yiban juntzanxa nación tol c'am chi jay chaon k'inal Chinama.
20A wal yet jun c'ual tu', a yin ch'en campana ibil oc yuj no chej, tz'ibbil oc axca ti': Yet-xac'al Jehová yayji, ẍi. Yetokc'al xij ok k'anlay bay is templo Jehová bay ok taj no chibej, yet-xac'al Cham, axca wal yayji mimek sec' chi k'anabax bay altar. 21Masanil xij bay Jerusalén c'al bay Judá, yet-xac'al Jehová, Cham Yajaw yin Masanil yayji ocok. A mac chi toj yak' junok is xajanbal bay tu', chi je' k'anon juntzan tu', cax chi yak'on taj no chibej chi ak'lay yin xajanbalil. A wal yet jun c'ual tu', c'amxa eb txonjom ok il-lay yin bay is templo Jehová Cham Yajaw yin Masanil.
Currently Selected:
Zac 14: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
