Zac 10
10
Albenal yuj Bekbanilal
1K'anek nabil k'inal bay Jehová axcata' is c'ual. A ton Cham chi pitzc'onen aj rayos, cax caw wal miman chi yut yaontek nab, yet chi ch'ibaj awoj bay e tx'otx' e masanil.
2Man cayok tu' paktzebal chi al-lay bay eb chi k'anlej yab bay yechelej c'al bay eb naom el k'anej yaloni. A juntzan tu' lek'tialc'al, c'am yelapnok. A tzet chi yalil eb wayichwom, toc'al chi ikbelay c'aytok eb chi k'anlej tu' yuj. A is k'anej eb yin mimanc'ulnewi, c'am jabok watx'il; yuj tu' xan toc'al chi c'ayic' jun conob tu' axca no calnel chi yab yail, yujtol c'am yilomal.
3Yuj tu' xan chi yal Jehová axca ti': Mayal tit wowal yin eb chi taynen in conob, xan ok waoc yailal eb chi ikban eb. Ayin Jehová, Yajaw in yin Masanil ok in taynej in conob, a ton eb yinatil Judá. A eb ok in k'anbalnej axca no chej ak'om owal.
4A bay xol eb tu' ok eltek jun ch'en ch'en tol miman yelapnok, c'al estaca yet mantiado, yetokc'al julbalej yet owal. Chi yal elapnok, tol a bay xol eb tu' ok eltek masanil eb ikbajwom.
5Ok tec'ay eb is yajc'ul, axca tec'on aj eb soldado tz'otz'ew yulak calle. Ok yak'on ayc'ay eb owal, yujtol ayin oc yetok eb, ok elcan q'uixwil eb ayoc yiban chej yuj eb.
6Ayin ok wak' is tec'anil eb yinatil Judá, cax ok wak'on colchaj el eb yinatil José. Axa wikban meltzoj eb bay is conob junelxa tu', yujtol chi ok' in c'ul yin eb. Cax ok can pax can eb junelxa, axca tol c'am bay max wiel eb yin in c'ul. Ayin ton Jehová is Diosal in eb, tol chi wabc'al is txaj eb.
7Tec'an ok yun eb aj Israel axca soldado. Ok tzalojbok aj c'ul eb axca eb chi uc'wi vino. A yet ok yilon yuninal eb jun ti', ok tzalojbok aj c'ul eb. Caw wal ok tzalojbok aj is yanimail eb yuj in colwal.
8Ok in uẍlok bay eb, yuj in wajban oc eb, yujtol colchajnakxa eb wuj. Ok aj wal can is bisil eb, axca wal max yun eb yettax payxa.
9Max in saklemnejtok eb bay xolak nacionlak. Caxc'al mi najat ay eb, palta ok in nalaytek yuj eb. Ay wal jun c'ual ok meltzoj eb yetok yuninal.
10Ok wak' meltzojtek eb bay Egipto, ok wi c'apaxtek eb bay Asiria, axa waontok eb bay Galaad c'al bay Líbano. Xiwilxa ok yun wajnaj oc eb, ijan c'amxa bay ok ayjok eb.
11A yet ok ec'tok eb xol yailal, axca xol a' mar, ayin ok wiel yipal a' mar tu'; axa a' Nilo ok tanaj a'. Ok wak'on lajwok ay is maynejbail eb aj Asiria, c'al wak'on lajwok ay is yikbej eb yajaw bay Egipto.
12Ayin ok wak' yipalil in conob. Wuj wali cax ok je' yuj. Ayin wal Jehová in chi wal juntzan k'anej ti', ẍi Jehová.
Currently Selected:
Zac 10: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
