Lucas 17

Aju tolsabl tu'n kcub tz'ak tuj il

Matey 18.6-7,21-22; Marcos 9.42

1Xitzun tma'n Jesús cye t-xnak'tzben:

—Mlay tzic'x ti'j, atlo cbel k'onte tolsabl tuj cybeye tu'n cycub tz'ake tuj il; pero bec'bil twitz aju xjal cbel k'onte. 2Mas ba'nwtlo tu'n toc c'alet jun ma tij cya' tjak' tkul ex tu'n t-xi xo't tuj mar, ex mya tu'n tcub tz'ak jun tal ch'in tuj il tu'n. 3Ten cycwente cyi'je.

Ka at jun mya ba'n ma tbincha termaniya ti'ja, cawinxa; ex ka ma tz'ajtz ti'j tanmi, najsama til. 4Ka ma tbincha wuk maj mya ba'n ti'ja tuj jun k'ij, ex ka ma tzul tuc'ila wuk maj tuj jun k'ij ex ma tma: Najsama wile, mya ba'n ma nbinchaye ti'ja, ka chi, najsama til.

Nim jacu bant ku'n ka at kocslabl

5Xitzun cyma'n apostl te Kajaw:

—K'ontza mastl kocslable.

6Atzunte Kajaw xi tma'n cye:

—Nokwit at cyocslable masque nok ch'in ic tza'n jun tal twitz mostaza, jacwitlo txi cyma'ne te tze' lu: Bako'nctz tiba tzalu ex awa'n cu'x tiba tuj mar; ex jaculo txi tniman tze' cyyole.

Tza'n tten tu'n tajben jun majen

7Ic tza'n cyeye ka at jun cymajene in ch'oquin ex ka in cwentin wacẍ tuj cojbil, oc tajtz meltz'aj cymajene ex oc tul ja, ¿jacupe txi cyma'ne te: Toctza ex ke'cuya tu'n twa'na? 8Mlay txi cyma'ne icju, o'cx cxel cyma'ne: Bincham ttena tu'n tbant nwaye, ex tu'n ttzaj tlak'ba'na; octzun nbaj wa'ne ex oc nbaj c'ane, maxitzun cwa'l teya ex cc'ala, che chiloye te. 9¿Jacupe txi cyk'o'ne chjonte te majen tu'nju otok tbincha aju otok txi cyma'ne te? Tuj nnable mlay. 10Cyja'tzun cxel nma'ne cyeye, oc tbaj bant tcyakil aju otok txi k'ma'n cyeye, cymanxe: Majen ko'ye minti' in bant-xix ku'ne, porque o'cx ma bant ku'ne aju tzaj k'ma'n keye.

Laj xinak at tx'a'c cyi'j aju minti' k'anbil ti'j, e banix tu'n Jesús

11Cyja'tok t-xi' Jesús tuj Jerusalén, ic'x t-xol tx'otx' Samaria tuc'il tx'otx' Galiley. 12Tej tpon tuj jun tal tnam, at laj xinak at tx'a'c cyi'j aju minti' k'anbil ti'j, e tzaj canul ti'j, pero e cub we' najchak, 13ex e jaw sch'in:

—Jesús, Xnak'tzal, k'ak'antz tc'u'ja ki'je, che chi.

14Tejtzun t-xi tque'yin Jesús ke xjal tx'a'c cyi'j, xi tma'n cye:

—Cyxi'ye, ex cyyec'unx cyibe cye pal cye judiy. Ex tej cyja'tok cyxi' tuj be, e banix. 15Tejtzun tna'nte jun cye keju otok che banix, ajtz meltz'aj in sch'in wen, in jaw tnimsa'n tbi Dios. 16Ex cub ẍmeje' t-xe tkan Jesús tejxi tpon tacl tibaj twitz twitz tx'otx', ex xi tk'o'n chjonte te. Ex aju xjal lu, aj Samaria. 17Atzunte Jesús xi tma'n:

—¿Myapetzun laj cybet keju ma che banix? ¿Yajtzun keju belajtl jatumtzun ate' ke? 18¿O'cxpe jun stranjer xjal ma tz'ajtz meltz'aj k'olte chjonte te Dios?

19Ex xi tma'n Jesús te:

—We'ctza ex bet-xa; tu'nju ma tocslaya ma banixa, chi Jesús.

Tza'n tten tzul tcawbil Dios

Matey 24.23-28,36-41

20Xi cykanin parisey te Jesús jtoj ban tul tcawbil Dios; atzunte Jesús xi ttzak'we'n:

—Aju tcawbil Dios mya k'ancha'l oc tul; 21ex mlay cyma xjal: Lu lu, ex ka, max ta' ma chixin, che chiwt; porque aju tcawbil Dios ya at cyxole.

22Xitzun tma'n Jesús cye t-xnak'tzben:

—Tzul tk'ijlalil oc cyajbeye tu'n wule jun k'ij cyuc'ile, akine sc'o'maj kine tu'n Dios tu'n ntene cyuc'il xjal, pero mlay chin cyile. 23Ctzajel cyma'n xjal cyeye: Lu at tzalu, ex ka, lu ta' ma chixin. Pero mi'n che'xe, ex mi'n che oc lpe'ye cyi'j. 24Porque ic tza'n xle'laj cya'j in jaw koptz'aj t-xe cya'j ex in pon tuj juntl pac', ictzun tten tk'ijlalil oc wule juntl maj, akine sc'o'maj kine tu'n Dios tu'n ntene cyuc'il xjal. 25Pero tnejel ilxix ti'j tu'n tic'x nimcu wu'ne, ex tu'n wel ic'une cyu'n xjal ate' tuj tk'ijlalil ja'lo. 26Ic tza'n o baj tuj tk'ijlalil tej tten Noé, ax icxtzun cbajel tuj tk'ijlalil oc wule, akine sc'o'maj kine tu'n Dios tu'n ntene cyuc'il xjal. 27In che wa'n xjal ex in che c'an; in cnet cyxu'jil xinak ex in cnet cychmil xu'j, ex cucx in cybincha'n xjal jlu tej tocx Noé tuj barc; tzajtzun k'ekab ex e baj naj cycyakil. 28Ax icxtzun o baj tuj tk'ijlalil tej tten Lot; in che wa'n xjal ex in che c'an, in che lak'on ex in che c'ayin, in che awan ex in che binchan cyja; 29pero ax k'ij tej tetz Lot tuj tnam Sodoma tzaj k'ak' tuj cya'j tuc'ix tal abj azufre, ex e baj naj cycyakil. 30Ictzun cbajel tuj k'ij oc wule juntl maj, akine sc'o'maj kine tu'n Dios tu'n ntene cyuc'il xjal.

31Tuj k'ij oc wule, ka at jun xjal tjax twi' tja, mi'n cu'tz k'ilte aju at te tuj tja; ex ka at jun xjal ta' tuj cojbil, ax icx mi'n tz'ajtz meltz'aj tja. 32Cyna'ntze ti o baj ti'j t-xu'jil Lot. 33Alcye jun xjal o'cx toc tc'u'j ti'j tu'n tten tchwinklal twitz tx'otx', mlay tcamba aju chwinklal in tzaj tk'o'n Dios; ex alcye jun xjal tk'on tib tu'n tnaj tchwinklal twitz tx'otx', oc tcamba' aju chwinklal in tzaj tk'o'n Dios.

34Cxel nma'ne cyeye, cabe xjal in che tan twi' junx watbil tuj konic'an oc wule; jun cxel k'i'n, ex jun cyjel k'o'n. 35Cabe xu'j in che che'n junx; jun cxel k'i'n, ex jun cyjel k'o'n. 36[Cabe xinak in che ak'nan tuj cojbil; jun cxel k'i'n, ex jun cyjel k'o'n.]

37Atzun cye xnak'tzben xi cykanin:

—¿Jatum cbajel jlu, Tat?

Xi ttzak'we'n Jesús:

—Jatum ta' t-ximlal cyimni, atzun che chmetel ke c'utz, chi Jesús.

Currently Selected:

Lucas 17: MAMH

Highlight

Copy