Miq 3
3
K'anej chi al-lay yin eb yajaw yob
1Catatu' max waloni: Ex yajawil conob Israel, abek wal tinani'. ¿Tom man e mojok ayex ti' e yojtaknen el tzet yetal tol tojol?
2A ti' e yet, tol che yaj can el tojolal tu', axac'al yobtakil che camc'ulnej. Axca wal tol che tzilel is tz'umal eb jet conob, axac'al is bakil chi can jalan e yuj.
3Axca wal tol yin yiquisal in conob, cax che chion aytok, che nic'on el is tz'umal eb, cax che pak'on k'aj is bakil. Lajanxac'al che yut eb axca chibej chi toj taj yul xij.
4Ay wal jun c'ual ok e yawtej Jehová; palta manxa ok tak'wok Cham ayex. A yet jun c'ual tu', ok c'ubajxac'al el ba Cham ayex yuj wal e yobtakil max e yaocok, quin chi.
5Axca ti' yalon Jehová: A in conob ti' caw wal ayc'al oc yul beal man tojolalok, yujc'al eb lek'ti' chekbej, tol chi alon elok tol ayc'al junc'ulal ta chi tojlanelay yin watx' bay eb. Axa pax bay mactxel c'am chi ak'on noj c'ul eb, chi yak'on eb owal yin eb. Xan chi wal yin juntzan chekbej tu':
6Ok aycan aj c'u yiban eb, axa can eb xol k'ekk'inal tu'. C'amxa yechel ay tzet ok tx'oxlay yil eb junelokxa, tamwal okto yalil eb tzet yetal ok uj yet yajtok tu', quin chi, ẍi Jehová.
7A juntzan chekbej tu', c'al juntzan naom el k'anej tu' yaloni, toxac'al ok cancan eb yin c'am ujnakilal, toxac'al ok tz'injokcan el eb, yujtol c'am jabok is paktzebal eb ok cha bay Dios.
8Axa pax ayin ti', ayoc Yespíritu Jehová win, xan ay wipalil, cax chi nachaj el tojolal wuj, xan chin tec'baj in ba walon oc yin sat Israel jantak is mul.
9Abek juntzan ti' tinani' xin, ex yajawilal conob Israel, ayex ti' che yajil tojolal. A jun tu' che q'uextok yin man tojolalok.
10Che watx'nej aj Jerusalén a ton conob yet tzalan Sión yuj tzet che yi' yin e mak'on cam anima, c'al yin man tojolalok che yunej.
11A eb juezal conob, chi watx'nej el eb k'anej eb yet animail yin man tojolalok, yuj chaon eb tumin. Ac'ala' eb sacerdote chi cuywaj eb, asan yuj chaon eb tumin, c'al eb lek'ti' chekbej Dios, asan yuj chaon tumin xan chi yal eb tzet max tx'oxlay yil eb yaloni, cax chi yalon eb tol ayoc Dios yetok eb, xan chi yal eb axca ti': A Jehová ayoc jetok, xan c'am tzet yetal ok ec'tok jiban, ẍi eb.
12Yuj wal tu xin, e yuj wal ayex ti', xan a Jerusalén, conob yet tzalan Sión, axcaxac'al tol t'ocbil yetok arado ok yuncanok, cax toxac'al ok aj can bulan is pojiltakilal, axa bay tzalan yet templo, eltzab ac'un ok ch'ibajok.
Currently Selected:
Miq 3: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
