Zac 11
11
Yayc'aybal eb mimek yajaw chi tx'oxtek te te'
1Jaklayokab be bay Líbano, yet chi tz'acantok masanil te c'ute' ay bay tu' yuj k'ak'ej.
2Ok'okab te taj, yujtol mayal ayc'ay te c'ute', yujtol a juntzan te' manxa watx'ilok tu', mayal lajwi ayok. Ok'okab te matx'jilak bay yul yet Basán, yujtol a te pim k'aktelak, mayal lajwi ayok.
3Axa ayex ilom calnel ex ti', elokab e yaw e yok'i, yujtol mayal ilay ec' e mimanbilal. Chi ablay yel yaw no coj, yujtol mayal lajwi mimek eltzab bay ti a' Jordán.
Eb cawan ilom calnel
4Max yal Jehová in Diosal ayin axca ti': Taynej wal no calnel tol t'inan wal ok camok. 5A eb chi manon el no' tu', chi mak' cam eb no' yin tol c'am jabok tzet chi na eb, axa eb chi txonon no tu', chi yal eb axca ti': Yuj wal dios, a tinani' beyom onxa, ẍi eb. Tamwal eb acaw yilomal no', c'am jabok chi cus c'ul eb. 6Cayin c'apax tu' ayin ti', c'am jabok ok cus in c'ul yin anima cajan sat tx'otx' ti'; junjunc'al eb ok waoc eb yul k'ab mactxel cajan is cawilal, c'al yul k'ab eb is reyal. A eb tu' ok etnentok sat tx'otx' ti'. Ayin wal caw Jehová in chi wal jun ti'. Majxac'al in col eb anima tu' yul k'ab eb, ẍi Jehová.
7Catatu' max in oc wilon no calnel tol t'inan mak'lay camok. A eb manom calnel tu', a eb chi ak'on in tojol. Max in sayon cab in k'okoch: A jun max wak' yik Watx'c'ulal, axa junxa xin, max wak' yik Junanebilal. 8Asan yin jun xajaw max in chekon pax oxwan eb ilom calnel; max lajwi aj in mimanc'ulal yin eb, cax yob inxa c'apax yul sat eb.
9Max walon bay no calnel tu' axca ti': Manxa ok ex wil tinani'. Ta ay junok ex chex cami, camanek. Ta ay junok mac chex mak'on camok, mak'layokab ex camok, axa ex tol chexto cani, c'aylejekxac'al el e ba, quin chi bay no'.
10Yuj tu xin, max wiaj te' in k'okoch max wak' yik Watx'c'ulal, max in pak'on k'ajok, yet chi tx'oxil ba tol chi lajwi is trato Jehová max watx'nej yetok masanil nacionlak. 11A ton yet jun c'ual tu', max lajwican jun trato tu', axa eb manom calnel, lanan quin is beyc'ulnen oc eb, cax max nachaj el yuj eb, tol a Jehová lanan k'anjab el yin tzet yetal chi wun tu'. 12Max walon bay eb axca ti': Tatol watx' che yila' tojlanejek in; ta c'amak xin, canokab axca tu', quin chi bay eb. Xan 30 bijan ch'en plata max yak' eb in tojolok.
13Max yalon Jehová ayin axca ti': I aj juntzan ch'en tumin tu', cax acantok bay c'uanbal tumin bay templo, ẍi. Max wiontok jun in tojol miman naon eb tu', tol in moj in chaoni, cax max in k'okon aytok bay c'uanbal tumin tu'. 14Max in pak'on k'aj c'apax junxa te k'okochej max wak' yik Junanebilal. Axca tu' max yun cancan Judá yetok Israel, yin c'amxa uẍtakbailejal nan xol eb. 15Max yalon pax Jehová ayin axca ti': Ut a ba axca jun ilom calnel tol c'am jabok chi yaoc yin c'ul yiloni. 16Yujtol ok waoc bay jun nación ti' junok yilomal tol yob ok yut ba axca junok ilom calnel c'am chi oc il yuj no' chi c'aytok, tamwal sayon ec'ok, tamwal chi yantej no' yas yayji, tamwal chi yak' lobej no' chi cam yuj wajil. A ti' yet, tol chi chiaytok no bak'ech, tamwal chito can yakan no' yuj. 17Ok'bal wal c'ul jun yilomal in conob c'am is nabal tu', yujtol max bekcan yilbej. Lowokab ch'en espada yin is k'ab, c'al yin is bak' sat bay is watx'. Sicbokokab can el is k'ab tu', axa is bak' sat tu', tanokabxac'al is k'ak'al yin junelnej, ẍi Cham.
Currently Selected:
Zac 11: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
