Lucas 16

Aju techal ti'j ju mayordom mya ba'n

1Ax icx xi tma'ntl Jesús cye t-xnak'tzben:

—Attok jun xinak k'inun at jun tmayordom, ex e pon xjal k'malte te cyja': Aju tmayordoma nok in baj tnajsa'n tpwaka, che chi. 2Atzunte patrón txquet mayordom tu'n ex xi tma'n te: ¿Ti tten jlu in nbi'ne ti'ja? Yec'untz tak'unbena, porque mlay tentla te nmayordome. 3Atzunte mayordom oc ten ximal ti'j: ¿Ti oc nbincha'ye? Porque c'elel ti'n npatrone wak'une tu'n mi'n ntentle te tmayordom. Minti' wipune tu'n wak'nane ti'j tx'otx', ex cye chin ch'ixwiye tu'n nxi'ye mo'l. 4Ba'n wu'ne ti oc nbincha'ye tu'ntzun nc'mete cyu'n xjal tuj cyja oc welk'i'ne ti'j wak'une. 5E tzajtzun ttxco'n teyle junjun keju at cyc'as tuc'il tpatrón, ex xi tma'n teju tnejel: ¿Jte' tc'asa at tuc'il npatrone? 6Atzunte xjal tzaj tma'n: Jun syent barril aseyt nc'ase. Xitzun tma'n mayordom te: Lu u'j lu jatum tz'iban tc'asa; juratx kecuya ex tz'iban cu'xa o'cx 50. 7Ex xi tma'n te juntl: ¿Yajtzun teya, jte' tc'asa? Atzunte xjal tzaj tma'n: Jun syent caja triw. Xitzun tma'n mayordom te: Lu u'j lu jatum tz'iban tc'asa; tz'iban cu'xa o'cx 80, chi mayordom. 8Cyja'tzun xi tma'n patrón; Aju mayordom lu mya ba'n pero list, porque at tnabl tu'n tbinchante jlu, chi patrón. Porque ke xjal mya ocslal ate' tuj tk'ijlalil ja'lo mas at cynabl cyxolx cywitz ke ocslal ate' tuj spic'un.

9Cyja'tzun cxel nma'ne cyeye, tz'oc tililx cyu'ne tu'n cychmet cyamiwoye tu'nju k'inumabl at twitz tx'otx', tu'ntzun cyc'monjtze tuj najbil te jumajx oc tcub baj aju at cyeye.

10Alcye in japunxix tu'n tuj ch'in, ax icx tuj nimxix in japun tu'n; ex alcye minti' in japunxix tu'n tuj ch'in, ax icx tuj nim mlay japun tu'n. 11Katzun minti' xjapunxix cyu'ne ti'j ju k'inumabl mya ba'n, ¿alcyetzun tzul k'onte cyeye jun k'inumabl axix toc? 12Ex ka minti' ma che ele cumplid ti'j ju ma tzaj okxenan cyeye tu'n juntl, ¿alcyetzun tzul k'onte cyeye aju cyexe?

13Mi jun majen jacu bant tajben te cabe patrón; porque c'elel tic'un xjal jun patrón, atzun juntl oc tc'ujla'; ex ka o'cx oc tk'a' tib te jun patrón, atzun te juntl minti' taj ti'j. Mlayx bant tu'n cyajbene te Dios ex te k'inumabl.

14Ax icx in che bin ke parisey ti'j ju yol lu, ex e oc ten xmayil ti'j Jesús, porque atzun tocxix cyc'u'j ti'j k'inumabl. 15Xitzun tma'n Jesús cye:

—Akeye in cyyec'un cyibe cywitz xjal ic tza'n tz'aklxix keye, pero ojtzki'n tu'n Dios aju at tuj cyanmiye; porque alcye keju ma' cyoclen tuj cywitz xjal, ic'un ke tu'n Dios.

Aju tley Moisés ex aju tcawbil Dios

16Na'nxtok tul Juan, o'cx tley Moisés at cyuc'ile ex cyyol t-sanjel Dios. Atzun ja'lo tzajni ti'j Juan, in pacbanjtz tkanil ba'n ti'j tcawbil Dios, ex cycyakil xjal in cyipuman cyib tu'n cyocx tuj.

17Mas jurat jacu naj cya'j ex tx'otx' twitz tu'n tnaj jun tal letr te ley ka minti' ma japun.

In tk'o'n Jesús xnak'tzbil tu'n mi'n tcub tpa'n tib xjal tuc'il t-xu'jil

Matey 19.1-12; Marcos 10.1-12

18Ka at jun xinak ma cub tpa'n tib tuc'il t-xu'jil, ex ka ma moje' tuc'il juntl xu'j, in tbincha'n aj pajil; ex alcye jun xinak ma moje' tuc'il ju xu'j otok cub tpa'n tib tuc'il tchmil, ax icx in tbincha'n aj pajil.

Aju xjal k'inun ex Lázaro

19Attok jun xjal k'inun nno'c t-xbalumin tib tu'n xbalun tbanilxix ex wi'yilxix, ex tcyakil k'ij in ic'san nink'ij ex nintz wa'n. 20Ax icx at jun xjal mebaxix, Lázaro tbi, nim tx'a'c ti'j, ex tx'ayl twitz tx'otx' ttzi tja k'inun. 21Ex o tajbe Lázaro tu'n tnoj tc'u'j tu'n tbuchil wabj nne'l tz'ak ttxa'n tmes k'inun; ex in che ul ke tx'yan lek'al twitz tx'a'c toc ti'j. 22Cyimtzun te Lázaro ex xi k'i'n cyu'n anjel tu'n tpon ttxlaj Abraham. Ax icx o cyim te k'inun ex cu'x maku'n. 23Ex tej tyajlanjtz k'inun tuj cynajbil cyimni, jaw tque'yin twitz ex o til k'inun, lu Abraham najchak ta' tuc'ix Lázaro toc ttxlaj. 24Tzajtzun sch'in k'inun chi cyja': Nman Abraham, k'ak'antz tc'u'ja wi'je, samantza Lázaro ex mu'ntz twi' tal tk'ab tu'n a' tu'n tchewix wak'e, porque nimxix in chin c'ixbisanjtze tuj k'ak' tzalu, chi k'inun. 25Xitzun tma'n Abraham te: Nc'wa'l, na'ntza, tej na'nxtok tcyima tuj tzalajbil o tena; atzunte Lázaro tuj bis o ten. Atzun ja'lo in k'ukbanjtz tc'u'j Lázaro tzalu, atzun teya in yajlanjtza ma chixin. 26Ex mya o'cx jlu, ax icx at juntl, at jun matij tkan xak ma' t-xe' tcub kxol; alcye taj tu'n t-xi' tzalu tu'n tpon cyuc'ile, mlay tzic'x; ex mlay tzaj jun xjal cyuc'ile tu'n tul kuc'ile, chi Abraham. 27Atzunte k'inun tzaj tma'n: Nman Abraham, chin cubsale twitza tu'n t-xi t-sama'na Lázaro ma tja nmane, 28porque ate' jwe' wermaniye; ba'n tu'n tyolin Lázaro cyuc'il, tu'ntzun mi'n cyul tuj lugar tzalu te c'ixbisabl, chi k'inun. 29Pero xi tma'n Abraham te k'inun: At tley Moisés cyuc'il tuc'ix cyu'jil t-sanjel Dios; ba'n tu'n t-xi cybi'n. 30Atzunte k'inun tzaj tma'n: Mlay nman Abraham; pero ka at jun cyxol cyimni ma txi' yolil cyuc'il, c'ajetz ti'j cyanmi. 31Atzunte Abraham xi tma'n te: Ka minti' in cub cybi'n aju in tma'n tuj tley Moisés ex tuj cyu'jil t-sanjel Dios, ax icx mlay txi cyocsla'n tyol jun xjal ka ma jaw ank'in cyxol cyimni, chi Abraham.

Currently Selected:

Lucas 16: MAMH

Highlight

Copy