Rom 2
2
Tuj tumelxix aju jwisi tu'n Dios
1Tu'ntzunju minti' tcolbil tiba, aya wuc'il, nok alxcyeya in yolina ti'j juntl ka aj ilxix; tu'nju in yolina ti'j juntl ka aj ilxix, tibajxa in cub tz'ak, porque in tma'na ka aj ilxix juntl, ex ax icx teya in tbincha'na mya ba'n. 2Ex ba'n ku'n, tuj tumelxix cbel cysentens xjal tu'n Dios, akeju in che binchan il. 3Yajtzun teya wuc'il, in yolina cyi'j keju in che binchan il ex ax icx teya in tbincha'na mya ba'n, ¿maj in ximana ti'j ka tu'n ttzokpaja tuj jwisi tzul tu'n Dios? 4¿Mujka nne'l tic'una Dios tu'nju ba'nxix ex at tpasens ex apa'nx tu'n? ¿Minti'pe ba'n tu'na ate Dios in txocon teya tu'n tajtz ti'j tanmiya tu'nju at nim t-xtalbil? 5Pero tu'nju cyuw tanmiya ex minti' nna'jtz ti'j, cyja'tzun mas in ch'iy tcastiwoya aju oc tc'ma'ya tuj k'ij oc ttzaj tcastiwoya tu'n Dios, ex oc ttzaj jwisi tuj tumelxix tu'n Dios. 6Porque ctzajel tk'o'n Dios chojbil te teyle junjun ic tza'nx tak'unben. 7Ctzajel tk'o'n Dios chwinklal te jumajx cye keju cucx toc tilil cyu'n tu'n cybinchante ba'n, nno'c tilil cyu'n tu'n cycambante jun nimbil cye tuj cya'j ex tu'n tten cychwinklal te jumajx. 8Atzun cye keju cyc'i' che bin ex minti' in xi cyniman aju yol ax toc, nok o'cx in xi cyniman aju mya tuj tumel, tzul tk'oj Dios cyi'j ex ctzajel tk'o'n cycastiw. 9Tzul yajbil ex c'ixc'oj cyibaj cycyakil xjal in che binchan mya ba'n, tnejelxix cye xjal judiy, ax icx cye xjal mya judiy. 10Atzun cye keju in cybincha'n ba'n, ctzajel tk'o'n Dios nimbil cye tuj cya'j, ex che tel tuj txubtxaj, tnejelxix cye xjal judiy, ax icx cye xjal mya judiy.
11Porque minti' nno'c tque'yin Dios ti cyxilen xjal. 12Porque cycyakil keju o che binchan il ex minti'tok bi'n tley Moisés cyu'n, oc che najel minti' toclen ley cyi'j; ex cycyakil keju o che binchan il ex bi'ntok tley Moisés cyu'n, che oquel tuj xjel ex cbel cysentens tu'nxju ley. 13Porque mlay che oc tk'o'n Dios ke xjal te tz'aklxix ka nok in che bin ti'j ley ex minti' in japun cyu'n; nok o'cx che oquel te tz'aklxix tu'n, akeju in japun ley cyu'n. 14Porque ke xjal mya judiy ke, akeju minti' tley Moisés cyuc'il, ka ma cybincha aju in tma'n ley, ax cynabl in k'mante alcye tu'n cybinchante masque minti' jun ley cyuc'il, cyja'tzun cyleyx cyib. 15Ax cybinchben in yec'unte ka at jun ley tz'iban tuj cyanmi, aju ley lu in tma'n tu'n tjapun cyu'n ic tza'n in tma'n tuj tley Moisés, ex ax cyanmi in k'mante ka ax toc jlu, ex tuj cyximbetz at maj in cyma'n ka at cyil ex at maj in cyma'n ka minti'. 16Tcyakil jlu c'elel tuj k'ancha'l tuj tk'ijlalil oc cyoc xjal tuj xjel twitz Dios tu'n Jesucrist, ic tza'nx tkanil colbil in xi npacba'ne, ex tcyakil cybinchben xjal mya ba'n ewan cyu'n, c'elel chic'e'.
Ke xjal judiy ex aju tley Moisés
17Aya toc tbiya xjal judiy ex k'ukl tc'u'ja ti'j tley Moisés ex in jaw tniman tiba tu'nju ojtzki'n Dios tu'na. 18Ojtzki'n tajbil Dios tu'na, ex ic'ni twitza ti'j aju ba'nxix, porque xnak'tza'maja ti'j ley. 19Ex k'ukl tc'u'ja ti'j ka aya ẍaklul cye moẍ ex ka aya k'ol spic'un cye keju in che bet tuj klolj. 20Tuj tnabla ka aya k'ol xnak'tzbil cye keju minti' ba'n cyu'n, ex xnak'tzala cye c'wa'l, porque at ttxuylal ojtzkibl tuc'ila tuj ley, ax icx ttxuylal ju yol axix toc. 21Katzun aya xnak'tzal te juntl, ¿tiku'n minti' in t-xnak'tzan tiba? Aya in pacban cye xjal tu'n mi'n cyelk'an, ¿yajtzun teya, tiku'ntzun in elk'a'na? 22Aya in k'mante tu'n mi'n cybinchante xjal aj pajil, ¿yajtzun teya, tiku'ntzun in tbincha'na aj pajil? Ex aya ic'un ke tilbilal tu'na, ¿tiku'ntzun nne'tz telk'a'na k'inumabl tuj cyja ke tilbilal? 23Aya in jaw tniman tiba tu'nju at tley Dios tuc'ila, pero in cub tk'o'na tch'ixwi Dios tu'nju nnic'a tibaj tley. 24Tuj tumelxix in tma'n tuj Tu'jil cyja': Ke xjal mya judiy ke in che yolin mya ba'n ti'j Dios nok tu'n cylaje, chi tuj Tu'jil.
25Ax toc at tajben sircunsisyón ka ma japun tley Moisés tu'na; pero ka ma tzic'a tibaj ley, c'oquela ic tza'n mya sircunsidarimaja. 26Atzunju xjal mya sircunsidarimaj pero ka ma japun tu'n aju in tma'n ley, junx ta' ic tza'n otok sircunsidarinjtz. 27Ex aju xjal mya sircunsidarimaj ti'j tchibjal, ka ma japun ley tu'n, c'oquel k'o'na te aj il tu'n, porque at tley Dios tz'iban tuc'ila ex o sircunsidarinjtza, pero nnic'a tibaj ley. 28Porque mya ax toc judiyte xjal nok tu'nju in tyec'un tib ka judiy xjalte; ex mya ax toc sircunsisyón aju in bant ti'j kchibjal. 29Aju xjal axix toc judiy, atzun teju at tley Dios tuj tanmi; ex aju sircunsisyón axix toc, atzun tu'n tten tuj kanmi, mya tu'n ley tz'iban in bant jlu, nok o'cx tu'n T-xew Dios in tbincha'n. Ate xjal lu cjawil nimsa'n tu'n Dios, mya cyu'n xjal.
Currently Selected:
Rom 2: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993