Mt 20

Yabixal juntzan eb mulnajwom

1Max yal Jesús bay eb is cuywom axca ti': Ok waltek ayex, tzet chi yun yeloc eb anima chi oc yul k'ab Cham aj satcan: A junel ay jun cham patrón, ayto k'inibi max toj sayon jaywanok is mulnajwom yin yawoj uva. 2Max ilchaj eb xin, cax max yak'on trato yetok eb. Max yalon cham bay eb tol jun denario ok tojlanej cham c'u junjun eb, cax max chekontok cham eb bay is mulnajil tu'. 3Axa yet yajc'ualil max eltok cham ec'jab txonbal, max yilon yin juntzan winak c'am is mulnajil. 4Axa yalon cham bay eb axca ti': Ta che yochej chex mulnaji, asek mulnaj ayin. Ok ex in tojlanej axca wal mojalil, ẍi bay eb. Axa toj eb mulnaj bay cham tu'. 5Max eltok ec'jab junelxa yet chuman c'u, max yak'on trato yetok jaywanxa, axcac'al max yut yak'on trato yetok eb max oc yin mulnajil yet yajc'ualil tu'. Ac'ala' max yun yet a las tres. 6Max toj cham ec'jab junelxa yet a las cinco bay txonbal. Ay juntzanxa winak c'am is mulnajil max yil bay tu', axa yalon bay eb tu' axca ti': ¿Tzet yuj toc'al ay ex ec' cayti' chi ec' c'u? ¿Tom c'am jabok e mulnajil? ẍi cham. 7C'am; yujtol c'am mac chon ochen on yin mulnajil, ẍi eb bay cham. Ta caytu xin, asek mulnajil ayin bay in tx'otx', ẍi cham bay eb.

8Axa yet max k'ekbi, max yalon cham bay jun is caporal axca ti': Awtejtek eb in majan, cax chak'on tojol c'u eb. A eb tzunanxac'al max oc yin mulnajil, cha tojlanej yin babelal. Axa eb babel max oqui, tzunan cha tojlanej eb, ẍi cham. 9Yuj tu' xan a eb yayc'ualilxa max oc yin mulnajil tu', a eb max babji jayi, jun denario tojol eb max cha'. 10Lajwi tu xin, max jayoc eb max pet oc yin mulnajil tu'. A yet max jayoc eb tu', a naon eb tol miman tojol eb ok cha'. Palta titol ac'ala' jun denario ch'en max cha' eb. 11A yet max lajwi chaon eb tojol tu', max tit yowal eb yin cham aj mulnajil tu'. 12Max yalon eb axca ti': A eb nak tzunanxa max jay mulnajil ti', junxanej hora max mulnaj eb nak; palta lajan pax tojol eb nak max yi' jetok on, ayon max techajc'al ec' c'u juj ti' xol k'ak', ẍi eb bay. 13Axa yalon cham bay junok eb nak tu' axca ti': Ach wamigo, man lananok wak'on tac in ti' ayach. ¿Tom man jun denariook max jut co trato xin? 14Yuj tu', cha' a tojol ti', paxan. Chi el yin in c'ul wak'on tojol eb tzunanilxac'al max oc yin mulnajil ti', axca a tojol chi wak' ti'. 15Ayin ti', ay walon wet wak'on in tumin axca bay chi el yin in c'ul. Maj je' tit owal win, yujtol watx' chi wut in c'ul yin junok mactxel, ẍi cham. Axca tu' yalon jun abix ti'.

16Yuj tu', ay eb c'am jabok yelapnok tinani', caw miman ok yun yeloc eb. Ay c'apax eb miman yelapnok tinani', c'amxa yelapnok eb bay tu',*fn* ẍi Jesús bay eb.

Chi yaltek Jesús is camichal junelxa

(Mc 10.32-34; Lc 18.31-34)

17A yet lanan yajtok Jesús yetok eb anima yul beal conob Jerusalén, max yawten el eb is lajcawan cuywom xol eb, max yalon bay eb axca ti':

18—Ilab lanan jajtok bay Jerusalén ti'. Ayin ti' caxc'al Chekbilintek yuj Dios xol eb jet animail, palta ok in alay oc yul k'ab eb sat sacerdote, c'al yul k'ab eb meẍtol yin ley Moisés, axa yaon oc eb camich wiban tu'. 19Cax ok in yaon oc eb yul k'ab eb man israelok. Ok in is buchon eb, ok in is mak' eb, ok in is curusnej eb; palta a yet cabjial ok in ictzonelay ajok, ẍi bay eb.

A tzet k'anbil yuj txutx Jacobo yetok Juan

(Mc 10.35-45)

20Max jayoc xal yistzil cham Zebedeo, yetok cawan yuninal eb bay Cham. Max bekon ay jajan ba xal txutxej tu' bay Jesús, yujtol ay tzet chi yochej c'ul chi k'an bay. 21Axa yalon Cham bay xal tu':

—¿Tzet chochej cha k'an ayin? ẍi Cham.

—Mamin, a yet ok ach oc yajawilal, matawal cha cha' ay chotan eb wune' ti' a c'atan, junok bay a watx' k'ab, junokxa bay a q'uexan, ẍi xal bay.

22Axa yalon Cham bay eb tu':

—Ayex ti', c'am chi nachaj el e yuj tzet che k'an ayin. ¿Ok mi techaj e yuj e yak'lay porobal, axca ok in utlayok? ẍi bay eb.

—Ok techajok, ẍi eb bay.

23—Yel toni axca yailal ok eq'uel wiban, caytu' yailal ok eq'uel e yiban. Palta c'am walon wet ex in chotban ay bay in watx' k'ab, ma bay in q'uexan, yujtol a co Mam Dios, watx'xa yayji yuj, mac eb ok ay chotan bay tu', a' ok ak'on bay eb, ẍi Jesús bay eb.

24A yet max yaben eb lajonwanxa cuywom jun ti', max tit yowal eb yin eb cawan tu'. 25Yuj tu' xan max wajbaj oc Jesús eb lajcawanil, cax max yalon bay eb axca ti':

—Ti wal e yojtakxa, a eb ayoc yajawil bay junjun mimek conob, tojolc'al chekwaj eb. Cay c'apax tu' eb mimek winak xol conob, yajawxac'al chi yut ba eb yiban anima. 26Palta a co xol ayon ti', man axcaok tu' ok yunej. Ta ay mac chi yochej caw miman yelapnok co xol, yowalil chi oc yak'omalok serbil eb yet cuywomal masanil. 27Yetok c'apaxok, ta ay mac co xol chi yochej tol chi oc aj babelal, yowalil chi oc mosejal bay eb yet cuywomal. 28Ilab in, ayin Chekbilintek yuj Dios xol eb jet animail ti', man yujok wak'lay serbil, xan max in jayi, palta yuj wak'wi serbil. Max in jay yuj ul wak'on in ba camok, yet watx' xiwil mactxel chi colchajcan el wuj, ẍi bay eb.

Cawan winak chi ilwican aj yuj Jesús

(Mc 10.46-52; Lc 18.35-43)

29A yet max el eb bay Jericó bay ayic' eb tu', xiwil anima max oc tzakan yintak Jesús. 30Ay cawan winak c'am chi je' yilwi, cax chotan ay ti be. A yet max yaben eb tol a Cham chi eq'uel tu', max aj yaw eb yin ipejal, max yalon eb:

—Mamin, ach Yinatil David, ok' a c'ul jin on, ẍi eb bay.

31Axa tenchanelay eb yuj eb anima tu', yet watx' chi tz'inji eb; palta tol max aj can yel yaw eb:

—Mamin, ach Yinatil David, ok' a c'ul jin on, ẍi eb bay junelxa.

32Max oc wanaj Cham cax max yawtentek Cham eb is c'atan.

—¿Tzet che yochej chex wutej? ẍi bay eb.

33—Mamin, chi jochej chon ak'can ilwok, ẍi eb bay.

34Axa yok'can c'ul Cham yin eb tu', max yaon oc k'ab yiban bak' sat eb. Max jakchaj sat eb yet jun bek tu' yuj; max lajwi tu xin, max tzakloj eb yintak.

Currently Selected:

Mt 20: ATBYK89

Highlight

Copy