1 S 9
9
Max chalej ba Saúl yetok cham Samuel
1A yin is tribual Benjamín ay jun winak chi yik Cis, c'ajol Abiel, yitxiquin Zeror; axa is mam icham is mam cham, chi yik Becorat, c'ajol Afía. Miman yelapnok Cis tu' yul sat anima. 2Ay jun is c'ajol caw wal tol watx' is mimanil chi yik Saúl. A xol masanil eb israel, c'am junok watx' yili yintak Saúl tu', miman is tel; a masanil eb winak bay israel, asan bay jolom is xic' chi ajapnok is tel eb.
3Ay jun c'ual max c'aytok juntzan no burro cham Cis tu'. Yuj tu' xan max yal bay Saúl is c'ajol tu':
—Watx'nej a ba, cax chach toj a sayon no burro tu', itok junok eb co chekbej etok, ẍi cham Cis tu'.
4Max toj Saúl, max k'axpojtok yul makbej siquilal tx'otx' yet Efraín cax max ec'tok yul yet Salisa; majc'al ilchaj no burro tu' yuj. Max ec' paxtok yul is makbej Saalim, c'al yul yet Benjamín, palta majc'al ilchaj no'. 5Axa yet max apni oc bay yul is makbej Zuf, max yalon bay jun chekbej tzunan oc yintak tu':
—Meltzojokon cayti', axa ta chi yunej, chi oc in mam yin bilc'ulalil juj yintak no burro, ẍi Saúl.
6Max tak'wi jun chekbej tu':
—A yul jun conob ti' ay jun is chekbej Dios, caw wal miman yayji oc yul sat eb anima; a masanil tzet chi yala' chic'al yunej. Ton jila', ok yala' tzet beal ok ji', ẍi jun chekbej tu'.
7—Ton xin, asan c'am wal jabok tzet chi jitok bay, tamwal junok ixim pan ay yul co pa, c'am wal jabok tzet ok jak' bay, ¿tzet wal ok jitok? ẍi Saúl.
8Max tak'wi jun chekbej tu':
—Ay ch'an jun bijan tumin naba plata ibil oc wuj, ok jak' ch'en bay jun chekbej Jehová tu', xan a ok alonok, tzet wal beal ok ji', ẍi jun chekbej tu'.
9(A yet payxa tu' ta ay junok israel chi yochej chi k'anlej yab is nabal bay Dios chi yal axca ti': Ton jil jun chi je' yilon tu', ẍi eb. Jun chi al-lay chekbejok Dios tu' tinani', a yet payxa tu' chi yik eb tol chi je' yiloni.)
10—Watx' xin, ton jila', ẍi Saúl.
Max toj eb cawanil bay ayic' jun chekbej Dios tu'. 11A yet lanan yajtok eb bay witzal conob tu', max chalen ba eb yetok juntzan eb ix k'opoj lanan toj eb ix ioj aej, max k'anlen eb bay eb ix axca ti':
—¿Ay mi ec' cham is chekbej Dios bay yul jun conob ti? ẍi eb.
12Max tak'wi eb ix:
—Ja', ayic' cham bay e sataktok tu', palta ta che c'ol e yip wal janic'okxa okto ilchaj cham e yuj. Tolto wal chi jay yul conobal ti' yujtol ay k'in ok chalay bay tzalan bay chi oc ayilal. 13Asanc'al chex apni che sayon ec' cham bay xol conob tu', yak'ban c'amto chi toj bay chi oc ayilal tu', bay chi echbanelay yuj eb anima. Masantac'al ok apnok cham, catatu' ok yalon watx' k'anej yiban xajanbal, axa low cham yetok eb anima awtebil tu'. Yuj tu' asek wal tinani', k'okbilto ok e yil cham, ẍi eb ix.
14Cax max toj eb xin, max ajapnok eb bay yul conob tu', c'uxan wal max chalej ba eb yetok cham Samuel, lanan toj cham bay yetc'ulal bay chi oc ayilal tu' max chalen ba eb.
15Yecalok to yapni oc Saúl, max yalon Jehová bay cham Samuel: 16A yet yecal yab axca ti', chi watek jun winak ayach, a tu' ok tit bay yul yet Benjamín, a jun tu' chaoc aceite yiban is jolom, a' ok oc yin yajawilal yiban conob Israel. A' ok colon in conob ti' bay yul k'ab eb filisteo, yujtol mayal cus in c'ul yuj tewilal eb ayin, ẍi Jehová.
17A yet max yilon cham Samuel yin Saúl, max yalon Jehová bay: A ton jun winak ti' max wal ayach tol a' ok oc yajawilalok in conob, ẍi Jehová.
18A bay puertail conob tu', a tu' max chalej ba eb, max yalon Saúl bay cham Samuel:
—Al ayin mamin, baytal ay yatut cham chekbej Dios, ẍi Saúl.
19—Ayin toni. Ton wetok, babjan. A tu' ok ach low wetok bay chin toj tu'. A to yet yecal ok wal ayach tzet chochej cha k'anlej tu', lajwi tu', axa a pax tu'. 20A yuj no' burro max c'aytok yettax oxji tu', c'amokab chi tac a c'ul yuj no', mayal ilchaj no'. A tinani' a wal tzet ochebil yuj eb jet conob Israel, a juntzan tu' et yayji ocok yetok eb ecan, ẍi cham Samuel. 21Max tak'wi Saúl:
—Ayin ti', titnak in yin is tribual Benjamín, a jun tribu tu' yelxac'al txennej yintak masanil is tribual israel. Ac'ala' yicham in mam bay max in tita, caw wal yaynakil xol is tribual Benjamín. ¿Tzet wal yuj xan chal juntzan ti' ayin? ẍi Saúl.
22Max lajwi tu' max yiontok cham Samuel tu' Saúl, yetok jun chekbej ibil oc yuj, bay yul jun salón, max yak'on ẍila caw wal miman yelapnok bay eb, ay mi junok 30 eb awtebil low tu'. 23Max lajwi tu', max yalon cham bay jun nak ilom loj bay cocina:
—Itek jun makan no chibej max wal ayach tol tx'ok max a pojcan elok, ẍi cham Samuel.
24Yin aymanil max yitek jun no xubej, yetok tzet yetal ay xol, max yak'on bay Saúl; max yalon cham Samuel:
—A jun ti', a a lobej tol pojbilxa elok; lowan. A jun ti' tol naanxac'alta wuj, max in chek pojlaycan elok, yet max in chekon watx'nelay jun k'in ti', ẍi cham.
Junnej max low Saúl yetok cham Samuel yet jun c'ual tu'. 25A yet max paxaytek eb bay tu xin, max ayol eb bay yul conob tu', max k'anjab cham Samuel yetok Saúl bay pananil yiban na. 26Axa yet max sakbi aj yet junxa c'ual, max awtelay Saúl yuj cham Samuel, max yaloni:
—Ajan wanok cax chach toji, ẍi cham.
Max aj wan xin; max lajwi tu', cax max tit cham Samuel yetok Saúl bay yul calle. 27Axa yet max ayapnok eb tilak conob, max yalon cham Samuel bay Saúl:
—Al bay jun a chekbej ti' tol chi babjitok, cax chach can janic'okxa, yujtol ay janic' tzet ok wal ayach, tol max chek Jehová wala', ẍi cham. Axa chekon babjoktok Saúl is chekbej tu'.
Currently Selected:
1 S 9: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
