Mal 3
3
1Axca ti' yalon Jehová, Cham Yajaw yin Masanil: Ok in chektok in chekbej, yet watx' chi toj watx'nej be yin babelal in satak. Catatu' ayin Yajaw in ti' echbanebil in e yuj, ayman ok in octok bay yul in templo. Che yochej chi jay in chekbej yuj yak'on yi ba in trato. Abek xin, ok in jayok, ẍi Cham.
2Palta ¿mac wal ok techaj yuj yet jun c'ual yet ok jay Cham? ¿Mac ok je' tec'ban ba satak? Yujtol a yopiso Cham axca k'ak' k'ak'ej chi k'an eb watx'nem ch'en, ma axca xapon chi k'an eb chi tx'ajwi. 3Ok ay chotan Jehová sakbanen el eb yinatil Leví, axca mac chi ion el tz'ilal ch'en plata, c'al ch'en oro xol k'ak'ej. Ok lajwok tu', catatu' ok je' yak'on eb is yofrenda satak Jehová, axca wal is mojalil yin tojolal. 4Cata wal tu', ok tzalojbok Jehová yetok is yofrenda eb aj Judá, yetok yet eb aj Jerusalén, axca chi yun tzalojbi yin, yettax payxa.
5A Jehová, Cham Yajaw yin Masanil chi alon axca ti': Ok in jay e xol yin ex in beyc'ulneni. Ayin wal caw ok wak' testigoal in ba yin aymanil yin eb tz'akan ay c'ul yaloni, yin eb chi yut ba ajmulal, yin eb chi yak' lek'tial, yin eb c'am chi tojlanej is mulnajwom yin tz'akan, yin eb chi etnen eb xal ix camnakxa yichamil, c'al eb unin c'amxa mam c'amxa txutx, yin eb man tojolok chi yut ba bay eb tx'ok conobal, c'al yin masanil eb c'am welapnok yul sat.
Diezmo c'al ofrenda
6Ayin Jehová, Yajaw in yin Masanil, c'am bak'in chin q'uexchaji. Yuj tu' xan ayex yinatil ex Jacob ti', c'amto chex lajwi ayok. 7Yettaxc'al max beytek eb e yichmam max e yintaknej el in chekbanil, majc'alta' e yikej. Meltzojanektek ayin, catatu' ok in meltzojtok ayex. Palta ayex ti' che k'anlej: ¿Tzetto wal chi jut meltzoj co ba? quex chi. 8¿Tom moj chi elk'anwi eb anima bay is Diosal? quin chi. Palta ayex ti' chin e yelk'anej cax chito wal e k'anlen axca ti': ¿Tzet yinal chach jelk'anej? quex chi. A ton yin jun ti': Tol che yelk'anej diezmo c'al ofrenda. 9Catabnebil ex e masanil, yujtol masanil jun nación ti' chin elk'aneni. 10A tinani' xin, iektek masanil e diezmo bay c'uanbal bay templo, yet watx' ay lobej eb chin ak'on serbil bay tu'. Ayin wal caw Jehová in, Yajaw in yin Masanil, chi wala', tol chin e yak' porobal. Axca tu' ok yun e yiloni tol ok in jak puertail satcan, cax ok in secon aytek yaxilal e yiban, tol c'amxa bay watx' ok e c'ubaj. 11Ayin caw chi wala', tol man ok in cha lajwok ay e yawoj yuj no no', tamwal ok in cha' etax el sat e yuva yet c'amto chi k'inbi. 12Ayin caw chi wala', tol masanil nacionlak ok alonok tol watx' e yet, yujtol caw wal watx'xac'al ok yun yeloc e nación ti', ẍi Jehová.
Ay is mimanc'ulal Dios yin is conob
13Chi yalon Jehová axca ti': Yelxac'al yob tzet che yal ayex ti' win, cax chito wal e k'anlej pax axca ti': ¿Tzet yetal yob chi jal en? quex chi. 14Axca ton ti' che yala': Nabac'al chi jak' serbil Dios. ¿Tzet wal yetal chi ji' yin, ta chi jikej bay tzet chi yala', cax chi jaon oc el pichilej satak Jehová Cham Yajaw yin Masanil, yuj co tx'oxon el co cusc'ulal yuj co mul? 15Chi jil wal ayon ti', tol a eb ch'aan, ay wal oc eb yin tzalojc'ulal, yetok c'apaxok, watx'c'al chi eloc masanil eb yob tzet chi yunej, toltax eb chi tec'baj ba satak Dios, c'am pax yailal chi jay yiban eb, quex chi, ẍi Cham.
16(Palta a eb ay yelapnok Jehová yul sat, chi k'anjab eb bay junjun, axa Cham chi cam wal yaben tzet chi yal eb. Satak wal Jehová chi tz'ibelay jun libro, a ton bay tu' chi binajtek eb ay yelapnok Cham yul sat, cax ayoc nabal eb yin Cham.)
17Axca ti' yalon Jehová, Cham Yajaw yin Masanil: A yet jun c'ual ok in beyc'ulnej el eb anima, ok in sic'can el eb ay welapnok yul sat, yet chi occan eb wetok. Axca junok mamej chi cus c'ul yin yuninal chi ak'on serbil, axca wal tu' ok yun cusoc in c'ul yin eb. 18A yet tu' ok nachaj el e yuj, tol ay q'uexanil is paktzebal eb watx' c'al eb yob. Ay c'apax q'uexanil is paktzebal eb chin ak'on serbil c'al eb c'am chin ak'on serbil, ẍi Cham.
Currently Selected:
Mal 3: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
