Mt 19

Cuybanil eb chi pojlej ba yetok yetbi

(Mc 10.1-12; Lc 16.18)

1Max lajwi yalon Jesús juntzan tu xin, max el bay Galilea tu', cax max toj yulak yet Judea, bay k'axepal ec' a' miman Jordán. 2Xiwil anima max tzakloj yintak. Max jaycan c'ul jantak eb ya'ay yuj Cham.

3Ay juntzan eb fariseo max apni oc bay Cham, yuj yak'len eb yikban c'aytok Cham. Max yak'on eb k'anlebal bay Cham.

—¿Ay mi leyal chi je' pojlen ba nak winak yetok yistzil yuj tzanc'al tzet yetal? ẍi eb bay.

4Max tak'welay eb yuj Cham:

—¿Tom c'amto bay che yil yul tx'an Un Tz'ibbilcanok, tol atax yet max watx'nen Dios yulyibank'inal ti', max watx'nej nak winak c'al ix ix? 5Max yalon c'apaxcan axca ti': Yuj tu xin, a nak winak, ok bekcan is mam c'al is txutx yuj junanen ba nak yetok yistzil, xan axca wal tol junxanej mimanilejal chi yuncan el eb cawanil, ẍi Dios. 6Yuj tu xin, manxa cawanok eb, palta tol junxanej chi yuncan el eb. Xan a eb junanebil yuj Dios, manchak pojlay ay eb yuj eb yet animail, ẍi Jesús bay eb.

7Axa k'anlen pax eb tu':

—¿Palta tzet xan albil pax can yuj Moisés, tol chi je' yak'on junok winak tx'an yunal pojlejbail bay yistzil, cax chi pojlen ba eb? ẍi eb bay.

8—Yuj e pital xan max cha' Moisés e pojlen e ba yetok e yistzil; palta atax yet max watx'nej Dios yulyibank'inal ti', man cayok tu' max yutej. 9Yuj tu' xan chi wal ayex, tol tzanc'al mactxel chi yuktej pax yistzil, palta c'am pax mul ix chi yaoc yul k'ab nak, cax chi yion nak junokxa ix, mul chi yun nak,*fn* ẍi bay eb.

10Axa yalon eb is cuywom tu' bay:

—Ta junelnej wal c'am chi je' pojlen ba nak winak yetok yistzil xin, yel mi watx' c'am chi oc yistzil, ẍi eb.

11Xan max yal Cham bay eb axca ti':

—Palta man masanilok anima chi techaj yuj juntzan che yal ti'. Asannej eb chi oc Dios yetok chi techaj yuj. 12Ay mac palta wal yayji is mimanil yintax yaljubal, yuj tu' xan c'am chi oc yetbi eb. Ay mac, a yet animail chi uten yin tol c'amxa chi je' yoc yetbi. Ay mac xin, c'am chi oc yistzil, yujtol asannej Cham is Yajawil ay satcan chi yochej chi yak' serbil. A eb chi techaj yuj axca tu', techajokab yuj eb xin, ẍi Jesús.

Max yal Jesús watx' k'anej yiban eb unin

(Mc 10.13-16; Lc 18.15-17)

13Max lajwi tu xin, ay juntzan unin max ilay jay bay Jesús yuj eb anima, yuj batxban oc Cham k'ab yiban eb, c'al yuj txajli Cham yuj eb. Palta max tenlay oc wanaj eb jay c'atan Cham yuj eb cuywom.

14Axa yalon Jesús bay eb is cuywom tu' axca ti':

—Chaek jay eb unin ayin. Man e tenoc wanaj eb, yujtol asan eb lajan nabal axca eb unin ti', asan eb ay yalon yet yoc yul k'ab Cham aj satcan, ẍi bay eb.

15Catatu' bian max yaon ajtok k'ab yiban jolom eb unin tu', axa toj tu'.

Yabixal jun nak ach'ej tol beyom

(Mc 10.17-31; Lc 18.18-30)

16A junel, ay jun ach'ej max apni oc bay Jesús. Max k'anlen bay Cham:

—Ach in Meẍtol, chin k'anlej ayach, ¿tzet yetal watx' chi wunej, yet watx' chin cha' k'inalej tol ayc'al yin tojbalk'inal? ẍi bay Cham.

17—¿Tzet yuj xan cha k'anlej ayin yuj tzet yetal watx'? Jun ch'an mactxel watx', asan Dios. Ta chochej cha cha' jun k'inalej tol ayc'al yin tojbalk'inal tu', ikej chekbanil Dios, ẍi Cham bay.

18—¿Mactet juntzan chekbanilej chal tu xin? ẍi bay Cham.

Max yalon Cham:

—Manchak a mak' cam anima. Manchak aoc a mul yul k'ab estzil. Manchak ach elk'ani. Manchak a naaj k'anej yin et animail. 19Ayokab yelapnok a mam c'al a txutx yul a sat. Ya'ilnej eb et animail axca chot a ya'ilnen a ba, ẍi Cham bay.

20—Chixa wikej masanil juntzan chekbanil tu' yet max in titoc yin uninal. ¿Tom ayto wal jabokxa chi wun chi yal tu'? ẍi bay Cham.

21—Ta chochej wal tol chach tz'aknaj el eken masanil, txoncan el masanil tzet ay ayach, cax cha pojontok tojol tu' xol eb meba'; catatu bian ok a chaon a beyomal bay satcan. Chi lajwi tu xin, cax chach ec'c'al cuywok wintak, ẍi Jesús bay.

22A yet max yaben jun ach'ej axca tu xin, max paxtok nak yin cusc'ulalil, yujtol caw beyom.

23Max lajwi tu xin, max yalon Jesús bay eb is cuywom axca ti':

—Wal yel chi wal ayex, tol a eb beyom, yatak yoc eb yul k'ab Cham aj satcan. 24Chi wal c'apax ayex, k'inalok junok no camello tinani', ¿tom ok je' yeq'uel no' yul yixal junok ch'en acuẍa? Cayton tu' eb beyom xin, ta ok oc eb yul k'ab Cham aj satcan, yin puralil ok oc eb, ẍi bay eb.

25A yet max yaben eb is cuywom jun tu', caw max c'ayaj c'ul eb. Axa yalon eb tu' axca ti':

—Ta caytu' axca tu xin, ¿mac wal txel ok je' colchaji? ẍi eb.

26Yuj tu xan max oc t'anan Jesús yin eb, axa yalon tu':

—A jun ti', c'am ton junok anima chi je' yuj; palta a Dios chi je' yuj, yujtol masanil chic'al je' yuj Cham, ẍi bay eb.

27Axa yalon Pedro tu' bay Jesús:

—Mamin, ilab ayon ti', max co bekcan masanil co tzetak yetal, cax chon ec'c'al cuywok entak. Yuj tu', ¿ay mi jabok watx'takil ok ji' q'uexelok? ẍi bay Cham.

28—Wal yel chi wal ayex, a yet ok ac'bok masanil tzet yetal, cax ok e chaon paktzil e yet tu'. A' ayin Chekbilintek yuj Dios xol eb jet animail ti', ok in ay chotan bay in despacho, bay ok txecloj el in mayk'ak'al. A ayex e lajcawanil max ex ec'c'al cuywok wintak ti', ok ex ay chotan junjun ex bay junjun e despacho. Ok e beyc'ulnen eb jet israelal lajcaw bulanil. 29Tzanc'al mac chi bekcan yatut wujc'al, ma yuẍtak, ma yanab, ma xin is mam ma is txutx, ma yuninal, ma is tx'otx' chi bekcan wuj, a ton eb tu' caw miman q'uexel ok cha'. Yetok c'apaxok, ok cha' c'apax eb k'inalej tol ayc'al yin tojbalk'inal. 30Ay eb miman yelapnok co xol tinani', palta a yet jun tiempoal chi wal tu', xiwil eb c'amxa jabok yelapnok. Ay pax eb xin, c'am jabok yelapnok co xol tinani', palta a yet tu', xiwil eb mimanxa yelapnok, ẍi Jesús bay eb.

Currently Selected:

Mt 19: ATBYK89

Highlight

Copy