Miq 4
4
A Jehová ok yajawbok yin junc'ulalil
(Is 2.2-4)
1A yet lajubal, ok canxac'al can jun tzalan bay ayic' is templo Jehová. A jun witz tu', yelxac'al can ok yun tel yintak juntzanxa witz. Lajwi tu xin, masanil juntzanxa nacionlak ok jayoc bay.
2Xiwilxa bisil conoblak ok yaltek bay junjun axca ti': Sebaxek, ajokonektok bay jolom witz bay ay is templo Jehová, is Diosal Jacob, yet watx' chon is tx'ox yin is beybal, cax chi co beybalneni, ẍi mi eb. Yujtol a bay Sión tu' ok eltek cuybanilej yet Jehová, ata bay Jerusalén tu' ok eltek is k'anej Cham.
3A Jehová ok beyc'ulnen el k'anej xolak nación. A' ok alon tzet ok yun nacionlak tol tec'an, caxc'al najat ay. Yuj tu' ok meltzoj oc is yespada eb yin aradoal, yetok c'apax is lanza eb, ok meltzoj oc yin jobal trigoal, yujtol c'am junokxa conob ok yi aj is yarma yin junokxa, c'amxa mactxel ok cuywok yin ak'oj owal.
4Masanil anima ok ayjok ec' yin c'amxac'al xiwc'ulalil. Junjunxac'al ok je' xew bay yalan yenel k'ab is yuva, c'al bay yalan yenel k'ab is yigo. A Jehová Cham Yajaw yin Masanil chi yak' is ti' yin jun ti'.
5Masanil conoblak chi ec'jab yetok yipalil is diosal junjun yaloni. Cayon c'apax tu' ayon ti', a yetok yipalil Jehová co Diosal ok on ec'jabc'al yin tojbalk'inal.
A Jehová ok colil is conob
6-7A wal caw Jehová chi alon axca ti': A yet jun c'ual tu', ok in wajbaj oc in conob, a ton eb mayal yab yail wuj bay tx'ok conobal, a ton eb k'ajil, eb c'unbinak, c'al eb sakleminak yayji. Yetok juntzan okto iquisbokcan ec' tu', ok in watx'nej jun nación tol caw wal ay is may ok yunej. Ayin wal caw Jehová in ok in yajawbok yiban in conob tu' bay tzalan Sión yin tojbalk'inal.
8Atac'al bay tzalan Sión yet Jerusalén ok in taynej in conob axca junok ilom calnel. Axa Jerusalén ti', ok yajawbok junelxa yin is makbej bay max yajawbi yet payxa, ẍi Cham.
9A tinani' xin ex aj Jerusalén, ¿tzet yuj xan tol chi el e yaw axca ix ix yet chi ajapnok c'ual watx'ji c'ul yuj yune'? ¿Tom yuj c'am junok rey bay ayex ti'? ¿Ma yujtol c'amxa junok eb aom oc nabalej e xol?
10Ex aj conob Sión, abek yail; elokab e yaw yuj yailal, axca wal yailal chi yab junok ix ix yet chi watx'ji c'ul yuj yune', yujtol ok ex el bay yul e conobal ti', cax ok ex tok cajay bay xolak te'; toltax ok ex apnoktac'al oc bay Babilonia. Axa bay tu' ok ex col-lay el yul k'ab eb e yajc'ul yuj Jehová.
11A tinani', xiwil nacionlak lanan yaj wan yin ajc'ulal e yin, cax chi yalon eb axca ti': Ok jak' wal co nabal jilon tzet ok yun yetaxtok Sión ti', ẍi eb.
12Palta a juntzan nación tu', man yojtakok eb tzet yetal nabil yuj Jehová. Man yojtakok eb tatol ok wajlay aj eb yuj Cham, axca wajlay tok ixim trigo bay tec'bal.
13A ayex aj Sión ex ti', ajanek wanok, teq'uek ay nacionlak, yujtol chi yal Jehová axca ti': Ayin ok wak' e yip e tec'on ay juntzan nación tu', axca junok toro tol hierro yuc'a', c'al tol bronce is yisk'ak tol ok tec'wok trigo. Ok e yiec' is beyomal max yi' juntzan nación tu' yin man tojolalok, cax ok e yak'on ayin, ayin ton Yajaw in yin masanil yulyibank'inal, ẍi Cham.
Currently Selected:
Miq 4: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
