Mal 2
2
1Chi yalon c'apax Jehová Cham Yajaw yin Masanil axca ti': A tinani' ex sacerdote, e yet yayji juntzan chekbanilej ti': 2Ayex ti', yowalil ay welapnok yul e sat yin tzet che yunej. Ta man ok e cha e yabej, ok ex in catabnej. Ok in q'uexoc e aloj watx' k'anej yin catab k'anejal. Wal yel, a jun tu' toxa mayal in catabnej, yujtol c'am che yaoc in chekbanil yin e c'ul.
3E yuj wal ayex ti', xan okto wak' yowalil bay eb e yinatil, cax ok waoc is tza' no xajanbal che yitek yet k'in tu' yin e sat. Cax junej ok yun e k'oklay el yetok is tza' no no' tu'. 4Axca tu' ok yun nachaj el e yuj, tol ayin Jehová Yajaw in yin Masanil max wak' jun tenchebal ti', yet watx' a in trato max wak' yetok eb yinatil Leví, ok beyc'altok.
5A in trato yetok eb e yichmam yinatil Leví, tol chi wak' is cawil, c'al junc'ulal eb. Max wak' in trato tu' yetok eb, yet watx' ay welapnok yul sat eb. A eb tu', caw wal ay welapnok yul sat, ayc'al is xiwc'ulal eb ayin. 6Yelc'al tzet max yal eb, c'amc'al lek'tial max ilchaj el yin is k'anej eb. Caw wal watx'c'al max yun yayji ec' eb wetok. Xiwil mactxel max pojcan el eb yin yobtakil. 7A wal yopiso eb sacerdote, tol chi cuylay eb anima yuj eb, yet chin yojtaknej el eb. Moj ton chi apni oc masanil anima bay eb, yet chi yaben eb cuybanilej, yujtol a eb tu', in chekbej yayji eb ayin Jehová in tol Yajaw in yin Masanil.
8A pax ayex sacerdote ex ti', mayal e pojcan el e ba yin watx'il. Yuj wal cuybanilej che yak'a', xan xiwil mactxel mayal ayc'ayi. Yuj tu', ayex wal caw mayal e yetnejtok in trato max wak' yetok Leví, ayin Jehová Yajaw in yin Masanil. 9Yuj tu xin, ayin chi wak' yunej, tol c'am e yelapnok, c'al yaynakil e yayji yul sat masanil anima, yujtol c'am che yikej tzet chi wochej, cax man lajanok che yut e beyc'ulal yin masanil anima, ẍi Cham.
Is tenomtakil eb aj Judá
10¿Tom man junnejok co Mam xin, a ton Dios Cham max on watx'neni? ¿Tzet yuj xin xan chi jetnelej co ba, cax chi jak'len yobc'ulalil jin junjun on, cax chi jetnentok is trato Dios max watx'nej yetok eb jichmam? 11A eb aj Judá, maj yikej eb yunen bay max yak' ti' satak Dios. Mayal yaoc is mul tol yelxac'al yob bay Jerusalén, c'al masanil yul makbej Israel. Mayal yetnejtok eb is cajlobal Dios tol yet yayji ocok, ay is camc'ulal yin. A eb winak max ion eb ix ix chi oc ayilal bay is diosal junok tx'ok nacional. 12Matawal chi el yin c'ul Jehová Cham Yajaw yin Masanil chi c'aylay el bay yul co nación ayon Israel on ti', tzanc'al mactxel chi unen axca tu', caxc'al chi yitek is xajanbal bay Cham.
13Ay junxa tzet yetal che yunej: Toxac'al chi jichchaj e c'ul e yok' yinlak altar, cax chex ok' wal yin mimek cusc'ulal, yujtol c'amxa chi chalay e yofrenda yuj Jehová yin tzalojc'ulal. 14Che k'anlej bay Cham: ¿Tzet yuj xan c'am chi chalayi? quex chi. Tix yuj ti': Yujtol a wal caw Jehová max iloni, tol c'am chi yun bay max e yak' e ti' bay eb ix ix max ex nupay yetok yet ach'ej exto, caxc'al a eb ix tu' e yetbic'alta'a, bay max e yak' e ti' yet max quex nupayi. 15Tokwal man junnejok yayji e mimanil, c'al e yanimail yetok eb ix. ¿Tzetbil yoc is nabal Dios xan caytu' yayji? Tix yayji oc ti': Yujc'al e yuninal tol caw conob Dios chi elocok. Yuj tu' xan taynejek e ba, yet watx' c'amokab mac chi yak' tac ti' bay yetbi max yi' yin yach'ejal. 16A wal caw Jehová co Diosal ayon Israel on ti', Cham Yajaw yin Masanil chi alon axca ti': Che taynej wal e ba, manchak e yut e ba yin tol c'am chi yun bay che yak' e ti' bay e yetbi. Yujtol ayin ti' caw wal c'am chi cha in c'ul che pojlej e ba yetok e yetbi, tamwal e yetnen eb ix e yetbi axca tu', ẍi Cham.
Is c'ual beyc'ulal
17Mayal caktzaj aj Jehová yuj tzet che yala'; tol chito wal e k'anlej axca ti': ¿Tzet yuj xan chi caktzaj aj Cham ayon? quex chi. Tix yuj ti': Yujtol ayex ti', che yala' tol chi cha' c'ul Jehová eb chi unen yobtakil, cax chi tzaloj yetok eb, cax che yalon paxok ¿Baytal ay Cham Dios, Cham chi beyc'ulnewi yin tojolal? quex chi.
Currently Selected:
Mal 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
