Lucas 18
18
Aju techal ti'j ju meba xu'j ex ju jwes
1Ax icx xi tma'n Jesús jun techal cye, tma ka ilxix ti'j tu'n kna'n Dios tcyakil k'ij ex tu'n mi'n kcub numj. 2Ex tma Jesús:
—Attok jun jwes tuj jun tnam, minti' in xob twitz Dios ex minti' tilwi jun xjal te. 3Ax icx at jun meba xu'j tujx ju tnam lu, cucx in xi aj tuc'il jwes tu'n ttzaj bincha'n ti'j tu'n tclet twitz aj k'oj ti'j. 4Atzunte jwes ela' maj minti' xi tbi'n tyol xu'j; pero yajxitl cub t-ximan: Masque minti' in chin xobe twitz Dios ex minti' tilwi jun xjal tuj nwitze, 5pero tu'nju cucx in wulin meba xu'j lu wi'je, cxel nbincha'ne ti'j, tu'ntzun mi'n tultl sicsal weye, chi jwes.
6Xitzun tma'n Kajaw cye t-xnak'tzben:
—Atzun jlu o tma aju jwes mya ba'n. 7¿Yajtzunlo te Dios, mlaypelo tzaj tbi'n cyyol keju sc'o'maj tu'n, akeju in che cubsan twitz k'ijtl ex konic'an? ¿Ex mlaypelo che tzaj tbi'n naj? 8Cxel nma'ne cyeye: Juratlo che tzajel tbi'n. Pero octzun wule juntl maj, akine sc'o'maj kine tu'n Dios tu'n ntene cyuc'il xjal, ¿atxpelo cyocslabl xjal twitz tx'otx'?
Aju techal ti'j jun parisey ex jun peyil pwak
9Ax icx xi tma'n Jesús juntl techal cye junjun xjal, akeju tuj cynabl ka tz'aklxix ke ex nne'l cyic'un ke txkantl. Chi Jesús cyja':
10—At cabe xinak e je'x na'l Dios tuj tja Dios, jun parisey ex jun peyil pwak. 11Aju parisey wa'l tten tej toc ten na'l Dios ex tma cyja': Dios, cxel nk'o'ne chjonte teya porque mya ic kine ic tza'n ke txkantl xjal, elek' ke, mya ba'n ke, aj pajil ke; ex mya ic kine ic tza'n jun peyil pwak lu. 12Cab maj in cub nyo'ne we'yaj tuj seman, ex in xi nk'o'ne tlaji'n teya ti'j tcyakilju in ncamba'ne, chi parisey. 13Atzunte peyil pwak najchak xi we', minti' o tajbe tu'n tjaw tque'yin twitz cya'j, o'cx oc tk'o'n tk'ab ttzi t-xu'c, ex tma cyja': Dios, cuchiwt tu'n ttzaj k'ak'an tc'u'ja wi'je, aj il kine, chi peyil pwak. 14Cxel nma'ne cyeye: Aju peyil pwak lu xi' tja najsa'majtl til; atzunte parisey minti'; porque alcye jun xjal ma jaw tniman tib, c'oquel k'o'n te ch'in; ex alcye ma tz'oc tk'on tib te ch'in, cjawil nimsa'n.
E cub tcy'iwla'n Jesús ke c'wa'l
Matey 19.13-15; Marcos 10.13-16
15Ex tzaj cyi'n xjal ke c'wa'l twitz Jesús tu'n cyoc tmaco'n; tejtzun cyque'yinte ke t-xnak'tzben jlu, e mayet ke xjal cyu'n, akeju e tzaj k'inte cye c'wa'l. 16E tzajtzun ttxco'n Jesús ke t-xnak'tzben, ex tma:
—Cyk'onxe ambil cye c'wa'l tu'n cytzaj wuc'ile ex mi'n che'x cymayo'ne; porque aju tcawbil Dios cyecye xjal akeju nno'c cyk'on cyib ic tza'n ke c'wa'l. 17Ax toc cxel nma'ne cyeye, alcye minti' ma tz'oc ic tza'n jun c'wa'l tu'n t-xi tniman tcawbil Dios, mlay bant tu'n tocx tuj.
Jun cu'xun k'inun in yolin tuc'il Jesús
Matey 19.16-30; Marcos 10.17-31
18At jun nejenel cye xjal xi tkanin te Jesús cyja':
—Xnak'tzal ba'n, ¿ti oc nbincha'ye tu'n ncambanteye chwinklal te jumajx?
19Xi tma'n Jesús te:
—¿Tiku'n in chin oc tk'o'na te ba'n? Mi a'l jun xjal ba'n, o'cxte Dios ba'n. 20Ba'n ke mandamyent tu'na: Mi'n cybinchaye aj pajil; mi'n che biyune; mi'n che elk'ane; mi'n jaw cynic'ane yol ti'j juntl; cynimanxe cymane ex cytxuye, chi tuj Tu'jil.
21Atzunte nejenel xi tma'n:
—Tcyakil jlu o japun wu'ne ntzajlenxe matok c'wa'lx kine.
22Tej tbinte Jesús jlu, xi tma'n te:
—At jun atx taj teya: C'a'yinxa tcyakilju at teya, ex k'onxa cye meba, cteltzun tk'inumabla tuj cya'j; ex tzaja, lpe'ca wi'je.
23Tej tbinte nejenel tcyakil jlu, tzaj nimxix tbis, porque nimtok tk'inumabl at. 24Ex tej tque'yinte Jesús in bisunxix nejenel, tma:
—Cyuw tu'n cyocx tuj tcawbil Dios keju at cyk'inumabl. 25Mas jurat jacu tz'ex jun chej camey tuj toy' jun bak, twitzju tu'n tocx jun k'inun tuj tcawbil Dios.
26Cymatzun keju e binte:
—Ka icju, ¿alcyetzun jacu clet?
27Ex tma Jesús cye:
—Aju mlay bant cyu'n xjal, in bant tu'n Dios.
28Xitzun tma'n Pedro te:
—Tat, quina ko'ye ma cyaj kk'o'ne tcyakilju at keye ex ma ko oc lpe'ye ti'ja.
29Ex tma Jesús cye:
—Ax toc in xi nma'ne cyeye, ka at jun xjal ma cyaj tk'o'n tja, ex ka tman, ex ka ttzic ex ka titz'in, ex ka t-xu'jil, ex ka tc'wa'l, tu'n tlaj tcawbil Dios, 30oc tc'ma' nimxix t-xel tuj tk'ijlalil ja'lo, ex tuj tk'ijlalil tzul oc tc'ma' tchwinklal te jumajx.
In yolin Jesús juntl maj ti'j tcamic
Matey 20.17-19; Marcos 10.32-34
31E je'x tuc'in Jesús keju cablaj t-xnak'tzben cyjunalx ex tma cye:
—Cybintze, ja'lo ko jawix tuj tnam Jerusalén, ex cjapunel tcyakilju tz'ibamaj wi'je cyu'n t-sanjel Dios, akine sc'o'maj kine tu'n Dios tu'n ntene cyuc'il xjal. 32Chin xel k'o'ne tuj cyk'ab stranjer xjal, ex chin oquel xmayine cyu'n, ex chin oquel yaso'ne, ex c'oquel tzuban tuj nwitze. 33Ex nbajlenxi c'ixbisa'ne, chin bel byo'ne cyu'n; pero tuj toxin k'ij chin jawil ank'ine.
34Atzun cye t-xnak'tzben minti' el cynic' ti'j jlu, porque myaxix clar e'la tuj cywitz, ex minti' ex tuj cywi' aju tzaj k'ma'n cye.
Jun xjal moẍ te tnam Jericó banix tu'n Jesús
Matey 20.29-34; Marcos 10.46-52
35Tejtzun tpon lak'e' Jesús ttxa'n tnam Jericó, at jun moẍ k'ukltok ttzi be, in kanin tcotz. 36Tej tbinte moẍ nim xjal in che bet tuj be, xi tkanin cye xjal ti t-xilen jlu. 37Xitzun cyma'n xjal te:
—Tzul Jesús aj Nazaret, che chi.
38Atzunte moẍ jaw sch'in:
—Jesús, Tc'wa'l David, k'ak'antz tc'u'ja wi'je, chi xjal.
39Ex akeju nejni twitz Jesús e oc ten ilil ti'j moẍ tu'n mi'n tk'ajt; atzunte moẍ mas jaw sch'in cyuwxix, ex tma:
—Aya Tc'wa'l David, k'ak'antz tc'u'ja wi'je.
40We'tzun Jesús ex xi tma'n cye xjal tu'n ttzaj k'i'n moẍ. Tejtzun tul lak'e' moẍ, xi tkanin Jesús te:
41—¿Alcye tajbila tu'n nbinchanteye teya?
Atzunte moẍ tma:
—Tat, wajbile tu'n tjaket nwitze.
42Xitzun tma'n Jesús te:
—Ma jaket twitza; tu'nju ma tocslaya ma banixa.
43Jurat jaket twitz moẍ; ex oc lpe' ti'j Jesús ex jaw tnimsa'n tbi Dios; ex cycyakil xjal tej cylonte jlu, xi cyk'o'n chjonte te Dios.
Currently Selected:
Lucas 18: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993
