Mt 18

¿Mac junok yel miman yelapnok?

(Mc 9.33-37; Lc 9.46-48)

1A yet jun tiempoal tu' max k'anlej el eb is cuywom Jesús bay axca ti':

—¿Mactxel yel miman yelapnok xol eb ayoc yul k'ab Cham aj satcan? ẍi eb bay.

2Max yawtentek Jesús jun unin, max lecban oc nan xol eb. 3Max yalon axca ti':

—Wal yel chi wal ayex, ta c'am chi na ba e c'ul, ta c'am che yut e nabal axca eb unin, maj je' e yoc yul k'ab Cham aj satcan. 4Yuj tu', a eb yaynakil chi yut ba axca jun unin ti', a ton eb tu' caw miman yelapnok yul k'ab Cham aj satcan. 5Tzanc'al mac chi chaon junok unin axca jun ti', yuj wal tol wet, ayin chin is cha'.

Ay is may jayc'ay yin yobtakil

(Mc 9.42-48; Lc 17.1-2)

6Ta ay mac chi ak'on etax el is nabal junok unin chi yaoc c'ul win, ok'bal wal c'ul. Yel mi watx' chi pixlay oc t'unan junok ch'en ch'en yet molino yin is nuk', cax chi k'oklaytok yul a', yet watx' manchak yetnej el is nabal jun unin tu'.*fn*

7Ok'bal c'ul wal eb anima yuj juntzan tzet chi ak'on etax el is nabal eb tu'. Masanil tiempo ayc'alta' juntzan tu', palta ¡ay…, a wal eb chi etnewi el nabalej tu', ok'bal wal c'ul eb!

8Yuj tu xin, ta a junok e k'ab, ma junok e yakan chi ak'on etax el e nabal, yel mi watx' che tzoq'uilok, cax che k'okon elok, yet watx' c'am chi etax el e nabal yuj junelnej. Yujtol yel mi watx' che cha' k'inalej tol ayc'al yin tojbalk'inal, caxc'al man tz'akanok e mimanil, yintak tol tz'akanc'al e mimanil, chex toj pax can xol k'ak' c'am bak'in chi tani. 9Ta a junok e bak' sat chi ak'on etax el e nabal xin, yel mi watx' che yiiltek, che k'okon elok yet watx' c'am chi etax e nabal junelnej. Yujtol yel mi watx' che cha' k'inalej tol ayc'al yin tojbalk'inal, caxc'al jun ch'an e bak' sat, yintak tol tz'akanc'al e bak' sat cax chex toj pax can xol k'ak'ej bay infierno.

Yabixal jun no calnel c'aynaktok

(Lc 15.3-7)

10-11Caw maj je' e yintaknen el junok eb unin ti'. Chi wal ayex, a eb ángel chi taynen junjun unin ti', ayic' eb yetok co Mam Dios masanil tiempo bay satcan.*fn*

12K'inalok ta ay junok mactxel ay junok ciento is calnel, cax chi c'aytok junok no', ¿c'amtax mi chi bekcan no 99 etbiej tu' low bay junok tzalan, cax chi toj sayon ec' no' max c'aytok tu'? 13Ta chi ilchaj no' yuj nak, caw chi tzaloj oc nak yin no', yintak pax no 99 ayc'alta' ec' tu'. 14Cayton tu' co Mam ayic' bay satcan xin, man yochwanok tol ay junok xol eb unin ti' chi c'aycan elok.

Yowalil ay co mimanc'ulal

(Lc 17.3)

15Ta ay junok oẍtak chi oc mul ayach, chach toj a tx'oklil bay, cax chalon bay tol max oc mul ayach. Ta chi cha' yab ayach, ti wal mayal monchaj oj chi yal tu'. 16Palta ta c'am chi cha yab ayach, yel mi watx' chetok jun cawanokxa mac chi toj alon etok bay. Ayokab cawanok ma oxwanok testigo, yet watx' miman txequel yayji tzet chi ali, axca yalon yul tx'an Un Tz'ibbilcanok. 17Palta ta ac'ala' c'am chi cha yab bay eb xin, yel mi watx' chal bay iglesia. Ta c'amc'alta' chi cha yab bay iglesia tu', canokab axca junok man israelok, ma axca junok tekom el tojlabal yul a sat.

18Wal yel chi wal ayex, a tzet ok e yak' yowalil yulyibank'inal ti', a ton tzet ayc'alta' yowalil yuj Cham aj satcan. Axa tzet man ok e yak' yowalil yulyibank'inal ti', a ton tzet c'amc'alta' yowalil yuj Cham aj satcan.

19Chi wal c'apax ayex, ta ay cawanok ex jun lajanc'al chaon e c'ul junok tzet yetal, cax che k'anon yin txajil, ok ak'lay ayex yuj co Mam ayic' bay satcan. 20Yujtol tzanc'al bay ayic' cawanok ma oxwanok chi wajbaj ba yin yion ay ba eb ayin, ayin ec' yetok eb, ẍi Jesucristo.

21Axa jitzontok ba Pedro tu' c'atan Cham, max k'anlen bay:

—Mamin, ta ay junok wuẍtak cac'al ti' yoc mul ayin, ¿jayel mi chi wak' mimanc'ulal yin? ¿Yowalil mi ukel chi wak' mimanc'ulal yin? ẍi.

22—Chi wal ayach, manc'al ukelnejok, palta caxc'al 490 el chi oc is mul ayach, ak'c'al mimanc'ulal yin.*fn*

Yabixal nak c'am is mimanc'ulal

23Ok waltek ayex tzet ok yun yeloc eb ayoc yul k'ab Cham aj satcan: Lajan wal yayji axca junok rey max yi' is cuenta yin jec eb is mulnajwom. 24Lanan wal chaon el yich yion is cuenta tu', cax max ilay jay junok nak ay xiwilok milal quetzal*fn* is jec bay. 25Palta c'am ch'en yuj nak. C'amxa tzet watx' max yun yak'on pax is jec tu'. Yuj tu xan max yal cham rey tu', tol yowalil chi txonlay el nak*fn* yetokc'al yistzil c'al eb yuninal, c'al jantak tzet ay, cax chi pax jec nak tu'. 26Axa bekon ay jajnaj ba nak satak jun rey tu', cax max yalon ba nak bay cham axca ti': Mamin, ta miman chot a c'ul win, ok wak' pax in jec tu' ayach, ẍi nak. 27Axa yok' c'ul cham tu' yin nak, max joonc'ay cham jec nak yiban masanil, axa beklay el nak yuj cham tu'.

28A yet mayal beklay el nak tu', max ilchaj el junok yet mulnajwomal nak yuj. Ay mi jayebok quetzal jec bay nak.*fn* Yuj tu' max oc mitx'naj nak yin, cax max oc pitz'naj nak yin nuk' jun winak tu'. Max yalon nak bay: Itek ch'en a majan tumin ayin wal tinani', ẍi bay. 29Axa bekon ay jajan ba nak ay majan tu' bay nak. Max yalon axca ti': Ta miman chot a c'ul win, ok wak' pax in majan tu' ayach, ẍi nak. 30Palta majc'al yal c'ul nak max yak' mimanc'ulal. A ti yet tol max toj yacan oc preso, masantac'al max yak' pax nak is majan tumin tu'. 31Ay pax juntzanxa yet mulnajwomal nak max ilon tzet max yun nak, caw wal max cus c'ul eb yuj. Yuj tu' xan max toj yal eb bay cham patronej yuj tzet max uj tu'. 32Axa yawten cham tu' nak c'am is mimanc'ulal tu', max yalon cham bay nak axca ti': Caw yob a c'ul ach chekbej. Max wak' mimanc'ulal yin masanil a jec, yuj max ach oc tean win. 33Matawal tol max ak' mimanc'ulal yin nak et chekbejal tu', axca max ach wut wak'on mimanc'ulal, ẍi cham bay nak. 34Caw wal max tit yowal cham tu' sic'libil. Max yaontok cham nak preso. Max yalon cham tol chi alay oc yailal nak, masantac'al chi yal yak'on pax nak is jec bay cham.

35Ta c'am che yak' c'apax mimanc'ulal yin masanil e c'ul yin yobtakil e yet animail chi oc ayex, man ok yak' c'apax mimanc'ulal co Mam Dios e yin, ẍi Jesús bay eb.

Currently Selected:

Mt 18: ATBYK89

Highlight

Copy