Zac 13
13
1A wal yet jun c'ual tu', ok jakchaj jun nuk' aej, yet watx' ok je' tx'ajlay el is mul, c'al is yobtakilal eb yinatil David, yetokc'al eb cajyom bay Jerusalén. 2Ayin Jehová in ti' chi wala' tol a bay yul masanil jun nación ti' ok wak' lajwok el masanil tzet chi al-lay oc diosal, yet watx' c'amxa chi nalaytek is bi. Ok wion c'apax el bay yul nación ti' masanil eb chi yaloc ba in chekbejok, c'al masanil eb ayoc nabal yin eb demonio.
3Yuj tu xin, ta ay junok mac chi tz'ak yal in k'anej, axa is mam c'al is txutx ok alon bay axca ti': Ach ti', ok ach camok, ¿tzet yuj xan cha tec'baj a ba alon el a lek'tial k'anej yin tol axcaok tol yet Jehová? ẍi eb bay. Ac'al oc is mam c'al is txutx tu', a ok tekon camok, yuj max yut ba in chekbejok. 4A yet jun c'ual tu', a eb in chekbej yaloni, ok q'uixwok aj eb yuj tzet max tx'oxlay yila'. Majxa yaoc eb el pichilej axca yet eb in chekbej, yuj yion aytek sat anima; 5palta junjunc'al ok yal axca ti': Ayin ti', man chekbejok Dios in; asan tol mulnajwom in. Yettaxc'al unin into, max in k'aytzelay yin mulnajil, ẍi. 6Ta ay junok mactxel chi k'anlen bay axca ti': ¿Tzet yayji juntzan yas en tu xin?*fn* ta ẍi. Axa paktzen axca ti': Max in ak'lay yasjok bay yatut eb wamigo, ẍi, ẍi Jehová.
Ok mak'lay cam Cham Yilomal conob Dios
7A Jehová Cham Yajaw yin Masanil chi alon axca ti':
Ilayokab aj espada yuj teklay cam Yilomal in calnel, a ton jun junejc'al ay wetok. Ok mak'lay cam jun ilom calnel tu', axa no calnel ok saklemcantok, axa woccan ajc'ulal yin no yunetak calnel tu'.
8Ayin Jehová in chi wala', tol a eb cajan bay jun nación ti', ec'ban nanok eb ok camok. Jaywanxanej eb ok iquisbokcan ec'ok.
9A eb chito cancan tu', ok wak' yab eb yailal, yet chi elcan yobtakil eb, axca wal chi yun sakbanelay el ch'en plata xol k'ak'ej, c'al axca chi yun watx'ji el ch'en oro. Lajwi tu' ok in yawtej eb yetok, cax ok in tak'wok bay eb. Ok waloni tol in conob eb; axa eb ok alon axca ti': A ton wal Jehová co Diosal, ẍi eb, ẍi Cham.
Currently Selected:
Zac 13: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
