Marcos 9

1Ax icx xi tma'n Jesús cye:

—Ax toc cxel nma'ne cyeye, at junjun cyxol keju ate' tzalu na'nxtok cycyim ex oc cyila' oc tul tcawbil Dios tuc'il tipumal.

O ch'expaj tilbilal Jesús

Matey 17.1-13; Lucas 9.28-36

2Tbajlenxitzun kak k'ij, xi tuc'in Jesús Pedro, tuc'ix Jacobo ex Juan, cyjunalx e je'x tuc'in twi' jun witz ma' twa'l; ex o ch'expaj tilbilal Jesús cywitz. 3O koptz'aj t-xbalun ex oc pur sak wen ic tza'n ttxa che'w; mi jun tx'jol xbalun tzalu twitz tx'otx' jacu sakix tu'n ic tza'n jlu. 4Ex cub tyec'un tib Elías tuc'ix Moisés, in che yolintok tuc'il Jesús. 5Xitzun tma'n Pedro te Jesús:

—Xnak'tzal, ba'n ax tu'n kten tzalu; e tjaw kbincha'n ox tal ja t-xak tze'yin cywi': jun teya, jun te Moisés, ex jun te Elías, chi Pedro.

6Porque minti' ba'n tu'n Pedro alcye tu'n t-xi tma'n tu'nju otok naj cynabl xnak'tzben. 7Ex tzaj jun muj cub ten cyibaj; ex at jun tzaj yolin tuj muj in tma'n:

—Atzun Nc'wa'le jlu c'ujla'nxix wu'ne; cybinxe tyol.

8Ex te jurat, tej t-xi cyque'yin cyi'jele, mi a'lo juntl o cyil, nok o'cxte Jesús attok cyuc'il.

9Cyja'tok cycu'tz twi witz, xi tma'n Jesús cye:

—Aju ma cyile, mi'n txi cyma'ne cye xjal, maxitzun cxel cyma'ne ocxi njatz ank'ine cyxol cyimni, akine sc'o'maj kine tu'n Dios tu'n ntene cyuc'il xjal, chi Jesús cye.

10Ex xi cyc'u'n ju yol lu tuj cyanmi, pero e oc ten xjelil ti'j cyxolx ti t-xilen jlu tu'n tjatz ank'in cyxol cyimni. 11Xitzun cykanin te Jesús:

—¿Tiku'n in cyma'n xnak'tzal ti'j ley ka ilxix ti'j tu'n tul nej Elías? Che chi.

12Xi ttzak'we'n Jesús:

—Ax toc tzul nej Elías, ex cbajel tbincha'n juntl maj tcyakil. ¿Pero chi toc in tma'n tuj Tu'jil wi'je? In tma'n tu'n tic'x nimcu wu'ne, akine sc'o'maj kine tu'n Dios tu'n ntene cyuc'il xjal, ex in tma'n tu'n wel ic'une cyu'n xjal. 13Pero lu cxel nma'ne cyeye, ate Elías o tzul, ex tcyakilju cyajbil xjal o cybincha ti'j, ic tza'n in tma'n ti'j tuj Tu'jil, chi Jesús cye.

Jun cu'xun at ju'ẍ tuj tanmi banix tu'n Jesús

Matey 17.14-21; Lucas 9.37-43

14Tejtzun cyul jatum ate' mastl t-xnak'tzben, o cyil nimcu xjal otok tz'oc cychmon cyib cyi'j cyuc'ix junjun xnak'tzal ti'j ley ex jaw jun yol cyxol. 15Tejtzun cylonte xjal otok tzul Jesús, bi'x e labin ti'j ex e tzaj kelan naj k'olbel te. 16Xitzun tkanin Jesús cye t-xnak'tzben:

—¿Alcye yol in che yoline ti'j cyuc'il xjal?

17Tzajtzun tma'n jun cyxol xjal:

—Xnak'tzal, ma tzul wi'ne ncy'ajale tuc'ila, at jun ju'ẍ tuj tanmi ma tz'oc ncy'ajale men tu'n. 18Nok jachak in tzaj tuj twitz tu'n ju'ẍ, in cub xo'n tu'n, ex in swaquin tuj ttzi', ex in kitx'itx'in t-xe' te', ex in xi ttx'ilin tib. Ma txi nma'ne cye t-xnak'tzbena tu'n tetz cylajo'n ju'ẍ tuj tanmi c'wa'l, pero minti' xbant cyu'n, chi xjal.

19Xi ttzak'we'n Jesús:

—Akeye xjal minti' in xi cyocsla'ne. ¿Jte' k'ij tu'n ntene cyuc'ile? ¿Jte' k'ij tu'n cyic'xe wu'ne? Cyi'ntze c'wa'l tzalu.

20Ultzun cyi'n tuc'il Jesús. Tejtzun tilwaj Jesús tu'n ju'ẍ, tzaj tuj twitz c'wa'l tu'n ju'ẍ, cub tz'ak c'wa'l twitz tx'otx', in balk'aje' ex in swaquin tuj ttzi'. 21Xi tkanin Jesús te tman c'wa'l:

—¿Jte'xi abk'i ttzyetlen tc'ixbisanjtz c'wa'l lu tu'n ju'ẍ? Chi Jesús.

Xi tma'n mambaj:

—Matok c'wa'lx tej ttzyet. 22Ex nimcu maj in xi tz'ak c'wa'l tuj k'ak' tu'n ju'ẍ ex tuj a', taj ju'ẍ tu'n tcyim c'wa'l tu'n; pero ka jacu bant tu'na, k'ak'antz tc'u'ja ki'je, ex ko tonintza, chi mambaj.

23Xi tma'n Jesús te:

—¿Tiku'n in tzaj tma'na weye icju: Ka jacu bant tu'na, chiya? Alcye at tocslabl, tcyakil jacu binchanjtz te.

24Jurattzun tzaj k'ajt tman c'wa'l ex tma:

—Cxel wocsla'ne Tat, chin tonintza tu'n tten mastl wocslable.

25Tejtzun tlonte Jesús cyja'tok cypon tilj xjal, xi mayo'n ju'ẍ tu'n.

—Aya ju'ẍ, tu'na ma tz'oc c'wa'l men ex chcyin twi'; akine in chin k'mante teya, tetza tuj tanmi c'wa'l ex mi'n tz'ocxa juntl maj, chi Jesús xi tma'n te ju'ẍ.

26Atzunte ju'ẍ jaw sch'in ex tzaj juntl maj tuj twitz c'wa'l tu'n, etztzun, ex ic tza'n cyimni oc c'wa'l tu'n; cyja'tzun o cyma nimcu xjal: Ma cyim c'wa'l, che chi. 27Pero jaw ttzyu'n Jesús tk'ab c'wa'l, jaw twaban ex jawtzun we' c'wa'l.

28Tejtzun tocx Jesús tuj ja, xi cykanin ke t-xnak'tzben te cyjunalx:

—¿Tiku'ntzun minti' xbant ku'ne tu'n tetz klajo'ne ju'ẍ? Che chi.

29Xitzun tma'n Jesús cye:

—Akeju jun c'loj ju'ẍ lu mlay che etz nok cucx, nok o'cx jacu che etz tu'n na'j Dios ex ka ma cub kyo'n we'yaj, chi Jesús cye.

In yolin Jesús juntl maj ti'j tcamic

Matey 17.22-23; Lucas 9.43-45

30Tejtzun cyic' tuj lugar lu, e ic' aj tuj tx'otx' Galiley. Ex minti' o tajbe Jesús tu'n cybinte xjal, 31porque in tk'o'ntok xnak'tzbil cye t-xnak'tzben in tma'n:

—Chin xel k'o'ne tuj cyk'ab xjal ex chin bel byo'ne; pero ncyimlenxitzune, chin jawil ank'ine tuj toxin k'ij, akine sc'o'maj kine tu'n Dios tu'n ntene cyuc'il xjal, chi Jesús cye.

32Atzun cye t-xnak'tzben minti' el cynic' ti'j ju yol lu, ex in che xob tu'n t-xi cykanin te.

Alcye mas at toclen cyxol

Matey 18.1-5; Lucas 9.46-48

33E pontzun tuj tnam Capernaum. Tejtzun tocx Jesús tuja, xi tkanin cye t-xnak'tzben:

—¿Alcye yol in che xjeline ti'j cyxolxe tuj be? Chi Jesús.

34Atzun cye minti' e k'ajt, porque otok che yolin ti'j cyxolx tuj be alcyeju mas at toclen cyxol. 35Cubtzun ke' Jesús, e tzaj ttxco'n ke cablaj t-xnak'tzben, ex xi tma'n cye:

—Ka at jun tajbil tu'n toc te tnejel, k'o'nc tib te mancbil cye cycyakil, ex k'o'nc tib te ajbel cye cycyakil.

36Ex tzaj ti'n Jesús jun c'wa'l, cub tk'o'n cyxol, jawtzun tchle'n, ex xi tma'n cye:

37—Alcye ma c'monte jun tal c'wa'l ic tza'n jlu tu'nju at tc'ujlalil wi'je, akine in chin tc'mo'n; ex alcye ma c'monte weye, mya o'cx akine in chin tc'mo'n, ax icx in c'monjtz Dios tu'n, aju tzaj samante weye.

Alcye minti' in k'ojl ki'j, axtzun kuc'ilju

Matey 10.42; Lucas 9.49-50

38Atzunte Juan xi tma'n te Jesús:

—Xnak'tzal, ma kile jun xjal in ajben tbiya tu'n tu'n cyetz ke ju'ẍ tuj cyanmi xjal tu'n, pero mya a jun kuc'ile, cyja'tzun xi kmayo'ne, porque mya kuc'ile in bet, chi Juan.

39Xitzun tma'n Jesús:

—Mi'n txi cymayo'ne; porque ka at jun xjal ma tz'ajben nbiye tu'n tu'n tbinchante jun binchben nim tipumal, mlay bant tu'n tyolin naj mya ba'n wi'je. 40Porque alcyeju minti' in k'ojl ki'j, axtzun kuc'ilju. 41Ex alcye jun xjal ma tzaj k'onte jun vas a' cyeye tu'nju ocslal keye wi'je, akine Crist, ax toc cxel nma'ne cyeye, ctzajel k'o'n jun oyaj te ti'j jlu.

Aju tolsabl tu'n kcub tz'ak tuj il

Matey 18.6-9; Lucas 17.1-2

42Ka at jun xjal ma cub tz'ak jun tal ch'in tu'n tuj il, aju cyxol keju ocslal wi'je, mas ba'n tu'n toc c'alet jun ma tij cya' ti'j tkul xjal ex tu'n tcu'x xo't tuj mar. 43Ka tu'n tk'aba cbel tz'aka tuj il, tx'emin ela, porque mas ba'n tu'n tocxa tuj cya'j ẍtunca, ex mya tu'n t-xi'ya tuj infierni tuc'il cabe tk'aba, jatum ta' k'ak' mlay bant tyupit. 44[Atzun minti' in che cyim ke ẍuk' in che wa'n ti'j cychibjal cyimni, ex atzun mlayx yupj k'ak'.] 45Ex ka tu'n tkana cbel tz'aka tuj il, tx'emin ela; porque mas ba'n tu'n tocxa tuj cya'j coxa, ex mya tu'n t-xi xo'na tuj infierni tuc'il cabe tkana tuj k'ak' mlay bant tyupit. 46[Atzun minti' in che cyim ke ẍuk' in che wa'n ti'j cychibjal cyimni, ex atzun mlayx yupj k'ak'.] 47Ex ka tu'n tbak' twitza cbel tz'aka tuj il, k'i'metza; porque mas ba'n tu'n tocxa tuj tcawbil Dios tuj cya'j junx tbak' twitza, ex mya tu'n t-xi xo'na tuj infierni tuc'il cabe tbak' twitza. 48Atzun minti' in che cyim ke ẍuk' in che wa'n ti'j cychibjal cyimni, ex atzun mlayx yupj k'ak'.

49Porque cycyakile cbantel cytene tu'nju c'ixc'oj c'ic'ex cyu'ne, mer ic tza'n tuj k'ak' che oquex k'o'ne, [ex tcyakil oyaj in xi k'ot te Dios, il ti'j tu'n toc atz'an ti'j]. 50Ba'n te atz'an; pero ka ma naj ta'w atz'an, ¿alcye cajbel tu'n toctl ta'w? Che ocxe ic tza'n atz'an; tenwt cymojbabl cyibe cyxolxe.

Currently Selected:

Marcos 9: MAMH

Highlight

Copy