1 S 8
8
Chi yochej conob Israel chi oc junok is reyal
1A yet max ichambi cham Samuel max yaon oc cawan is c'ajol yin juezal. 2Joel is bi jun babel c'ajol cham, axa junxa, chi yik Abías. A bay Beerseba max yak' eb juezal yiban conob Israel. 3Palta man watx'ok max yut ba eb axca is mam, tol a wal ch'en tumin max yochej oc eb; max txon ba eb nak, xan yobxac'al chi yun watx'nen el eb k'anej. 4A yuj tu' xan max wajbaj oc ba masanil eb yicham winakil conob Israel, cax max toj eb yilon cham Samuel bay Ramá. 5Max yalon eb: A ach ti', caw wal icham winak achxa; axa eb a c'ajol, man watx'ok chi yut ba eb axca wal max ot a ba. Yuj wal tu' xan tol chaoc junok co rey yet chi oc co yajawilok axca yayji bay juntzanxa nación, ẍi eb.
6Caw wal max tac c'ul cham Samuel yet max yabeni, tol chi k'an eb junok is reyal chi ak'on yajawil yiban eb; yuj tu' xan max txajli cham bay Jehová. 7Max tak'wi Jehová bay cham: Ikej masanil tzet chi k'an eb conob, yujtol manak ach yaynakil chach yut eb, palta ayin, yujtol c'amxa chi yochej eb chin yajawbi yiban eb, xan axca tu' chi yun yalon eb. 8Atax yet max wion eltek eb bay Egipto max occ'al eb ayilal bay comon dios, c'am welapnok yul sat eb; axca wal max quin yutc'al eb, caywal tu' chach yut eb tinani'. 9Yuj tu xin, ikej bay tzet chi yal eb. Palta yak'ban tu' chi cam ak'on yojtaknej el eb tzet wal ok utlay eb yuj junok is reyal eb ok oc tu', ẍi Jehová bay cham Samuel.
10Max lajwi tu', cax max yalon cham Samuel bay eb max k'anon is rey tu', axca max yun yalon Jehová. 11Max yalon axca ti':
—Cay wal ti' ok yun junok e rey ok yajawbok e xol: Ok wajbaj oc masanil eb e yuninal, ay eb ok occan yin carruaje yet owal, ay mac xin, ok oc yiban chej, cax ok tok yin owal; ay pax mactxel xin, ok occan taynemalok jun rey tu'. 12Ay eb ok oc yajawilok junok mil soldado, ay pax eb ok oc yin yajawilok junok 50 soldado. Ay pax eb xin, ok oc yin mulnajil yin is tx'otx', c'al yin joon aj is trigo; ay pax eb xin, ok oc yin watx'nej ch'en yet owal, c'al yin watx'nej tzetak yetal chi oc yin carruaje yet owal. 13Cax ok yiontok eb e cutz'in bay yatut yin watx'nej perfume, ma watx'nej loj, c'al yin watx'nej pan. 14A wal e tx'otx' caw wal watx' ok oc yetok, a e yawoj awbil, an uva c'al te olivo, ok yak' bay eb is chekbej. 15Cax ok yion el diezmoal e yawoj chi eli, c'al e vino, cax ok yak'on bay eb is chekbej tu'. 16Cax ok yion c'apax ec' eb nak e chekbej, c'al eb ix e chekbej, c'al yion ec' e wacax c'al e burro caw wal watx', cax ok yaon oc yin is mulnajil. 17Ac'ala' ok k'anon c'apax diezmoal e calnel, c'al ayex ti' ok ex oc is chekbejok. 18A yet jun tiempoal tu', ok el e yaw e yaben yail yuj tzet ok ex utlay yuj e rey ok e sic'oc tu', palta majxac'al cha yab Jehová, ẍi cham.
19Majc'al cha yab eb israel tzet max yal cham Samuel.
—C'amc'al yelapnok juntzan tu', asan tol chi oc junok co reyal on. 20Chi jochej axca juntzanxa nación chi junej, chi jochej tol a junok co rey chi yajawbi co xol, c'al on yikban yin owal, ẍi eb.
21A yet max yaben cham Samuel tzet max yal eb anima tu xin, max yalon pax cham bay Jehová. 22Max tak'wi Jehová:
—Ikej tzet chi yal eb, aoc junok reyal eb, ẍi Jehová.
Lajwi tu', max yalon cham Samuel bay eb, tol chi meltzoj eb junjun bay is conob bay max tita.
Currently Selected:
1 S 8: ATBYK89
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989